Jehovab ge ge hui mî îm sîm mâsiba ūǃoa mâpa ǀguim ga hâ xawe

Kassholms khoe-aogu ra ge Giliada 1979 ge hâǃnâ tsî ra ge kurigu ge ǃkharu khami ǃkharagagu ǃhūga ǃoa ge ǁgaumâihe. Aiǁgause Iranni, Mauritius, Myanmars, Tansaniab, Ugandab tsî Saires tsîna. Giliadi tawa ra ge ǁîra ǁgauǃnâ-aob Jack Redfordi xa ǀapemāsa ge māhe hîna ge ǁîra a huisa mâ ǁgaumâis hoas ǃnâ. Hā re î ra ǁguiǃā.

Mats khomai-aona mîba re mati du ge amaba a hō ǀgausa.

Mats: Ti dadab ge Polandi ǃnâ ǀgamǁî ǃhūbaib torob ǁaeb ǃnâ ge ûi hâ-i tsî ge mû mati i ge hînaǃnâxasiba ǀoa hâ-i ǀgauba katolik kherkeb ǃnâ. Xaweb ge gere mî, “Elobmîs amab ge noxopa a hō-e ǁkhā.” ǁAeb ǀkha ta ge ge mûǂan, ǁîb ge amaba gere mîsa. Tita ge ǀnai ge khomai toa-e hâ-i ǂkhanide ge ǁnama. ǀGui ǂkhanis ge The Truth That Leads to Eternal Life ti ge ǀon hâ. ǁNā ǂkhanis xoaǂams ge ti mûde ge ǂgae, tita ge hoa ǂkhanisa ǀgui ǃuis ǃnâ ge khomai. ǁNā ǂkhanisa ta ge khomai toa, o ta ge ge ǂan i amaba ta go hōsa.

Aprili 1972 tsoatsoa xu ta ge ǂgui ǂkhanin Jehovab ǃoaba-aon dina ge khomai. Tsî ta ge ū ta ge hâ dîdi ǃereamde Elobmîsa xu ge hō. Tita ge Jesub ǂkhōs ǃnâ ge hâ i ǁama-aob khami gere tsâ. ǁÎb ge ǀgui ‘Perelsab’ ge hō, o ūb ge hâ i xūn hoana ge ǁamaxū îb ǁîsa hō ǁkhā. ǁNā ǁama-aob khami ta ge dī ǂgao ta gere xūn hoana ǁnāxu tsî ge mîǁgui Jehovaba ǃoabasa. (Mat. 13:​45, 46) Desemberi 10, 1972 ta ge ge ǁāǁnāhe.

Kurib khaoǃgâ i ge ti ǁgûra tsî ti ǂkham ǃgâsab tsîna ge ǁāǁnâhe. Julib 1973 ta ge ǁnaetisa aimâba-aose ge ǃoaba tsoatsoa. Kaise a îsa aimâba-aos Anna-Catrins ge sida ǀhaohâb ǃnâ ge hâ i. ǁÎs ge Jehovaba kaise ge ǀnam-i. Sîm ge ge ǀnam gu tsî 1975 ge ǃgamme. Sîm ge 4 kuriga Strömsund ti ǀon hâ îsa ǃāros ǃnâ gere ǁan Swedenni ǃnâ. Aoǁnâ sîsenni ge ǁnāpa kaise ge ǁkhoaxa-i.

Ann-Catrin: Ti dadab ge ǀgapi ǁkhāǁkhāsensab ra dī hîna amaba Stockholms ǃnâ ge hō. Tita a ǃnona ǁkhâxa hînab ge ǁîba ǀhaodi tsî aoǁnâ sîsen-e ǃoa gere ūsao te. Ti mamas ge nēs xa ge ǃgâibahe tama hâ i tsî gere dītsâ îs ǁgau Jehovab ǃoaba-aona ama tama xūna ra ǁkhāǁkhāsa. Nēsas ge ge dī hō tama hâ i tsî ega ge ǁāǁnâhe. Tita ge 13 kurixa ta ge o ge ǁāǁnâhe tsî 16 kurixa ta ge o ge aimâba-ao kai. Umeas ǃnâ i ge aoǁnâ-aon ǂhâsiba ge hâ i tsî ta ge ǁnāpa ta ǁaeroba ǃoaba hâs khaoǃgâ ge ǀō-aisa aimâba-ao kai.

Mats hâm ǃgamme toa hâs khaoǃgâm ge kai ǂkhîba gere hōǃâ khoena huisa în amaba ǂan. ǁNā khoen ǁaegu î ge Maivor ti ǀon hâ ǂkham ǀgôarosa ge hâ i, ǁîs ge ǂgamǂgamsen ǀhurub ǃnâ kaise ge ǃgâi i xawe ǁnā ûiǀgauba ǁnāxu tsî ega ti ǃgâros ǀkha ǀguipa ge ǃoaba tsoatsoa. ǁÎra ge Giliada ǃoa 1984 ge ī tsî nēsi sîsabese Ecuadori ǃnâ ra ǃoaba.

“ǃGâina mû hōsents ra mâsib hoab ǃnâ” ti hâ ǀapemāsa ro ge saro ǁgaumâidi ǃnâ mati sao?

Mats: Sîm ge ǃnāsa ǁaeba ǀasa ǁgaumâide gere hō. Xawem ge dītsâ tsî Jesub aiǁgausa gere ǁgae, ǃgōsase ǁîb ǃgamǃgamsenxasiba. (Kol. 2:​6, 7) Aiǁgause, ǃgâsan ge xūna ǁîn ǃhaos ǁnaetigu ase gere dī tsîm ge sîma gere ǁkhāǁkhāsen tae-i ǃaroman ǀnî xūna ǀkhara ǀgaub ǃnâ gere dīsa. ǁÎn ǂâiǀgauba ǁkhāǁkhāsen tsîm ge ǃhaos xas tsîna ǃnāsase gere ǁkhāǁkhāsen ǂgao. Jesub aiǁgausam gere ǁgae ǀgara khamim ge gere mûǂan, kaise i ge supu isa ǁnaetiga sao tsî ǃgâiaǂgaosa sîm ǁgaumâis ǃnâ.—Psa. 1:​2, 3.

Ann-Catrin: ǀAsa ǁgaumâisam gere hō, om ge ǀasase ra ǃhana-e hais khami ge ī-i hîna soresa ǂhâ hâsa is kai ǁkhā. Jehovab ge ǁnās ǀkha “sores” khami sîma ge ība ī. (Psa. 84:11) ǁÎb ge khoexaǃnâ ǃgâsan ǀkha ge ǀkhae mî. Aiǁgause, Iranni ǃnâm ge hâǃnâ hâ i ǀhaohâb ge kaise ge ǂkhariro i xawen ge ǃgâsana ǃhaokhoeǃkhōǃoaxasiba gere ǁgau. Elobmîs ǃnâ da ra khomai khoen ǃhaokhoeǃkhōǃoaxasiba gere ǁgaun ǀkham ǀguiba ra ǁanǀhao khami ī ge gere tsâ. Sîm ge Iranni ǃnâ gere hâ ǂgao xawe i ge Julib 1980 Jehovab ǃoaba-aon sîsen-e ge mā-amhe tama hâ i. Tsîm ge ge mîbahe îm tsēs ǃnâ ǁnā ǃhūba xu ǂoa. Sîm ge ǁnās khaoǃgâ Kongoba ǃoa ge sîhe Afrikab ǃnâ.

ǂGuro ta ge ǁnâuo, Afrikaba ǃoam ra īsa o ta ge ge ā. Tita ge ǀaon tsî ǂhī ǁōn ǁnāpa hân xa kaise gere ǃao. Xawe î ge sîm ǃgamme hâ ǀhōsa ra hîna Afrikab ǃnâ gaxuse ǃoaba hâ ra ge mî: “Saro ge kaise nî ǁkhoaxabahe, î ge tā ǃao. Sîm ge a ǂan Afrikaba ro nî ǀnamsa.” ǁÎra ge amaba ge ǃhoa. ǃGâsan ge kaise ǀnamxaǃnâ. Afrikab ǃnâm 6 kuriga ǃoaba hâs khaoǃgâm ge ge mîbahe îm ǃhūba xu ǂoa, sîda sîsenni ge mā-amhe tama hâ i xui-ao. Afrikab xa ta gere tsâ ǀgaub xa ǂâi tsî ta ge gere ǀnom tsî Jehovaba ǃoa ge ǀgore, “toxopa mā-am re îm noxopa nēba hâ ro.”

Mâ ǀkhaega du ge hōǃâ Jehovab ǃoabas ǃnâ?

Mats: Sîm ǁgaumâis xa ǃaroma hâsem ge ǀgū ǀhōsaguside ǀnî hâ sîsabe ǀhōsa ra ge ūhâ-i ǃkharagagu ǃāde xu gere hā ra. ǀNî ǁgaumâidi ǃnâm ge 20 khoena ge ūhâ i Elobmîsam gere ǁkhāǁkhāna tsîs ge nēsa kai ǂkhîba gere mā-mi. Tātsē ta ge Afrikab ǃhūb ǃgâsan ǀnammi tsî ǃhaokhoeǃkhōǃoaxasib tsîna ǀuru tide. ǀHaohâgam gere sari om ge sîm audos ǃnâ gere ǁom. Xawen ge ǃgâsana ǂhâm ge hâ i xūn hoana gere mā mî ǀgâsan ge ī xawes tsîna. (2Kor. 8:3) Kaise ge ǀō-aisaba mî ī xū-i ge tsēs ǃnâ gere ī xūna ǁgamǀhaosa. Mâ tsēs hoas ǀams aim ge Ann-Catrin hâma ǂnû tsî ǁnā tsēs ǃnâ gere ī xūna ǁgam tsî Jehovaba gere gangan sîm ǀkhab ge hâ i xui-ao.

Ann-Catrin: Tita xa sa î ge ǃhūbaib ǂhawase hâ ǃgâsan ǀguiǃnâxasiba ǂkhîba gere māte. ǂGui gowagam ge ge ǁkhāǁkhāsen, aiǁgause Farsi, Frans gowab, Lugandab tsî Swahilib tsîna. Tsîm ge ǃkharagagu ǂgui ǃhaoǃnâbe xūn tsîna ge ǁkhāǁkhāsen. ǂGui ǃgâsana ǁkhāǁkhās ǀkham ge ge hui, ǃgâi ǀhōsana kuru tsîm ge ǂkhîb ǀkha Jehovaba gere ǃoaba.—Sef. 3:9.

Jehovab ǃkharagaguse îxa xūna kuru hâ ǀgaub tsînam ge ge mû. ǀAsa ǁgaumâisam gere ūǃoa ǃnās hoasab ge Jehovaba ge hâ i tsî gere daoǁgau mî matim nî ǃgûsa. ǁÎb ge sîm ga aitsama ǁkhāǁkhāsen tama hâ xūna ge ǁkhāǁkhā mî.

Mâ ǃgomsina ro gere hōǃâ tsî tae-e ge hui ro î ro mâǀgai?

Mats: ǀNî ǁaegu aim ge ǃkhargagagu ǀaena gere hōǃâ, malarias khami. Tsî Ann-Catrins ge ǃâubasen tamam ge hâ i ǃhôade gere ǃkharuǃnâ. Sîm kaira ra ǁgûra xas tsînam ge gere ǂâiǂhansen. ǁNā-amgan ge sîm ǀaokhoena ra ǃgôaǃgâ sîm ǁgûna gere kōǃgâ na, sîm ǁgaumâidem gere dī ǁaeb ai. ǁÎn ge ǂgomǂgomsase sîm ǁgûna ǃnūǃnâxasib, ǂkhîb tsî ǀnammi ǃnâ gere kōǃgâ. (1Tim. 5:4) ǃNūseba xum dī ǁkhā-i hoa-em gere dī xawem ge ǀnî ǁaegu ai gere ǀhapitsâsen tsî gere ǂâi ǁîra ǀgūsem ga hâ ǁkhā ti.

Ann-Catrin: Kongob ǃnâm 1983 ra ǃoaba hîna ta ge ǀgaisase cholerasa ge ǀaesen. ǀAeǃkhō-aob ge Matsa ge mîba “nētsē nē khoesa nē ǃhūba xu ūǂui.” Saora tsēs aim ge ǁnā ǃhūba ge ǂoa. Xawe ǀgui ǀgaus Swedena ǃoam nî īs ge anikunis khoena tani tamas ǀkha.

Mats: Kaisem ge gere ā ǂâim ge xui-ao ǁkhawam sîsabese ǃoaba ǁkhā tide ti. ǀAeǃkhō-aob ge ge ǂâi hâ i Ann-Catrins ǁkhawa ǂgau tide ti xawes ge ǁîsa ge ǂgau. Tsî kurib khaoǃgâm ge ǁkhapa Kongoba ǃoa ge oa. Tsî ǂkhari ǀhaohâb Lubumbashi ti ǀon hâ ǃās ǃnâ sī ge ǃoaba, ǃgâsan ge Swahili gowaba ǁnāpa gere ǃhoa.

Ann-Catrin: Lubumbashis ǃnâm hâ, hîna ta ge ge ǀgamǀkhā xawe î ge babakiro-e ǃnae-e tamase ge ǁō. Omarisa tsoatsoasam ge ǀapeǁgui tama hâ i xawes tsîn hoan ǃnâ ta ge kaise ge tsûaǂgao, sîm ǀgôaro-i ge ǁō o. Xawe ǁnā ǃgom ǁaeb ǃnâb ge Jehovaba ǃâubasen tamam ge hâ i ǀkhaeba ge mā mî. ǂGui Elobmis ǁkhāǁkhādem ge ge tsoatsoa. Kurib xa ǀoro ǁaeb ǃnâb ge ǀhaohâba 35 ǃgâsana xu 70 ǃgâsan ǀkha ge ǀarosen tsî î ge ǀhaode hâǃnâs tsîna 40 sa xu 220 ǀkha ge ǀarosen. Aoǁnâ sîsenni ǃnâm kaise ge ǀhape-i tsîb ge Jehovaba sida ǁgūtsâdi hoade ge ǀkhae tsîs ge ǁnāsa ǃgâise ge tsâ kai te. Noxopam ge sîm babakiro-i xa ǂâi tsî ra ǃhoa. Mûǂuim ge ra matib Jehovaba paradais ǃnâ sîm tsûba nî ūbē ǀgausa.

Mats: Egas ge Ann-Catrinsa tsau tsî ǂkhabusase gere tsâ. ǁKhā ǁaeb ai ta ge tita tsîna ge ǂanǂui kankersa ta ūhâsa tsî ta kai ǃhôasa ǂhâ hâsa. Nēsi ta ge ǃgâise ra tsâ tsîs ge Ann-Catrins tsîna ǁîs ǁkhāsib ǃnâ ǁkhās a-i hoa-e ra dītsâ îs Jehovaba ǃoaba.

Mûǂanam ge ge sîm ǀguim ǃgomsina ǃkharuǃnâ tamasa. ǃHaoǃnâbe ǃkhams ge Rwandab ǃnâ 1994 toas khaoǃgâ, om ge ǃgâsana ǃkhūsabe kamgu ǃnâ sī gere sari. ǁÎn ǂgoms, mâǀgais tsî ǃhaokhoeǃkhōǃoaxasibam ge ge mû, matikō ǃgom mâsigu ǃnân ge hâ-i xawe. Mûǂanam ge ge Jehovab ǀgaiba ūhâsa îb ǁîb khoena mâ ǃgomsi-i hoa-i ǃnâ huiǂui tsî ǀgaiba nî māsa.—Psa. 55:22.

Ann-Catrin: ǁNâub beros māǁnâsa ǃoam garu 2007 hînam ge Ugandab ǃnâ ǀnî hâ ǃgomsiba ge hōǃnâ. ǀApeǁguib khaoǃgâ da ge 25 sîsaben tsî Betels omaris ǁanin ǀkha Nairobi, Keniaba ǃoa ge garu-i. Keniab di xrens tawa da nî sīs aiǃâ î ge kai loriba sida ǃnâ ge ǃnariǂgâ. ǃNari-aob tsî 5 ǀhōsan sîm din ge ǃkhais ai ge ǁō. Tsîs ge ǀgui ǃgâsasa ega ǀaeǃkhō-oms ai sī ge ǁō. Sîm ǀhōsana ǁkhapa mûsa ǃoam ge ra mûǂui.—Job. 14:​13-15.

Sorosi tsûna xum ge ge ǂgau. Xawe Mats hâm tsî ǁnā audos ǃnâ ge hâ i ǃgâsan tsîn ge aiǃgû tsî ǂâiǂhansende gere hōǃâ ǁnā audo tsūkeǃgâb xa ǃaromahe hâsa. Tita xa î ge nē ǂâiǂhansende ǃui-a gere hāǂamte tsî ǀgaisa ǂgao ǁōba da ūhâ khami gere tsâ kaide. ǁNās ge ge ǃaoǃaoxa i. Jehovaba ǃoa ǀgore, Elobmîsa khomai tsî sîm a ǃgâibahe xoadi xa ǂâiǃgâs ge ge hui mî îm ǃnomsase tsâ. ǀAeǃkhō-aona ǃoas tsînam ge ge ī, ǂan ge īna nē ǂâiǂhansenden mati nî ǀaeǃkhōsa tsî ǁnās ge kaise ge hui mî. Nēsîm ge ǁnātikōse ǂâiǂhansen tama xawem ge aiǃgû tsî Jehovaba ra ǂgan îb ǁnān hîna ǁnāti ī mâsiga ra hōǃâna ǁkhaeǂgao.

Hōǃâ du ge ǃgomsina du gere sîsenǂam ǀgaus xa, o du ge ge mî “Jehovab ge ora ǃupu-i khami ge tani mî.” Tae-e du gere ǂâibasen?

Mats: Khoe-i ga ora ǃupuna tani tsî ǁkhauba, khamib ge Jehovaba ǀnamxaǃnâse ge ǂkhâǃnâ mî mâ ǁgaumâi-i hoa-i ǃnâ. Hoaǁaem ge ǂhâm ge hâ i xūna ge ūhâ i. ǀNî ǁaegu aim ge ǂhâm hâs ǂam-ai ǃnāsase ge ūhâ i. ǀGui ǀgaub Jehovab ǀnammi tsî kōǃgâsam ge hōǃâs ge ǂGaeǂguira sorosa xu.

Ann-Catrin: ǀGui aiǁgaus xa ta ge ra ǃhoa ǂgao, Jehovab ǀnamxaǃnâ ǁkhaeǂgaosam ge hōǃâsa. ǀGuitsē ta ge ge ǁkhami-e tsî ge mîbahe ti dadab Swedenni ǃnâ ǀaeǃkhō-oms ǃnâ ǁgoe tsî ǀgaisase ǀaesen hâsa. Matsi ge noxopa ǂkhabusase gere tsâ, Malariasab ge ūhâ i xui-ao. Tsîm ge mari-e ge ūhâ tama hâ i Swedenna ǃoa oasa. ǁNās ǀkham ge ge mîǁgui audosa ǁamaxusa. ǀGam ǃkharagagu khoen xam ge ǁnās khaoǃgâ ge ǁkhami-e. ǂGurom ge ǃgamme hâ khoe-aogu ra xa ge ǁkhami-e, ǁîra ge sîm mâsib xa ge ǁnâu. Tsî ra ge ǀgui khoe-i ǃaroma ra matare ūs marisa ūhâs xa ge ǃhoa. ǀGamǁîses ge ǁkhara ǃgâsasa ge ǁkhami hîna ge mari-e sâu hâ isa boksiros ǃnâ. Nē boksis ge “ǂhâsib” ti ge xoa-aihe hâ i. ǃNubu ǁaerob ǃnâb ge Jehovaba ǂhâm hâ huiba ge mā mî.—Heb. 13:6.

Jehovaba du ǃoaba hâ 50 kurigu ǃnâ du ge tae-e ǁkhāǁkhāsen?

Ann-Catrin: ǁKhāǁkhāsen ta ge ge sida ǀgaib ge “ǃnōs tsî ǂgomǃgâs” tsîn ai ǃgaoǃgaosa. Jehovaba da ga ǂgomǃgâ, ob ge ǁîba sida nî ǃkhamba. (Jes. 30:15; 2Kro. 20:​15, 17) Jehovaba ǃoabas ǃnâ-ū da ge mâ ǁgaumâis hoas ǃnâ ǀkhaeba ra hō. ǀNî hâ ǀgaub ai da hō ǁoase.

Mats: ǂHâǂhâsa xū-i hîna ta ge ǁkhāǁkhāsen i ge, Jehovab ai ǂgomaiǂnûisa mâ ǁgâiǀā-i hoa-i hîna ta ra hō-i ǃnâ tsîb ge ǁîba tita nî hui. (Psa. 37:5) Noxopab ǁnā mîmâisa ǁāǃnâ tama. Jehovab ra hui mî ǀgaubam ge noxopa ra mû,nēsîm ūhâ ǁgaumâis ǃnâ, Myanmars Betels ai.

Ti ǁkhoreb ge ǂkhamkhoen hîna Jehovab ǃoabas ǃnâ ǃnāsa-e ra dī ǂgaon, Jehovab ǂgomǂgomsa ǀnamma nî hōǃâsa. ǂGomǃgâm ge ra ǁnā ǀnaman nî hōǃâsa, mā-amnan ga o îb Jehovaba hui nî hân a ǃkhai-i hoa-i ai.