Kuli Vakua Filipu
1 Yange Paulu, njili hamo na Timoteu, tu vangamba va Kilistu Yesu. Njili na kusonekela vakua kulela vose vaze va likata na Kilistu Yesu vali mu Filipu, hamolika na tuniungi na vakua kukuasa vipanga, nguange:
2 Ngozi ya kama na ciyulo via kutunda kuli Njambi Tatetu na Muangana Yesu Kilistu vikale nenu.
3 Nje kusantsela Njambi yange ntsimbu yose inje ku mi vuluka 4 mu vivundilo viange via ku lambelela omo lienu vose. Nje ku lambelela Njambi na ndzolela, 5 omo lia kulihana cenu mu kutuala lutue muzimbu ua cili, tunde ha litangua lia kulivanga na kalelo. 6 Muomu njili na vusunga nguange, uze ua putukile cipanga ca cili muli enu aka ci puisamo noho ha lika hetela litangua lia Kilistu Yesu. 7 Cinapu ca cili ku singanieka evi viuma kutuala hali yenu, muomu muli mu mutima uange kaha mue kutambuila hamo nange ngozi ya kama ya Njambi. Cikuavo naua, mua nji kuasele mu malienge, namu kuhakuila muzimbu ua cili kaha naku utumbika kuliya na masiko.
8 Njambi anji kelako vukaleho kutuala ha cizango cange ca kama ca kua ku mi mona mu vose na cilemo ngue cize cali naco Kilistu Yesu. 9 Kaha evi vikevio vinjili naku tualelaho kuvundila nguange, cilemo cenu ci tualeleho kukola cikuma-kuma kutuala ha mangana a vusunga na kuivuisisa ca kulova.* 10 Linga mu nongonone viuma via hiana seho kaha kati mukale na kapenga ni kusuntsuisa vakuenu noho hali ka hetela litangua lia Kilistu. 11 Kaha naua mu sule na vusuka vua vuviuke vuze vue kuiza kuhitila muli Yesu Kilistu linga Njambi atambule vumpahu naku sangaziala.
12 Vamuanetu, nji tonda mu tantekeye nguenu, viuma vinji na hiti via suenesa kulutue muzimbu ua cili, 13 ngeci malienge ava nanji kutu omo lia Kilistu, va na atantekeya kuli vakua kuniunga muangana ua Loma vose naku mbunga yose. 14 Kaha cingi ca vamuanetu muli Muangana va na kolesa omo lia malienge ange kaha vali na kumuesa kusimpa ca kama mu kuambulula lizi lia Njambi ca kuhona liova.
15 Cili vene, vamo vali na kuambulula Kilistu omo lia cipululu na kulituala ha matunta, vunoni vamo vali na vutumbe vua cili. 16 Ava vanji na tumbula ku ntsongo vali na kuambulula Kilistu omo lia cilemo, muomu va tantekeya nguavo vanji hangula linga nji hakuile muzimbu ua cili. 17 Vunoni vaze vanji na livangele kuhandeka nguange vali na kulingamo omo lia kulituala ha matunta, kavesi na vutumbe vua cili muomu va tonda kunji kokela visoti muno mu kamenga. 18 Kaha vika vinezaho? Ambe nga vali na kuambulula mu kulikuisa ni mu vusunga, ca kama Kilistu vali naku muambulula kaha evi vi njivuisa ndzolela. Cili vene nji tualelaho ku vuahelela, 19 muomu nji na tantekeya nguange nji ka uana vuovoke kuhitila mu ku lambelela cenu na vukuasi vua sipilitu ya Yesu Kilistu. 20 Eci ca litombola na cizango cange ca kama na lulavelo lu njili naluo nguange, kanji kevu ntsoni naimo yahi, muomu njili na vusunga nguange nji ka tualelaho kuhandeka na kusimpa linga nji hake Kilistu ku vukama mu ntsimbu ino ngue munja lingile ku nima, njika muhaka ku vukama kuhitila mu kuyoya* cange ambe mu kutsa.
21 Muomu kuli yange, nga nji yoya nji yoyela Kilistu kaha nga njitsa nja vezika. 22 Kaha nga nji tualelaho kuyoya ku ntsitu, ovu vunapu vusuka* vua vipanga viange; vunoni kanji tantekeya vi njihasa ku hangulaho. 23 Njili na citanga hakati kevi viuma vivali, muomu njili na cizango ca kupatuka ku muvila ou, linga nji kakale na Kilistu muomu cikeco ca cili cikuma. 24 Vunoni ca cili nji tualeleho kukala mu uno muvila* omo lienu. 25 Ngeci mukemuo, mu kulinga njili novu vusunga nji tantekeya nguange nji tualelaho kukala nenu vose, omo lia kukola cenu na ndzolela, na omo lia lutsilielo luenu, 26 linga kulisamba cenu muli Kilistu Yesu cipue ca kama muli yange, mu nja kukala hamo nenu.
27 Vunoni yoyenu lika mu ku litombola na muzimbu ua cili kutuala hali Kilistu, linga ambe nga njiza mu kua ku mimona ni nji uahiko, nji hase kuivua via cili kutuala hali yenu, nguavo mu nemana ngo na sipilitu* imolika, na muono* umolika oku mu luila hamo lutsilielo lua muzimbu ua cili, 28 ca kuhona kuvuila vitozi venu liova. Kuhona liova cenu, cinapu citantekeyeso ca kunonga cavo vunoni kuli yenu cinapu citantekeyeso ca kuovoka cenu, kaha evi vi tunda kuli Njambi. 29 Muomu mua tambula civezikiso kati lika ca kutsiliela muli Kilistu, vunoni na ca kumu yandela. 30 Muomu muli na kuhita mu tuyando ngue tu mua nji muene nange nji yanda, kaha mu tantekeya nguenu na ntsimbu ino njili na kuyanda.