Kuli Vakua Loma
10 Vamuanetu, cizango ca ku mutima uange mpundu, kaha vikevio vinjili na kulambelela vene na kuli Njambi omo liavo nguange vovoke.* 2 Muomu nange nji vakelako vukaleho ngecize, vakala na ntuima ku via Njambi, vunoni kati kuliya na mangana a vusunga. 3 Muomu mu kulinga ka va tantekeya vuoloke vua Njambi, kaha va na limangela viavo vavenya, ngeci ka va liononuesele ku vuoloke vua Njambi. 4 Muomu Kilistu ua manusula Masiko, linga uose amu tsiliela apue mukua vuviuke.
5 Muomu Mosesa ua soneka kutuala ha vuviuke vuemana ha Masiko nguendi: “Muntu alinga evi viuma, aka yoya omo lia viuma viaco.” 6 Vunoni kutuala hali mukua vuviuke omo lia lutsilielo, lizi lia Njambi ngualio: “Kati uhandeke mu mutima uove nguove, ‘Iya aka londa muilu?’ kulumbunuka aka suluisa Kilistu ha mavu, 7 ni nguove, ‘Iya aka sikumuka mu cina* kacesi na masima?’ kulumbunuka kusangula Kilistu ku vatsi.” 8 Vunoni vika lizi lia Njambi lihandeka? “Lizi lili mu hiehi nove, mu kanua kove vene namu mutima uove mpundu,” ni nguetu “lizi” lia lutsilielo lituli na kuambulula. 9 Muomu nga uambulula kumbunga na kanua kove nguove, Yesu ikeye Muangana, na kutsiliela mu mutima uove nguove, Njambi uamu sanguile ku vatsi, ukovoka. 10 Muomu muntu atsiliela na mutima, linga apue mukua vuviuke, vunoni ambulula na kanua kendi ku mbunga linga akovoke.
11 Muomu visoneka nguavio: “Uose amu tsiliela kaka liveye.” 12 Muomu kahesi kuliseza hali kaYundeya na kaNgelengu. Vose Muangana uavo umolika, uze ueku vezikisa vose vamu sana. 13 Muomu “uose asana lizina lia Yehova* akovoka.” 14 Vunoni vati vaka mu sana nga ka vamu tsilielele? Amba va kamu tsiliela vati nga kanda vevueho viendi? Vati va kevua viendi nga uahi a vambuluila? 15 Kaha vambulula vati nga uahi na vatumu? Ngue mu vasoneka nguavo: “Talenu muya viuka mikono* ya vakua kuambulula muzimbu ua cili ua viuma via cili!”
16 Vutuhu ngoco, kati vose vononokele ku muzimbu ua cili. Muomu Isaya nguendi: “Yehova, iya na tsiliela mu viuma viva nevu kuli yetu?”* 17 Ngeci mukemuo, lutsilielo lue kuiza mu nima ya kuivua lizi. Kaha lizi ve kulivua nga muntu ahandeka via Kilistu. 18 Vunoni nji ci hulako: Vuno vaIsaleli ka vavuile eli lizi ni? Cili vene va vuileko. Ngue mu vasoneka nguavo, “lizi liavo va livuile ha mavu hose, na muzimbu uavo ua hetele na kuze kualenga mavu.” 19 Kasi nji hulako naua nguange, vuno vaIsaleli ka vevuisisile ni? Ha katete Mosesa ua handekele nguendi: “Njika mi sangumuna lifuua mu kupangesa vantu ka vapuile muyati. Njika pangesa muyati ua kuheva mu kumi sangumuna matoto.” 20 Vunoni Isaya ua simpile mua kama na kuhandeka nguendi: “Vaze ka vakele na kunji tonda, vakevo vanji uanene. Vaze ka vakele na kuihula viange, vakevo vanji tantekeyele.” 21 Vunoni kutuala kuli vaIsaleli nguendi: “Litangua liose nji noluela mavoko ange ava vantu va lisino, kaha va kukaluua mitima.”