Kuhitila Muli Mako
8 Ku matangua aze, mbunga ya ingi ya likunguluile kuli ikeye naua, vunoni ku vakele na viakulia. Ngeci Yesu ua sanene vandongesi vendi naku va leka nguendi: 2 “Njili na kuvuila ngozi eyi mbunga, muomu vali nange matangua atatu kaha kavesi na viakulia. 3 Nga nji vecela va hiluke ku membo avo na ndzala, vahasa ku lezumukila mu njila muomu vamo va na tundu ku lahako.” 4 Vunoni vandongesi vendi vamu kumbuluile nguavo: “Membo ali ku lahako, kuiko tuhasa kuuana viakulia via kupuamo via kuhana mbunga ya kupuaha?” 5 Kaha Yesu ua vehuile nguendi: “Vimbolo vingahi muli navio?” Vamu kumbuluile nguavo: “Via kupua 7.” 6 Ngeci ua lekele mbunga va tumame. Kaha ua tambuile vize vimbolo 7, ua vundilile* kaha uavi pazuile naku vi hana ku vandongesi vendi, ngeci vandongesi vendi va putukile kuhana mbunga. 7 Vakele naua na tumo tuvantsi, ngeci Yesu ua vundilile kaha mu nima yaco, ua tuhele ku vandongesi vendi linga va tepele mbunga. 8 Ngeci vose valile vekutile. Kaha va kunguluile visupo viose via viakulia, na kusulisa mitonga 7. 9 Vaze valile vapuile vamala 4.000. Mu nima yaco, ua lisalesele navo.
10 Ngeci haze vene, ua kovelele mu vuato na vandongesi vendi kaha vaile ku mutamba ua Ndalamanuta. 11 Kaha kuezile vaFaliseu va putukile ku likandula nendi vimpata, linga ava muese citantekeyeso ca kutunda muilu mu kumueseka. 12 Ngeci Yesu uavuile vusiua kaha ua tutumuisile na kuhandeka nguendi: “Omo lia vika ou muyati utonda citantekeyeso, mua vusunga nji mileka nguange, uno muyati ka uka mono citantekeyeso na cimo cahi.” 13 Mu nima yaco, uava sezele ua kovelele naua mu vuato na kuya mu sinia.
14 Vunoni vandongesi va suvile kuambata mbolo ya kupuamo, vakele lika na mbolo imolika mu vuato. 15 Kaha Yesu uava mamuine nguendi: “Tonenu na kuzangama na cimbaluila ca vaFaliseu, na cimbaluila ca Helonde.” 16 Ngeci va putukile kulihoya hakati kavo, muomu ka vambatele mbolo ya kupuamo.” 17 Yesu mua tantekeyele vi vakele naku lipindisa hakati kavo, ua vehuile nguendi: “Vika mu lipindisila nguenu ka muesi na mbolo ya kupuamo? Nkuma na ntsimbu ino ka muevuisisile ni? Nkuma mitima yenu kasi ina kaluua ni? 18 ‘Meso muli nauo, nkuma kamuesi na kumona? Matuitui muli nauo, nkuma kamuesi na kuivua?’ Kamu vuluka 19 vize vimbolo vitanu vinja munguile, vi valile vamala 5.000? Vihele vingahi via visupo mua sulisile?” Vamu kumbuluile nguavo: “Via kupua 12.” 20 “Kaha mu nja munguile vize vimbolo 7, vi valile vamala 4.000, mitonga ingahi ya visupo mua sulisile?” Vamu kumbuluile nguavo: “Ya kupua 7.” 21 Ngeci Yesu ua vehuile nguendi: “Nkuma na ntsimbu ino kasi ka muevuisisile ni?”
22 Kaha vaka hetele ku Mbetesainda. Ngeci vantu va nehelele Yesu umo yala ua kapuputa, naku mu lambelela nguavo amu saleke livoko. 23 Ngeci Yesu ua kuatele uze kapuputa ha livoko, naku mu tuala ha mbandza ya limbo. Mu nima ya kumu zekuila malendzi ha meso, uamu kuateleho naku muihula nguendi: “Uli na kumona vimo?” 24 Uze yala uanduile meso endi na kuhandeka nguendi: “Njili na kumona vantu, vunoni vali na kusoloka ngue miti ili na kuenda.” 25 Yesu ua kuatele naua ha meso auze yala, ngeci meso endi emukile kaha ua putukile kumona viuma viose ndzualala. 26 Mu nima yaco, Yesu uamu lekele aye ku ndzivo yendi naku mu sika nguendi: “Kati ukovele muimbo.”
27 Yesu na vandongesi vendi vaile ku membo aku Sesaliya ya Filipu, kaha mu vakele mu njila uehuile vandongesi vendi nguendi: “Vantu vali na kuhandeka nguavo yange iya?” 28 Vamu kumbuluile nguavo: “Vamo nguavo yove Yoano Mukua Kumbatiza, vakuavo nguavo Eliya, kaha vakuavo nguavo umo kapolofeto.” 29 Ngeci ua vehuile nguendi: “Amba yenu co nguenu yange iya?” Petulu uamu kumbuluile nguendi: “Yove Kilistu.” 30 Ngeci uava vindikile linga kati va lekeko naumo uahi viendi. 31 Cikuavo naua, ua putukile kulongesa vandongesi vendi nguendi: “Muana muntu na pande kuhita mu tuyando tua tuingi, kaha vakuluntu, vakuluntu va vasasendote na vakua kusoneka vaka mu viana naku mu tsiha, kaha mu nima ya matangua atatu aka sanguka. 32 Ua handekele ano mezi ku meso avo. Vunoni Petulu uamu sanenene ku mukulo na kuputuka kumu paya. 33 Kaha Yesu ua tengulukile na kutala ku vandongesi vendi, kaha ua tenukilile Petulu nguendi: “Tundomu Satana! Muomu visinganieka viove kati via Njambi, vunoni via vantu.”
34 Ua sanene mbunga hamolika na vandongesi vendi kaha uava lekele nguendi: “Nga muntu atonda kunji kava, na pande kuliviana ikeye ivene na kuambata citi cendi ca kayando* kaha atualeleho kunji kava. 35 Muomu uose atonda kuohiela muono uendi, aka uzimbalesa. Vunoni uose azimbalesa muono uendi omo liange, ni omo lia muzimbu ua cili aka u uana. 36 Muomu seho ika iliho nga muntu apita viuma viose via ha mavu, vunoni azimbalesa muono uendi? 37 Ni vika mpundu ahasa kufueta muntu linga apatule muono uendi? 38 Uose anji vuila ntsuamua naku vuila ntsuamua mezi ange kuno ku muyati ua vukoyi* na vupi, Muana muntu nendi aka mu vuila ntsuamua mua keza na tungelo va kulela mu vumpahu vua Ise.