Wujpe wichi toj ileyej toj ihoye laka iglesias, hop toj ikhajyenhihentʼa wet tachʼothiyetʼa lhamel hopkhilak hiwʼen nʼoyʼatshanhay toj matche toj lahal ihiche lechulhyajay. Toj malhyejtso, ¿atsi toj tamenej toj is che am lehoye hop reuniones toj wichi toj yen lhometa Heowa yenlhi? ¿Atsi toj lewʼenla toj ihi lhiptso?

Akajyaj ihihla toj lhewej wichi toj lehumnhayaj ihi wet pʼaltsentses. Toj tafwaytshi toj Jesús yʼil pʼante, wichi toj ichun toj ihanlhi pʼante lham toj kalelhajcha pʼante toj ihi congregacionesa, lhamel lhaihutpejwek hopkhilak nʼokwiyej Dios, lhaichufwenej Biblia wet lhainityenwetha (Hebreos 10:24, 25). Lewhaytso toj iyej lepunfwas, nʼohumnhayaj ilunej lhamel, ilate toj ihi lakalayʼis toj matchehen (2 Tesalonicenses 1:3; 3 Juan 15, [3 Juan 14, TNM]). Ifwalasna hate olhamel owoye tajtso wet owʼen okajyaj.

Alechufwenhiyeja toj lewoye Dios Lhomtes lefwonyajay. Malhyej at iwoye toj Biblia inʼalit, hinʼul, atsinhay wet naʼtshas, olhaihutwek yamlek nʼochufwenyajwos toj ihanej toj iwo lechufwenyaja ipayen nʼoyehen lenʼayij toj olhamel owoye nʼofwonyajay toj ihi Dios Lhomtes nilhok ifwalas (Deuteronomio 31:12; 1 Timoteo 3:1, 2). Nilhokej wichi toj ihoye iwoyek nichulho lewhay che iche lhipey toj iche nʼoyʼatshanhay, wet hate iten nʼotenkay. Isej tajtso, weihalhapej iwoyek yome hop leniwhayaj (Hebreos 10:23).

Nʼokapfwayaj toj iwohiyelak ikhajyen atʼekhahyaj toj letiyej Dios. Hop apóstol Pablo ilesayen pʼante lhomet toj ithate congregaciones toj iche pʼante lewhay toj lham iche, yopʼantek: «owatläk oho amehen [...] häpkhilek yʼakhajyen lhamejen lhatʼekhahyaj tä inʼamejen» (Romanos 1:11, 12). Toj namel naisej lhapunfwas toj ihi reuniones, ikhajyen lhatʼekhahyaj wet tachʼot namehen toj nakalelhat toj nawoye Dios lenechʼetayaj.

Hoye elh reunión toj ihichela hopkhilak lekatej nʼokapfwayajaytso. Olhamel oyahnhiyeja ahila olhamel ohumnhayaj. Ihichetʼala nʼoelh che tʼalhej ame chinaj tʼoj.

• Lewhay toj olhamel olhaihutwek, ¿atsi toj olhamel oten?

• ¿Atsi mʼayhay toj naisej toj iche toj nalehutwek?

Tej toj is che nanukwe tayhi toj matche toj wʼatshan halʼoy toj iche wok che matche toj chayokwe, iwomcha wok iche ihwok toj aytaji, wichi toj yen lhometa Heowa olhamel olehiyejtʼa toj ohoye olhamel oka reuniones. Tej toj iche olhamel owitʼayhyajay wet toj oyʼelej ochumet toj owoye, ¿atsi toj tamenej toj olhamel matche toj olhaikhajyenej hopkhilak olhaihutwek toj olhayʼe olhamel opunfwas?

Tachʼot nʼoyehen hopkhilak oisen. Toj yome pʼante toj namel nawatlak nahoye reuniones, apóstol Pablo yopʼantek:«nʼatʼukwe lhakey tä is» (Hebreos 10:24). Toj nʼotʼukwe mʼak iwatlak nʼotʼamajej toj nʼotetshan. Toj malhyejtso, mʼak toj apóstol yome, hope toj inityen namejen toj is che weihalhapej namel itafwelej elh, toj is che nen lhalhakliya lhaiyhaj. Lewhay che natafwelej iyhaj lhapunfwas toj ihi congregación, natajpe toj iche iyhaj toj iche pʼante lewitʼayhyajay toj tafwayej, malhyej iwoye lhawitʼayhyajay toj inamejen wet iwoyek tachʼot namehen hopkhilak naten lhamel.

Iwoyek pitaj lewhay toj nawʼen lhakalayʼis. Toj olhamel olhaihutwek, olhamel oihi lechowej okalayʼis toj matchehen toj tsʼilakhitʼa toj hopehen wichi toj olhamel otafwelej. Lhayʼe toj iche iyhaj lewhayis toj olhamel olhaihutwek hopkhilak olhamel owoye mʼayhay toj isen toj ikajyen nʼowetha. ¿Atsi mʼayhay toj isen toj nakatej toj nalhahipʼajtej lhamel? Ichufwen namejen toj is che nawʼawlhatcho lhaiyhaj toj tamenej toj nʼohumnhayaj yʼayhettshi toj nalhahipʼajtitwek. Wet che lhapunfwas ihi lewitʼayhyajay, yofwajkwet natiyej lhachʼotyaj, hop toj matche toj takhajay toj hopehen lhakalayʼis (Proverbios 17:17). Toj nalhahipʼajtej nilhokej lhapunfwas toj ihi congregación, nanʼalit toj «elh weihalhapej yen tichunhayaja yämthilek tachʼote iyhäj» (1 Corintios 12:25, 26).

Olhamel oaikhajyen toj letshupyene toj lhen akalayʼisa wichi toj iwoye tʼat mʼak toj Dios lenechʼethayaj. Lewʼenla akalayʼis toj malhyejtso toj ihi wichi toj yen lhometa Heowa. Kawayhla che mʼak at che hope inuhla hopkhilak lelhayʼe olhamel toj olhaihutwek.

• ¿Atsi toj tamenej toj iwoyek naisej toj nalhahipʼajtej lhapunfwas toj ihi congregación?

• ¿Atsi lewhay toj lehuminchek letafwelej olhamel oka congregación?

Lewhay toj lhaihutwek Jesús lechufwenkay toj ichun, yenlhi pʼante mʼayhay toj athahihentʼa. Lhamel ichoywetha, iwo tʼalhyaja, iyahyen Dios Lhomtes wet lhaichufwenej (1 Corintios 14:26). Che lehoye olhamel oka reuniónes, lewʼenla toj mʼayhay toj ihi malhyej at iwoye.

Nʼowʼenhomche wichi nʼochufwenyajay toj iwoyek ichumyenlhi toj talho Biblia. Toj sábados wok domingos, nilhokej congregaciones lhaihutwek yamlek tachʼahuye hop nʼolhomet toj nʼoyome toj talho Biblia toj treinta minutos, toj inʼalit chi malhyej toj yʼaj namehen mʼayhay toj ihi Dios Lhomtes wet lewhayisna toj nehi. Wichi toj ihoye iwoyek iyahyen toj ihi laka Biblia, lewhay che nʼoyahyen versículos. Toj tafwaytshi, iwo tesa Nʼochufwenyaj toj talho La Atalaya toj una hora, toj wichi toj ihoye iwoyek nichulho nʼoyʼatshanhay toj nʼoyenlhi lewhay toj nʼotetshan lhip toj ihi revista La Atalaya toj nʼolhaichufwenej. Tajna inʼalit wujpe lenʼayhay toj iwoyek nawoye nʼofwonyajay toj talho Biblia. Mʼak toj nʼolhaichufwenej toj ihi weihalhapej congregaciones toj iche ciento diez mil, hope tʼat toj iyhaj toj iʼpe nilhok honhat lhaichufwenej.

Naiwaklhathen hopkhilak is toj nawo lhachufwenyaja. Hate iche elh ifwala toj honatsi toj khitʼa toj sábados wok domingos toj olhamel olhaihutwek hopkhilak olhamel owaklhat nʼochufwenyaj toj iche tres lhipey toj lhey M’ak toj Dios Lakawos ihi wet Lechumet, toj talho librofwaj toj inupha iwel’apej toj lhey Vida y Ministerio Cristianos - Guía de actividades para la reunión. Lhip toj ichun reunionna lhey N’olhomtes toj matche toj lahal ihi toj ihi Biblia, tach’ot namehen toj matche toj natafwelej lhimpajpej Biblia toj wichi toj ihoye pajche iyahyen. Elh toj ihan len’ayij hope Nat’ayhettshi toj is toj nahopehen N’ochufwenyajwos toj iche nʼochufwenyaj toj inʼalit atsi m’ak toj is che olhamel owoye toj owo lhometa hopkhilak iwoyek oten. Iche elh olhamel opunfwa toj yome nʼolhomtes toj tachʼot nʼoyehen hopkhilak tʼaytshi toj is lewhay che olhamel oyahyen wet oyamwetha toj oihi toj wichi tatache (1 Timoteo 4:13). Elh toj lepes hope M’ak toj Dios Lakawos olhamel oihi, toj itetshan hop len’ayij m’ayhay toj olhamel owoye ifwalapej toj yiwtejla m’ayhay toj matchehen toj ihi Biblia. Hip’akej toj nilhokej wichi toj ihoye iwoyek nichulho lewhay che iche lhipey toj iche nʼoyʼatshanhay hopkhilak y’ayhettshi toj natafwelche m’ayhay toj ihi Dios Lhomtes.

Lewhay che lehoye reuniones, nʼochufwenyajay toj matche toj isen toj ihi leselthiyeja (Isaías 54:13).

• ¿Atsi toj lewʼenla lewhay che lehoye wichi toj yen lhometa Heowa toj lhaihutwek?

• ¿Atsi elh reuniones toj olhamel oyenlhi toj iche nilhokej semanas lehumchek ichun toj lehoye?

¿Ha lewʼen mʼathi nʼopeykas toj ihi librofwajna toj wichi toj yen lhometa Heowa matche toj is toj lhayenwetha toj ihoye reuniones? ¿Atsi toj tamenej toj olhamel matche toj otʼuye okay toj otwʼuyhi wet toj olhayenwetha?

Hop toj olhamel owujyen Dios. Matche tʼat toj Dios itetshanhitʼa mʼayhay toj tumpha toj iyej hinʼu (1 Samuel 16:7). Mat, lewhay toj olhamel olhaihutwek hopkhilak olhamel onʼokwiyej, mʼak toj matche toj olhamel otʼuhlak owoye hop toj onʼaltej lham toj olhamel oyenhitʼa wʼet mʼayeka wet hate olhamel opunfwas. Che nahoye nʼochufwenyajwo wok directora toj ihi nʼochufwenyajwʼet, matche toj nenla tichunhayaja chi malhyej toj nalhenwetha, hop toj nenhitʼa wʼet mʼayeka lenʼohyaj toj ihi. Malhyej at iwoye, toj olhayenwetha toj oihi reuniones olhamel onʼalit toj matche toj owujyen Heowa toj «ihichetʼa nʼochufwenyajwo chik wʼawulhi», wet hate lhip toj olhamel oihi toj onʼokwiyej Lham (Job 36:22).

Hopkhilak olhamel onʼalit toj otchʼahuye mʼayhay toj ipayen nʼoyehen toj is alhoho. Biblia yome toj Dios kawos is che «tawʼuyhi lewʼuyis tä tʼuhawetej» wet «häpehen iyhäj tä lehusek ihi» hop toj hopehen wichi toj «lhayen Dios tʼamajchetesa» (1 Timoteo 2:9, 10). Toj nʼoelh «tawʼuyhi lewʼuyis tä tʼuhawetej», wichi itetshanhitʼa. Tawʼuyhihitʼa lakay toj lhaichajejlhi toj hiwʼen wok inʼalit tʼisan lhipey toj tʼuhawethiyejtʼa che nʼalpe. Hate, che ohopehen wichi toj «lehusek ihi» olhamel otwʼuyhi owʼuyis toj isen, toj khitʼa owʼuyis toj otʼuhiyetʼa wok toj matche toj wichi iyahin hop toj khitʼa mʼak toj lhamyaj. Tej toj olhamel ohanej nʼofwonyajayna, weihalhapej iwoyek otshupyene wujpe lenʼayij toj olhayenwetha. Lewhay che matche toj is toj olhayenwetha wet hope mʼak toj tʼuhawetej, iwoyek olhamel onʼalit «tä matche tä isilataj nʼochufwenyaj tä yäme Dios Lhafwayhthi» wet owujyen, tej toj newache olhomtes (Tito 2:10; 1 Pedro 2:12). Toj matche toj olhayenwetha lewhay toj olhamel olhaihutwek, iwoyek iwo elha wichi letichunhayajay toj itiyej Heowa laka wichi.

Hopkhilak olhamel newache ochʼohle wet otwʼuyhi okay toj tʼuhawetej, iwathitʼahla che olhamel otwʼuyhi okay toj tʼunhi wok inuʼpe lewʼet toj isis. Kawayhla che iwo akʼefwhayaja toj letichunejlhi chi malhyej toj alhenlhi toj lehoye wichi toj yen lhometa Heowa Lewʼet.

• ¿Atsi toj tamenej toj matche toj laha ihi che natetshan lhakay lewhay che nanʼokwiyej Dios?

• ¿Atsi nʼofwonyajay toj iwoyek tachʼot namehen lewhay che nakalelhat toj nalhenwetha?

Che am lelhay’e elh wichi toj yen lhometa Heowa toj alechufwenej Dios Lhomtes, nʼalej toj ichun lewaklhat lhip toj alechufwenhiyeja. Che malhyejtso mʼak toj nawoye toj nahoye reuniones, mathichela che naisej che nakalelhat toj nalechufwenhen. Che nawo lewʼeta toj nalechufwenhen, matche toj is che ihi toj ihi toj nawoye tajtso.

Tshupyene lewhay wet lhip toj lhehi toj alechufwen. ¿Atsi lewhay toj atamsek ihi hopkhilak letichunlhi? ¿Ha hope toj nechʼe ifwala toj kamaj kachumalhi, wok toj honatsi toj naʼtshas imahen? Tej toj wujitʼa lewhay toj lewʼen, tetshan chifwajte lewhay toj iwoyek alechufwen wet chumyenlhi lewhaytso hopkhilak lewoye tajtso. Ukwe lhip toj tʼuhawetej hopkhilak atamsek ihi toj letichunejlhi wet tiyej kanhi mʼayhay toj iwohitʼa atamseka, malhyej radio, televisión wet teléfono. Toj lewo tʼalhayaja hopkhilak lewo tesa toj alechufwen, tachʼotla ame hopkhilak lepʼethatla mʼayhay toj lhen alhaklhiya ifwalatso wet tajlhamet toj letetshan Dios Lhomtes (Filipenses 4:6, 7).

Sajchufwi nʼolhomtes toj yome mʼayhay toj lhamenya wet is che awakʼalh hopkhilak lechulho. Toj ichun is che matche toj letafwelche atsi toj yome mʼak toj alechufwenhiyeja. Tetshan nʼolhomtes toj wus toj ichalas toj hope nʼochufwenyaj lhey wet iyhaj toj hopehen lheyis weihalhapej nʼochufwenyaj lhipey. Tichunejlhi lenʼayij toj nʼolhomtesna yiwtejla nʼochufwenyaj toj lhamya, yahyen nʼoyʼatsanhay toj iwoyek tachʼot ame yamlek lehanej iche nʼochufwenyajna wet tetshan nʼopeykas. Toj tafwaytshi, yahyen weihalhapej párrafo wet ukwe lechulhyaj hop nʼoyʼatshanek toj yiwte. Yahyen toj ihi Biblia hop versículos toj ihi párrafo toj nʼotenhitʼahla nʼolhomtes toj ihi wet tetshanchʼoye atsi toj tamenej toj ihi (Apóstoles Lhenhay 17:11). Che lewʼen nʼoyʼatshanek lechulhayaj toj ihi párrafo, sajchufwi nʼolhomtes toj matche toj lahal ihiche toj tachʼotla ame hopkhilak lehanej iche lechulhyaj. Lewhay che iche reunión, iwoyek letipha akwey, che lehuminche, hopkhilak lhenlhi achulhyaj toj nipitaja toj lechulho nʼoyʼatshanhay toj nʼoyenlhi malhyej toj am letafwelche.

Che letetshan wʼenhahiche nʼochufwenyajay toj is che nʼolhaichufwenej semanapej, iwohiyelak lepʼajtej iyhaj mʼayhay toj nechʼeyhis toj letafwelej toj ihi Biblia (Mateo 13:51, 52).

• ¿Atsi mʼayhay toj is che lewoye hopkhilak alechufwenej mʼayhay toj ihihla reuniones?

• ¿Atsi mʼak toj is che lewoye toj alewaklhat hopkhilak lechulho nʼoyʼatshanhay toj nʼoyenlhi toj ihi reuniones?

Lewhayis toj pajche, Heowa tʼupʼantehlak wichi toj lewʼet lheley ihi lhahipʼajtitwek yamlek tachʼote toj tʼaytshi toj hopehen Lham lakalayʼis wet ise lewʼet lheley (Deuteronomio 6:6, 7). Hop toj tamenej toj, wichi toj yen lhometa Heowa, otiyej kanhi iyhaj mʼayhay hopkhilak onʼokwiyej Dios toj olhayʼe owʼet lheley. Lewhaytso toj otamsekis ihi, olhamel otetshan mʼayhay toj iwoyek tachʼote weihalhapej owʼet lheley hopkhilak ise Dios. Hate, wichi toj ihiyejtʼa lewʼet lheley, iwoyek ichumyenlhi lewhaytso toj yachaje Dios toj itetshan at chʼoye mʼayhay toj talho Biblia toj lham toj tatshupiye.

Lewhay toj iwoyek namwhoye Heowa. «Hoyaye Dios wet lham ihohla amehen» (Santiago 4:8.). Matche toj natafwenhiyeja Heowa lewhay che nalechufwenej atsi toj hope lham wet mʼayhay toj iwoye pʼante malhyej toj Biblia yome. Iche lenʼayij toj athahitʼa hopkhilak lewo tesa toj alechufwen toj lelhayʼe hawʼet lheley. Iwoyek elh weihalhapej yam aytaji lepak toj iyahyen lhip Biblia. Toj tafwaytshi, nilhokej lhamel iwoyek yome mʼak toj itafwelche. Iwoyek lechumyenlhi nʼolesaynek (programa) toj yome mʼayhay toj ihihila M’ak toj Dios Lakawos ihi wet Lechumet.

Lewhay toj iwoyek namwhoye lhawʼet lheley. Wichi toj lechʼefwas ihi, hate nʼojchalis, nʼokolis wet leles, is che ilate toj tʼaytshi toj weihalhapej lhahipʼajtej elh, lewhay toj lhaihutwek hopkhilak lhaichufwenej Biblia. Lewhayna is che lekajyaj ihi wet letamsek ihi wet is che nilhokej inihihla. Nʼalej toj nʼojchalis wet nʼokolis is che itichunejlhi nekchomis toj leles hiwʼen wet lhaichufwenej mʼayhay toj tʼuhawetej hopkhilak isej, toj talho La Atalaya wet ¡Despertad! wok toj talho sitio jw.org. Wok iwatlak yome mʼayhay toj iwo lelhakliya leles toj ihi nʼochufwenyajwʼet wet mʼak toj is che iwoye yamlek tatayhla. Lhay’e iwoyek iyahin toj ihi JW Broadcasting wet toj paj lhamel iwoyek yome m’ak toj pajche itethsan toj ihi. Hate lhamel iwoyek lhaiwaklhatej nʼotenkay toj nʼotenla toj ihi reunión wet toj noj toj lhaichufwenhen iwoyek lhamel yen lekajyaja toj tuj lhak toj niwuja.

Lewhay toj matche toj laha ihi toj natiyej kanhi iyhaj mʼayhay hopkhilak nanʼokwiyej Heowa toj nalhayʼe lhawʼet lheley, tachʼotla namehen yamlek nahumin Dios Lhomtes, wet Heowa mathichela che ikapfway namehen toj nalekhajyenejen (Salmo 1:1-3).

• ¿Atsi toj tamenej toj natiyej kanhi iyhaj mʼayhay hopkhilak nanʼokwiyej Dios toj nalhayʼe lhawʼet lheley?

• ¿Atsi mʼayhay toj iwoyek iwoye nʼojchalis wet nʼokolis hopkhilak lewhaytso nilhokej lhamel ihumin?

¿Atsi toj tamenej toj wichina matche toj lekajyaj ihiche? Hop toj lhamel ihi elh olhamel oka reunión toj wus toj olhamel oyenlhi. Malhyej iwoye Dios kawos toj iche pʼante lewhayis toj pajche, toj nʼoneʼtepʼantek lhaihutwek tres toj yachajopej toj ihi nekchom, olhamel oyen kajyaja lewhay toj onitakw toj olhaihutwek (Deuteronomio 16:16). Nilhok nekchomis, tres toj yachajopej toj olhamel onitakw toj olhaihutwek: dos toj yachojopej toj iche reunión toj wuj toj iche tefwajni ifwala wet weihalha toj iche elh reunión toj wuj toj iche tres ifwalas. ¿Atsi mʼayhay toj olhamel oisej toj hiwʼen nʼohomche?

Tachʼot namehen hopkhilak matche toj namwhoye lhapunfwas. Hop Israel lhayis matche toj lhamel yenpej lekajyaja toj iwunit Heowa toj iyej laka wichi. Malhyej iwoye olhamel oyenpej okajyaja lewhayistso toj laha ihi toj olhayʼe olhamel opunfwas toj onʼokwiyej Lham (Salmo 26:12; 111:1). Reunionesna toj wus hope lewhayis toj tʼuhawetej hopkhilak nalhaipʼajtej lhapunfwas toj talhe iyhaj congregaciones wet iyhaj toj talhe lhip elh honhat. Weihalhapej nʼoelh iwoyek ichaj lhak toj talhe lewʼet, hopkhilak iwoyek tuj toj ifwala ihi lechowej, toj ihi tʼat lhip toj reunión ihi. Hope lewhaytso toj is hopkhilak natʼukwe lhakalayʼis toj nechʼehen (Salmo 133:1). Toj olhamel oihi reuniontso toj wuj, olatla nʼohumnhayaj toj hipʼajtitwek olhamel «[o]punfwas toj iʼpe nilhok honhat» (1 Pedro 2:17, TNM).

Tachʼot namehen hopkhilak matche toj namwhoye Heowa. Israel lhayis isej pʼante toj «lhamel ihanej mʼak tä õʼchufwenejen» toj talho Dios Lhomtes (Nehemías 8:7, 12). Hate olhamel oyen tichunhayaja toj nʼochufwenyajay toj nʼowʼen nʼohomche toj ihi reuniones toj wus matche toj lahal ihi. Weihalhapej reunionna wʼenha lhamej nʼochufwenyaj toj yome toj talho Biblia. Ichufwen namejen chi malhyej toj nawoye Dios lenechʼethayaj, ichumyenlhi tʼat nʼolhomtes toj nʼoyome toj talho Biblia wet toj olhamel opunfwas inʼalit nʼochufwenyaj toj iwaklhat hopkhilak iwoyek naten. Hate naikhajyenhen toj nalate wichi toj yome lewitʼayhyajay toj iyej hop toj hope Dios kawos toj ihi ifwalasna toj atha wet atsi toj lhamel iwoye hopkhilak ikalhi toj tatayhla. Toj ihi Reunión toj wuj toj iche tres ifwalas, iche wichi toj tawʼuyhi lakay toj malhyej at iwoye Dios kawos toj iche pʼante lewhayis toj pajche wet lhamel iten wet inʼalit mʼayhay toj Biblia yome hopkhilak naisej. Wet nilhokej reuniones toj wus toj olhamel oyenlhi, iche wichi toj iwatlak inʼalit toj lhamel ikalelhat toj lhayachaje Dios wet hop toj tamenej toj lhaiwo bautisaya.

• ¿Atsi toj tamenej toj reuniones toj wus hope lewhayis toj matche toj iche nʼokajyaj?

• ¿Atsi mʼayhay toj iwoyek aisej che lehoye elh reunión toj wus toj olhamel oyenlhi?

Toj tatay lhimphaj che yʼil Jesús, yome pʼante toja: «Nʼosilätyaj tä Isna tä yäme Dios Niyatyaj õʼwohla silätaʼpe imälhewek honhat yämthilek nilhokej wichi tä ihiche honhates iläte. Wet nechʼe häpkhilek näm lepes» (Mateo 24:14). ¿Chi nʼowoyneje toj nʼowo silota imalhewek honhat? Malhyej at iwoye mʼak toj Jesús iwoye pʼante lewhay toj iʼpe honhatna (Lucas 8:1).

Olhamel ohoye weihalhapej wichi toj ihi lewʼet. Jesús ichufwenej pʼante lechufwenkay toj yen lhometa nʼosilotyaj toj isis, ihoye weihalhapej wichi toj ihi lewʼetes (Mateo 10:11-13; Apóstoles Lhenhay 5:42; 20:20). Nʼosilotyajwostso toj ichun, nʼofwenho pʼante tʼat lhip toj kalelhaj toj is che lhamel yen lepesa toj ihi toj iwo lhometa (Mateo 10:5, 6; 2 Corintios 10:13). Malhyej iwoye athana, olhamel toj owo lhometa matche toj kalelhajcha, wet weihalhapej congregación hiwʼen lhip toj ihi toj lhamel is che iwo lhometa toj lepes iche. Toj olhamel owoye tajtso, iwoyek otahuyej wujpey wichi, olhaikhajyenejen tʼat mʼak toj Jesús yome pʼante toj is che olhamel owoye toj «oyen lhämeta Dios Silätyaj tä Is» (Apóstoles Lhenhay 20:24).

Olhamel olhaikhajyenej hopkhilak ohoye wichi toj ihi lhip at che hope. Hate Jesús ipayen namehen chi pʼante iwoyneje toj iwo silotyaja toj ihi toj wichi tatache, malhyej toj iwhaye lewomek wok nʼopek toj ihi hupuy (Marcos 4:1; Juan 4:5-15). Malhyej at iwoye ifwalasna olhamel ofwenho wichi mʼayhay toj ihi Biblia tej toj ihi lhip at che hope: ihi nʼayij, ihi lhip toj lhamel ihoye toj tʼukwe laka chinaj tʼoj, ihi kachawʼet wok olhamel ochumyenlhi teléfono. Hate, lewhay che iwoye, olhamel ofwenho mʼayhay toj olhamel otʼekhachʼoye wichi toj iwhaye olhamel owʼet, olhamel otʼunfwas toj ihoye nʼochufwenyajwʼet wet opunfwas. Toj isej tajtso, nʼofwenho wujpey wichi nʼosilotyaj toj isis «lefwayhyaj» (Salmo 96:2).

Tichunejlhi nʼoelh at che hope toj lehuminchek lefwenho nʼosilotyajay toj isis toj talhe Dios Niyatyaj wet chi malhyej toj yʼaje lewhayis toj tataye. Yej nʼayejo wichi iyhaj hop nʼosilotyajna toj nʼoniwhayaj. Lewhay che iwoye, iwoyek letafwnhatej iyhaj wichi.

• ¿Atsi toj hope «Nʼosilätyaj tä Isna» toj is che nʼoyen lhometa?

• ¿Atsi mʼayhay toj Jesús iwoye pʼante toj iwo lhometa toj wichi toj yen lhometa Heowa naten?

Tichunla hinʼu toj is che inuhyenkwe iyhaj lhip toj is che inukwe toj ihi tayhi, lhip toj hanhiyejtʼa che iche nʼoelh che ihoho. Is che yisthen halʼoy, iwaklhat nʼayij wet ifwenho iyhaj toj is che ihan lenʼayij. Nʼoelhtso hope nʼoelh toj ifwoyenche nʼayij (precursor). Malhyej iwoye Jesús lewhay toj iʼpe honhatna. Nʼochen pʼante honhate hopkhilak lhayen wichi lakawoya wet ifwoyenche nʼayij yamlek wichi tafwayhen wet ikatej lewʼatshancheyaj toj tʼun (Mateo 20:28). Ifwalasna olhamel oten Jesús wet otiyej kanhi iyhaj mʼayhay hopkhilak owo lhometa wet wujpe lewhay toj olhamel ochufwenhen wichi (Mateo 28:19, 20). Iche iyhaj toj lhamel ikalelhat toj hope elh toj ifwoyenche nʼayij.

Nʼoelh toj matche toj wuj toj iwo silota Dios Niyatyaj. Nilhokej olhamel wichi toj yen lhometa Heowa, owo lhometa. Mat iche iyhaj toj ikalelhatcha mʼayhay toj hiwʼen hopkhilak iwoyek hope nʼoelh toj ifwoyenche nʼayij wet iwo lhometa setenta horas nilhok iwelʼas. Hopkhilak lhamel iwoyek iwoye tajtso, tʼukwe lechumet toj tajlhamet toj lechowej ifwala toj tachuma. Iyhaj nʼotshupyene hopkhilak hope nʼoelh toj ifwoyenche nʼayij nilhok lewhay wet nʼothate lhip elh honhat toj nʼowatla wujpe wichi toj iwo lhometa. Lhamel iwo lhometa nilhok iwelʼas ciento treinta horas wok inuʼpe. Lhamel lekajyaj ihiche, tej toj wujitʼa mʼayhay toj hiwʼen wet tʼekhaye Heowa toj hiwʼenhohla mʼak toj lhamel iwatla (Mateo 6:31-33; 1 Timoteo 6:6-8). Lhapunfwas toj iwohiyetʼa che malhyej iwoye iyhajtso, iwoyek hope nʼochʼotfwa toj ifwoyenche nʼayij, toj lhamel iwo lhometa treinta wok cincuenta horas toj ihi weihalha iwelʼa.

Lehumnhayaj toj itiyej Dios wet iyhaj wichi hop toj inityen hop nʼoelh toj ifwoyenche nʼayij. Malhyej iwoye Jesús, olhamel otafwelej toj wichi matche toj iwatla lechʼotyaj yamlek ise Dios (Marcos 6:34). Mat olhamel ohanej toj iwoyek isej athana, hop toj hiwʼenho leniwhayaj toj matche toj tʼaytshihla toj is mʼak toj ihi lewhayis toj tataye. Lehumnhayaj toj itiyej iyhaj, inityenej nʼoelh toj ifwoyenche nʼayij toj itiyej kanhi iyhaj mʼayhay wet ichumyenlhi lakhajyhayaj yamlek tachʼote iyhaj toj ise Dios (Mateo 22:39; 1 Tesalonicenses 2:8). Hate matche toj ilate toj lekajyaj ihi toj tajtso ikhajyen tʼekhahyaj wet yam takhajay toj lakalayʼi Dios (Apóstoles Lhenhay 20:35).

• ¿Atsi toj hope nʼoelh toj ifwoyenche nʼayij?

• ¿Atsi toj ikhajyen iyhaj toj hopehen nʼoelh toj matche toj wuj toj iwo silota?

Wichi toj yen lhometa Heowa talhettsiy toj iwo lahaya nʼochufwenyaj toj talho Biblia. Hop toj tamenej toj iche nʼochufwenyajwʼetes toj tajlhamet lhamel toj wuj toj iwo lhometa toj ihoye toj iwaklhat hopkhilak lhayʼe lhip toj is lechumet toj yachaje Dios (2 Timoteo 4:5).

Nʼochufwenyajwʼet toj iwaklhat Nʼoelh toj ifwoyenche nʼayij. Hope nʼochufwenyaj toj nʼowʼenho lhamel toj iche seis ifwalas wet iwoyek nʼotihi wichi toj yen lhometa Heowa Lewʼet toj iche toj atofwiyetʼahla lhip toj lhamel ihi. Is che pajche hiwʼen weihalha nekchom toj hope nʼoelh toj ifwoyenche nʼayij toj iwoyek ihoye. Lhiptso tachʼote lhamel hopkhilak tʼaytshi toj yamwhoye Heowa wet toj is mʼayhay toj lhamel iwoye toj iwo lhometa wet ikhajyen yamlek yikchufwi lechumet.

Nʼochufwenyajwʼet toj iwaklhat Dios Kawos toj iwo silota Leniyatyaj. Lhiptso wichi toj naj lechʼefwasa wet toj lechʼefwas ihi toj ihoye toj dos iwelʼas toj iche. Is che hiwʼen 23 nekchomis pajtha 65, hope elh toj pajche itafwelej wujpe lewhayis toj hope nʼoelh toj ifwoyenche nʼayij wet ikalhi toj tʼaye lhip toj matche toj nʼowatla lechʼotyaj. Lhamel iten Jesucristo, Nʼosilotyajwo toj inuʼpe elh at che hope toj iʼpe pʼante honhatna wet yok: «Olham tä oikana, chennʼo» (Isaías 6:8; Juan 7:29). Toj lhamel tʼaye elh lhip is che lhaihoyantej toj wujitʼala mʼayhay toj hiwʼen, wichi lakeyis toj wʼenhahiche, toj techajche, chayokwe, wet nʼolhak toj matche toj wʼenha lhamej. Nʼalej toj is che lhamel lhaichufwenej elh nʼolhomet. Toj ihi nʼochufwenyajwʼetna lhamel lhaichufwenhiyeja toj yʼayhettshi mʼayhay toj isen yamlek tachʼote toj ise Dios. Lhamel iwatlahla mʼayhayna che ihi lhip toj tʼayhiyela. Nʼowaklhathenla hopkhilak tʼaytshi toj lhamel tachʼote Heowa wet laka wichi toj kalelhajcha.

Nʼochufwenyajwʼet toj lhey Galaad. Nʼolhometna toj yok Galaad toj hebreo lhomet hope toj yome «tuntey toj nʼoskonwek yamlek nʼoyen tichunhayaja wet iwo silota». Nʼochufwenyajwʼetna iwo tesa toj nekchom 1943. Talhe lewhaytso, inuʼpe 8.000 olhamel opunfwas toj tafwayej nʼochufwenyajna, tʼaye lhip elh honhat hopkhilak iwo lhometa wet matche toj is lechumet toj iwoye toj iʼpe nilhok honhat (Apóstoles Lhenhay 13:47). Malhyej toja, congregación ihihitʼa pʼante Perúʼ lewhay toj iyhaj toj nʼochene lhip elh honhat hopkhilak iwo lhometa toj ichun toj nichate. Athana inuʼpe mil congregaciones toj iche. Lewhay toj iyhaj nichate Japón, nichathiyetʼa pʼante che iche diez wichi toj yen lhometa Heowa toj ihi. Ifwalasna inuʼpe 200.000 toj iche. Toj ihi nʼochufwenyajwʼetna toj iche cinco iwelʼas, nʼolhaichufwenej mʼayhay toj ihi Dios Lhomtes wet nʼowaklhathen yamlek ikhajyen olhamel ochumet toj owoye toj iʼpe nilhok honhatna wet tachʼote hopkhilak is alhoho. Wichi toj iwoyek ihoye, is che hope nʼoelh toj iwo lhometa nilhok lewhay, nʼoelh toj nʼochene elh honhat hopkhilak iwo lhometa, olhamel opunfwas toj tʼuyehen wujpe congregaciones wok iyhaj toj tachumhilhi Nʼowukwey Betel.

• ¿Atsi mʼak toj tʼuhlak ikalhi hop Nʼochufwenyajwʼet toj iwaklhat Nʼoelh toj ifwoyenche nʼayij?

• ¿Atsi nʼoelh toj iwoyek ihoye Nʼochufwenyajwʼet toj iwaklhat Dios Kawos toj iwo silota Leniyatyaj?