Ua Kulivanga Kuli Vakua Kolintu

9 Nkuma kati nji ua kupatuka ni? Kati nji kapostolo ni? Kanja muene Yesu Muangana uetu ni? Kaha kati yenu cipanga cange muli Muangana ni? 2 Ambe nga vamo ve kunji mona nguavo kati nji kapostolo, vunoni kuli yenu njapua vene kapostolo! Muomu yenu muapua citantekeyeso ca muesa ha toma vupostolo vuange muli Muangana.

3 Kuli vaze vali na kunji paya,* nji lihakuila nguange: 4 Nkuma katuesi na mpoko ya kulia na kunua ni? 5 Nkuma katuesi na mpoko ya kuambata vampuevo vaze va tsiliela, na kuya navo mu mangendzi etu ngue mu vali na kulinga vapostolo vose, na vamuanaye ya Muangana na Kefasi ni?* 6 Nkuma yange lika vene na Mbanambasa tua pande kupanga linga tu uane via kulikuasa navio ni? 7 Lisualale muka apanga na kulifueta ikeye vavenya? Iya akuna lihia lia vinyu, ahona kulia ku vusuka vualio? Ni iya aniunga vutanga vua vimuna, vunoni kanu ku mavisi a vimuna vaco?

8 Vuno njili na kuhandeka evi viuma kuliya na cifua ci veku muenamo vantu ni? Nkuma Masiko nauo, kua handekele ha viuma viaco ni? 9 Muomu mu Masiko a Mosesa va sonekamo nguavo: “Kati ukute ngombe ku kanua, omo ali na kuzungula vimbuto.” Vuno Njambi ua lisosomua lika na vangombe ni? 10 Ni aa mezi ka va handekelele yetu? Cili vene, vavi sonekelele yetu, muomu mukua kulima na mukua kuzungula, ve kulingamo na lulavelelo lua ku tambulako vimo.

11 Nga tua kunine hakati kenu viuma via ku sipilitu, vuno ci kapua vupi kutia vukuasi vua ku muvila kuli yenu ni? 12 Nga vantu veka vali na mpoko ya kutambula vukuasi kuli yenu, nkuma yetu katuesi na mpoko ya kulingamo, ku tuvakana vakevo ni? Vutuhu ngoco, katua pangesele mpoko yaco, vunoni tuli na kukolesa mu viuma viose, linga kati tu honouese vantu kutambula muzimbu ua cili kutuala hali Kilistu. 13 Enu kamu tantekeya nguenu, vakua kupanga cipanga ca kulela, ve kulia viuma via mu tembele ni? Kaha naua, kamu tantekeya nguenu, vakua kupangela ntsimbu yose ku mutula, ve kutambulako vimo ku mutula ni? 14 Mukemuo naua, Muangana ua sikile nguendi, vaze vambulula muzimbu ua cili va yoyele ha muzimbu ua cili.

15 Vunoni ku viuma evi na cimo cahi cinji na pangesa. Cili vene, evi kanja visonekele linga munji lingilevio, muomu kuli yange, cili kulutue kutsa, ku tuvakana—,kanji tavesa muntu naumo uahi anji tambule viuma vinje kulipambela! 16 Na vuno, nga njambulula muzimbu ua cili, na vimo viahi vinji lihalesela, muomu kanapu kapandi kange vene. Cili vene, ngongo yange nga ka njambulula muzimbu ua cili! 17 Nga nji linga cipanga caco ku cizango, nji ka tambula fueto. Vunoni ambe vene nji linge ca ku lisindiya, kuli cimo cipanga ci va nanji kundika. 18 Kaha fueto yange ika? Inapu kuambulula muzimbu ua cili ku cizango cange, ca kuhona kufuetesa linga kati nji pangese mua kuvihia mpoko yange ya kupua mukua kuambulula muzimbu ua cili.

19 Muomu, vutuhu nji ua kupatuka ku vantu vose, vunoni njina lipuisa ndungo ku vose, linga nji koke* vantu vavengi. 20 Ku vaYundeya nja lipuisile kaYundeya, linga nji koke vaYundeya. Kuli vaze vali muintsi lia masiko, nja lipuisile ngue muntu ali muintsi lia masiko, vutuhu ange kanjesi muintsi lia masiko, linga nji koke vaze vali muintsi lia masiko. 21 Kuli vaze kavesi na masiko, nja lipuisile ngue uze kesi na masiko, vutuhu ange nje ku kavangeya masiko a Njambi, kaha naua njakala muintsi lia masiko a Kilistu, linga nji koke vaze kavesi na masiko. 22 Kuli vakua kuzeya, nja lipuisile ua kuzeya, linga nji koke vakua kuzeya. Nja lipuisile viose ku vantu va vifua viose, linga nji uane vinjila viose-ovio via kuovolako vamo. 23 Vunoni viuma viose evi, nje kuvi lingila omo lia muzimbu ua cili, linga nji uambuluileko vakuetu.

24 Vuno kamu tantekeya nguenu mu vueho vua kutunta, vose ve kutunta vunoni umolika ue kutambula fueto ni? Tuntenu mu njila ize ika mi lingisa kutambula fueto. 25 Vose ve kutunta mu vueho vua kulivula-vula, ve kukuata* mutima mu viuma viose. Eyo, vakevo ve kulingamo linga vaka tambule cilongo cize ce kunonga, vunoni etu, tue ku vilingila cilongo cize ka ce kunonga. 26 Ngeci mukemuo, omo nji tunta, kanji tuntu lika ngoco. Kanjesi na kuveta vinkome viange mu luhundzi lua ngoco. 27 Vunoni, nji lintula* muvila uange naku upuisa ngue ndungo, linga mu nima ya kuambuluila vakuetu, ange kati vanji viane.