Haisi-ams Xristeǁî ǁgûn ǃaroma:

ǁGûn ase du ge sadu ǀgôana ra hui ǂgao în Jehovaba ǀnam tsî ǁîn di ûiba ǁÎba mā. Tae-e du a dī ǁkhā ǁîna aiǂhomisa ǁāǁnâs ǃaroma? Mâǁaen ǁîna nē ǂhâǂhâsa ǃharosa a ū ǁkhā?

Jesub ge ǁîb di ǁkhāǁkhāsabega ge mîba: “ǃGûǂoa, î go hoa ǁaede ǁkhāǁkhāsabedī, î go ǁîna ǁāǁnâ.” (Mat. 28:19) Nēs ǃoagu i ge khoe-i hîna ra ǁāǁnâhe ǂgao-e nî ǁkhāǁkhāsebe kai—ǁî-i ge Xristub di ǁkhāǁkhāde ǁnâuǃā tsî ǂgoms ǀguisa dī tama hâ xawe ǁnā ǁkhāǁkhāde ra ûiǂui. Nē i ge ǂkham ǀgôa-i xas tsîna a dī-e ǁkhā.

ǃGâi aiǁgausa sadu ǀgôana ǁgau re tsî ǁîna Jehovab xa ǁkhāǁkhā re. (Deu. 6:6-9) Nēs ge ra ǂâibasen ǀAmosib kōse ǃgâiaǂgao re ǂkhanisa sîsen-ūsa ǁîna Elobmîs amab tsî tsoatsoade ǁkhāǁkhāsa în ǁnâuǃā. Sadu ǀgôana hui re în ǁîn di ǂgomsa aitsama ǁîn mîdi ǃnâ mîǃā ǁkhā. (1Pet. 3:15) Sado xun ra hō ǂans tsî ǂkhâǃnâs tsî Elobmîsa ôaǃnâs, ǀhaohâb di ǀhaodi tsî ǃgâi ǀhōsan ge a hui nî ǁkhā în ǁāǁnâs ǃaroma aiǂhomisen tsî ǁnās khaoǃgâs tsîna aiǃgû. Gagasi mîǁguigu xa ǁîn ǀkha ǁgam re.

ǂKhoamîdi 20:11 ge ra mî: “ǀGôab ge ǁkhāti dīgu âb ǀkha nî ǂanǂuihe, . . . īseb a ǂhanu ǃkhaisa.” Mati du nî mûǂan ǀgôa-i nēsi i ga aore tamas ka io tare-i Jesub Xristub di ǁkhāǁkhāsabe kai tsî a ǁāǁnâhe ǁkhāsa?

ǀGôa-i hîna ǁāǁnâs kōse ra aiǃgû i ge ǁî-i di ǁgûna nî ǁnâuǀnam. (ǃNǃkh. 5:29; Kol. 3:20) Jesub ge 12 kurixa io, ob ge ǁgûra gere “ǁnâuǀnam” dis ge Elobmîsa ra mî. (Luk. 2:51) Sadu ǀgôa-i dīǀoaǀoasa kurusa nî ūhâsa du ge a ǃâubasen ǁoa. Xawe ǁî-i hîna ra ǁāǁnâhe ǂgao i ge nî dītsâ Jesub di aiǁgausa sao aisa tsî i ge nî mûǂan-e ǁîn di ǁgûnan da ǁnâuǀnam ǃkhaisa.

ǁÎ-i ge Elobmîs ǃnâ hâ amab ǃnâ i ǃgâiǃgâibasensa ūhâsa nî ǁgau tsî nî ǁkhāǁkhāsen ǂgao. (Luk. 2:46) Sadu ǀgôa-e ǀhaohâb di ǀhaode hâǃnâ tsî ǁhao i ra? (Psa. 122:1) Elobmîsa khomais tsî ôaǃnâs di turaba ū i hâ?—Mat. 4:4.

ǀGôa-i hîna ǁāǁnâs ǃoa ra ǁgūtsâ i ge Elob Gaosiba ǂgurose ǁî-i di ûib ǃnâ ra mâi. (Mat. 6:33) ǁÎ-i ge ǃereams hîna i tani hâsa ǁāǁnâsa tama aoǁnâ-ao-i ase ra ǁgau ǁî-i aitsamaba xu aoǁnâ sîsenni ǃnâ ǂoa tsî khoen ǀkha ra ǁgam o. ǁÎ-i ge ǂguiǃnâgu ǀgaugu ǃnâ aoǁnâ sîsenni ǃnâ ra ǁhao tsî tao tama hâ ǁî-i di ǁgauǃnâ-ao-i tsî skol ǀhōsan tsîna mîbasa ǁî-i a Jehovab di ǀHûǀguitimî-aon di ǀguisa. ǁÎ-i ge ǀhaohâb ǃnâ ra māhe sîsen-e ǃamkuse ra aiǂhomi tsî ǁî-i di ǁkhāsib hoab ǀkha ra dī.

ǁÎ-i ge nî ǁgūtsâ ǃgâi tama tanisen ǀgaugu tsî ǁgai ǀhōsana xu ǂgōsensa. (ǂKhm. 13:20; 1Kor. 15:33) Nē i ge musiki, muvin, ai-īsiǂhôaǂgares ǀapeǁguigu, vidio ǀhurugu tsî internetsa i ra sîsenū ǀgaub ǃnâ nî mûǃāsen.

ǂGui ǀgôan ge ǃgâise ǁgûn ǁguiǂgāsensa ǁnâuǀnam tsî amaba ra ǁîn di kai tsî ǂkham ân a hîna ra ǁāǁnâ kaisen. Ab Jehovaba ǀkhae du re sadu ǀgôana du ra hui hîna în nē kai ǂhâǂhâsa mîǁguiba ū Jehovab ǀkha ǃgâi sîsenǀhaosa ūhâsa.

Haisi-ams ǁāǁnâsa tama aoǁnâ-ao-i ǃaroma:

Kaise ǃgâi aiǂhanub ge ǀhaohâb ǀkha ǁāǁnâsa tama aoǁnâ-aose aoǁnâ sîsenni ǃnâ ǁhaosa. Koahesa du ge anu hâ nē gagasi aiǃgûs hîna du go dīs ǃaroma. Amab di ǂansa du ge Elobmîsa ǁkhāǁkhāsens ǃnâ-ū go hō tsî ǁnā ǂans ai ǃgaoǃgaosase ra ǂgom.—Jhn. 17:3; Heb. 11:6.

ǂGaogao du ge Elobmîsa du Jehovab di ǀHûǀguitimî-aon ǀkha nî ǁkhāǁkhāsens aiǃâ ǀkhara ǂgoms ǃnâ ge hâ i. Tamas ka io du ge ǀnîsi ǀnî hâ ǁaxasigu ǃnâ ge hâ i Elobmîs tsoatsoadi ǀkha ǀgau tama hâga. Xawe du ge nēsi sadu ǂgomsa go ǁgauǁgau ǃhobasens ǃnâ-ū, nēs ge ra ǂâibasen ǃkharu ge ǁae du gere dī ǁgai xūn xa du ǃgamse ra ǃhausensa. Noxoba du ge ǂgom du rasa ra ǁgau ūdawasens ǃnâ-ū, nēs ra ǂâibasens ge ǀoro tanisensa du ǁnāxū tsî ra ǁgui-aisensa Elob mûǁae ǂhanu-aise dīsa.—ǃNǃkh. 3:19.

Xawe nau ǀkhāb ai du ge ǀnîsi Timoteub khami ‘ǀgôasisa xu ǃanu xoade a ǂan’ tsî ǁîdi xa ge huihe eloxoresa tanisens tsî ǁoreba xu ǂgōsensa. (2Tim. 3:15) Sadu ge ge ǁkhāǁkhāsen ǂkhamkhoesi ǁgâib tsî nanahesa mâǃoasa tsî Jehovab mûǁae a ǁgai xūna xu ǂgōsensa. Sadu ge go ǁgau ǂgom du rasa ǁaposase ǂhanu-aisib ǃnâ mâ tsî sadu ǂgomsa nau khoen ǀkha ǀgoragusa. Sadu ge ǃgâise go huiǃnâhe nē aoǁnâ sîsen-e dīsa. Tsî du ge nēsi go mîǁgui ǁāǁnâsa tama aoǁnâ-aose Jehovaba sîsenbasa ǀhaohâb ǃnâ.

Mâ ǀgaub hoab ai du ga Jehovab di ǀgauga ǂkhamsisa xu ǂans tamas ka io kai du hâ hîna a ǂans tsîn ǃnâ du ge nēsi ǀgam ǃharora sadu gagasi kais ǃaroma ra ǂâiǃgâ—māǁnâsens tsî ǁāǁnâs tsîna. Sadu ge Jehovab tawa ge māǁnâsen sadu ge ǁîba ǀgores ǃnâ-ū ǀgū o tsî mîǁgui o ǁîba du ǀamosib kōse ǀguri nî ǃoabasa. (Mat. 16:24) Māǁnâsens di ǁgauǂuis ase du ge ǁgammi ǃnâ nî ǁāǁnâhe. (Mat. 28:19, 20) Nē māǁnâsens tsî ǁāǁnâs ǃnâ-ū du ge ra Jehova Elob di ǂanǃgâsa sîsen-ao kai. Kai aiǂhanub ge!

Sadu Elobmîs ǁkhāǁkhāsensa xu du go mû khama i ge nē du go ǁhûi daoba hoaǁae supu tide. ǂÂis ǃnâ ūhâ re, Jesub ge ǁāǁnâhes khaoǃgâb ge “Gagab xa ǃgaro-ǃhūb ǃoa ge ǂgaiǂguihe, ǁgâuab xab nî ǃâitsâhese.” (Mat. 4:1) Sadu ǁāǁnâs khaoǃgâ du ge Jesub di ǁkhāǁkhāsabe-i ase ǃâitsâga a ǃâubasen ǁkhā. (Jhn. 15:20) Nē ǃâitsâgu ge ǃkharagagu ǀgaun ai a ǀkhī ǁkhā. Sadu omaris ge a mâǃoa du ǁkhā. (Mat. 10:36) ǃHōhe ǁkhā du ge a sîsen-ū du ra khoen tsî hâ ū du gere khoen xa. Xawe hoaǁae Jesub mîde ǂâis ǃnâ ūhâ re Markub 10:29, 30 ǃnâ a xoamâisade “Amase ta ra mîba go, khoe-i ga ǁnāxū oms tsî ǃgâsagu tsî ǃgâsadi tsî ǁgûb tsî ǁgûs tsî ǀgôan tsî ǃhanagu tsîna, tita tsî ǃgâiǂhôas ǃaroma, o-i ge ǁî-e kaidisi ǃnādi kōse nîra ǃkhōǃoa nēsi nē hâ ǁaeb ǃnâ: Omdi tsî ǃgâsagu tsî ǃgâsadi tsî ǁgûdi tsî ǀgôan tsî ǃhanagu tsîna ǃgôaǃgondi ǀkha, tsî ǃgoaxaǁaeb ǃnâ ǀamo ûiba.” Aiǃgû re ǃgarise sîsens ǀkha tsî Jehovab ǀgūse hâs tsî ǁîb ǂhanu-ai ǀgaub ai ûiǀgaras ǀkha.

ǁĀǁnâhe ǂgao du ga o, ǀhaohâb ǃûi-aoga mîba re. Nē haisi-amsa ra sao-ai dîdi ge ǃgaoǃgaosa ra kuru ǁgamǀhaos hîna du ǁîgu ǀkha nî ūhâsa, î gu mû aiǂhomisa du asa ǁāǁnâhes ǃaroma. Sadu ge nē dîde aitsama a ǃgûǃgâ ǁkhā sadu Elobmîsa du ra ôaǃnâ ǁaeb ai.

Nē ǃhoaǀhaosa aiǂhomibasens ǃaroma, ǁaeba ǁamaǂui re khomai tsî ǂâiǃgâsa nē xoaǂuisa tsî māsa xoade. ǁÎdi ge hoa ǃereamde mā tama hâ xawe nî hui du î du Xoas ǃgaoǃgaoba hō nē dîdi ai. Sadu ge ǁnā xoa ai du hâ ǂkhanin tsî nē ǂkhanis tsîna ǁkhowa-amsase a ūhâ ǁkhā nē ǁgamǁaesa du ǀhaohâb ǃûi-aogu ǀkha ra dī hîna. ǃGombahe du ga o nē dîdi xa, o dî re Elobmîsa ra ǁkhāǁkhā du khoe-i ai tamas ka io ǀhaohâb ǃûi-aogu ai huiba ǂgan re.

ǀHaohâb ǃûi-aogu ǀkha du nî ūhâ ǁgamǀhoas ǃnâ tā ǁgarisase tsâ re gaxu tamas ka io ǃgomǀgausa ǃereamsa māsa. Supu tsî ǃnubu ǃereams sadu mîdi ǃnâ hâs ge ǂâu hâ. ǂGui dîdi ǃaroma i ge a ǃgâi ǀgui tamas ka io ǀgam xoara ǁgausa ǁgaura de, sadu ǃereams Elobmîs ai a ǃgaoǃgaosa ǃkhaisa.

Sadu ga noxoba ǂâusa ǂansa ūhâ tama io nē hoaǃnâ-aixa Elobmîs ǁkhāǁkhādi amsi, o gu ge ǀhaohâb ǃûi-aoga nî hui du î du ǂhâbasa huiba hō tsî ǁkhāsiba nî mā du Elobmîsa ǃgâise ǁnâuǃāsa tsî ǀnî hâ ǁae ǁāǁnâ kaisensa.

[ǃÂrob ǀhaohab ǃûi-aogu ǃaroma: ǁGuiǂams ǁāǁnâhe ǂgao ra khoen ǀkha ǁgamǀhaos dis ge 54 sa xu 59ǁî ǂhawegu ai ra hōhe.]