Kuhitila Muli Yoano
14 “Kati mume mitima. Tsilielenu Njambi naku tsiliela muli yange naua. 2 Mu ndzivo ya Tata muakala vihela viavingi. Nga ka via keleko, nga njina mileka muomu njili na kuya njika mi viukisile cihela. 3 Cikuavo naua, nga njiya naku mi viukisila cihela njika hiluka linga njaku miambate, linga oku kunji kakala nenu muka kaleko. 4 Kaha oku kunjiya, nenu mu tantekeya njila.”
5 Tomasi uamu lekele nguendi: “Muangana, oko kuya ka tu tantekeyako. Amba njila tu izivuka vati?”
6 Yesu uamu kumbuluiile nguendi: “Yange njila, na vusunga, na muono. Naumo uahi eza kuli Tata, kuvanga kuhitila muli yange. 7 Nga yenu mua nji tantekeya, nga mua tantekeya naua Tata. Kutunda hano, mua mu tantekeya kaha mua mu mono.”
8 Filipu uamu lekele nguendi: “Muangana, tu lekese Tata, kaha kunahu vinapumo.”
9 Yesu uamu kumbuluile nguendi: “Filipu, mupue ntsimbu injili nenu, kasi vene ka unji tantekeya? Uose nanji mono na mono naua Tata. Kaha vati uhandeka nguove, ‘Tu lekese Tata’? 10 Nkuma ka utsiliela nguove, nja likata na Tata kaha Tata ua likata nange? Vinjili na kuhandeka, kati via ku lisinganiekela yange vavenya, houe. Vunoni Tata uze ua likata nange, ikeye ali na kulinga vipanga viendi. 11 Nji tsilielenu mu njina handeka nguange, ange nja likata na Tata kaha Tata ua likata nange. Nga kuahi, nji tsilielenu omo lia vipanga vi njili na kulinga. 12 Nji mileka vusunga nguange, uose anji tsiliela nendi aka linga vipanga vi njili na kulinga. Kaha aka linga vipanga via kama ku tuvakana evi, muomu njili na kuya kuli Tata. 13 Cikuavo naua, viose-ovio vi mu vundila mu lizina liange, njika vilinga, linga Tata atambule vumpahu kuhitila muli Muana. 14 Viose-ovio vi muka vundila mu lizina liange, njika vilinga.
15 “Nga mua nji lema, mu kononoka masiko ange. 16 Kaha njika lomba Tata ami hane mukuasi* ueka, linga akakale nenu ku miaka yose, 17 ikeyo vene sipilitu ya vusunga, intsa ka va hasa kutambula vakua mavu muomu kavesi na kuimona nambe ku itantekeya. Yenu mu itantekeya muomu ili nenu kaha naua ili muli yenu. 18 Kanji miseza ngue vana vantsiua. Njika hiluka naua kuli yenu. 19 Vuovuno vakua mavu ku vanji mono naua. Vunoni yenu munji mona, muomu njili na kuyoya kaha nenu muka yoya. 20 Ha litangua lize, muka tantekeya nguenu nja likata na Tata, nenu mua likata nange kaha nange nja likata nenu. 21 Uose atava masiko ange naku ononoka, ikeye uanji lema. Kaha uose anji lema, Tata aka mu lema, kaha nange njika mu lema naku lisolola ha toma kuli ikeye.”
22 Yundasa, vunoni kati Iskaliota, ua muihuile nguendi: “Muangana, vika via lingika linga utonde ku lisolola ha toma kuli yetu lika, vunoni kati kuli vakua mavu?”
23 Yesu uamu kumbuluile nguendi: “Nga muntu anji lema, ononoka lizi liange kaha Tata amu lema. Kaha tuiza kuli ikeye tua kukale hamo nendi. 24 Uose uze kanji lemene, kononoka mezi ange. Lizi limuli na kuivua kati liange, vunoni lia Tata uze uanji tumine.
25 “Njili naku mileka evi viuma ntsimbu njicili nenu. 26 Vunoni mukuasi, eyo sipilitu santu vene, ize ya ka tuma Tata mu lizina liange, ika mi longesa viuma viose naku mi vuluisa viose vinja mileka. 27 Njimi sila ciyulo. Njimi hana ciyulo cange. Kanji mi hanaco ngue muve ku cihana vakua mavu. Kati mume mitima cipue kuivua liova. 28 Muavuile munja mi lekele nguange, ‘Njili na kuya kaha njika hiluka kuli yenu.’ Nga mua nji lema, nga mua viukilila nguenu njili na kuya kuli Tata, muomu Tata uanji hiana ange. 29 Ngeci njina livanga ku mileka evi viuma, ntsimbu kanda vi soloke, linga muvi ka soloka, muka tsiliele. 30 Kanji handeka naua nenu viuma viavingi, muomu mukua kusika ano mavu ali na kuiza, kaha kesi na ngolo hali yange. 31 Vunoni linga vakua mavu va tantekeye nguavo nja lema Tata, njili na kulinga ngue muze vene mua nji sikile Tata. Katukenu, tu tundenu kuno.