Kuhitila Muli Mako
11 Mu va hetele kuhiehi na Yelusalema, ku Mbetefanje na Mbetaniya ku Muncinda ua Olivela, ua tumine vandongesi vendi vavali, 2 nguendi: “Yenu muimbo li muli na kumona, kaha mumu ka kovelamo, muka uana umo muana cimulu ua kukuta, uze kanda va londeho ku muntu naumo uahi. Mu zitulenu naku mu neha kuno. 3 Vunoni nga kuka kala umo aka mihula nguendi: ‘Vika muli naku vi lingila evi?’ mu lekenu nguenu, ‘Muangana amu tonda kaha vuovuno amu hiluisa.’” 4 Ngeci vaile, vaka uanene muana cimulu va namu kutiliya ha mbandza ku cikolo ca ndzivo yakele ku mukulo ua njila, kaha vamu zituile. 5 Vunoni vamo vemanene kuze va vehuile nguavo: “Vika muli na kuzituila ou muana cimulu?” 6 Ngeci va kumbuluile ngue muze mua va lekele Yesu, kaha vava tavesele vaye.
7 Vamu nehelele uze muana cimulu, valeleho vuzalo vuavo vua helu, kaha Yesu ua tumameneho. 8 Vantu vavengi valele vizalo viavo via helu mu njila, vakuavo co va tetele mintango ya miti. 9 Kaha mbunga ikuavo yakele ha lutue na ize yakele na kuiza mu nima yendi, yakele na kutambeka nguavo: “Tua kuvundila, ovola!* Ua vezika uze eza mu lizina lia Yehova!* 10 Vua vezika Vuangana ovu vuli na kuiza vua tatetu Ndaviti! Tua kuvundila ove uakala muilu, nguetu muovole!” 11 Yesu ua kovelele mu Yelusalema kaha uaile mu tembele, ua talele viuma viose, vunoni tele kulingila kutoka, ua tuhukile na kuya ku Mbetaniya na vaze 12.
12 Lia mukuavo muakele na kutunda ku Mbetaniya, uavuile ndzala. 13 Kaha ha lahako ua muene umo muti ua mukuyu uli na mefo, ngeci uaileko na kutala nga a uanako vimo. Vunoni mua ka heteleko, ka uaneneko na vimo viahi, mefo lika muomu ka yapuile ngonde ya vinkuyu. 14 Ngeci ua usingile nguendi: “Kati kuka kale naua muntu aka lia ku vusuka vuove.” Vandongesi vendi vakele na kuivuako.
15 Va hetele mu Yelusalema. Kaha Yesu ua kovelele mu tembele, ua putukile kusekula vose vakele na kulanda na kulandesa mu tembele, kaha ua fulumikile vimesa via vakua ku landakana* vimbongo na vituamo via vakua kulandesa mavembe, 16 kaha ka tavesele naumo uahi ambate cimo cuma na kuhita naco mu tembele. 17 Uakele naku va longesa nguendi: “Kati va soneka nguavo, ‘Ndzivo yange vaka isana nguavo ndzivo ya vivundilo ku vakua vifuti vose ni?’ Vunoni enu mua ipuisa ndzivo ya vezi.” 18 Vakuluntu va vasasendote na vakua kusoneka mu vavuile ngoco, va putukile kutonda njila ya kumu tsihilamo. Muomu va muivuilile liova mu kulinga mbunga yose ya likomokelele kulongesa cendi.
19 Ku cinguezi, va tundile mu mbonge. 20 Vunoni ku cimene-mene mu vakele na kuhita, va muene uze muti ua mukuyu unomu cau naku mizi. 21 Kaha Petulu mua uvulukile, ua lekele Yesu nguendi: “Lambi, tala! Muti ua mukuyu una singile unomu cau.” 22 Yesu uava lekele nguendi: “Tsilielenu Njambi. 23 Nji mileka vusunga nguange, uose aleka ou muncinda nguendi, ‘Zunduka aha, ya uka liumbile mu kalunga ndonga,’ kaha kakala na vimpata mu mutima uendi, vunoni atsiliela nguendi viuma via na handeka vi lipuisamo, vi lipuisamo vene. 24 Ngeci mukemuo nji mileka nguange, viuma viose vimu vundila, tsilielenu nguenu mua vi tambula laza kaha muka vi tambula vene. 25 Nga muimana linga mu vundile, konekelenu muntu uose nami vulumuina, linga Isuenu ali muilu nendi ami konekele vivulumuna vienu.” 26——
27 Vezile naua mu Yelusalema. Kaha omo uakele na kuenda mu tembele, vakuluntu va vasasendote na vakua kusoneka na vakuluntu vezile kuli ikeye 28 naku muihula nguavo: “Na mpoko ika uli na kulinga evi viuma? Ni iya na kuhana mpoko ya kulinga viuma viaco?” 29 Yesu uava kumbuluile nguendi: “Nange njimi hula vimo. Mu nji kumbulula, kaha nange nji mileka na mpoko ika njili na kulinga evi viuma. 30 Mbatizimu ya Yoano, ya tundile muilu ni ku vantu? Nji kumbululenu.” 31 Ngeci va putukile ku lihandekesa hakati kavo nguavo: “Nga tu handeka nguetu, ‘Ya tundile muilu,’ ahandeka nguendi, ‘Amba honi omo lia vika ka mua mu tsilielele?’ 32 Ni citava tu handeke nguetu, ‘Ya tundile ku vantu’?” Vunoni vavuile liova lia mbunga, muomu vose va tsilielele nguavo Yoano uapuile kapolofeto. 33 Ngeci va kumbuluile Yesu nguavo: “Yanini.” Kaha Yesu uava lekele nguendi: “Nga ngoco ni nange kanji mileka kuiko nja uana mpoko ya kulinga evi viuma.”