Toj ihi olhamel oka wichi toj kalelhajcha, ihichetʼa hinʼul toj nʼochufwenyajwos che inuʼpe iyhaj wet nʼowʼenhihotʼa chinaj tʼoj. Mat hatet iwoye Dios kawos toj iche pʼante toj tafwaytshi toj Jesús yʼil, iche hinʼul toj ihanej iwoyneje «yämlek [tʼuyehen] wichi tä Dios yen lelesa» (Apóstoles Lhenhay 20:28). Hinʼulna toj tʼuyehen lepunfwas, matche toj ise Dios, itetshan congregación, khitʼa toj ‹wʼet lhainityenej tʼat tä iwoye, wok iwoye häp tä iwatlak ikalhi chinaj tʼäj mat is tä wuj tä humin lechumetna› (1 Pedro 5:1-3). ¿Atsi lechumtes toj iwoyej namehen?

Tʼu namehen. Hinʼul toj tʼuyehen lepunfwas, inuhyenkwe lhip toj is che inukwe hop congregación wet tʼuye che ise Dios. Lhamel ihanej toj Dios toj yen lewoya lechumetna toj matche toj laha ihi, inityenhitʼa nʼoyejen che olhamel oyen tichunhayaja toj lenʼohyaj wuj toj laha ihi, mat tachʼot nʼoyehen hopkhilak oisen wet okajyaj ihi (2 Corintios 1:24). Malhyej iwoye tsonʼataswo toj matche toj tʼamajej toj tʼuye weihalhapej lelay tsonʼatas, olhamel opunfwas toj tʼu nʼoyehen yen lelhakliya che itafwelej weihalhapej Dios lelay toj ihi congregación (Proverbios 27:23).

Ichufwen nʼoyejen toj olhamel owoye Dios lenechʼethayaj. Semanapej olhamel opunfwas toj tʼu nʼoyehen, lhamel ihi toj olhamel ottache lewhay toj olhaihutwek hopkhilak ikhajyen olhamel otʼekhahyaj (Apóstoles Lhenhay 15:32). Lewhay toj olhamel owo lhometa, hinʼulna toj lhaikhajyenejpe iyhaj, inuhyen nʼokwehen lhip toj is che olhamel onukwe toj owo silotyaja wet ichufwen nʼoyejen wujpe lenʼayij toj olhamel owoye ochumetna.

Ikhajyen weihalhapej olhamel. Hopkhilak olhamel owʼen mʼayhay toj weihalhapej olhamel owatla hopkhilak oise Heowa, lhamel tʼisiyak nʼoyehen toj oihiche owʼet wet tahuy nʼoyejen toj ihi wichi toj yen lhometa Heowa Lewʼet. Hiwʼen nʼohohen lechʼotyaj wet ikhajyen nʼohen, ichumyenlhi tʼat Dios Lhomtes (Santiago 5:14, 15).

Nitakw iyhaj hinʼul toj tʼu nʼoyehen iwoye wujpe mʼayhay toj ihi congregación, hate hiwʼen lechumtes wet lewʼet lheley toj is che tʼuye wet itetshan. Olhamel opunfwastso toj matche toj tachumwetha tʼuhawetej toj is che nenhitʼa wʼet mʼayeka (1 Tesalonicenses 5:12, 13).

• ¿Atsi lechumtes toj iwoye hinʼul toj tʼuye congregación?

• ¿Chi malhyej toj inʼalit toj yen lelhakliya weihalhapej olhamel?

Dios Lhomtes yome toj iche lhapunfwas toj wʼenha lhamej lechumtes toj ihi congregación: hop «hinʼul toj tʼuyehen lhapunfwas» wet «lechʼotfwas» (Filipenses 1:1, TNM) Weihalhapej congregaciones toj iche, wujpe iyhaj lhapunfwasna toj ihi. ¿Atsi lechumtes toj iwoye hinʼul toj tʼuyehen lhapunfwas lechʼotfwas?

Tachʼote hinʼul toj tʼuyehen lhapunfwas toj iwek toj tachumwetha. Hinʼul toj tʼuyehen lhapunfwas lechʼotfwas matche toj ise Dios, hopehen wichi toj iwoyek nʼotʼekhaye toj lhamel tʼamajej toj iwoye lechumet wet iwoyek hopehen mamses wok iyhaj toj thanhay. Hop hinʼul toj tʼuyehen lhapunfwas yen chumeta toj itetshan wet ichufwen hop lhapunfwas toj ihi congregación. Hop toj tamenej toj hinʼultso tachʼote lhamel hopkhilak iwoyek itetshan tajtso. Toj malhyejtso, lhamel itetshan lechumtes iyhaj toj wʼenha lhamej toj laha ihi hopkhilak wakʼalhcha mʼayhay toj ihi congregación.

Iwoye lechumet toj wuj toj laha ihi. Lewhay toj iche reuniones, iche hinʼul toj tʼuyehen lhapunfwas lechʼotfwas toj iwoyek hopehen iyhaj toj iwo wʼeta iyhaj wet tʼamajej toj tachumla toj namhen. Iyhaj itetshan mʼak toj nʼochumyenlhi yamlek nʼolate nʼopak wet nʼotenkay, hiwʼenhomche wichi mʼayhay toj iwoyek nʼoyahyen, itetshan chinaj tʼoj toj ihi congregación wet ifwenho lepunfwas lhip toj is che iwo lhametahi. Hate tachʼote toj tʼuye Wichi toj yen lhometa Heowa Lewʼet wet lepunfwas toj hichʼuthen malhyej toj hinʼul toj tʼuyehen lepunfwas ifwenho lhamel. Lechumet at che hope toj is che iwoye, lhamel lhaikhajyenej toj yam is alhoho toj iwoye hop toj tamenej toj iyhaj yenhitʼa wʼet mʼayeka (1 Timoteo 3:13).

Hopehen hinʼul toj ise Dios toj iwoyek naten. Hop hinʼul toj tʼuyehen lhapunfwas lechʼotfwas nʼotshupyeneje lechumetna hop toj lhamel matche toj ise Dios wet lakeyis lhayʼe lhip toj isen. Lewhay toj ihi toj congregación tatache toj tachʼote toj ichufwen iyhaj, ikhajyen olhamel otʼekhahyaj, toj lhamel iwo lhometa iwoyek oten wet tʼaytshi toj olhamel otʼuhlak owo lhometa. Hate toj lhamel ihumin toj tachʼote hinʼul toj tʼuyehen lhapunfwas toj iwek toj tachumwetha, tʼaytshi toj olhamel okajyaj ihi wet toj olhahipʼajtitwek (Efesios 4:16). Che paj lhamel iwoyek hopehen hinʼul toj tʼuyehen lepunfwas.

• ¿Atsi lakeyis toj is che hiwʼen hinʼul toj nʼoyen nʼochʼotfwasa?

• ¿Atsi lechʼotyaj toj hiwʼenho congregación hop hinʼul toj tʼuyehen lhapunfwas lechʼotfwas hopkhilak wakʼalhcha mʼayhay toj ihi?

Biblia Lhip toj hope Griego Lhomtes yachajopej toj yome hop Bernabé wet apóstol Pablo. Lhamel tʼisiyakepej congregaciones toj iche lewhaytso, hop toj hopehen pʼante hinʼul toj iwopej wʼekyaja hopkhilak tʼuyehen lepunfwas. ¿Atsi toj tamenej pʼante toj iwoye tajtso? Lhamel matche pʼante toj yen lelhakliya toj lepunfwas isen tʼat. Pablo yome pʼante toj matche toj tʼuhlak tʼisiyake lepunfwas hopkhilak hiwʼen che is tʼat pʼiya. Itetshanhitʼa pʼante che nʼayij toj inukwe matche toj atojche toj ihoye lepunfwas hopkhilak ikhajyenhen (Apóstoles Lhenhay 15:36). Hope tʼat tajtso toj inityenej lhapunfwas toj iche athana toj tʼuye wujpe congregaciones.

Namhen hopkhilak ikhajyenhen namel. Hop lhapunfwasna tʼisiyake veinte pʼiya congregaciones wet dos toj yachajopej toj ihi nekchom toj iyej tefwajni semana weihalhapej congregación. Iwoyek matche toj naleʼisyenej mʼayhay toj iyej pʼante lhamel wet lechʼefwas, che hopehen iyhaj toj lechʼefwas ihi. Lhamel hiwʼawlhatcha toj tʼuhlak itafwelej mamses, lhutshay wet wichi toj thanhay, wet matche toj lhamel tʼuhlak yik namchehen toj nawo lhometa wet toj natʼisiyake wichi toj nachufwenej Dios Lhomtes. Hate tʼisiyake iyhaj lepunfwas toj ihiche lewʼet hopkhilak ikhajyenhen lhayʼe hinʼul toj tʼuyehen lepunfwas wet lhamel yome nʼolhomtes toj naikhajyenhen toj is che nʼoyome toj talho Biblia toj ihi reuniones wet iyhaj reuniones toj wus (Apóstoles Lhenhay 15:35).

Yen lelhakliya nilhokej namel. Lhapunfwasna matche toj yen lelhakliya che lepunfwas toj ihi congregación ise Dios. Lhamel lhaihutwek, lhayʼe hinʼul toj tʼuyehen lepunfwas wet lechʼotfwas hopkhilak itetshan chi malhyej toj tʼaytshi mʼayhay toj iwoye pʼante congregación. Hate ifwenho nʼofwonyajay toj tachʼothiyela lhamel lechumtes wet tachʼote hop iyhaj toj hopehen nʼoelh toj ifwoyenche nʼayij toj tʼayhettshi toj is toj iwo lhometa wet ichiyhelit mʼayhay toj lhamel ikalhi toj talho lechumtes. Hate matche toj lhamel yen lekajyaja che itafwelej wichi toj nechʼe toj iwo tesa toj lhayʼe olhamel toj lhaihutwek wet ihanej toj tʼaytshi toj hopehen Dios lakalayʼis. Weihalhapej lhapunfwasna ihumin toj lhaikhajyenejpe iyhaj wet «tachʼote [...] yämthilek [n]amel [n]aisej» (2 Corintios 8:23). Naten lhamel tʼekhahyaj, lehumnhayaj wet tʼifwtihyaj toj itiyej Dios (Hebreos 13:7).

• ¿Atsi mʼak toj tʼuhlak ikalhi hop lhapunfwas toj tʼuyehen wujpe congregaciones toj tʼisiyake iyhaj?

• ¿Atsi mʼak toj iwoyek aleʼisyenej lewhay toj tʼisiyake congregación toj lhehi?

Lewhay che iche honhat wʼahu wok nʼowitʼayhyajay toj matche toj ayteschehen, wichi toj yen lhometa Heowa ikelit toj iwoye mʼayhay toj tachʼoteje lepunfwas toj iwatla lechʼotyaj. Mʼayhaytso toj olhamel owoye inʼalit toj matche toj ohumnhen opunfwas (Juan 13:34, 35; 1 Juan 3:17, 18). ¿Atsi mʼayhay toj olhamel owoye yamlek otchʼote opunfwas?

Othate chinaj tʼoj. Dios kawos toj ihi Antioquía, lhamel ithate pʼante chinaj tʼoj lepunfwas toj ihi Judea lewhay toj iche pʼante nehla toj wuj toj ihi lhiptso (Apóstoles Lhenhay 11:27-30). Malhyej iwoye, toj olhamel ohanej toj iche opunfwas toj ihi lhip elh honhat toj iche lewitʼay wet matche toj iwatla lechʼotyaj, olhamel ochumyenlhi congregación yamlek itathe chinaj tʼoj (2 Corintios 8:13-15).

Othate iyhaj mʼayhay toj lhamel iwatla toj iwoyek isej. Hinʼul toj tʼuyehen lepunfwas toj ihi lhip toj nʼowitʼay ihi, tʼukwe weihalhapej lepunfwa toj ihi congregación wet matche toj itetshan che tafwayej lewitʼay. Iyhaj olhamel opunfwas toj lhayen lewoya toj tachʼote iyhaj, itetshan che kalelhajcha toj nʼowʼenhomche iyhaj nʼolhak, inat wet nʼokay, wet toj is che iche kachawo toj iyahinlhi elh wet iwaklhat iyhaj lewʼet toj iwoyek ihi. Wujpe iyhaj toj ihanej toj iwoye lechumet, lhamel tʼat toj ithatcho laka chinaj tʼoj toj ihoye lhip toj nʼowitʼay ihi hopkhilak iwoye nʼochumtes toj tachʼote iyhaj, inechʼaynhiche Wichi toj yen lhometa Heowa Lewʼet wok iyhaj hupuy. Olhamel olhahipʼajtitwek malhyej toj wichi itafwel nʼoyejen wet toj pajche olhamel ohanej chi malhyej toj oiwek toj ochumwetha, hop toj tamenej toj iwoyek ilafwel toj olhamel onʼalit ochʼotyaj lewhay che iche nʼowitʼay. Tej toj «nem koyhyaj che [o]tchʼote [o]puhfwas», che iwoye hate olhamel otchʼote iyhaj wichi toj wʼenha lhamej laka religión (Gálatas 6:10).

Ochumyenlhi tʼat Biblia yamlek owʼenho ochʼotyaj toj ikhajyenhen lehusey. Mʼak toj matche toj iwatla wichi toj ihi lewitʼay, hope toj is che nʼowo letamsekisa. Lewhaytso, Heowa toj «häpe Dios tä ikhajyenpej ohusey tä olhamel olhakli ihi» hiwʼenhohla lakhajyhayaj (2 Corintios 1:3, 4). Hop toj tamenej toj wichi toj lelhakli ihi olhamel ofwenho mʼayhay toj Biblia yome, toj ikalelhat toj atofwiyetʼa che Dios Niyatyaj itayhthila nilhokej mʼayhay toj ilanhen wichi wet nʼotelaythayaj (Apocalipsis 21:4).

• Lewhay toj iche honhat wʼahu wok nʼowitʼay at che hope, ¿atsi toj tamenej toj wichi toj yen lhometa Heowa olhamel okelit mʼak toj owoye?

• ¿Atsi mʼayhay toj talho Biblia toj iwoyek ikhajyen lehusey toj olhamel owʼenho wichi toj tafwayej lewitʼay?

Toj nichatyaye lewhay che yʼil, Jesús toj tsʼilak toj lhayʼe cuatro laka apóstoles toj yamwetha: Pedro, Santiago, Juan wet Andrés. Lewhay toj yome hop nʼotetnek toj inʼalit toj lham iwohla tesa toj niyatej pele lewhay che lepes, yome pʼante mʼak toj matche toj laha ihi toj yopʼantek: «¿Atsi elh tä häpe nʼokawo tä afwtintsaj wet lehusek ihi? Häpe tʼat elh tä lewuk yen lewoyayej nʼokawos iyhäj tä ihi lewʼet, wet häp ifwalastso tä lewuk newa katsi lham hiwʼenhomchepej lhäk lhamel tä nichäte lewhäy» (Mateo 24:3, 45; Marcos 13:3, 4). Jesús lhomtesna, yomhiyetʼa pʼante nʼolhak toj iwoyek nʼotufw. Lham itechʼaynej pʼante nʼolhak hop nʼotafwnhayaj toj talhe Dios. Hop nʼowuk, ikalelhat toj yenla lewoyayej wichi toj nilhokla lewhay toj hiwʼenhihomchepeja nʼotafwnhayajna lechufwenkay lewhay che lepese. ¿Atsi toj hope nʼokawotso?

Hope wichi toj wujitʼaʼpe toj ihanlhi Jesús toj Dios tatshupiye, ichumyenlhi laka espíritu toj nʼotʼamajchet. Hop «nʼokawo» hopehen Hinʼul toj wujitʼaʼpe toj Itetshan nilhokej wichi toj yen lhometa Heowa laka congregaciones. Lhapunfwasna toj iwek toj tachumwetha hiwʼenhomchepej nʼotafwnhayaj toj talhe Dios iyhaj toj lhayʼe lhamel toj nʼokwiyej Heowa toj nichate lewhay toj nawatla. Namel nawatlak nʼokawotso ‹hiwʼenpej namhomche lhalhak toj nichate lewhay› (Lucas 12:42).

Itetshan Dios lewʼet lheley (1 Timoteo 3:15). Jesús yen pʼante lewoya nʼochumetna toj matche toj laha ihi che itetshan nilhokej Heowa kawos toj kalelhajcha toj ihi honhatna. Lhamel is che tʼuye mʼayhay toj hiwʼen namhomche, itetshan iyhaj toj iwo lhometa wet ichumyenlhi congregaciones yamlek naichufwenhen. Hopkhilak hiwʼen namhomche mʼayhay toj nawatla lewhay toj nawatla, «nʼokawo toj afwtintsaj wet lehusek ihi» hiwʼen namhomche nʼotafwnhayaj toj talhe Dios ichumyenlhi tʼat mʼayhay toj iwoyek nʼoyahyen toj nachumyenwetha toj nawo lhometa wet mʼayhay toj nʼochufwen namejen lewhay toj nalehutwek wet toj ihi reuniones toj wus toj olhamel oyenlhi.

Hop «nʼokawo» afwtintsaj, hop toj nilhok lewhay ihanlhi mʼayhay toj matchehen toj ihi Biblia wet imatitche toj iwoye lechumet toj is che yen lhometa nʼosilotyajay toj isis, wet lehusek ihi hop toj tʼamajej toj itetshan nilhokej mʼayhay toj Cristo tʼupʼantehlak tʼuye (Apóstoles Lhenhay 10:42). Isej Dios lakapfwayaj, tʼaytshipej wichi toj lhayen hopeya wichi toj yen lhometa Heowa wet iwoyek nawʼen wujpe nʼotafwnhayaj toj talhe Lham toj malhyej iwoye nʼolhak (Isaías 60:22; 65:13).

• ¿Atsi elh toj Jesús yen pʼante lewoya hopkhilak hiwʼenho lhak hop lechufwenkay toj hope nʼotafwnhayaj toj talhe Dios?

• ¿Atsi toj tamenej toj Dios Lhomtes yome toj «nʼokawo» hope elh toj afwtintsaj wet lehusek ihi?

Lewhay toj tafwaytshi toj Jesús yʼil pʼante, «apóstoles lhayʼe hinʼul toj tʼuyehen lepunfwas toj ihi Jerusalén», lhaihutpejwek wet hopehen pʼante wichi toj wujitʼaʼpe toj itetshan nilhokej congregaciones (Apóstoles Lhenhay 15:2, TNM). Lhameltso yomlhiʼpe nilhokej wichi toj Dios itshupyene toj ihoye pele toj iche lewhaytso toj ikalelhthen mʼayhay toj matche toj lahal ihi. Hopkhilak nilhokej lhamel wʼawulhcha letichunhayaj lewhay toj is che ikalelhat mʼak toj iwoye, itetshanchʼoye mʼayhay toj ihi Biblia wet tʼukwe che Dios laka espíritu inuhyenkwe lhip toj is che inukwe (Apóstoles Lhenhay 15:25). Hinʼul toj wujitʼaʼpe toj Itetshan nilhokej congregaciones toj iche athana, malhyej at iwoye mʼak toj iwoye.

Dios ichumyenlhi lhamel hopkhilak iwoye lenechʼethayaj. Iyhaj lhapunfwasna toj Dios tatshupiye hopkhilak ihoye pele hopehen Hinʼul toj wujitʼaʼpe toj Itetshan nilhokej congregaciones. Lhamel matche toj yen letichunhayaja Biblia wet ihanej chi malhyej toj iwoye lechumet hopkhilak mʼayhay wakʼalhen wet tʼuhawetej lenʼayij toj nʼokwiyej Dios. Weihalhapej semana lhamel lhaihutwek yamlek itafwelej mʼayhay toj lepunfwas iwatla. Malhyej iwoye lewhayis toj pajche, lhamel hiwʼenhomchepej iyhaj nʼofwonyajay toj talho Biblia. Hop toj tamenej toj ichumyenlhi lhomtes toj ilesayen wok lhapunfwas toj tʼuyehen wujpe congregaciones wet iyhaj lepunfwas. Tajtso tachʼote Dios laka wichi toj wʼawulhcha letichunhayaj wet mʼak toj iwoye (Apóstoles Lhenhay 16:4, 5). Hate iwaklhat mʼayhay toj tachʼot namehen hopkhilak nahanej Dios letafwnhayaj, ikhajyen toj nawo silota Dios Niyatyaj wet lhameltso itetshan chi malhyej toj nʼotshupyene iyhaj lepunfwas toj lhayen lewoya wʼenhahiche nʼochumtes.

Lhamel tʼukwe che Dios laka espíritu inuhyenkwe lhip toj is che inukwe. Hinʼul toj wujitʼaʼpe toj Itetshan nilhokej congregaciones, lhamel tʼukwe che Heowa inuhyenkwe lhip toj is che lhamel inukwe. Lham toj hope Nʼowuk toj inuʼpe mʼak at che hope. Hate lhamel tʼukwe che nʼoelh toj nilhokej Dios lakawos Lhetek toj hope Jesús inuhyenkwe lhip toj is che inukwe (1 Corintios 11:3; Efesios 5:23). Lhameltso yenhitʼa tichunhayaja che lhamel is che ichunla iyhaj wet Dios laka wichi is che ihan lhamel lenʼayij. Mat «ihänlhi tʼat Tsonʼataj Lhäs, lhip chik häpe chik ihoye», malhyej iwoye iyhaj Dios kawos toj Lham itshupyene hopkhilak ihoye pele (Apocalipsis 14:4). Hinʼul toj wujitʼaʼpe toj Itetshan nilhokej congregaciones matche toj hiwʼen namhomche gracias toj nawo tʼalhyajaʼpe lhamel wet lechumtes.

• ¿Atsi pʼante toj hopehen Hinʼul toj wujitʼaʼpe toj Itetshan nilhokej congregaciones toj iche lewhay toj tafwaytshi toj Jesús yʼil?

• ¿Atsi toj lhamel iwoye ifwalasna hopkhilak Dios inuhyenkwe lhip toj is che inukwe?

Betel hope nʼolhamet toj hebreo toj yok «Dios Lewʼet» (Génesis 28:17, 19). Tajtso hope lhey toj tʼuhawetej hop hupuy toj wus toj wichi toj yen lhometa Heowa hiwʼen toj iʼpe nilhok honhat. Lhiptso itetshan wet ikhajyen iyhaj toj iwo lhometa. Hinʼul toj wujitʼaʼpe toj itetshan nilhokej congregaciones, lhamel iwoye lechumet toj ihi Nʼowukwe Betel toj lhamya toj ihi Nueva York (Estados Unidos). Lhiptso itetshan mʼayhay toj iwoye iyhaj nʼowukwey Betel toj ihiche wujpe honhatil iyhaj. Nilhokej lhapunfwas toj ihi lhipeyna toj lhahipʼajtitwek toj tachumwetha, nʼoyen lheya Betel lewʼet lheley. Hatet iwoye nilhokej wichi toj lewʼet lheley ihi toj lhahipʼajtitwek, lhamel tʼekhen, ihi lhiptso, tachumwetha wet lhaichufwenej Dios Lhomtes (Salmo 133:1).

Nʼowʼet toj matche toj isilataj toj wichi toj ihi lhayʼe lhip toj lhaikhajyenej toj iwoye lechumet. Weihalhapej Betel lewʼet lheley, iche hinʼul wet atsinhay toj ihi toj matche toj ise Dios. Lhamel hopehen wichi toj lhayachaje Dios yamlek iwoye lenechʼethayaj nilhok lewhay wet hopkhilak tʼaytshi mʼayhay toj lewuk Dios Niyatyaj (Mateo 6:33). Ihichetʼa elh che hope che nʼowʼenho lakaha, tej toj nʼowʼenho lewʼet yamlek ihi wet lhak, hate nʼochʼote hopkhilak ichaj mʼayhay toj iwatla. Weihalhapej nʼowʼenho lechumet: malhyej toj iche iyhaj toj ichufwi lhip toj nʼochumyenwetha computadoras, lhip toj nʼowaklhat nʼolhak; iyhaj ichufwi lhip toj nʼothatpe nʼolesaynhay papel wok lhip toj nʼotiʼpe libros tʼahes; wet iyhaj tachuma toj ilejchufwi lhipey toj lepunfwas ichufwi toj imahen, lhip toj nʼolej nʼokay, wet lhip toj nʼotʼuye che yikchufwi toj is mʼayhay toj nʼochumyenwetha wet iyhaj nʼochumtes.

Nʼowʼet toj matche toj wuj nʼochumet hopkhilak ikhajyen toj nʼoyen lhometa Dios Niyatyaj. Mʼak toj lhamya toj iwatlak ikalhi weihalhapej nʼowukwe Betel, hope toj ichaje wujpey wichi mʼak toj matche toj talho Biblia. Librofwajna inʼalit tajtso. Hin’ul toj wujit’a’pe toj Itetshan nilhokej congregaciones iyahin toj nʼolesayen pʼante librofwajna. Toj paj librofwajna nʼothate wujpey wichi toj lechumet toj ithate elh nʼolhomet toj iʼpe nilhok honhat, nʼochumyenlhi tʼat computadoras, toj tafwaytshi nʼothatpe nʼolesaynhay papel, nʼochumyenlhi tʼat lecha toj ihi wujpe iyhaj honhatil wet nʼothate inuʼpe 110.000 congregaciones. Weihalhapej lhipeytso, Betel lewʼet lheley lhamel itiyej lechʼotyaj toj laha ihi toj is che nʼokelit nʼochumet toj is che ichunla iyhaj, toj hope toj is che nʼowo silota nʼosilotyaj toj isis (Marcos 13:10).

• ¿Atsi wichi toj tachumwetha toj ihi nʼowukwey Betel, wet atsi mʼayhay toj nʼowʼenhomche?

• ¿Atsi nʼochumet toj is che nʼokelit toj tachʼote mʼayhay toj nʼoyenwetha toj ihi weihalhapej nʼowukwe Betel?

Nilhokej Betel lewʼet lheley iwoye wʼenhahiche lechumtes hopkhilak tachʼote toj nʼowo silota nʼosilotyaj toj isis toj ihi weihalha honhat lhip elh wok inuʼpe. Lhapunfwastso iwoyek tachuma toj ithate iyhaj nʼolhomtes mʼayhay toj iwoyek nʼoyahyen, ithatho nʼolesaynhay papel, iwo tʼahesa libros, ikancha mʼayhay toj iwoyek nʼoyahyen hopkhilak nʼothattshi wok yenlhi mʼayhay toj iwoyek nʼoyahin wet nʼotchʼahuye, wet iyhaj lechumtes.

Hinʼul toj nitakwitʼa toj Itetshan Nʼowukwe Betel iyahin nʼochumtes. Hinʼul toj wujitʼaʼpe toj Itetshan nilhokej congregaciones, hop toj itshupyeneje tres wok inuʼpe Hinʼul toj tʼuyehen lepunfwas toj matche toj ihanej toj iwoye lechumet yamlek hopehen Hinʼul toj nitakwitʼa toj Itetshan weihalha Nʼowukwe Betel. Hinʼultso ifwenho lhamel hop mʼayhay toj tʼaytshi toj isen toj ihi honhat lhip toj lhamel ihi wet nʼowitʼayhyajay toj iwoyek iche. Toj isej tajtso lhamel iwoyek ihanej atsi mʼayhay toj ithathohla hop mʼayhay toj iwoyek nʼoyahyen, hate mʼayhay toj ihihla reuniones wet reuniones toj wus. Ichepej lewhay toj Hinʼu toj nʼochenek toj talhe Hinʼul toj wujitʼaʼpe toj Itetshan nilhokej congregaciones tʼisiyake Nʼowukwey Betel yamlek hiwʼenho lechʼotyaj hop Hinʼul toj nitakwitʼa toj Itetshan hopkhilak is toj iwoye lechumet (Proverbios 11:14). Lewhay toj nam hinʼu toj talhe Betel toj lhamya, iche reunión toj matche toj laha ihi toj lham yome mʼak toj is che nʼoyome toj talho Biblia hopkhilak ikhajyen lepunfwas toj ihi honhat toj Nʼowukwe Betel itetshan.

Nʼotiyej nʼochʼotyaj hop congregaciones. Toj ihi Nʼowukwe Betel, iche lhapunfwas toj nʼoyen lewoya toj lhamel yome che iwoyek iwo tesa iyhaj congregaciones toj nechʼehen. Hate iyahin lechumtes iyhaj toj hopehen nʼoelh toj ifwoyenche nʼayij, nʼoelh toj nʼochene lhip elh honhat hopkhilak iwo lhometa, wet lepunfwas toj tʼuyehen wujpe congregaciones toj itetshan honhat toj lhamel ihi toj iwoye lechumtes. Nʼotetshan atsi mʼayhay toj nʼoyenhilhila toj ihi reuniones toj wus, nʼokancha mʼayhay toj nʼowatla hopkhilak nʼoyenwetha Wichi toj yen lhometa Heowa Lewʼetes wet nʼothate mʼayhay toj iwoyek nʼoyahyen hop congregaciones. Nilhokej mʼayhay toj nʼoyenlhi toj ihi Nʼowukwe Betel tachʼote hopkhilak kalelhajcha toj nʼowo silota nʼosilotyaj toj isen (1 Corintios 14:33, 40).

• ¿Atsi mʼayhay toj iwoye toj Hinʼul toj nitakwitʼa toj Itetshan Nʼowukwe Betel tachʼote Hinʼul toj wujitʼaʼpe toj Itetshan nilhokej congregaciones?

• ¿Atsi nʼochumtes toj nʼoyenlhi toj ihi Nʼowukwe Betel?

Hopkhilak nʼowo silotayej «nilhokej wichi [...] tä wʼenhache lhamejen lhäyʼe tä lhämtes wʼenhahiche» hop nʼosilotyaj toj isis, olhamel oyenlhi mʼayhay toj iwoyek nʼoyahyen toj inuʼpe 750 nʼolhomtes toj wʼenhahiche (Apocalipsis 14:6). ¿Chi malhyej toj olhamel owoye nʼochumetna toj matche toj wuj? Olhamel owʼen wujpe nʼolesaynhaywos toj ihiche honhatil iyhaj toj talhomche wʼenhahiche honhates. Lhameltso wet wujpey wichi toj lhayachaje lechumet toj ithate iyhaj nʼolhomtes hop mʼayhay toj iwoyek nʼoyahyen toj hopehen wichi toj yen lhometa Heowa.

Nʼolhomtes toj ichun toj nʼolesayen hope inglés. Hinʼul toj wujitʼaʼpe toj Itetshan nilhokej congregaciones, iyahin hop Lhip toj ihi toj nʼoyenlhi Nʼolesaynhay toj ihi tʼat nʼowukwe Betel toj lhamya. Toj ihi lhipna itetshan hop nʼolesaynhaywos lechumtes toj ihi wet toj ihi iyhaj nʼowukwey Betel. Toj isej toj olhamel owʼen wichi toj wʼenhahiche, iwoyek oyome mʼayhay toj yʼaje wujpe wichi toj wʼenhache lhamej lakeyis. Hop toj tamenej toj mʼayhay toj olewuhuy toj iwoyek nʼoyahyen, wujpe wichi toj ihi nilhokej honhatil toj ihumin.

Nʼothate nʼolhomtes iyhaj wichi toj is che iwo iyhaja. Lewhay toj nilhok nʼolhomtes nʼolesayen wet nʼowʼen toj is, nʼochumyenlhi computadora toj nʼothate hop wujpe wichi toj iwo iyhaja nʼolhomtes toj ihi toj iʼpe nilhok honhat, wet lhamel toj itetshan toj ithate iyhaj nʼolhomtes. Lhamel ilhakʼalchʼoye che «hiʼisyen alhoho tä ilesayen» nʼolhomtes toj matche toj hope lhomet, hopkhilak tajo lewʼet mʼak toj lhamya toj tʼuhlak yome hop nʼolhomtes toj inglés (Eclesiastés 12:10).

Hop computadoras tachʼote nʼochumet hopkhilak ilafwel. Hop computadora iwohiyetʼak yenlhi hinʼu lechumet toj hope nʼolesaynekwo wok elh toj iwo iyhaja nʼolhomtes. Mat, iwoyek yamhitʼa atha nʼochumet toj nʼoyenlhi, nʼochumyenlhi tʼat computadoras wet libros toj yam kalelhaj mʼak toj yome nʼolhomtes. Hop wichi toj yen lhometa Heowa olhamel oyenlhihte nʼochumetcha toj ihi computadora, Sistema Electrónico de Edición Plurilingüe (toj hate lhey MEPS). Isej tajtso iwoyek nʼolesayen toj ihi computadora wujpey nʼolhomtes toj wʼenhahiche, nʼotiyej nʼolhomtes hop nʼopeykas wet nʼoyam wakʼalh mʼayhay toj is che nʼothatho papel.

¿Atsi toj tamenej toj matche toj olhaikhajyenej toj olhamel othate iyhaj nʼolhomtes wujpey mʼayhay toj iwoyek nʼoyahyen? Hop toj mʼak toj Heowa lenechʼethayaj, hop toj «nilhokej wichi tafwayhen wet nitäfwelej lham lhämet tä matche» (1 Timoteo 2:3, 4).

• ¿Atsi nʼochumtes toj nʼoyenlhi lewhay toj nʼolesayen mʼayhay toj iwoyek nʼoyahyen?

• ¿Atsi toj tamenej toj olhamel othate wujpe iyhaj nʼolhomtes mʼayhaytso?

Nilhokej nekchomis, wichi toj yen lhometa Heowa, olhamel oyenlhi wet owʼenhomche hop wichi millones biblias wet iyhaj mʼayhay toj iwoyek nʼoyahyen. Hate olhamel oyenwetha Wichi toj yen lhometa Heowa Lewʼetes wet nʼowukwey Betel wet olhamel otʼuye. Lhayʼe toj nʼowʼenho mʼayhay toj lhamel iwatla miles olhamel opunfwas toj tachumwetha toj ihi Betel wet iyhaj toj hopehen nʼoelh toj nʼochene elh honhat hopkhilak iwo lhometa, wet olhamel othate nʼochʼotyaj lhipey honhatil toj iche nʼowitʼayhyajay toj matche toj ayteschehen. ¿Atsi lhip toj talhe chinaj tʼoj hopkhilak nʼowo haya nilhok tajtso?

Olhamel onityenhiyejtʼa che wichi tis nʼohen, ichumyenlhi diezmos, ofrendas wet olhamel otʼalhiyetʼa chinaj tʼoj. Tej toj nʼochumet toj olhamel owoye toj owo lhometa is che nʼowo haya wujpe mʼayhay, olhamel otʼalhiyetʼa wichi chinaj tʼoj. Tafwaytshi cien nekchomis, revista toj ihan elh toj ichun La Atalaya yome olhamel oka wichi toj kalelhajcha toj wakʼalh tʼat letichunhayajay toj isiyeja Heowa lechʼotyaj. Yome tʼat wichitso toj yopʼantek: ihichetʼala «che tʼalhwetha, hate tʼalhiyetʼala hinʼul che tachʼote». Tajtso nʼal tʼat toj matche (Mateo 10:8).

Chinaj tʼoj talhe wichi toj tʼuhlak ithatcho. Wujpe wichi toj ihumin olhamel ochumet toj ochufwenej wichi iyhaj Dios lhomtes wet lhamel tʼuhlak ithatcho chinaj tʼoj hopkhilak tachʼote nʼochumetna. Olhamel oyachaje Dios olhamel okhajyhayaj, mʼayhay toj olhamel owʼen wet otiyej kanhi iyhaj mʼayhay hopkhilak owoye lenechʼethayaj toj iʼpe nilhok honhat (1 Crónicas 29:9). Toj ihi wichi toj yen lhometa Heowa Lewʼetes wet lhipey toj ihi toj olhamel oyenwetha reuniones toj wus, iche chinaj tʼoj lehis toj nilhokej wichi iwoyek ithatho. Hate iwoyek n’ochumyenlhi lhip toj ihi internet toj lewuk olhamel jw.org toj n’otatcho chinaj t’oj. Wujpe wichi toj ithatcho chinaj tʼoj hopehen wichi toj hiwʼenhitʼa mʼak, toj malhyej iwoye tesa toj pʼelitsaj toj Jesús iwujyen pʼante, hop toj ithatho pʼante takwfwas chinaj tʼoj toj lhimphaj laha nʼotʼawayhtes lehis toj ihi Dios lewʼet (Lucas 21:1-4). Nʼoelh at che hope iwoyek itiyejpej kanhi lhip chinaj tʼoj toj «häpe tʼat mʼak tä pajche yen tichunhayaja» toj ithatcho (1 Corintios 16:2; 2 Corintios 9:7).

Olhamel okachuhitʼa toj Heowa yikhilatʼatchufwi toj ikhajyen wichi toj tʼuhlak iwujyenejej mʼayhay toj lhamel hiwʼen hopkhilak yikchufwi toj tachʼote nʼochumet toj lewuk Dios Niyatyaj wet toj malhyejtso iwoye lenechʼethayaj (Proverbios 3:9).

• ¿Atsi toj tamenej toj wichi toj yen lhometa Heowa, malhnhiyejtʼa iwoye iyhaj religiones?

• ¿Chi malhyej toj nʼochumyenlhi chinaj tʼoj toj wichi ithatcho?

Lhip toj olhamel oihi toj olhaihutwek hopkhilak onʼokwiyej Dios, olhamel oyen lheya Wichi toj yen lhometa Heowa Lewʼet. Toj ihi lhiptso olhamel otetshan mʼayhay toj talho Biblia toj yome Dios Niyatyaj toj hope pʼante mʼak toj lhamya toj Jesús yen lhometa (Lucas 8:1).

Toj ihi lhip toj ihi hupuytso nʼochumyenlhi toj nʼonʼokwiyej Dios toj matche. Toj ihi lhiptso nʼotetshan toj nʼoyen lhometa nʼosilotyajay toj isis (Mateo 24:14). Wichi toj yen lhometa Heowa Lewʼet iche iyhaj toj wus wet iche iyhaj toj lelemsas wet wʼenhahiche toj nʼoyenlhi, mat nilhokej hupuytso wujitʼa che nʼoyam isis. Wujpe iyhaj iche nitakw congregaciones toj ihi toj lhaihutwek. Lewhayis toj tafwaytshi, olhamel oyenlhi miles hop hupuytso hopkhilak wʼawulhi congregaciones toj tʼaylhatshi. ¿Atsi toj tachʼot nʼoyehen toj okalhi tajtso? (Mateo 19:26).

Nʼoyenwetha hop toj isej chinaj tʼoj toj wichi ithatcho wet weihalha lhip toj ihi toj nʼohutwek. Chinaj tʼoj toj wichi ithatcho nʼothate hop Betel hopkhilak nʼocheyajantej congregaciones, toj tʼalhitʼaʼpe, toj lhamel iwatlak yenlhi Wichi toj yen lhometa Heowa Lewʼet toj nechʼe wok tʼayhettshi toj yam is elh toj pajche lhamel hiwʼen.

Wujpe wichi toj wʼenhahiche toj lenechʼethayaj che tachumwetha toj hiwʼenhitʼa lakaha, lhamel yenwetha hupuytso. Toj ihi wujpe honhatil iche Lhapunfwas toj iwek hopkhilak yenlhi Wichi toj yen lhometa Heowa Lewʼet. Lhamelna toj iwek wet iyhaj toj tachʼote toj nʼoyenlhi, ihoyehen congregaciones toj ihi honhat toj lhamel ihi wet iyhaj toj ihi lhipey toj matche toj atosehla iyhaj hupuy hopkhilak yenlhi Wichi toj yen lhometa Heowa Lewʼet. Lewhay toj nʼoyenlhi wet toj nʼotʼayhettshi toj nʼoyam is hupuytso toj ihi iyhaj honhates, nʼotshupyene wichi toj ihanej toj iwoye lechumet toj yenlhi toj hopehen wichi toj yen lhometa Heowa hopkhilak itetshan nʼochumet toj ihi weihalhapej lhip toj ihi. Tej toj wujpe chumhasna toj yenlhi Wichi toj yen lhometa Heowa Lewʼet matche toj ihanej toj tachuma nʼochumetna, wujpe iyhaj toj tʼuhlak yenlhi hopehen wichi toj ihi congregación toj ichumyenhilhila hupuytso. Toj isej Heowa laka espíritu wet toj matche toj laka wichi lhaikhajyenej, iwoyek nʼowoye tajtso (Salmo 127:1; Colosenses 3:23).

• ¿Atsi toj tachʼot nʼoyehen hopkhilak okalhi toj oyenwetha Wichi toj yen lhometa Heowa Lewʼet toj iʼpe nilhok honhat?

Nilhokej Wichi toj yen lhometa Heowa Lewʼet ichaj Dios lhey toj nʼotʼamajchet. Hop toj tamenej toj is che nʼalejpej wet natʼuye hopkhilak matche toj is. Olhamel okajyaj ihi toj nʼowahin nʼoyejen toj nilhokej iwoyek tachʼote lhip nʼochumetna toj matche toj laha ihi toj olhamel oyachaje Dios.

Nanʼalit toj nahuminchek natchʼote toj nʼolejen mʼayhay lewhay toj noj reunión. Toj tafwaytshi reunión, wichi toj ihi congregación lhamel ilejpej mʼayhay toj tumpha toj ihi wet ichepej toj matche toj nʼotʼamajej toj nʼolej. Hinʼul toj tʼuyehen lhapunfwas wok lechʼotfwas, lhamel ihanlhi mʼayhay toj ilesayen toj inʼalit mʼayhay toj is che iwoye. Toj is che nʼosek, nʼolejej wesaj; nʼolej honhat mok wet nʼokancha sillas; nʼotʼamajej toj nʼolej baños; nʼolanhi ventanas lechʼohle wet nʼoyanthis; nʼowom mʼayhay toj nemhit isen, wet nʼolej wet nʼokancha lhipey toj alhoye. Weihalhapej nekchom, is che nʼotshupyene tefwajni ifwala hopkhilak nʼotʼamajej toj nʼolej nilhokej mʼayhay. Toj nʼowʼenho naʼtshas lechumtes, ichufwenhiyeja toj yenhitʼa wʼet mʼayeka lhip toj nehi toj nawoye lhanʼokhayaj (Eclesiastés 5:1).

Is che natchʼote hupuytso hopkhilak nʼoyam isen. Nilhokej nekchomis iche nʼoelh toj iyahinpe Wichi toj yen lhometa Heowa Lewʼet, toj ilechʼoye wet toj iʼalhoye hopkhilak nʼotetshan atsi mʼayhay toj is che nʼoyenlhi yamlek tʼaytshi toj nʼoyam is wok nʼoyam isilataj. Che matche toj nʼotʼuye Wichi toj yen lhometa Heowa Lewʼet, tamenhiyeja toj ihichetʼa che nʼowom wujpe chinaj tʼoj che paj (2 Crónicas 24:13; 34:10). Wichi toj yen lhometa Heowa Lewʼet toj matche toj lechʼohle neyahi wet isen mʼayhay toj iyej, hope lhip toj tʼuhawetej toj is che nʼonʼokwiyej Dios. Che natchʼote, hop toj hope mʼak toj nawatla, nanʼalit toj matche toj laha ihi huptso wet nahumin Heowa (Salmo 122:1). Hate, wichi toj iwhaye lhip toj nehi toj nalehutwek hiwʼenla toj isen mʼayhay toj nawoye (2 Corintios 6:3).

• ¿Atsi toj tamenej toj is che natʼuye lhip toj nehi toj is che nanʼokwiyej Heowa?

• ¿Atsi nʼochumtes toj nʼowoye hopkhilak nilhok lewhay ihichetʼa lechʼohle Wichi toj yen lhometa Heowa Lewʼet?

¿Ha lehuminchek letʼayhettshi atafwnhayaj toj talho Biblia? ¿Ha lewatlak tʼaytshi toj letafwelche mʼak toj versículo yome, mʼak toj iyej pʼante nʼoelh wok honhat toj Biblia yome? ¿Ha letʼatshanpej ame che Dios Lhomtes iwoyek tachʼot ame hopkhilak letetshan awitʼay? Che lehuminchek lehanej tajtso, iwoyek lechumyenlhi hop libros lewʼet toj ihi Wichi toj yen lhometa Heowa Lewʼet.

Libros lewʼet toj hiwʼen mʼayhay toj iwoyek lechumyenlhi toj letetshanchʼoye mʼak toj lewatlak lehanej. Nʼalej toj nilhokhiyejtʼa toj lewʼen hop mʼayhay toj iwoyek nʼoyahyen toj olhamel oyenwetha toj hope omet. Mat libros lewʼet toj ihi Wichi toj yen lhometa Heowa Lewʼet, nichatyaye che nilhokej mʼayhay toj iwoyek nʼoyahyen toj pajichetʼa toj inukwepha toj ihi. Nʼalej toj iche wujpe Biblias toj wʼenhahiche toj ihi, libro toj yam kalelhaj mʼak toj yome weihalhapej nʼolhomtes, wet iyhaj libros hopkhilak letetshanchʼoye mʼak toj lewatlak lehanej. Isitʼa che lefwune che lewatlak lechumyenlhi mʼayhayna lewhay che kamaj niwoya tesa reuniones wok lewhay che noj. Che iche computadora toj ihi libros lewʼettso, nʼalej toj Watchtower Library toj ihi. Hope nʼochumetcha toj ihi computadora toj wujpe mʼayhay toj iwoyek nʼoyahyen toj ihi toj lewuk olhamel wet tamenej toj athahitʼa toj nʼotʼukwe wujpe mʼayhay toj nʼoelh iwatlak ihanej, nʼolhomet pʼiya, versículo toj ihi Biblia wok iyhaj mʼayhay.

N’ochufwenhay toj ihi M’ak toj Dios Lakawos ihi wet Lechumet iwoyek matche toj lhamel isej. Iwoyek lhom is toj lechumyenlhi libros lewʼet toj ihi Wichi toj yen lhometa Heowa Lew’et lewhay toj is che lewaklhat achufwenyajay toj pitajitʼa. Elh toj itetshan reunión toj lhey M’ak toj Dios Lakawos ihi wet Lechumet hop toj is che tʼuye hop libros lewʼet. Hate is che iyahin che iche mʼayhay toj iwoyek nʼoyahyen toj nechʼehen wet kalelhajcha. Lham wok elh toj ichufwen amej Biblia, iwoyek ipayen ame chi malhyej toj iwoyek lewʼen mʼayhay toj lewatlak lehanej. Mat is che lehanej toj nʼowahnhiyejtʼa che iche nʼoelh toj itompha libros toj ihi Wichi toj yen lhometa Heowa Lewʼet, hate is che nʼotʼuye wet isitʼak nʼolesaynhiche.

Dios Lhomtes yome toj «mathichelak [na]täfwelej Dios» che nawatlak natʼukwe, malhyej toj natʼukwe «nʼokäywet tä õʼiskat» (Proverbios 2:1-5). Libros lewʼet toj ihi Wichi toj yen lhometa Heowa Lewʼet hope lhip toj matche toj is hopkhilak lewo tesa toj ihi toj letʼukwe mʼayhay toj lewatlak lehanej.

• ¿Atsi nʼochʼotyaj toj iwoyek lechumyenlhi hopkhilak letetshanchʼoye toj ihi libros lewʼet toj lewuk Wichi toj yen lhometa Heowa Lewʼet?

• ¿Atsi nʼoelh toj iwoyek tachʼot ame hopkhilak matche toj aisej hop libros lewʼet?

Jesús yome pʼante lechufwenkay toj yok: «is chik [...] aka isi ihutunpe tä ihi tä wichi itayche, häpkhilek lhamel hiwʼen mʼak tä is tä lewoyaye wet iwunit Ajchayay tä ihi pule» (Mateo 5:16). Hopkhilak olhamel okalhi tajtso ochumyenlhi mʼayhay toj nechʼehen toj inukwepha, malhyej Internet. Hop sitio toj matche toj lewuk olhamel toj ihi internet, hope jw.org. Lhiptso yam kalelhaj mʼayhay toj wichi toj yen Lhometa Heowa tʼekhachʼoye wet mʼayhay toj lhamel lechumtes. ¿Atsi mʼayhay toj inʼalit?

Nʼochulhejo Biblia nʼoyʼatshanhay toj wichi tayʼatshanpej lhamehen. Lewʼenla lechulhyajay iyhaj nʼoyʼatshanhay toj matche toj lahal ihi toj nilhok wichi tayʼatshanpej lhamehen. Iyhaj ihi nʼolesaynhayna toj nipitesa: ¿Ha nofwila ifwala che hope nʼotelaythayaj?, ¿Ha iwohiyela pʼiya che nʼopʼitseyhay yachajo toj ilayhiche?, toj ihi olhamel oka sitio toj ihi internet toj iwoyek n’otompha toj inu’pe 600 n’olhomtes toj wenhahiche toj iche. Hate lewʼenla hop Traducción del Nuevo Mundo toj iche 130 nʼolhomtes toj wʼenhahiche; wujpe libros yamlek nʼolhaichufwenej Biblia, malhyej librofwaj Nʼosilatyaj toj isis toj talhe Dios, wet revistas toj pajichetʼa toj inukwepha toj hope La Atalaya wet ¡Despertad! Iche wujpe mʼayhay toj iwoyek nʼoyahyen wok nʼotchʼahuye toj ihi internet wet nʼotompha PDF, EPUB wok MP3. Che lehuminche, iwoyek lethatho papel lewʼoley iyhaj toj omtes hopkhilak lepayne nʼoelh toj iwatlak ihanej. Iche mʼayhay toj iwoyek nʼoyahin toj hope wichi toj chʼotechʼol lhayhi. Iwoyek nʼotompha mʼayhay toj nʼoyahyen wet nʼopeykas toj iten wet inʼalit mʼayhay toj Biblia yome toj iyej pʼante wichi toj iche lewhayistso wet nʼotenkay toj isis toj iwoyek nʼotchʼahuye lewhay che lewo atʼelakwʼeta.

Mʼayhay toj ische alhoho toj nʼoyomeje wichi toj yen lhometa Heowa. Hop jw.org iche nʼosilotyajay toj nechʼehen wet mʼayhay toj iwoyek nʼoyahin toj yiwtejla olhamel ochumet toj iʼpe nilhok honhat. Hate mʼayhay toj iche ifwalasna toj yʼaje wichi toj yen lhometa Heowa wet olhamel ochumtes toj owoye hopkhilak otchʼote wichi. Hate yome hop reuniones toj wus toj ihichela wet inʼalit lenʼayij toj nʼoelh iwoyek tahuye hop olhamel owukwey Betel.

Toj isej mʼayhaytso, isi toj talhe mʼak toj matche ihutunpe wujpe honhatil toj iʼpe nilhok honhat, pajtha nichate honhat lhip toj matche toj techaj toj lhey Antártida. Olhamel owo tʼalhyaja hopkhilak Heowa «lhämet iläfwel tä yikpe» nilhok honhat yamlek nʼowujyen Lham (2 Tesalonicenses 3:1).

• ¿Atsi mʼayhay toj iche toj ihi lhip toj ihi internet, jw.org tachʼote hopkhilak tʼaytshi wichi toj itafwelej mʼayhay toj matchehen toj talho Biblia?

• ¿Atsi toj lehuminchek letetshanchʼoye toj ihi lhip toj ihi internet toj lewuk olhamel?