Ua Kulivanga Kuli Vakua Kolintu

15 Vamuanetu, hano honi njimi vuluisa via muzimbu ua cili unja miambuluilile, uze u mua tavele, kaha uze naua una mi lingisa kukanyama. 2 Nga mu tualelaho ku kakatela ku muzimbu ua cili unja miambuluilile, mu kovoka kuhitila muli ukeuo, nga kuahi kaha mua lisini ngoco kupua vakua kutsiliela.

3 Muomu ha viuma via kulivanga vinja mi lekele, vikevio nange viva nji longesele, nguavio Kilistu ua tsililile vupi vuetu ngue mu via handeka Visoneka. 4 Vamu tsindile, kaha vamu sanguile ha litangua lia mu citatu ngue mu via handeka Visoneka. 5 Kaha ua solokele kuli Kefasi,* munima yaco kuli vaze 12. 6 Munima yaco, ua solokele ku vamuanetu va tuvakana 500 ha ntsimbu imolika, cingi cavo vacili netu vutuhu vamo va na kosa mu tulo tua kutsa. 7 Munima yaco, ua solokele kuli Tiango, kaha ua solokele naku vapostolo vose. 8 Mu kumanusuila, uaku solokele kuli yange. Ngeci mukemuo, njinapu ngue kakeke ua kusemuka vuvisu.

9 Muomu yange ua mundende hakati ka vapostolo vose, kaha kanja fuililile kunji sana kapostolo, muomu nja yandesele cikungulukilo ca Njambi. 10 Vunoni ku ngozi ya kama ya Njambi, njinapu muno mu njinapu. Kaha ngozi yendi ya kama ya nji muesele, ka yaile mu ngoco, vunoni nja fuitanganene cikuma ku tuvakana vose. Vutuhu ngoco, kati yange nja vi puisilemo, vunoni ngozi ya kama ya Njambi injili nayo. 11 Vunoni ambe nga yange ni vakevo, mukemuo vene mu tue kuambuluila kaha mukemuo mu mua tsilielele.

12 Nga tuli na kuambulula nguetu Kilistu vamu sanguile ku vatsi, kaha vati honi vamo hakati kenu vali na kuhandeka nguavo kakuesi cisangukilo ca vatsi? 13 Nga cili vene ka kuakele cisangukilo ca vatsi, omuo ni na Kilistu vene ka vamu sanguile. 14 Kaha nga Kilistu ka vamu sanguile, omuo ni kuambulula cetu cinapu ca ngoco. Kaha na lutsilielo luenu naluo lunapu lua ngoco. 15 Cikuavo naua, nga cili vene vatsi ka vaka va sangula, omo tunapu vakaleho va Njambi va makuli, muomu tuli na kuambulula vukaleho kutuala hali Njambi nguetu ua sanguile Kilistu, vunoni ikeye kamu sanguile. 16 Muomu nga vatsi ka vaka va sangula, kaha na Kilistu vene ka vamu sanguile. 17 Kaha nga Kilistu ka vamu sanguile, lutsilielo luenu lunapu lua ngoco, kaha mu tualelaho mu vupi vuenu. 18 Kaha na vaze va na kosa tulo tua kutsa muli Kilistu, va na nongo vua vuye. 19 Nga tua lavelela Kilistu mu muono uno lika, kaha tuvuisa cikuma ngozi kuhiana vantu vose.

20 Vunoni vusunga ni ovu, Kilistu va namu sangula ku vatsi kaha ikeye vusuka vua kulivanga ku vaze va na kosa tulo tua kutsa. 21 Muomu mu kulinga kutsa cezile kuhitila muli muntu umolika, na cisangukilo ca vatsi naco cineza kuhitila muli muntu umolika. 22 Muomu ngue omo vose vali na kutsa omo lia Andama, mukemuo naua omo lia Kilistu vose vaka tambula muono. 23 Vunoni muntu ku muntu mu ntsimbu yendi: Ua kulivanga* Kilistu, munima yaco vaze va kundama kuli Kilistu vaka va sangula mu ntsimbu ya kusoloka cendi. 24 Kutundaho, kukeza kuhua ca viose, omo aka hiluisa Vuangana kuli Ise Njambi yendi, munima ya kunongesa mavuangana ose, na mpoko yose ya kutumina kaha na ngolo yose. 25 Muomu napande kusika noho Njambi aka haka vitozi vose muintsi lia viliato viendi.* 26 Kaha citozi ua kumanusuila kumu nongesa ikeye kutsa. 27 Muomu Njambi “nononuesa viuma viose muintsi lia viliato viendi.” Vunoni mu kuhandeka nguavo ‘nononuesa viuma viose,’ eci ka ca lumbunukile nguavo hamolika na Uze vene nononuesa viuma viose, houe. 28 Vunoni omo viuma viose vaka viononuesa kuli ikeye, Muana nendi aka liononuesa kuli Uze ua muononuesele viuma viose, linga Njambi apue viuma viose kuli vose.

29 Nga vatsi ka vaka sanguka, vika vi ka soloka kuli vaze va vali na kumbatiza na vutumbe vua kutsa? Kaha vika vali naku va mbatizila mu cifua oco? 30 Vika netu tuli naku likovelesela mu vusonde ntsimbu yose?* 31 Tangua na tangua nje kuhita mu vusonde vua kutsa. Ovu vunapu vusunga vamuanetu, ngue mu njili na kulipamba kutuala hali yenu muli Kilistu Yesu Muangana uetu. 32 Nga ngeci mua vakuetu* nange nja luile na vikasama vamu Efesu, vika njina uanaho? Nga nguavo vatsi ka vaka sanguka, omuo ni “tu lienu tu nuenu, muomu imene tutsa.” 33 Kati mu likuise. Vavusamba va kuvihia, ve kuvihisa vilinga* via cili. 34 Singaniekenu mua cili na kulinga via vuviuke, muomu kuli vamo ka va tantekeya Njambi. Njili na kuhandeka evi viuma linga muivue ntsoni.*

35 Vutuhu ngoco, umo ahasa kuhandeka nguendi: “Vatsi vaka sanguka vati? Muvila ua cifua cika vaka sanguka nauo?” 36 Ove ciheve! Vize vi ukuna kavi tendumuka, kuvanga vi livange kutsa. 37 Kaha vize vi ukuna, ka ukunu muvila uze ukola, vunoni ukuna lika nona yaco ambe nga ya tiliku ni mbuto ya cifua ceka. 38 Vunoni Njambi ue kuhana muvila ku nona yaco kuliya na muze mua na zange, kaha mbuto ku mbuto ueku ihana muvila uayo. 39 Ntsitu yose ka yafuile mumolika. Vunoni kuakala ya vantu, kuakala ntsitu ya vangombe, kuakala ntsitu ya tuzila, na ya vantsi. 40 Kuli mivila ya muilu na mivila ya ha mavu. Vunoni vumpahu vua mivila ya muilu vuapua vua cifua ceka, kaha vumpahu vua mivila ya ha mavu navuo vua cifua ceka. 41 Vumpahu vua litangua vuapua vua cifua ceka, kaha vumpahu vua ngonde navuo vuapua vueka, na vumpahu vua vintangantanga vuapua vueka. Cili vene, vumpahu vua imo ntangantanga* vua liseza na vua ikuavo.

42 Mukemuo mu cafua na cisangukilo ca vatsi. Va kuna muvila uze ue kuvola, kaha va sangula muvila uze ka ue kuvola.* 43 Va ukuna mu kusahuka, vunoni va usangula mu vumpahu. Va ukuna mu kuzeya, vunoni va usangula mu ngolo. 44 Va ukuna mu kupua muvila ua ntsitu, vunoni va usangula mu kupua muvila ua sipilitu. Nga kuakala muvila ua ntsitu, kaha kuli naua na muvila ua sipilitu. 45 Ngeci mukemuo vasoneka nguavo: “Muntu ua kulivanga Andama, uapuile muntu ua muono.” Vunoni Andama uaku manusuila, uapuile sipilitu ize ihana muono. 46 Vunoni muvila ua sipilitu kati ukeuo ua livangele. Muvila ua ntsitu ukeuo ua livangele, amba vuose kuize muvila ua sipilitu. 47 Muntu ua kulivanga ua tunda ha mavu kaha vamu tangele na mpumputa ya livu. Vunoni muntu uamu civali, ua tunda muilu. 48 Vantu va ha mavu, vapua ngue uze iva tangele ku mpumputa ya livu. Vunoni vaze va muilu, vapua ngue uze ua tundile muilu. 49 Ngue muze mu tua lifua na uze iva tangele ku mpumputa ya livu, tu ka lifua naua na uze ua tundile muilu.

50 Vunoni vamuanetu nji mileka nguange, ntsitu na maninga ka vihasa kusuana Vuangana vua Njambi, cipue cize ce kuvola, ka ci hasa kusuana cize kace kuvola. 51 Talenu! Nji mileka lihungu lia kulela nguange, kati tu vavose tu ka kosa tulo tua kutsa, vunoni tu vose tu kaluluka. 52 Mu vuasi-vuasi, ngue kukavuka* ca liso, omo luneta lua ku manusuila lu ka sika. Muomu luneta lu ka sika, kaha vatsi vaka sanguka na mivila ize ka ye kuvola, kaha tu ka himpuka. 53 Muomu muvila uvola, una pande kuzala uze ka ue kuvola. Kaha uze utsa, una pande kuzala uze ka ue kutsa. 54 Vunoni omo muvila ou uvola uka zala uze ka ue kuvola, nomo muvila ou utsa uka zala uze ka ue kutsa, kaha aka lipuisamo mezi a vasoneka nguavo: “Kutsa va naci lehula ku miaka yose.” 55 “Ove kutsa, kuhiana cove ci li kuli? Ove kutsa, vusungu* vuove vuli kuli?” 56 Vupi vukevuo vusungu vuze vue kukoka kutsa, kaha ndzili ya vupi, yapua Masiko.* 57 Vunoni tu santsela kuli Njambi, muomu ikeye ueku tu kuasa kuvula kuhitila muli Muangana uetu Yesu Kilistu!

58 Ngeci mukemuo, vamuanetu vanja lema, kolesenu, imanenu ngi, ntsimbu yose kalenu na viavingi via kulinga mu vipanga via Muangana, muomu mu tantekeya nguenu ku fuitangana cenu muli Muangana kaci kaya mu ngoco.