Kuhitila Muli Yoano
10 “Mua vusunga nji mileka nguange, uze ka kovelela ku mbelo ya limba lia vampanga, vunoni alondela kueka uapua muizi kaha uapua naua muhuza. 2 Vunoni uze akovelela kumbelo, ikeye kaniungi ua vampanga. 3 Mukua kuniunga kumbelo amu sokoluela kaha vampanga va halakana ku lizi liendi. Asana vampanga vendi ha mazina naku va tuhula. 4 Mu nima ya kutuhula vampanga vendi vose, ue kutuama kulutue luavo kaha vampanga vamu kavangeya, muomu va tantekeya lizi liendi. 5 Ku va kakava muntu ueka, vunoni vaka mu teua muomu ka va tantekeya mezi a vantu veka.” 6 Yesu uava hele eci cimueso, vunoni ka vevuisisile viakele naku va leka.
7 Ngeci Yesu uava lekele naua nguendi: “Mua vusunga nji mileka nguange, yange mbelo ya vampanga. 8 Vose vaze va neza na kulikuisa nguavo yange, va napu vezi na mihuza. Vunoni vampanga, kavava halakanene. 9 Yange mbelo. Uose akovelela muli yange akovoka, kaha aka kovela na kutuhuka na kuuana vulilo. 10 Muizi ke kuiza ngoco, vunoni ue kuiza mu kupunda, kutsiha na kunongesa. Yange njineza linga va uane muono na kukala nauo ku miaka yose. 11 Yange kaniungi ua cili. Kaniungi ua cili ue kuhana muono uendi omo lia vampanga. 12 Muntu ua kukumuna ngoco, uze kati kaniungi kaha vampanga kati vendi, mua mona kangunga na hete, atina na kuseza vampanga, ngeci kangunga ava kuata naku va sanduola. 13 A tina muomu ua kukumuna lika, kaha vampanga ka va silivila kuli ikeye. 14 Yange kaniungi ua cili. Nji tantekeya vampanga vange kaha vampanga vange vanji tantekeya. 15 Ngue omo Tata anji tantekeya, nange naua nji tantekeya Tata, kaha njihana muono uange omo lia vampanga.
16 “Njili na vampanga veka kati vamu limba lino. Navo nja pande ku va neha kaha vaku halakana ku lizi liange, ngeci va kupua vutanga vumo na kaniungi uavo umolika. 17 Ngeci mukemuo, Tata uanji lema, muomu njihana muono uange linga njika utambule naua. 18 Naumo uahi anji tambulauo, vunoni yange nji hangula ku uhana. Njili na mpoko yaku uhana kaha njili na mpoko ya ku utambula naua. Eli lisiko nja litambula kuli Tata.”
19 Hakati ka vaYundeya ha katukile naua kulitepa omo lia aa mezi. 20 Vavengi vakele na kuhandeka nguavo: “Ali na ndemone ou, na zaluka. Vika honi muli naku mu halakanena?” 21 Vakuavo nguavo: “Aa kati mezi a muntu ali na ndemone. Vuno ndemone ahasa kuimuisa meso a tupuputa?”
22 Ha ntsimbu yaco, mu Yelusalema muakele Cilika ca Kukundika.* Capuile cisika, 23 kaha Yesu uakele na kuenda mu tembele ku cimbimbi ca Solomone. 24 Ngeci vaYundeya vamu zengelekele na kuputuka ku muihula nguavo: “Ntsimbu ingahi utonda tu tualeleho ku takanya? Nga yove Kilistu, tu leke vene.” 25 Yesu uava kumbuluile nguendi: “Njina mileka laza, vunoni uenu kutava. Vipanga vinjili na kulinga mu lizina lia Tata, vikevio vihana vukaleho kutuala hali yange. 26 Vunoni kamu tondo kutava, muomu kati mu vampanga vange. 27 Vampanga vange va halakana lizi liange, yange nji va tantekeya kaha vanji kava. 28 Nji va hana muono ka ue kuhua, kaha na limo litangua liahi vaka nonga, cikuavo naua, naumo uahi ava nyangula mu livoko liange. 29 Via nanji hana Tata, viapua via seho kuhiana vikuavo viose, kaha naumo uahi ahasa ku vi nyangula mu livoko lia Tata. 30 Nange na Tata tuapua umo.”*
31 Ngeci vaYundeya va nonene naua lueka mavue linga va muase. 32 Yesu ua vehuile nguendi: “Njina mi muesa vipanga via cili viavingi via kutunda kuli Tata. Ha vipanga viaco evi, cipanga cika mu njasela mavue?” 33 VaYundeya vamu kumbuluile nguavo: “Ka tu kuasela mavue omo lia cilinga ca cili, vunoni omo lia kusahula Njambi. Muomu vutuhu u muntu, uli na kulipuisa njambi.” 34 Yesu uava kumbuluile nguendi: “Kati va soneka mu Masiko enu nguavo, ‘Nja handekele nguange: “Enu mu vanjambi”’?* 35 Nga vaze va lia payele lizi lia Njambi uava tumbuile nguendi “vanjambi”, kaha evi Visoneka kasi ka vialulukile. 36 Vunoni ange, Tata nanji lelesa naku nji tuma hano ha mavu. Kaha munjamba nguenu, ‘Uli na kusahula Njambi,’ muomu njina handeka nguange, ‘Nji Muana Njambi ni’? 37 Nga kanje kulinga vipanga via Tata, kati munji tsiliele. 38 Vunoni nga njili naku vilinga, vutuhu ka mua tsilielele muli yange, vunoni tsilielenu vipanga, linga mu tantekeye na kutsiliela ngecize Tata ua likata nange kaha nange nja likata na Tata.” 39 Ngeci vesekele naua kumu kuata, vunoni uava sevunukile.
40 Yesu ua zavukile naua mu sinia lia Yondau, kuze kuakele naku mbatizila Yoano ku vuputukilo, kaha uaka kele kuze. 41 Vantu vavengi vezile kuli ikeye na kuhandeka nguavo: “Yoano ka lingile na cimo citantekeyeso cahi, vunoni viose via handekele kutuala hali ou yala viapuile via vusunga.” 42 Kaha vantu vavengi kuze vamu tsilielele.