Vilinga Via Vapostolo

8 Saulu nendi ua tavele kutsa ca Setefanu.

Tunde ha litangua lize, va putukile kuluisa mua kama cikungulukilo cakele mu Yelusalema; ngeci vose va lisanduokelele mu membo amu Yundeya na Samaliya, ku tundisako lika vapostolo. 2 Vunoni vamala vakua ku lemesa Njambi, vambatele Setefanu naku ka mu tsinda kaha va mulilile cikuma. 3 Vunoni Saulu ua putukile kuluisa mua kama cikungulukillo, uakele naku kovela ku ndzivo na ndzivo naku kokangeya vamala na vampuevo naku va soka mu kamenga.

4 Vunoni vaze va lisanduokele, vaile mu membo ose na kuambulula muzimbu ua cili. 5 Kaha Filipu ua sikumukile ku mbonge ya Samaliaya na kuputuka kuambulula via Kilistu. 6 Kaha mbunga yose ya likuatele kumo, mu kutuala mana ku viuma via kale naku handeka Filipu, omo vakele naku mu halakana na kumona vitantekeyeso viakele na kulinga. 7 Vantu vavengi vakele na vasipilitu va kuzuala kaha vasipilitu vaco vakele na kutambeka na lizi lia kama na kutunda mu vaze vantu. Cikuavo naua, vantu vavengi vaze vakele na kalepa na vulema va kangukile. 8 Ngeci vantu va mu mbonge ize va vuahelele cikuma.

9 Mu mbonge ize muakele umo yala ua lizina Simone, ku ntsimbu ya ku nima uakele na kulinga mahesi, ua komouesele vakua Samaliya naku litumbula ivene nguendi, mukua vukama. 10 Kaha vantu vose, vakama nava vavandende vakele naku mu halakana naku handeka nguavo: “Ou yala ikeye Ngolo ya Njambi iva tumbula nguavo, Ngolo ya Kama.” 11 Vakele naku mu halakana muomu uava komouesele na mahesi endi mu miaka ya yingi. 12 Vunoni mu va tavele Filipu uze uakele naku vambuluila muzimbu ua cili ua Vuangana vua Njambi nou ua lizina lia Yesu Kilistu, vamala na vampuevo va vambatizile. 13 Na Simone nendi ua tsilielele kaha mu nima ya ku mu mbatiza ua tualeleho ku likata na Filipu. Mua muene vitantekeyeso via kama na vipanga via ngolo viakele naku lingiua ua likomokelele mua kama.

14 Kaha omo vapostolo ku Yelusalema vavuile nguavo, vakua Samaliya va na tava lizi lia Njambi, va tumineko Petulu na Yoano. 15 Vaileko kaha va vundilile linga vakua Samaliya va tambule sipilitu santu. 16 Muomu sipilitu santu tele kanda ize ambe vene hali umo uavo, vunoni va vambatizile lika mu lizina lia Muangana Yesu. 17 Ngeci mukemuo, vava salekele mavoko avo kaha va putukile ku tambula sipilitu santu.

18 Vunoni Simone mua muene vapostolo vali na kuhana vantu sipilitu mu ku va saleka lika mavoko, ua tondele ku vahana vimbongo, 19 nguendi: “Nange nji haneniko eyi ngolo linga uose inji saleka livoko liange, ahase ku tambula sipilitu santu.” 20 Vunoni Petulu ua mu lekele nguendi: “Palata yove inongele kumo nove, muomu ua singanieka nguove uhasa kulanda vuana vua Njambi na vimbongo. 21 Yove ka uesi na mutamba mu cipanga cino, muomu mutima uove ka ua sungamene ku meso a Njambi. 22 Aluluka ku vupi vuove naku lambelela Yehova, nga citava aku konekele ku visinganieka viove via kuvihia; 23 muomu nja mono nguange, unapu vusungu vua kusasa na ndungo ya vilinga via kuvihia.” 24 Simone ua kumbuluileko nguendi: “Nji lambelelenuko kuli Yehova, linga na cimo ca viuma vi mua handeka ci nji solokele.”

25 Mu nima ya ku manusula kuhana vukaleho na kuambulula lizi lia Yehova, va hilukile ku Yelusalema kaha vambuluile muzimbu ua cili ku membo a engi a vakua Samaliya.

26 Vunoni kangelo ua Yehova ua lekele Filipu nguendi: “Katuka, ya ku sulu ku njila itunda ku Yelusalema iya ku Ngaza.” (Eyi njila ya hita mu mpambo.) 27 Ngeci ua katukile na kuya, kaha talenu! Ua liuanene na umo yala ua ku Etiopia uze uapuile mukua vukama kuli Kandase, muangana ua mpuevo ua ku Etiopia. Ou yala ikeye uakele na kuniunga vupite vuose vua muangana kaha uaile ku Yelusalema mu ku lemesa. 28 Kaha muakele na kuhiluka kuimbo, ua tumamene mu litemba liendi oku atanda na lizi lia kama livulu lia kapolofeto Isaya. 29 Ngeci sipilitu ya lekele Filipu nguayo: “Suenoko ku litemba.” 30 Filipu ua tuntilile ku litemba kaha uavuile uze yala atanda livulu lia kapolofeto Isaya na lizi lia kama, ngeci ua muihuile nguendi: “Viuli na kutanda via ku lumbunuka ni?” 31 Ua mu kumbuluile nguendi: “Vi nji lumbunuka vati? Kuvanga kukale umo anji lumbunuinavio.” Ngeci ua pingile Filipu alonde mu litemba na kutumama nendi. 32 Aa akeo mezi akele na kutanda mu Visoneka, nguao: “Va mu tualele ngue mpanga iva tuala mu kutsiha, kaha naua ngue muana mpanga na holoka kulu mu mavoko a mukua ku mu tehula, ngeci nendi ka kasama kanua kendi. 33 Mu vakele naku mu sahula, ka va mu sompesele mu vuoloke. Iya aka lumbununa vuino via muyati uendi? Muomu muono uendi va na u tundisa hano mavu.”

34 Ngeci uze yala ua ku Etiopia uehuile Filipu nguendi: “Iya ali naku handeka hano kapolofeto? Sukulukambu nji lekeko, ali naku litumbula vavenya ni muntu ueka?” 35 Ngeci Filipu uaputukile ku handeka, kaha kuputukila hali ou mukanda ua muambuluilile muzimbu ua cili kutuala hali Yesu. 36 Mu vakele na kuya, va uanene mema kaha uze yala ua handekele nguendi: “Tala! Mema aa; vika vi nji honouesa ku nji mbatiza?” 37 —— 38 Ngeci uze yala ua ku Etiopia, ua tumine vemike litemba kaha nendi na Filipu va sulukile naku kovela mu mema, ngeci Filipu ua mu mbatizile. 39 Mu va tundile mu mema, sipilitu ya Yehova vuasi-vuasi ya tundisile Filipu kuze kaha uze yala ua ku Etiopia ka mu muene naua, vunoni ua tualeleleho vungendzi vuendi oku na viukilila. 40 Vunoni Filipu ua ka litulukuile ku Azoto, ngeci ua hitanganene mu membo ose a kuze naku tualelaho kuambulula muzimbu ua cili ku vimbonge viose, naku Sesaliya.