Kuhitila Muli Yoano
18 Mua manusuile kuhandeka evi viuma, Yesu na vandongesi vendi vaile mu sinia lia kana kandonga* Kendelone muze muakele cimo citungu. Ngeci ua kovelelemo na vandongesi vendi. 2 Yundasa uze ua muendele vungungu, nendi ua tantekeyele ku cihela caco, muomu vintsimbu viavingi Yesu uakele naku likunguluilako na vandongesi vendi. 3 Ngeci Yundasa uezile na civunga ca masualale, na misipayi va vakuluntu va vasasendote, na misipayi va vaFaliseu kaha vambatele mitetengo, vindeya na vitua. 4 Mu kulinga Yesu ua tantekeyele viakele na kulingiua, ua suenene ha lutue naku vehula nguendi: “Iya muli na kutonda?” 5 Vamu kumbuluile nguavo: “Yesu Mukua Nazaleta.” Ngeci Yesu uava lekele nguendi: “Yange vene.” Yundasa uze ua muendele vungungu, nendi uakele hamo navo.
6 Vunoni Yesu mua va lekele nguendi, “Yange vene,” va hilukile ha nima na kuuila ha mavu. 7 Kaha Yesu ua vehuile naua nguendi: “Iya muli na kutonda?” Vamu kumbuluile nguavo: “Yesu Mukua Nazaleta.” 8 Yesu uava kumbuluile nguendi: “Nja mileka laza nguange yange vene. Kaha nga yange muli na kutonda, ecelenu ava vamala vaye.” 9 Evi via solokele linga alipuisemo mezi a handekele nguendi: “Hali vaze va uanji hele, kanja zimbaleseleho ambe umolika.”
10 Simone Petulu uakele na mukuale, ngeci ua usomuene na kuvatula lituitui lia cilio, lia ngamba ya sasendote ua kama. Lizina lia ngamba uaco, ikeye Maleku. 11 Vunoni Yesu ua lekele Petulu nguendi: “Someka ouo mukuale mu cindalu cauo. Vuno kanja pandele kunua ngandza ya na njihana Tata ni?”
12 Kaha masualale, mukuluntu ua masualale na misipayi va vaYundeya, va kuatele Yesu naku mukuta. 13 Ha katete vamu tualele kuli Anase, muomu uapuile isemueno ya Kayafase uze uapuile sasendote ua kama, uze muaka. 14 Kayafase, ikeye vene uze ua lekele vaYundeya nguendi, ca cili kuli vakevo muntu umo atsile vantu.
15 Simone Petulu na ndongesi mukuavo, vakele na kukava Yesu. Ndongesi uaco, vamu tantekeyele kuli sasendote ua kama, kaha ua kovelele hamo na Yesu mu citali ca sasendote ua kama. 16 Vunoni Petulu uemanene hambandza ku mbelo. Kaha uze ndongesi uva tantekeyele kuli sasendote ua kama, ua tuhukile na kuhandeka na mukua kuniunga ku mbelo, ngeci ua kovelesele Petulu mukati. 17 Kaha umo ngamba ua mpuevo uakele na kuniunga ku mbelo, uehuile Petulu nguendi: “Nguetu nove undongesi you yala?” Petulu uamu kumbuluile nguendi: “Houe, kati yange.” 18 Kaha vangamba na tupaso,* vemanene ku coto mu kuota tuhia tu va vuekele, muomu kuakele lisika. Petulu nendi uemanene navo mu kuota.
19 Kaha mulukuntu ua vasasendote uehuile Yesu kutuala ha vandongesi vendi na vilongesa viendi. 20 Yesu uamu kumbuluile nguendi: “Njina handeka na vakua mavu ha meso a vose. Ntsimbu yose njakele na kulongesa mu sinangonga namu tembele, muze muve ku likunguluila vaYundeya vose, kaha kanja handekele na vimo viahi mu vusueke. 21 Vika unjihuila? Ihula vaze va halakanene vinja va lekele. Tala! Ava vakevo va tantekeya vinja handekele.” 22 Mua manusuile kuhandeka evi viuma, umo kapaso uakele ku mukulo uamu hanene mbanda* kumeso naku muleka nguendi: “Mukemuo mua ku kumbuluila mukuluntu ua vasasendote omuo?” 23 Yesu uamu lekele nguendi: “Nga nja handeka mua kuvihia, njileke vi njina vihisa. Vunoni nga nja handeka vusunga, vika uanji pupila?” 24 Ngeci Anase, ua tumine Yesu kuli Kayafase sasendote ua kama, oku hanga va namu kutila.
25 Simone Petulu uakele kuze mu kuota tuhia. Ngeci va muihuile nguavo: “Nove nguetu u ndongesi yendi ni?” Ua vianene naku kumbulula nguendi: “Houe, kati yange.” 26 Umo ngamba ya sasendote ua kama, kavusoko ka uze yala ya vatuile lituitui Petulu, ua muihuile nguendi: “Kati yove inji na muene hamo nendi mu citungu?” 27 Vunoni Petulu ua vianene naua, kaha haze vene ndemba ua tambekele.
28 Ngeci va tundisile Yesu kuli Kayafase, vamu tualele ku ndzivo ya nguvulu. Aha tele cimenemene. Vunoni vaYundeya ka va kovelele mu ndzivo ya nguvulu, kati ngoco va lizualesa kaha va honoua kulia Paskua. 29 Ngeci Pilato ua tuhukile ha mbandza naku ka vehula nguendi: “Mulonga uka mua mu uana nauo ou yala?” 30 Vamu kumbuluile nguavo: “Nga ou yala kesi na mulonga,* nga katua mu nehele kuli yove.” 31 Ngeci Pilato uava lekele nguendi: “Mu tualenu, muka mu sompese yenu vavenya kuliya na masiko enu. Kaha vaYundeya vamu kumbuluile nguavo: “Masiko ka atu tavesa kutsiha muntu.” 32 Evi via solokele linga mezi a handekele Yesu alipuisemo, mu kumuesa cifua ce ku tsilililemo.
33 Ngeci Pilato ua kovelele naua mu ndzivo ya nguvulu, ngeci ua sanene Yesu naku muihula naua nguendi: “Yove Muangana ua vaYundeya ni?” 34 Yesu uamu kumbuluile nguendi: “Eci cihula ca ku lisinganiekela yove vavenya, ni kuli vamo va na kuleka viange?” 35 Pilato uamu kumbuluile nguendi: “Vuno nange nji kaYundeya ni? Vakua muyati uove na vakuluntu va vasasendote vakevo va na kuneha kuli yange. Vika una lingi?” 36 Yesu ua kumbuluile nguendi: “Vuangana vuange kati vua hano ha mavu. Nga Vuangana vuange vuapuile vua hano ha mavu, nga vantu vange* va nanji luilako linga kati va njihane mu mavoko a vaYundeya. Vunoni Vuangana vuange kati vua hano ha mavu.” 37 Pilato ua muihuile nguendi: “Mua cili, nkuma u muangana ni?” Yesu uamu kumbuluile nguendi: “Yove vavenya una handeka nguove nji muangana. Muomu vikevio vinja semukilile kaha naua vikevio vianji nehele hano ha mavu, linga njihane vukaleho vua vusunga. Uose ali ku mutamba ua vusunga a halakana lizi liange.” 38 Pilato ua muihuile nguendi: “Vusunga vuapua vika?”
Mu nima ya kuhandeka evi, ua tuhukile naua hambandza mu ku ka liuana na vaYundeya naku va leka nguendi: “Yange kanja mu uanene na mulonga. 39 Cikuavo naua, kuliya na kalingo-lingo kenu, mue kutonda nji mi patuile umo cindzinda ha ntsimbu ya Paskua. Mu tonda nji mi patuile Muangana ua vaYundeya ni?” 40 Va tambekele naua nguavo: “Ka tutondo ou yala, tutonda Mbalambasa!” Mbalambasa uapuile muhuza.*