Kuhitila Muli Yoano
7 Mu nima yevi, Yesu ua tualeleho kuendangana mu Ngalileya, ka tondele kulingamo mu Yundeya, muomu vaYundeya va tondele kumu tsiha. 2 Cilika ca vaYundeya ci va sanene nguavo Cilika ca Vimbalaka,* ca kele mu hiehi. 3 Ngeci vantsongo vendi vamu lekele nguavo: “Tunda kuno uye ku Yundeya, linga vandongesi vove navo vaka mone vipanga viuli na kulinga. 4 Nga muntu atonda mbunga imu tantekeye ke kulingila viuma mu vusueke. Nga uli na kulinga evi viuma lisolole ku mavu.” 5 Muomu vantsongo vendi ka vamu tsilielele. 6 Kaha Yesu uava kumbuluile nguendi: “Ntsimbu yange kanda ici hete, vunoni yenu mu hasa kulingamo ntsimbu yose-oyo. 7 Vakua mavu nevi viva mi zindila viahi, vunoni yange vanji zinda. Muomu njili na kuambulula vukaleho kutuala hali vakevo nguange, vilinga viavo via kuvihia. 8 Yenu ku cilika, yange kanji yiko, muomu ntsimbu yange kanda ihete.” 9 Mua manusuile ku va leka evi viuma, ua salele mu Ngalileya.
10 Vunoni vantsongo vendi mu vaile ku cilika, mu nima yaco, nendi uaile, vunoni uaileko mu vusueke kati ha meso a vantu. 11 Ngeci vaYundeya va putukile kumu tonda ku cilika caco nguavo: “Kuiko ali uze yala?” 12 Kaha vantu vavengi mu mbunga vakele naku liyevetela kutuala hali ikeye. Vamo vakele na kuhandeka nguavo: “Uapua muntu ua cili.” Vakuavo co nguavo: “Houe. Ali naku hungumuna lika mbunga.” 13 Naumo uahi ua hasele kuhandeka viendi ku meso a mbunga omo lia liova lia vaYundeya.
14 Cilika mu ca hetele hakati, Yesu ua kandukile ku tembele kaha ua putukile kulongesa. 15 Ngeci vaYundeya va likomokelele mua kama nguavo: “Vati ou yala atantekeya ngeci Visoneka, ikeye ka lilongesele?”* 16 Yesu uava kumbuluile nguendi: “Vi njili na kulongesa kati viange, vunoni via uze uanji tumine. 17 Nga muntu atonda kulinga cizango ca Njambi, aka tantekeya nga vino vilongesa vi tunda kuli Njambi, ni njili naku lihandekela viange vavenya. 18 Uze ahandeka viendi vavenya ali na kutonda vumpahu vuendi vavenya, vunoni uose atonda vumpahu vua uze uamu tumine, ikeye mukua vusunga kaha kapuile mukua vuhenge. 19 Mosesa ua mihele Masiko, ni vati? Vunoni naumo uahi hakati kenu ue kuononoka. Vika honi mu tonda kunji tsihila?” 20 Mbunga yamu kumbuluile nguayo: “Uli na ndemone ove. Iya atonda ku kutsiha?” 21 Ngeci Yesu uava kumbululuile nguendi: “Njina lingi lika cuma cimolika, vunoni mu vose mua likomokela. 22 Ngeci mukemuo, aci singaniekenu vino, Mosesa ua mihele lisiko lia kulovola* kati ngue lisiko liaco lia tundile kuli Mosesa, vunoni ku vakukuluila venu; kaha mue kulovola vene muntu lia sapalalo. 23 Nga yenu mue kulovola muntu lia sapalalo linga kati mu tsihe Lisiko lia Mosesa, amba vika munji nyenguela muomu nja kanguisa muntu lia sapalalo? 24 Likelenu kuhisa vantu omo lia cifua cavo, vunoni hisenu vantu mu vuoloke.”
25 Kaha vamo va tungile mu Yelusalema va putukile kuhandeka nguavo: “Kati ikeye yala iva tonda kutsiha ou? 26 Kaha talenu! Ali na kuhandeka ku meso a mbunga, vunoni viahi vali na kuhandeka. Vuno vantuamena vetu va na nongonona nguavo ikeye Kilistu ni? 27 Yetu tutantekeya kuiko atunda ou yala, vunoni Kilistu mua keza, naumo uahi aka tantekeya kuiko aka tunda.” 28 Yesu muakele na kulongesa mu tembele, ua tambakanene nguendi: “Yenu munji tantekeya, kaha mu tantekeya noku kunji tunda. Ka njezile ku cizango cange vavenya, vunoni Uze uanji tumine uapua ua vusunga mpundu kaha enu kamu mu tantekeya. 29 Yange nji mu tantekeya, muomu nji mukua ku muimanenako kaha Ikeye uanji tumine.” 30 Ngeci va tondele kumu kuata, vunoni naumo uahi ua hasele ku lingamo muomu ntsimbu yendi tele kanda ihete. 31 Vutuhu ngoco, vantu vavengi mu mbunga vamu tsilielele kaha vakele na kuhandeka nguavo: “Omo Kilistu akeza, vuno aka hasa kulinga vitantekeyeso viavingi ku tuvakana viou yala ni?”
32 VaFaliseu vavuile mbunga mu yakele na kuningita evi viuma kutuala hali ikeye, ngeci vakuluntu va vasasendote na vaFaliseu va tumine masualale vaka mu kuate. 33 Ngeci Yesu ua handekele nguendi njikala nenu mu kantsimbu kakandende, ntsimbu kanda njiye kuli Uze uanji tumine. 34 Kaha muka nji tonda, vunoni ka muka nji uana, noku ku njika kala yenu kamu hasa kuyako.” 35 Ngeci vaYundeya va putukile ku lihandekesa hakati kavo nguavo: “Kuiko atonda kuya ou yala kua kulinga ka tuhasa kumu uana? Vuno atonda kuya ku vaYundeya vaze va lisanduoka hakati ka vaNgelengu, linga aka longese vaNgelengu ni? 36 Vika atonda kuhandeka omo mua nambe nguendi, ‘Muka nji tonda vunoni ka muka nji uana, noku ku njika kala yenu kamu hasa kuyako’?”
37 Ha litangua lia ku manusuila lize liapuile litangua lia kama lia cilika, Yesu uemanene naku tambakana nguendi: “Nga kuli umo natsi mpuila, eze kuli yange akunue. 38 Uose anji tsiliela, ‘Muntima yendi muka tunda vandonga va mema a muono’ ngue mu via handeka visoneka.” 39 Vunoni mu kuhandeka evi, uakele na kutumbula mpundu via sipilitu ive ku tambuile vaze va tsilielele muli ikeye, ha ntsimbu eyi sipilitu tele yahiko muomu Yesu tele kanda akovele mu vumpahu. 40 Ngeci vamo mu mbunga, mu vavuile aa mezi va putukile kuhandeka nguavo: “Mua vusunga ou ikeye Kapolofeto.” 41 Vakuavo vakele na kuhandeka nguavo: “Ou ikeye Kilistu.” Vunoni vamo nguavo: “Vuno Kilistu ahasa kutunda ku Ngalileya ni? 42 Kati visoneka nguavio, Kilistu aka tunda kumbuto ya Ndaviti namu Mbetelema muimbo liakele Ndaviti ni?” 43 Ngeci ize mbunga ya litepele omo liendi. 44 Vamo va tondele kumu kuata, vunoni naumo uahi ua hasele kumu saleka livoko.
45 Ngeci vaze masualale va hilukile ku vakuluntu va vasasendote na vaFaliseu, vunoni va vehuile nguavo: “Vika ka mua mu nehelele kuno?” 46 Masualale va kumbuluile nguavo: “Kanda ku cikale muntu ua kuhandeka ngeci muendi.” 47 Kaha vaFaliseu va vehuile nguavo: “Nenu va nami hungumuna ni vati? 48 Vuno kuli umo mukua kusika ni kaFaliseu namu tsiliela? 49 Vunoni eyi mbunga ka itantekeya Masiko inapu ya kusinga.” 50 Nikondemo, umo uavo uze uaile kuli Yesu tangua limo, uava lekele nguendi: 51 “Vuno Masiko etu atavesa kusompesa muntu, ca kuhona kumu halakana linga tu tantekeye viali na kulinga?” 52 Vamu kumbuluile nguavo: “Nkuma nove ua tunda ku Ngalileya, tondesesa kaha uka uana nguove, naumo kapolofeto uahi aka tunda ku Ngalileya.”*