¿Chifwajte wichi toj yen lhometa Heowa toj letafwelej? Nʼalej toj iche iyhaj toj iwhaye hawʼet, wok hope atʼunfwas toj ihi achumet, wok toj ihi nʼochufwenyajwʼet; nʼalej toj iche pʼante lewhay che olhamel ofwel amho mʼayhay toj ihi Biblia. ¿Atsi toj ohopehen, wet atsi toj tamenej toj olhamel ofwenho wichi mʼayhay toj otʼekhachʼoye?

Ohopehen wichi toj malhyej at iwoye iyhaj. Toj ihi olhamel, iche wichi toj wʼenhahiche mʼayhay toj iyej pʼante wet iche iyhaj toj pʼalitses wet iyhaj toj hiwʼen mʼak. Iche iyhaj toj ihi pʼante elh religión, wet iyhaj toj tʼekhahiyetʼa pʼante Dios. Tej toj malhyejtso, toj kamaj nichataye toj hope elh wichi toj yen lhometa Heowa, nilhokej olhamel otiyej kanhi iyhaj mʼayhay hopkhilak matche toj otetshan mʼayhay toj Dios Lhomtes lechufwenyajay (Apóstoles Lhenhay 17:11). Olhamel otchumla mʼayhay toj olhaichufwenej wet toj paj weihalhapej ikalelhat mʼak toj iwohiyela: nʼokwiyej Heowa Dios.

Olhamel olhahiʼisyenej toj olhaichufwenej Biblia. Malhyej iwoye nilhokej wichi toj iʼpe honhat, olhamel owitʼayhyajay ihi wet okʼefwhayajay ihi. Mat olhamel olhaikhajyenejen toj owoye mʼayhay toj matchehen toj ihi Biblia ifwalapej. Toj isej tajtso olhamel oyen kajyaja mʼayhay toj olhamel owʼen, matche toj isen okeyis inuʼpe lewhay toj pajche, isen mʼayhay toj olhamel olate toj tum nʼoyehen (Salmo 128:1, 2). Hop tajtso elh mʼak toj tamenej toj olhamel ofwenho wichi mʼayhay toj isis toj olhaichufwenejen toj ihi Biblia.

Olhamel owoye mʼayhay toj isen toj Dios ichufwen nʼoyejen. Mʼayhayna toj isen, toj Dios Lhomtes lechufwenyajay, hop toj tamenej toj oisen. Hate ikhajyen nʼoyejen toj olhamel oyen tichunhayaja toj iyhaj wichi lahal ihi wet toj ohopehen wichi toj is alhoho mʼak toj iwoye wet pʼaltsentses. Tachʼot nʼoyehen hopkhilak isen otichunhayajay wet owoye ochumtes hopkhilak oiyhaj isej. Hate mʼayhayna tachʼote che lhahipʼajtitwek nilhokej wichi toj lewʼet lheley ihi wet iwoye mʼayhay toj ipayne lhamel toj hope mʼak toj is alhoho. Olhamel kalelhaj nʼohohen toj ohanej toj «Dios hiwʼawlhatejchä lehumnhayaj tä itiyej wichi». Hop toj tamenej toj matche tʼat toj, tej toj olhamel oihiche wʼenhahiche honhatil ohopehen wichi toj lhalepunfwas, ihichetʼa che hiwʼenhat nʼohen toj owʼenhahiche. Tej toj ohopehen wichi toj wʼet mʼayhayhas tʼat, olhamel oihi nʼoka wichi toj malhnhiyejtʼa iwoye iyhaj (Apóstoles Lhenhay 4:13; 10:34, 35).

• ¿Atsi mʼayhay toj inamejen toj malhyej iwoye iyhaj wichi?

• ¿Atsi mʼayhay toj isen toj nalechufwenejen toj talho Biblia?

Wujpe wichi toj fwetaj wichi toj yen lhometa Heowa ohopehen religión toj nechʼe. Mat, dos mil setecientos nekchomis toj tafwaytshi, wichi toj Dios toj weihalha lhayʼe toj matche lakawos nʼoyen pʼante lheya «iyhäj tä hiwʼenpe» mʼayhay toj Dios iwoye wet yen lhometa Lham (Isaías 43:10-12; Marcos 13:9). Pajtha nichate nekchom 1931 toj wichi itafwelej olhamel olhey toj hope Wichi toj lhaichufwenej Dios Lhomtes. ¿Atsi toj tamenej toj olhamel okalelhat toj is che olhamel olhey wichi toj yen lhometa Heowa?

Hop toj itafwnhatej wichi atsi toj hope elh toj olhamel oka Dios. Dios lhey, Heowa, miles toj yachajopej toj ihi Biblia, malhyej toj nʼolesaynhay toj pajche inʼalit. Lewhay toj wichi ithate iyhaj nʼolhomtes hop Biblia, nʼolheyna nʼothatho lewʼet nʼolhomtes toj inʼalit atsi toj hope nʼoelh, malhyej Lhawuk, Dios wok Nʼilataj. Mat, toj ihi nʼolhomtes toj lhamenya, Dios toj matche lhaitafwnhatej pʼante Moisés, ifwenho tʼat lhey toj hope Heowa. Toj paj ifwenho pʼante Moisés toj yok «häp täjtso olhey tä nittäya» (Éxodo 3:15).Toj malhyejtso ikalelhat pʼante toj malhnhiyejtʼa iwoye iyhaj dioses toj kamatachehen. Olhamel matche toj oyen kajyaja toj inʼoyejen Dios lhey toj nʼotʼamajchet.

Hop toj inʼalit olhamel ochumet. Talhe tʼat Abel hinʼu toj is pʼante, wujpe wichi toj tʼekhaye pʼante Heowa wet yen lhometa tajtso. Toj yiklhatshi lewhayistso, iche iyhaj wichi toj malhyej Noé, Abrahán, Sara, Moisés wet David, toj lhaihute «wujpey wichi pʼante tä hinʼälit lechayaj» wet iwo lhometa (Hebreos 11:4–12:1). Che am nʼosujkanej ame mʼak toj kamatache, ihichela akalayʼi toj yomlhi atape. Malhyej iwoye, olhamel kalelhaj toj oyenla lhometa mʼak toj matche toj iyejla Heowa.

Hop toj olhamel oten Jesús. Dios Lhomtes yome toj Jesús hope «Dios kasilätwo [wok «elh wichi toj yen lhometa Lham», TNM] tä afwtintsaj lhäyʼe tä matche» (Apocalipsis 3:14). Lham toj yome pʼante toj itafwnhatej wichi hop Lajcha lhey wet name pʼante honhat hopkhilak yen lhometa «mʼak tä häpe mʼak tä matche» (Juan 17:26; 18:37). Hop toj tamenej toj, lechufwenkay toj matchehen is che ichumyenlhi Heowa lhey wet ifwenhomche iyhaj wichi. Hop tajtso toj wichi toj yen lhometa Heowa olhaikhajyenejen toj owoye.

• ¿Atsi toj tamenej toj nemhit olhamel olhey wichi toj lhaichufwenejen Dios Lhomtes, mat athana nechʼe hope wichi toj yen lhometa Heowa?

• ¿Atsi lewhay toj talhe toj iche pʼante Heowa lakawos toj hiwʼenpe mʼak toj iwoye wet yen lhometa Lham toj iʼpe honhatna?

• ¿Atsi pʼante elh toj matche toj yen lhometa Heowa toj iʼpe honhatna?

Biblia pajche pʼante yome toj che tafwaytshi toj Jesús yʼil inuhikwephala nʼochufwenyajwos toj kamatachehen toj ihi Cristo lakawos toj ichun wet iwitʼayen mʼak toj matche toj ihi Dios Lhomtes (Apóstoles Lhenhay 20:29, 30). Tajtso nʼal pʼante tʼat: lhamel ilhahtej Jesús lechufwenyajay hop religiones lechufwenyajay toj kamatachehen, wet iwo tesa toj iche Cristo lakawos toj akantses (2 Timoteo 4:3, 4). Toj malhyejtso, ¿ha iwoyek namel nahanej toj is alhoho toj natafwelche nʼochufwenyajay toj ihi Dios Lhomtes ifwalasna?

Nichate lewhay hopkhilak Heowa inʼalit mʼak toj matche. Dios yome pʼante toj ifwala toj lepes «hinʼol tä ahantses lhamenlak nitäfwelej» lhamet (Daniel 12:9, 10). Toj nekchom 1870, hop wichifwas toj nitakwitʼa toj tʼukwe pʼante mʼak toj matche, itafwelej pʼante toj wujpe mʼayhay toj iglesias yen lechufwenyaja talhihotʼa Biblia. Tajtso ichaje pʼante lhamel toj itetshanchʼoye Biblia lechufwenyajay toj ichun wet Heowa ikapfwayeje pʼante lechʼotyaj yamlek lhamel itafwelche.

Hinʼul toj lehusey ihiche toj tʼamajej pʼante toj lhaichufwenej Biblia. Wichitso toj lhaichufwenejen Dios Lhomtes, toj lewhaytso wichi yen lheya wichi toj yen lhometa Heowa, itetshan pʼante weihalhapej nʼochufwenyajay toj talho Biblia. Malhyej iwoye toj ifwalasna olhamel ohanlhi. Lewhay toj lhamel tajpe versículo toj atha, tʼukwe iyhaj versículos toj iwoyek tachʼote hopkhilak itafwelche, wet toj kalelhaj mʼak toj ihanej toj ihi versículo lechufwenyaj toj yiwtejla nilhok mʼak toj ihi Dios Lhomtes, lhamel ilesayen. Toj malhyejtso, Biblia lham tʼat toj inʼalit mʼak toj lechufwenyaj. Hop toj tamenej toj yachajo pʼante toj nʼal mʼak toj matche toj hope Dios lhey wet Leniyatyaj, lenechʼethayaj toj iwatlak itiyej wichi wet honhat, mʼak toj iyej wichi toj yʼinhen wet toj iwoyek yachajo toj ilayhiche. Mʼayhay toj lhamel itetshanchʼoye tachʼote pʼante toj ileyej toj imatiche wet iwoye wujpe mʼayhay toj niʼisache alhoho (Juan 8:31, 32).

Nekchom 1879 lhamel ihanej toj nichate tʼat lewhay toj is che nʼoyen silotyaja mʼak toj matche yamlek nilhokej wichi itafwelej. Hope tʼat nekchomtso toj iwo tesa toj yenlhi revista toj ichun toj pajtha ifwalasna olhamel owʼenhomche wichi: La Atalaya. Anunciando el Reino de Jehová. Athana olhamel ofwenhomche wichi toj ihi 240 honhatil wet iche 750 nʼolhomtes toj wʼenhahiche hop mʼayhay toj matchehen toj ihi Biblia. ¡Athana mʼak toj matche nichate lhipey toj matche toj atosehen!

• ¿Atsi pʼante mʼak toj iyej mʼak toj matche toj ihi Dios Lhomtes toj tafwaytshi toj Jesús yʼil?

• ¿Atsi mʼak toj olhamel owoye pʼante hopkhilak mʼak toj matche toj ihi Dios Lhomtes yachajo toj nʼal?

Wujpe nekchomis toj tafwaytshi, wichi toj yen lhometa Heowa, otihi papel, ochumyenlhi wet owʼenhomche wichi Biblias toj wʼenhahiche. Mat toj paj, olhamel owʼen toj Biblia is che yachajo toj nʼothate elh nʼolhomet toj ihi toj talhe nʼolesaynhay toj lhamenya. Isej tajtso wichi iwoyek athahitʼa toj «nitäfwelej [Dios] lhämet tä matche» malhyej toj lham lenechʼethayaj (1 Timoteo 2:3, 4). Toj nekchom 1950, olhamel owo tesa toj oyenlhi lhipey hop olhamel oka Biblia toj hope Traducción del Nuevo Mundo toj ichumyenlhi nʼolhomtes toj wichi lhomtes ifwalasna. Toj ichun hope pʼante inglés lhomtes. Bibliana inuʼpe 130 nʼolhomtes toj wʼenhahiche toj nʼothate wet tajo lewʼet nʼolhomtes toj ihi.

Nʼowatpʼantehla Biblia toj athahitʼa che wichi itafwelche. Nʼolhomtes iwoyek iwo iyhaja toj tafwaytshi wujpe nekchomis, wet wujpe Biblias toj iche nʼolhomtes toj ihi toj nʼotafwenhichetʼa wok nemhit nʼochumyenwetha. Hate nʼotajpe nʼolesaynhay toj ihi Biblia, toj lewhay toj nʼoyenlhi pʼante atofwiyetʼahla iyhaj nʼolhomtes toj lhamenya wet matche toj tajo lewʼet. Isej tajtso tʼaytshi toj nʼotafwelchehen nʼolhomtes toj nʼolesayneji pʼante Biblia toj hope hebreo, arameo wet griego.

Nʼowatpʼantehla Biblia toj nʼothate nʼolhomtes toj ihanlhi Dios Lhomtes. Wichi toj is che iwo iyhaja nʼolhomtes toj ihi Biblia, isitʼa che yen wʼet mʼayeka, tsi hope tʼat Dios leyalh. Is che ihanlhi nʼolhomtes toj lhamenya. Mat, wujpe Biblias nʼothathihotʼa Dios lhey toj hope Heowa.

Nʼowatpʼantehla Biblia toj iwujyen Heowa lhey. (2 Samuel 23:2). Toj ihi Traducción del Nuevo Mundo, Heowa lhey nʼoyachajo lewʼet toj ihi versículos toj inuʼpe siete mil toj yachajopej toj ihi nʼolesaynhay toj pajche toj lhamenya, malhyej toj ihi toj tumcha toj nʼonʼalit (Salmo 83:18, TNM). Bibliana hop toj talho nʼochumet toj wujpe nekchomis toj nʼotʼamejej toj nʼotetshanchʼoye mʼayhay toj ihi, iwoyek nʼoelh che iyahyen yen kajyaja, tsi kalemlhajfwaj toj yome Dios letichunhayajay. Che lewʼen Bibliatso wok lewʼenhitʼa toj amtes, olhamel oaikhajyen hopkhilak lewʼen akey toj leyahyen Heowa lhomtes nilhok ifwalas (Josué 1:8; Salmo 1:2, 3).

• ¿Atsi toj tamenej toj olhamel owʼen toj owatla Biblia toj yachajo toj nʼothate elh nʼolhomtes?

• ¿Atsi lakey toj is, toj is che iti lhamej nilhokej wichi toj iwatlak ihanej atsi toj hope Dios lenechʼethayaj?