Elobmîsa du go Jehovab di ǀHûǀguitimî-aon ǀkha ǁkhāǁkhāsens ǃnâ-ū du ge amaba ra mûǃā. Sadu go ǁkhāǁkhāsen gagasi xūn ge go khoakhoa du. Nēn ge nēsi ǂâibasens hānîǁaeb ûib disa ra mā du tsî ǀkhaegu paradais ǃhūbaib ai ûis diba Elob Gaosib ǂgaeǂguis ǃnaga. Sadu ǂgoms Elobmîs ǃnâs ge go ǀgaiǀgaihe tsî sadu ra ǀhaohâb ǀkha sîsenǁae khami du ge ǀkhaega nî hōǃâ. Sadu ge nēsi ra ǃgôaǃgâ Jehovab mati ǁîb khoen ǀkha nētsē ra sîsen ǀgausa.—Sax. 8:23.

Sadu nēsi ǁāǁnâsa ra ǂhomisenba khami du ge nē hoaǃnâ-aixa ǁkhāǁkhādi Elobmîs dide ǃgûǃgâsa xu nî ǀama, ǀhaohâb ǃûi-aogu ge nēsa sadu ǀkha nî dī. (Heb. 6:1-3) Ab Jehovaba ǁnān hîna ǁÎba ǂansa ra dītsâna ǀkhae re tsî ǁîna mîǁguib hâ mādawa-ams tsîna mā.—Jhn. 17:3.

1. Tae-i ǃaroma du ra ǁāǁnâhe ǂgao?

2. Jehovaba a ham?

   • “ǃKhūb ge a ǁnā Elo, ǀgapise ǀhommi ǃnâs kas, ǃnaga ǃhūbaib ais kas hoasa; ǀnîb ge a ǀkhai.”—Deu. 4:39.

   • “În ǂan, sats ǀguits, ǀons âts a ǃKhūts ǀguits, Hoan xa ǀGapisa, ǃhūbaib hoaragab ai.”—Psa. 83:18.

3. Tae-i ǃaroma i a ǂhâǂhâsa Elob ǀonsa sîsen-ūsa?

   • “Nēti ǁnâi ǀgore du re: Sida Îtse ǀhommi ǃnâ hâtse, sa ǀonsa as khaihe re.”—Mat. 6:9.

   • “Mâ-i hoa-i ǃKhūb ǀonsa ra ǂgaiǀî-i nîra ǃgâiǃō xui-ao.”—Rom. 10:13.

4. Mâ mîde Elobmîs ǃnâ ra sîsen-ūhe Jehovaba ra ǁguiǃāde?

   • “ǀAmo Elob, ǃKhūb ǀkhâuǀamdi ǃhūbaib didi di Kuru-aob.”—Jes. 40:28.

   • “Sida Îtse ǀhommi ǃnâ hâtse.”—Mat. 6:9.

   • “Elob ge a ǀnam.”—1Jhn. 4:8.

5. Jehovaba da tae-e a mā ǁkhā?

   • “Tsîts ge ǃKhūb sa Eloba nî ǀnam sa ǂgaob hoab ǀkha, sa ǀoms hoas ǀkha, sa ǁnâuǃāb hoab ǀkha tsî sa ǀgaib hoab ǀkha.”—Mrk. 12:30.

   • “ǃKhūb sa Elobats ge nî ǀgoreǀî tsî ǁîb ǀguiba nî ǃoaba.”—Luk. 4:8.

6. Tae-i ǃaroma du Jehovab ǃoa-ai ǂgomǂgomsase ra hâ ǂgao?

   • “Gā-aise ī ti ôa, îts ti ǂgaoba ǃgâiaǂgao kai, î ta tita ga ǃkhāǃkhāba xū-e ǃeream ǁkhā.”—ǂKhm. 27:11.

7. Ham-e ǃoa du ra ǀgore tsi ham-i ǀons ǃnâ-ū?

   • “Amase, amase ta ra mîba go: ǁGûba go ga ǂgan xūn hoanab ge sago ti ǀons ǃnâ nîra mā.”—Jhn. 16:23.

8. Mâna a ǀnî xū hîna du a ǀgoreba ǁkhāna?

   • “Nēti ǁnâi ǀgore du re: Sida Îtse ǀhommi ǃnâ hâtse, sa ǀonsa as khaihe re! Sa gaosiba ab hā re, sa ǂâisa as ī, ǀhommi ǃnâs ra īs ǁkhās khami ǁnāti ǃhūbaib on ai, nētsē sida tsēkorobe pereba mā da, î sida ǀhapina ǀûba da, sida ǀhapixabena da ra ǁkhāti ǀûba khami. Î tā ǃâitsâb ǃnâ ǂgaeǂgui da, î ǂkhababa xu ore da.”—Mat. 6:9-13.

   • “Tsî nēb ge ǁkhoaǂgaosib, ǁîb ǃoa da ūhâba: Xū-e da ga ǁîb di ǂâis ǃoa ǂgano, ob ge ra ǁnâu-am da.”—1Jhn. 5:14.

9. Jehovaba tae-i ǃaroma khoe-i ǀgorede ǁnâu-am tide?

   • “ǁNāǃnubai gu ge ǃKhūb ǃoa nîra ǂgai, xawe ǁîb ge ǁîga ǁnâu-am tide . . . ǁîgu ge tsūdī amaga.”—Mix. 3:4.

   • “ǃKhūb di mûra ge ǂhanu-ain ai hâ, tsî ǁîb di ǂgaera ǀgores ân ai xuige; xawe ǃKhūb di ais ge ǂkhababa ra dīn ǃoagu hâ.”—1Pet. 3:12.

10. Jesub Xristuba a ham?

    • “Ob ge Simon Petruba ǃeream tsî ge mî: ‘Xristu, ûitsama Elob di Ôats kom satsao.’”—Mat. 16:16.

11. Jesuba tae-i ǃaroma ǃhūbaiba ǃoa ge hā?

    • “Khoen Ôab ge hā tama, ǃoabaheb nîse, tsîb nî ǃoaba tsî ǁîb ûiba māse ǂguin di orehesa ǃoa.”—Mat. 20:28.

    • “Ob ge ǁîn ǃoa ge mî: Nau ǃādi ona ta nî ǃgâiǂhôas Elob gaosib disa aoǁnâ; ǁîs ǃoa ta kom ge sîǂuiheo.”—Luk. 4:43.

12. Mati da Jesub ǁguibasa da ra gangan ǃkhaisa a ǁgau ǁkhā?

    • “Tsîb ge hoana ge ǁōba, în ûitsamana tā ǁî-aitsama ûibasen, în ǁîna ge ǁōbab tsî ǁîna ge khâibaba ûiba ti.”—2Kor. 5:15.

13. Jesuba mâ ǃharosa ūhâ?

    • “Māhe ta hâ tita hoa ǀgaiba ǀhommi ǃnâ tsî ǃhūbaib ai.”—Mat. 28:18.

    • “ǁNā-amagab ge Eloba ǁîba kaise ge ǀgapiǀgapi, tsî ǀons, ǀondi hoadi ǃnā hâsa ge mā bi.”—Fil. 2:9.

14. ǂGom i du ra ǂGaeǂguira soros Jehovab di ǀHûǀguitimî-aon dis a ‘ǂgomǂgomsa tsî gā-ai ǃgāsa’ hîna Jesub xa ǁgaumâihe hâga?

    • “Mâba ǁnâi ǂgomǂgomsa tsî gā-ai ǃgāb, ǁîb ǀhonkhoeb ge oms din ǂama mâiba, ǁaeb aib nî ǁîna ǂûmāse?”—Mat. 24:45.

15. ǃAnu gagaba khoeba?

    • “Ob ge ǀhomǃgāba ǃeream, tsî ge mîǀî si: ‘ǃAnu Gagab ge nîra hāǂam si, tsî Hoan xa ǀGapib di ǀgaib ge nîra somsomǂam si; ǁnā-amaga i ge sasa xu nîra ǃnae ǃAnu-e, Elob Ôab ti nîra ǂgaihe.’”—Luk. 1:35.

    • “Sadu hîa ǁnâi ǂkhaba du ga ǂano, sadu ôana ǃgâi xūna māsa, matikōseb ǁnās ǂamai ǀhomsi ǁGûba ǃAnu Gagaba ǂgan bi rana nî mā.”—Luk. 11:13.

16. Jehovaba mati ǁîb ǃanu gagaba ra sîsen-ū?

    • “ǃKhūb di mîsa xu gu ge ǀhomga ǂnubihe hâ, tsî ǁîgu di ǂnubis hoasa ǁîb ams di gagasa xu.”—Psa. 33:6.

    • “Xawe go ge sago ǃAnu Gagab di ǀgaiba nîra hō, sago ǂama nîra hāba; o go ge nî ti ǃkhō-amao . . . ǃhūbaib di ǀams kōse.”—ǃNǃkh. 1:8.

    • “Î du nēsa ǂguro ǂan, kēbosis Xoas dis xares ǁî-aitsama ǁguiǃāsa xu hâ tamasa. Tātsē i kēbosi-i xare-e khoe-i di ǂâisa xu ūǀkhīhe tama hâ xui-ao; xawe ǃAnu Gagab xa doeǁgarihe hâsen ge ǃanu khoen Elob dina gere ǃhoa.”—2Pet. 1:20, 21.

17. Elob Gaosiba a tae?

    • “Xawe ǁnā gao-aogu di tsēdi ǃnâb ge Elob ǀhommi diba, gaosiba nîra ǂnûikhâi, ǀamosib kōse hîkākāhe tideba, tsîb ge ǁnā gaosiba ǀkhara ǁae-i xare-e ǁnābahe tide: ǁÎb ge nau gaosidi hoade nîra ǂkhūǂkhū tsî hîkākā, xawe ǁîb ge ǀamosib hoab kōse nîra hâhâ.”—Dan. 2:44.

18. Elob Gaosiba xu du mati nî ǀama?

    • “Ob ge Eloba mûdi âna xu ǁgamron hoana nî ǀombē; ob ge ǁōba ǃaruǀî hâ tide, tsî ǃoa-i xare-i tsî ā-i xare-i tsî ǃgomsi-i xare-i ǃaruǀî hâ tide; ǂguron go ǃgôa-ī xui-ao.”—ǂJ.ǂHa. 21:4.

19. Mati du a ǂan Gaosib ǀkhaegu ǀgūǁae nî ǀkhī ǃkhaisa?

    • “Tsî ǀKheraǃhommi aib ge ǂnû, o gu ge ǁkhāǁkhāsabega ǁîb ǃoa ǀguri hā tsî ge mî: Mîba sige re, mâǁaen nēna nîra īsa, tsî mâs a saos sa hās tsî nē hâ ǁaeb ǀams disa ǃkhaisa. Ob ge Jesuba ǃeream tsî ǁîgu ǃoa ge mî: ‘. . . Nē ǁaes ge nau ǁaes ǃoagu tsî nē gaosis ge nau gaosis ǃoagu nîra khâima tsî ǂhī ra ǀaesenaigu, ǃâtsūǀkhāgu tsî ǃhūǂgubigu tsîgu ǃkharaga ǃkhaidi ǃnâ nîra ī xui-ao. Tsî ǃgâiǂhôas gaosib dis ge ǃhūbaib hoab ai nîra aoǁnâhe, hoa ǁaedi mîdansa ǃoa; tsî ǁnāǃnubais ge ǀamsa nîra hā.’”—Mat. 24:3, 4, 7, 14.

    • “Îts ǂan nēsa, ǀuni tsēdi ǃnâ gu ǃgom ǁaega nîra hā ǃkhaisa. Khoen nîra ǁîǀnamsenxa, mariǃgunuxa, anxa, ǃgurixa, ǃkhāǃkhāxa, ǁgûna ǁnâuǀnamoǃnâ, ganganoǃnâ, ǃanuoǃnâ, ǀnamoǃnâ, ǂkhîbaguoǃnâ, ǀhoexa, ǀgauoǃnâ, ǃkhausa, ǃgâina ǃoa ǀnamoǃnâ, ǀapexūxa, ǂgapaǂgaoxa, khūkhūsenxa, turaba Elob ǃgâ-ai ra ǀnamna; eloǃaoǃgâxasib di īsiga ūhâ, xawe ǀgaib âba ra ǀoana. Nēti īna xu ǂgō.”—2Tim. 3:1-5.

20. Mati da a ǁgau ǁkhā Gaosib sida ǃgao a ǂhâǂhâsa ǃkhaisa?

    • “ǂGurosa ǁnâi Elob di gaosib tsî ǁîb di ǂhanu-aisib tsîkha ôa.”—Mat. 6:33.

    • “ǃNubaib ge Jesuba ǁîb ǁkhāǁkhāsabegu ǃoa ge mî: ‘Mâ-i hoa-i ti khaoǃgâ ra hā ǂgao-e, a-i ǁî-aitsama ǀūxūsen, î-i ǁî-i ǃgâuhaiba ūkhâi tsî tita sao.’”—Mat. 16:24.

21. Satanni tsî demongu tsîna a ham?

    • “Sadu ge ǁgâuaba ǁgûb ase ūhâ . . . ǁÎb ge khoen ǃgamao ge i, tsoatsoasa xu.”—Jhn. 8:44.

    • “Tsî kai draki ge ge aoǂuihe, kaira ǀaob, ǁgâuab tsî Satanni ti ra ǂgaiheb, ǃhūbaib hoaragaba ra ǂgaeǂhapuba, ǁîb ge ǃhūbaib ai ge aoǁnâhe, tsî ǀhomǃgāgu âb ge ǁîb ǀkha ge aoǁnâhe.”—ǂJ.ǂHa. 12:9.

22. Satanna tae-e Jehovab tsî ǁîb ǃoaba-aon tsîna ge ǂgari-am?

    • “Os ge tarasa ǀaob ǃoa ge mî: Sim ge ǂûn nē ǃhanab ǃnâ hâ haidi din xa ra ǂû; xawe ǂûn nē ǃhanab ǁaegub ǃnâ hâ hais din xab ge Eloba ge mî: ǁÎn xa tā ǂû, î ro ǁîna ǁkhāti tā tsâǀkhā, ǁō ro tidega. Ob ge ǀaoba taras ǃoa ge mî: Tātsē ro kom ǁō tideo; xawe Elob ge a ǂan, ǁîs xa ro ga ǂû tsēsa xu di saro di mûde nî khowahe ǃkhaisa, o ro ge Elob ǁkhāb khami nî ī, tsî ro ge nî ǂan mâ-i a ǃgâi tsî mâ-i a ǂkhaba ǃkhaisa.”—Gen. 3:2-5.

    • “ǁGoasib ge Satanna ǃKhūba ǃeream tsî ge mî: ‘Khōba khōb ama! Tsî mâ xū-i khoe-i ūhâ-i hoa-e i ge ra mā ǁî-i di ûib ǃaroma.’”—Job. 2:4.

23. Mati da a ǁgau ǁkhā Satanni di ǂgari-ams ama tama hâ ǃkhaisa?

    • “Îts ǁîba [Eloba] ǃoaba ǀoasa ǂgaob ǀkha.”—1Kro. 28:9.

    • “ǁŌ ta nîs kōse ta ge ti ǂhauǃnâsiba tita xu sîsenbē tide.”—Job. 27:5.

24. Khoena tae-i ǃaroma ra ǁō?

    • “ǁNā-amaga, ǀgui khoeba xub ge ǁoreba ǃhūbaib ai hā khami, tsî ǁoreba xu ǁōba, tsîb ge ǁōba ǁnāti hoa khoena ge ǃgûǃnâǃganu, hoan gere ǁore amaga.”—Rom. 5:12.

25. ǁŌ hâ khoen mâsiba a tae?

    • “Ûitsaman ge a ǂan xui-ao, ǁōn nî ǃkhaisa, xawe ǁō hân ge xū-i xare-e ǂan tama hâ.”—Aoǁn. 9:5.

26. ǁŌ hâ khoena tae-i ǃâubasensa ūhâ?

    • “Tsî ta ge ǃâubasensa Elob ai ūhâ, ǁîn ǁkhāti ūhâsa, ǁō hâna xu khâi-i nîra hâ ti, ǂhanu-ain tsî ǂhanuoǃnân tsîn di-e.”—ǃNǃkh. 24:15.

27. Matikō khoena ǀhommi ǃnâ Jesub ǀkha sī nî ǂgaeǂgui?

    • “Tsî ta ge ge kō; tsî mû, ǁKhaob ge Sionǃhommi ai ge mâ i, tsî ǁîb ǀkha ǀguikaidisi tsî hakadisihakaǀaǀoadisin, ǁîn di ǃūdi ai ǁîb dis tsî ǁgûb di ǀonsa xoamâihe hâna.”—ǂJ.ǂHa. 14:1.

Sadu Elobmîs di ǁkhāǁkhāsens ǃnâ-ū du ge ǂansa go ūǂgā Jehovab sado xu tae-e ǃâubasen hâs tsî mati du ǁîb di ǂhanu-ai ǂgaoǀkhādi ǀnōba nî sīǃnâ ǀgaus tsîna. ǁKhāǁkhāsen du go xūna ûiǂuis ge ǀkharaǀkharana sadu ûi ǀgaub ai nî hau tsî sadu khoexa tanisen ǀgaub ais tsîna. Nēsi du ge go mîǁgui, Jehovab di ǂhanu-ai ǀgaugu ai du nî ûisa, ǁnās ǀkha du ge ǃgâi ǃharos ǃnâ mâ ǃgâiǂhôas sîsenna dīsa.

Sao ra dîde ôaǃnâs ge nî hui du î du Jehovab di ǂhanu-ai ǂgaoǀkhāde ǃamkuse sadu ǂâis ǃnâ ūhâ tsî nî ǂâiǂâi du ǀnî xūn sadu a dī ǁkhāna î du mā-amsa sîsenao kai. Nē ǂans ge sado ǂhâǂhâsasib ǃgâi ǂâiǂâisensa ūhâs tsî Jehovaba ǃgôasiba ūhâbas diba nî mā du.—2Kor. 1:12; 1Tim. 1:19; 1Pet. 3:16, 21.

Nēs kōse du go hās ge ra ǁgau Jehovab ǂgaeǂguisa du ra ǃgôaǃgâsa tsî ra ǁîb ǀapeǂhumis ǃâ kai ǂgaosa. Dîdi tsî xoadi hîna nēpa ra hō-e di ge nî hui du i du Jehovab daoǁgausa du ra ǁnâuǃā ǃkhaisa ǁgau, ǀhaohâb ǃnâs kas, omaris ǃnâs kas tamas ka io ǂgīǂgōsi xūn nē ǃhūbaib din ǃnâs kas. Jehovab daoǁgaus ǁkhāǁkhā da tsî gagasise omkhâi das disa da ge kaise nî ǃgôaǃgâ. Nēs ge ǀhaohâb ǀhaodi tsîna ǃkhōǂgā hâ hîna du sadu mâsib ra mā-am khami nî ǁhaoǃnâ de.

Nē ǃâb ge hoaǁae mâsib ra mā-am khami aoǁna sîsenni ǃnâ ǂoas di ǂhâǂhâsasiba ra ǃhoaǃgao tsî nau khoena ra hui în Jehovaba ǂan tsî tae-eb khoesiba ra dības tsîna. (Mat. 24:14; 28:19, 20) Tsî nēs ge sadu māǁnâsens hîna du ge Jehovab ǃoa-ai a dīs di ǂhâǂhâsasib nî ǁgau tsî sadu ǁāǁnâs tsîna. ǂGomǃgâsiba du ge nî ūhâ Jehovab sadu khoexaǃnâsiba ra ǃgôaǃgâ ǃkhaisa hîna du ge ǁîb ǀons ǃnâ a ǁgauba.

1. Xristeǁîn di ǃharosa a tae ǃgameb xa? Mâ Elobmîs ai ǃgaoǃgaosa ǃaromas ǃgao ǀguin Xristeǁîna a ǀgora ǁkhā?

   • “Ob ge ǃeream, tsî ǁîgu ǃoa ge mî: Khomai tama go kha ǁnâi hâ, ǁîra ge kurub ge aob tsî taras ase a kuru ra ǃkhaisa. Tsî ge mî: ‘ǁNā-amagab ge khoeba ǁgûb tsî ǁgûs tsîra ǁnāxū, tsî taras âb ai nî ǂgāmâisen, o ra ge nî ǀgui ǁgan kai.’ ǁNā-amaga ra ge ǀgam tama, tsî a ǀgui ǁgan. Elob xa ǁnâi ǃgaeǀhaohe hâ-e i ge khoe-e ǀgora tide. Tarasa ga ǁnāxūb hoab, ǀaiba xu i ga ī tama io, tsî ǀkharasa ga ǃgameb ge ra ǃgamekhôa.”—Mat. 19:4-6, 9.

2. Tae-i ǃaroman ǁnān hîna aob tsî tarase ra hâǀhaona ǂanǃgâsa ǃgameba nî ūhâ? ǃGame du ga o, ǂan î du a sadu ǃgameb ǂhanub xa ra ǂanǃgâhesa?

   • “ǁÎna ǂâiǂâiǃnâ re, în ǂamkhoegu tsî ǀgaisagu tsîga ǃnaga hâba, în ǁnâuǀnam.”—Tit. 3:1.

   • “Ab ǃgameba hoan tawa ǃgôasib ǃnâ ūhâhe, îb ǃgame kharoba ǂnao-ose ī, ǀai-aon tsî ǃgamekhôa-aonab ge Eloba nîra ǀgoraǃgâ xuige.”—Heb. 13:4.

3. Sadu ǃereamsa a tae omaris ǃnâ?

   • “ǁNâu re ti ôatse, saob di ǂgōǀausa, îts saos di ǁkhāǁkhāsa tā ǂkhā.”—ǂKhm. 1:8.

   • “Aob ge a taras di dana xuige, Xristub a ǁkhāti ǀhaohâb di dana khami . . . Sago aogo sago taradi ǂûde ǀnam, Xristub ge ǀhaohâba ǀnam.”—Efe. 5:23, 25.

   • Tsî sago ǁgûgo, sago ôana tā ǁaib ǃoa ǁgonǁgon, î go ǁîna ǃKhūb ǂgōǀaus tsî ǁnamas tsîra ǃnâ kaikai.—Efe. 6:4.

   • “Sadu ǀgôado, sadu îna ǁnâuǀnam hoa xūn ǃnâ; ǁîs a ǃKhūba ǃgâiba xuige.”—Kol. 3:20.

   • “Saso taraso, saso aoga ǃnaga hâba.”—1Pet. 3:1.

4. Tae-i ǃaroma da ûiba ǃgôasiba nî ūhâba?

   • ‘Elob ge hoana ûib tsî ǀoms tsî hoa xūna ra māo. ǁÎb ǃnâ da ra ûi, tsî gon tsî hâ xui-ao.’—ǃNǃkh. 17:25, 28.

5. Tae-i ǃaroma da khoe-e ǃgam tide, ǃnae-e tama ǀgôa-e ǃkhōǂgā hâse?

   • ‘Tsî aogu ga ǂnoagu tsî gu ga ǀgamǀkhā hâ tara-e ǂnauo, tsî i ga ǁōǁōsa ǂkhôa-i ga hâo, ots ge nî mā ǀomsa ǀoms ama.’—Eks. 21:22, 23.

   • “Sa mûra ge tita kuruhe tama ta hâ hîa ge mû, tsî sa ǂkhanis ǃnâ di ge ǁîdi hoade xoamâihe hâ, ǁnā tsēdi hîa nî hādi di ǀguis xawes ganupe a ǀkhai hîa.”—Psa. 139:16.

   • ‘ǃKhūb ra ǁkhan . . . ǃomgu ǀhapioǀaoba ra ǂnâxū ga.’—ǂKhm. 6:16, 17.

6. Eloba tae-e ǀaob xa ra mîmā?

   • “Ūdawasen du nî . . . ǀaoba xu, tsî ǀhomǀomhe hâ-e xu.”—ǃNǃkh. 15:29.

7. Tae-i ǃaroma da sida ǃgâsana nî ǀnam?

   • “ǀAsa mîmā-e ta ra mā go: ǀNamgu go nî, ti; tita ge sago ǀnam is ǁkhās khami go nî sago ǀnamgu. Nēs tawan ge hoana nî mûǂan, ti ǁkhāǁkhāsabe go asa, ǀnamguba go ga sago ǃnâ ūhâo.”—Jhn. 13:34, 35.

8. ǂHīǁō-i tamas ka io ǁkhōǁkhōsa ǁō-e nau khoena ǂhīsa xu ǂgōsens ǃaroma, tae-e i ǀaesen hâ khoe-e nî dī? (a) ǃKhōǂgāgus tsî ǁoagus tsîna i ge tā nî dī? (b) Tā du ge ǁgaise nî tsâ ǀnîn ga ǁîn omde ǃoa ǁkhau du tama io? (c) Tae-i ǃaroma i ǂhīǁō-e ūhâ khoe-e māsenxase ǁî-i di ǀaoba nî ǃâi kai ǃgame-i nîs aiǃâ? (d) Tae-i ǃaroma i ǂhīǁō-e ūhâ khoe-e ǁāǁnâhe nîs aiǃâ mûǂam ra ǃgâsaba nî mîba?

   • “Î du tā khoe-e xū-e surude, ǀnamgus ǀguis; nau-e ra ǀnam-i ge ǂhanuba dīǀoaǀoa hâ xuige. Nēn: . . . ǁÎn kom nē mîs ǃnâ ra ǃkhōǀhaoheo: Sa ǀgūkhoebats ge nî ǀnam sats ǁkhāts khami. ǀNammi ge ǀgūkhoeba tsū xū-e dī tama hâ, tsîb ge ǀnamma a ǂhanub di dīǀoaǀoasi.”—Rom. 13:8-10.

   • “A i mâ-i hoa-e tā ǁî-i ǃgâib xa ǀgui ǂâi, î-i ǁkhāti nau-i ǃgâib on xa ǂâi.”—Fil. 2:4.

9. Tae-i ǃaromab Jehovaba nau khoena da nî ǀûba ǃkhaisa ra ǃâubasen?

   • “Î du tanibagu, î du ǀûbagu, nē-i ga nau-i ǃoagu ǀauxū-e ūhâo; Xristub ge sado ǀûbas ǁkhās xase sado ǁkhāti dī.”—Kol. 3:13.

10. Tae-e da nî dī ǃgâsa-i ga sida xa ǂhumiba ǃhoa tsî gāxaǃnâ da o?

    • “Tsî sa ǃgâsab ga sats ǃoagu ǁoreo, ǃgû, î ǂgōǀau bi sats tsî ǁîb tsîkho ǁaegu ǀguri. Satsab ga ǁnâuo, ots kom sa ǃgâsaba go hōbaseno. Tsî ǁnâu tsi tamab ga io, ǁnâi gorose ǀguib kas, ǀgamkha kasa ūsao, ǀgam tsî ǃnona ǀhûǀguitimî-aon di amdi ǃnâs mâ mîs hoasa nî mâiǀgaiǀgaihe xuige. Tsî ǁîn onab ga ǁnâu tama io, ǀhaohâba ǁnâi mîba; tsî ǀhaohâb onab ga ǁnâu tama io, ǁnâi ǀūbekhoe tsî mariǃkhōǃoa-aose ūhâ bi.”—Mat. 18:15-17.

11. Jehovaba sao ra ǁorena mati ra mû?

    • ▪ ǀAib

    • ▪ Ai-īsiga ǃoabas ǃgao sîsen-ūs

    • ▪ Tarekhoedi tamas ka io aorekhoegu hîna ra ǁgoe-ūgun

    • ▪ ǃNaris

    • ▪ Dobbols

    • ▪ Āǀhoros

    • “ǁNâi ǂan tama du kha hâ, ǂhanuoǃnân gaosib Elob diba ǀumi tide ǃkhaisa? Tā ǁhapu re: ǀAi-aon karao, ǁgôatsuiǁgoana ra ǃoaban karao, ǃgameba ra khôan karao, ǁgaiǁgaisana ra dīn karao, aoregu ǀkha ra ǁgoegu karao, ǃnari-aon karao, xūǃgunuxan karao, ǀhorosemân karao, ǃkhāǃkhā-aon karao, ǁkhâuǁnâ-aon karao, ǁîn ge Elob gaosiba ǀumi tide.”—1Kor. 6:9, 10.

12. ǀAib hîna ǃkharagagu ǃnôa ǁgoe-ūgu ǀgauna ǃkhōǂgā hâb xa tae-ets ra mîǁgui ǁîs xa dīsa?

    • “ǁHâxū ǀaiba re.”—1Kor. 6:18.

13. Tae-i ǃaroma da ǀaeǃkhō-aob xa mā-e tama hâ ǁkhōǁkhōsa sōǀoana xu nî ǂgōsen?

    • “O ta ra ǁnama du, ǃgâsado, Elob di ǀkhomxaǂgaosiga xu du sadu sorode nî mâi ǃkhaisa ûitsama tsî ǃanu tsî Eloba ǃgâiba ǁguibase, ǁîs ge a sadu gā-ai eloǃoaba. Î tā nē ǃhūbaib ǀkha ǀguiti dīsen, î du sadu ǂâis di ǀasa kaisis ǃnâ ǀkhara, ǃâitsâ ǁkhā du nîga, mâs a Elob di ǃgâi tsî ǃgâiǃgâibasensa tsî dīǀoaǀoasa ǂâi ǃkhaisa.”—Rom. 12:1, 2.

14. Eloba mâ xūn hîna demongu ǀkha dīxū-e ūhâna ra ǂkhā?

    • “Kēbo-aoba ta ge tita ǁîna nîra ǂkhaiǂkhaiba, ǃgâsagu ân di ǁaeguba xu, sats khami ība; tsî tita ge ti mîde ǁîb ams ǃnâ nîra mā, tsîb ge ǁîn ǃoa nî ǃhoa ǁîba ta nî mîmān hoana. Tsî i ge nîra ī, ǁnā khoeb, ti mîdi, ǁîb nî ǀons âtas ǃnâ ǃhoade ga ǁnâuǀnam tama ib, ǁîb tawa ta tita ǁîsa nîra ôa ǃkhaisa.”—Deu. 18:10, 11.

15. Khoe-i ga ǁore tsî ǃhōbasen tsî Jehovaba ǃoa ǁkhawa oaǀkhī ǂgao o, o i tae-e nî dī?

    • “Ti ǁoreba ta ge ge ǂanǂan tsi, tsî ti ǂhanuoǃnâsiba ta ge ǃgū-ai tama ge hâ i. ‘Tita ge: ǃKhūb ai ta ti ǃûǂamde nî ǁguiǁnā, ti ge mî.’”—Psa. 32:5.

    • “Khoe-i ga sadu ǃnâ ǀaeseno, a-i ǂnomdomgu ǀhaohâb diga ǂgai, î gu ǁî-i ǂama ǀgore, î gu ǃKhūb di ǀons ǃnâ ǁnui-i ǀkha ǁî-e ǂkhau; os ge ǂgoms di ǀgoresa ǀaesen hâ-e nî sâu, tsî ǃKhūb ge ǁî-e nî ǃkhōkhâi; tsî ǁorena i ga dī hâ io, o i ge ǁîna nî ǀûbahe.”—Jak. 5:14, 15.

16. Khoe-i hîna ra ǁore-e du ga ra ǂan io, o du tae-e nî dī?

    • “Tsî khoe-i ga ǁoreo, nūs di domma i ga ǁnâu tsî i ga ǃkhō-amao, mû i kas, ǂan i kas hoasa; ǁî ǃkhaisa i ga ǂanǂan tama hâ io, o i ge ǁî-i di ǀhapisa nî tani.”—Lev. 5:1.

17. Khoe-i ge ǁkhawa Jehovab di ǀHûǀguitimî-aon ǀgui tama hâ di i ga ǂanǂanhe o, o da tae-e nî dī?

    • “Xawe ta ge sado ge xoaba, habagu du tidesa, khoe-i ga ǃgâsase ǂgaisen, tsî i ga ǀai-ao, xūǃgunuxa, ǁgôatsuiǁgoaǃoaba-ao,  ǃkhāǃkhā-ao, ǀhorosemâ tsî, ǁkhâuǁnâ-ao-o: ǁNāti ī-i ǀkha du ǂûs xawesa hî tide ti.”—1Kor. 5:11.

    • “Khoe-i ga sadu ǃoa hā tsî nē ǁkhāǁkhāsa ūhâ tama io, ǁî-e oms ǃnâ tā ǃkhōǃoa, î du tā ǁî-e tawede.”—2 Jhn. 10

18. Tae-i ǃaroma da Jehovaba a ǀnam ǀhōsana nî ūhâ?

    • “Gā-ain ǀkha ga ǂharugub, ǁnāb ge nîra gā-ai, xawe ǁnāb hîa gâren di horesab ge nîra khôaǂkhūǂkhūhe.”—ǂKhm. 13:20.

    • “Tā ǁhapu re: ǂKhaba ǃhoa-ūgu-aidi ge ǃgâi ǂūga ra ǁgaoǁgao.”—1 Kor. 15:33.

19. Jehovab di ǀHûǀguitimî-aona tae-i ǃaroma ǂgīǂgōsi xūn ǃnâ ǃâ tama hâ?

    • “ǃHūbaiba xun ǁîna hâ tama, tita on ǃhūbaiba xu hâ tama khami.”—Jhn. 17:16.

20. Tae-i ǃaroma da ǂhanuba nî ǁnâuǀnam?

    • “Mâ-i hoa-e a-i ǂamkhoega ǃnaga hâba, ǁî-i ǂama ǀgaiba ūhâga. ǂAmkhoegu ge Elob ǀguiba xu hâ xuige; tsî hâ a ǂamkhoegu kom Elob xa ǂnûiǂgāhe hâo.”—Rom. 13:1.

21. Khoesi ǂhanub tsî Elob ǂhanub tsîn ǁaegu i ga ǂkhababa hâ o, o du tae-e nî dī?

    • “O gu ge Petrub tsî nau apostelgu tsîga ǃeream tsî ge mî: Anu i kom ao, Elob nî khoen ǃgâ-ai ǁnâuǀnamhe ǃkhaisao.”—ǃNǃkh. 5:29.

22. Mâ xoade nî hui du ǃhūbaib ǃâ tama isa sîsen-e du ga ǁhûi ǁaeb ai?

    • “Os ge ǀgui ǁaesa nau ǁaes ǃoagu gôaba ūkhâi tide tsîn ge ǃaruǀî torodīsa ǁkhāǁkhāsen tide.”—Mix. 4:3.

    • “ǁÎsa xu ǂoa, ti ǁaese, î du ǁîs di ǁoren ǃnâ tā amǃnâxa, ǁîs di tsûtsû-aidi xa du hō tidega.”—J.ǂHa. 18:4.

23. Mâ ǀgaub ǃnâ da ǁkhoaxa ǁaeba nî ūhâ tsî mâ xūna xu da nî ǂgōsen?

    • “ǃKhūb ge . . . ǁnāb, ǁgarisa ǀnam hâb . . . âba ra ǁkhan.”—Psa. 11:5.

    • “ǂKhababa ǁkhan, î du ǃgâib tawa ǂgāmâisen.”—Rom. 12:9.

    • “Ama-ain hoan, tsî anu hân hoan, tsî ǂhanu-ain hoan, tsî ǃanun hoan, tsî ǀnamǀnamsan hoan, tsî ǃgâise ra ǀōn hoan, mâ ǃgâi ǂū-i tsî mâ koa-i ga hâo, ǁî-i xa ǂâiǂâisen.”—Fil. 4:8.

24. Jehovab di ǀHûǀguitimî-aona tae-i ǃaroma nau ǂgomdi ǀkha ǀguiba ǃoaba tama hâ?

    • “ǃKhūb di tāb tsî ǁgâuagu di tāb tsîn ǃnâ du a amǃnâxa ǁoa.”—1 Kor. 10:21.

    • “ǁNā-amaga ǁîna xu ǃgûǂoa, î du khaisen, tib ra ǃKhūba mî; î du ǃanuoǃnâ-i xare-e tā tsâǀkhā, o ta ge nî ǃkhōǃoa du.”—2Kor. 6:17.

25. Mâ ǁgaraga nî hui du ǁaxasigu ǃnâ ǁhaosa mîǁguisa?

    • “Tsîn ge ǀūben ǀkha habagu tsî ǁîn di sîsenga ge ǁkhāǁkhāsen. Tsîn ge ǁgôatsuiǁgoagu âna ge ǃoaba, o gu ge ǁîna ge ǁnoa kaiba.”—Psa. 106:35, 36.

    • “ǁŌ hân ge xū-i xare-e ǂan tama hâ.”—Aoǁn. 9:5.

    • “ǃHūbaiba xun ǁîna hâ tama, tita on ǃhūbaiba xu hâ tama khami.”—Jhn. 17:16.

    • “ǂÂuba da i kom hâo, ǃgôa-ī ge ǁaeb ûib diba da ǀūben di ǂâisa gere dīǀoaǀoasa, ǁgaiǁgaisa ǂūǁoasigu tsî turagu tsî āǀhorosigu tsî ōgu tsî āǃansengu tsî ǁgaisi ǁgôatsuiǁgoaǃoabagu tsîn ǃnâ da gere ûi ǃnubai.”—1Pet. 4:3.

26. Elobmîs ǁgaraga mati ra hui da ǃnaetsēde da nî tsēdī tamas ka io tsēdī tidesa mîǁguisa?

    • “Tsî i ge ǃnonaǁî tsēs ai ge ī, Faraob di ǃnaetsēs ai, ǁîb di ǃgāgu hoagab ge ǂûǁae-e a dība ǃkhaisa; tsîb ge ǂamkhoeb ǁhamaogu dib di danasa ge ǀgapiǀgapi tsî ǂamkhoeb ǁganaogu dib di danasa ǁîb di ǃgāgu ǁaegu. Tsîb ge ǂamkhoeb ǁhamaogu diba ǁîb di ǁhamsîsenǃâs ǃoa ǁkhawa ge oa kai, ob ge ǁîba Faraoba ǀgabisa ǃomǁae ge mā, xawe ǂamkhoeb ǁganaogu dibab ge ge ǂgāmâi, Joseb ge ǁîkha ǁguiǃāba hâ i khami.”—Gen. 40:20-22.

    • “Tsî Herodeb di ǃnaetsēs ge tsēdīheo, os ge Herodias ôasa ǁîn aiǃâ ge ǂnā, tsîb ge Herodeba ge ǃgâibahe. ǁNā-amagab ge nūs ǀkha ge mîmâiba si, ǂgans ka-i hoa-eb nî mā si ǃkhaisa. Os ge ǁgûs xa aibe ǀapeǃnâhe tsî ge mî: Johaneb ǁĀǁnâ-aob danasa ǃores ǃnâ mā te hā re. Ob ge sî tsî Johaneba ǃkhō-oms ǃnâ ge ǁhāǁnâdana kai.”—Mat. 14:6-8, 10.

27. Tae-i ǃaroma du ǀhaohâb ǃûi-aogu daoǁgausa nî sao?

    • “Sadu aiǃgû-aoga ǁnâuǀnam, î ǁîga ǃnaga hâba; ǁîgu ge sadu ǀomdi ǂama ra ǃûi, ǃereamsa nîra māgu ase; î gu ǁîsa ǃgâiaǂgaob ǀkha dī, î gu tā ǀhâimâinǀoms ǀkha dī, ǁîs ǃgâiba du tide xuige.”—Heb. 13:17.

28. Tae-i ǃaroma i a ǂhâǂhâsa sadu tsî sadu omaris tsîna ǁaeba ǁamaǂui tsî Elobmîsa ôaǃnâ tsî khomaisa?

    • “ǁNāb, ǁîb di turaba ǃKhūb di ǂhanub ǃnâ ūhâb tsî ǁîb di ǂhanub xa ra ǂâiǂâisenna, tsēs tsî tsuxub tsîra. Hai-i ǁgamxa ǃārogu tawa ǂgāhe hâ-i khamib ī xui-ao, ǁî-i di ǂûna ǁaeb â-i ai ra ūǀkhī-i, tsî ǁî-i di ǂgaes ǁnā tama-i; tsî dīb ra xū-i hoa-i ge nîra ǃgâiǃgâ.”—Psa. 1:2, 3.

29. Tae-i ǃaroma du ǀhaode ǃoa ī tsî ǁîdi ǃnâ ǁhaosa a ǀnam?

    • “O ta ge sa ǀonsa ti ǃgâsaga nî ǃhoaba; o ta ge ǀhaohâb ǃnâ satsa nî kare.”—Psa. 22:22.

    • “Î da kōǃgâ ǀnammi tsî ǃgâi sîsengu hōhōǃnâgu ǃoa; î da tā sada ǀhûsa ǀûǀkhā, ǀnîn ǁnaetiba ūhâ khami, î da ǁnamagu, î da ǁîsa ǃnāsase dī, tsēs ra ǀgū ǃkhaisa du ra mû xuige.”—Heb. 10:24, 25.

30. Mâ-e a ǂhâǂhâsa sîsen hînab ge Jesuba a mîmā da-e i da dī?

    • “ǁNā-amaga ǃgûǂoa, î go hoa ǁaede ǁkhāǁkhāsabedī, î go ǁîna ǁāǁnâ, . . . ǁîna ǁkhāǁkhā sago ta gere mîmān hoana ǃkhōǀgaipesa.”—Mat. 28:19, 20.

31. Māsenxa mā-e da ga mā tamas ka io sida ǃgâsana hui o, o i mâ tanisen ǀgauba Jehovaba ra ǂkhî kai?

    • “ǃKhūba ǀkhae sa xūn xa tsî sa hōǂgābasendi hoadi di ǂgurosan xa.”—ǂKhm. 3:9.

    • “A i mâ-i hoa-e ǂgaob ǃnâ i go ǂâibasen khami dī, ǀaraǂams ǀkha tama tsî ǁgarihesa xu tama; ǃgâiaǂgaoxase ra mā-eb Eloba ǀnam xuige.”—2Kor. 9:7.

32. Xristeǁîna mâ ǃgomsina nî ǃâubasen hōǃâsa?

    • “ǃGâiǃōn ge hâ ǂhanu-aisib ǃaroma ra ǃgôaǃgonhena, ǁîn dib a gaosib ǀhommi diba amaga. ǃGâiǃō du ge hâ, khoen ga sado ǁgui-ai tsî ǃgôaǃgon, tsî ǂhumib ǀkha hoa ǂkhaba xūna sadu ǃoagu gowao tita ǃaroma. ǃGâiaǂgao î du dâ, amǃnâs âdu ǀhommi ǃnâ a kai xuige; ǁnātin kom sada aiǃâ ge hâ i kēbo-aoga gere ǃgôaǃgono.”—Mat. 5:10-12.

33. Tae-i ǃaroma i a ǀō-aisa aiǂhanu Jehovab di ǀHûǀguitimi-aon ǀgui-i ase ǁāǁnâhesa?

    • “Sa mîdi ge hōhe ǃnubai ta ge ǁîde ge hapu; tsî sa mîs ge tita ǂgaob âtab di dâb tsî ǃgâiaǂgaob ase ge ība, tita ge sa ǀons ǃoa ǂgaihe hâ ta, ǃKhū ǂnubidi di Elotse.”—Jer. 15:16.