Kuhitila Muli Mako

14 Tele kua lisupu matangua avali ku Paskua naku Cilika ca Mbolo ya Kuhona Cimbaluila. Kaha vakuluntu va vasasendote na vakua kusoneka, vakele na kutonda njila mu kupangesa amo makuli linga va kuateleho Yesu naku mu tsiha. 2 Vunoni vakele na kuhandeka nguavo: “Kati tu kalingemo ha litangua lia cilika, kutina vantu vaka linga mbuanja.”

3 Yesu muakele mu Mbetaniya, mu ndzivo ya Simone mukua mbumba, ntsimbu tele ali na kulia,* umo mpuevo uezile kuli ikeye na ntsazi ya alambastru, ya mazi a ndando yakama na vueko vua cili, nardu mpundu. Kaha ua suenene kuli Yesu na kuputuka kumu muanyena mazi aco ku mutue. 4 Vamo mu vavi muene, va nyenguele mua kama na kuhandeka nguavo: “Vika va vihisila ngeci aa mazi a vueko vua cili? 5 Muomu mazi aco nga va na alandesa vimbongo vi tuvakana 300 denariu, naku vihana ku vahutu!” Ngeci va nyenguelele uze mpuevo. 6 Vunoni Yesu uava lekele nguendi: “Muecelenu. Vika mu mu pindisila? Na nji lingila viuma via cili. 7 Vihutu muli navo ntsimbu yose, kaha mu hasa ku va lingila via cili ntsimbu yose-oyo imu tonda, vunoni yange ka mu kakala nange ntsimbu yose. 8 Ou mpuevo na lingi vize via na hasa. Aa mazi a vueko vua cili ana muanyena ha muvila uange, nau viukisila kunji tsinda. 9 Nji mileka vusunga nguange, kuose ku va kambuluila muzimbu ua cili mu mavu ose, via na lingi ou mpuevo vaka vi handeka mu kumu vulukilaho.”

10 Kaha Yundasa Iskaliota umo ua vaze 12, uaka simutuilile na vakuluntu va vasasendote kutuala ha vati ue kuendele Yesu vungungu, naku va hanaye. 11 Mu vavuile ngoco, va viukilile mua kama ngeci vamu kulahesele kumu hana vimbongo via palata. Kaha ua putukile kutonda vukovelelo vua cili vua ku muenda vungungu.

12 Ha litangua lia kulivanga lia Cilika ca Mbolo ya Kuhona Cimbaluila, litangua lize li vakele naku kombeleya cimuna ua Paskua, vandongesi vendi va muihuile nguavo: “Kuiko utonda tu ka ku viukisile Paskua?” 13 Mua vuile ngoco, ua tumine vandongesi vendi vavali naku va leka nguendi: “Yenu mu mbonge, muka liuana naumo yala nambata njava ya mema. Mukavenu 14 mu ndzivo yose oyo ya ka kovela. Kaha muka leka vavenya ndzivo nguenu, ‘Mulongisi natu tumu nguendi: “Hondo ya vangendzi mu njihasa kulila Paskua na vandongesi vange ili kuli?’” 15 Uze yala aka mi lekesa hondo yakama ya helu, ya kuviukisa laza kaha muli viose. Mukemuo mu muka tu vuaheselayo.” 16 Ngeci vandongesi vaile, vaka kovelele mu mbonge, vaka uanene viose ngue mua va lekele Yesu ngeci va viukisile Paskua.

17 Ku ntsimbu ya cinguezi, Yesu uezile na Vapostolo vendi 12. 18 Kaha mu vakele ku mesa na kulia, Yesu uava lekele nguendi: “Nji mileka vusunga nguange, umo uenu ali na kulia nange, aka njenda vungungu.” 19 Ngeci va putukile kulinyenga kaha muntu ku muntu ua muihuile nguendi: “Ouo ni kati yange, ni vati?” 20 Ngeci uava lekele nguendi: “Umo hali yenu 12, uze atanta hamolika nange mu lilonga. 21 Muomu Muana muntu ali na kuya, ngue mu vasoneka kutuala hali ikeye, vunoni ngongo ya muntu uze enda Muana muntu vungungu! Cacili nga muntu uaco ka semukile.”

22 Kaha omo va tualeleho kulia, ua nonele mbolo. Mu nima ya ku ivezikisa, ua ipazuile naku va hanayo nguendi: “Uahenu. Eyi yemanena muvila uange.” 23 Kaha ua nonele naua ngandza, ua santselele naku va hanayo, ngeci vose va nuinemo. 24 Uava lekele nguendi: “Evi vinyu viemanena ‘maninga ange a litavasiano,’ aze aka muanya omo lia vavengi. 25 Mua vusunga nji mileka nguange, kanji kanu naua vinyu, naha litangua lize li nji kanua vinyu via viha mu Vuangana vua Njambi.” 26 Mu va manusuile kuimba miaso, vaile ku muncinda ua Olivela.

27 Kaha Yesu uava lekele nguendi: “Mu vose muka suntsuka, muomu va soneka nguavo: ‘Njika tsiha kaniungi kaha vampanga vaka lisanduoka.’ 28 Vunoni mu nima ya kusanguka cange, njika tuama ku Ngalileya.” 29 Vunoni Petulu uamu lekele nguendi: “Ambe nga vakuetu vose vaka suntsuka, ange kanji ka suntsuka.” 30 Ngeci Yesu uamu lekele nguendi: “Nji kuleka vusunga nguange, lelo vene, eyo, vutsiki vua lelo ntsimbu ndemba kanda atambeke luvali, unji viana lutatu.” 31 Petulu uamu lekele nguendi: “Kanji ka kuviana. Ambe kutsa njasa kutsa nove.” Kaha na vakuavo vose mukemuo mu va handekele.

32 Kaha mu va hetele ku cihela ci valuka nguavo Ngetesemane, ua lekele vandongesi vendi nguendi: “Tumamenu hano, ntsimbu nji vundila.” 33 Kaha uaile na Petulu, Tiango na Yoano, ua putukile kuivua vusiua vua kama naku lisosomua cikuma. 34 Uava lekele nguendi: “Njili* mu vusiua vua kama, mu nji zivila ngue njitse. Salenu hano naku tualelaho kuvingila.” 35 Ua suenene ha lutue kavundende kaha ua tsikamene ha mavu na kuputuka kuvundila nguendi, nga citava, ize ntsimbu ya kayando kati imu uane. 36 Kaha nguendi: “Aba, Tata, Yove uhasa viuma viose. Tundisa eyi ngandza kuli yange, vutuhu ngoco, kati ngue munayi cizango cange, vunoni cilingiue cizango cove.” 37 Ua hilukile, vunoni uava uanene va na kosa, ngeci uehuile Petulu nguendi: “Simone una kosa? Nkuma ka ua hasele kukala na ndzili ya ku tualelaho kuvingila, ambe mu ola imolika? 38 Tualelenuho kuvingila na kuvundila ntsimbu yose, linga kati mu kovele mu ceseko. Cili vene, sipilitu* ina zange, vunoni muvila una zeye.” 39 Ngeci uaile naua mu kuvundila kaha ua handekele viuma vimolika. 40 Mua hilukile, uava uanene va na kosa naua, muomu meso avo alemenene na tulo, ngeci ka va tantekeyele mua kumu kumbuluila. 41 Kaha ua hilukile naua ntsimbu ya mu citatu naku va leka nguendi: “Ha ntsimbu ya kufua ngeci, enu mu na kosa na kuhuima! Kunahu! Ola inapuho! Talenu! Muana muntu va muenda vungungu naku mu hana mu mavoko a vakua vupi. 42 Katukenu, tuyenu. Talenu! Mukua kunjenda vungungu ali mu hiehi.”

43 Haze vene, tele acili na kuhandeka, Yundasa, umo ua vaze 12, uezile hamo na civunga ca kama, cambatele mikuale na vimbueti. Vakuluntu va vasasendote, vakua kusoneka na vakuluntu, vakeko va tumine vantu vaco. 44 Mukua ku muenda vungungu, uava kulahesele ku va hana citantekeyeso, nguendi: “Uose inji ka tsemba, ikeye vene. Yenu muka mu kuate na kuya nendi kaha ye muka mu niungiliye. 45 Ngeci ua sungamene vene hali ikeye na kuhandeka nguendi: “Lambi!” Kaha uamu tsembele. 46 Ngeci vamu kuatele, na kuya nendi. 47 Vunoni umo ua vaze vakeleko, ua somuene mukuale uendi, na kuvatula lituitui lia umo ngamba ua sasendote ua kama. 48 Vunoni Yesu uava lekele nguendi: “Vuno mu neza mu kunji kuata na mikuale na vimbueti ngue mu neza mu kukuata muizi? 49 Tangua na tangua njakele nenu mu tembele mu kulongesa, vunoni ka mua nji kuatele. Vunoni evi viose vili na kusoloka linga Visoneka vi lipuisemo.”

50 Vunoni vose vamu sevunukile na kutina. 51 Vutuhu ngoco, kuakele umo mukuendze, ua zalele lika ntanga ya linyu kaha ua putukile kukava Yesu ha hiehi, ngeci mu va tondele kumu kuata 52 ua sezele ntanga yendi ya linyu, na kutina vuntselentsele.*

53 Kaha va tualele Yesu kuli sasendote ua kama kuze ku va likunguluilile vakuluntu va vasasendote, vakuluntu kaha na vakua kusoneka. 54 Vunoni Petulu uakele naku mu kavela ha lahako cikuma, noho uaka hetele vene namu citali ca sasendote ua kama. Ngeci ua kovelele na kutumama hamo na vangamba linga ote tuhia. 55 Vakuluntu va vasasendote na Mpunga yose, vakele na kutonda vukaleho, linga va uane ha kutsihila Yesu. Vunoni ka va uanene na vumo vuahi. 56 Vutuhu vavengi vakele na kuhana vukaleho vua visaki kutuala hali ikeye, vunoni ka vua litombuele. 57 Cikuavo naua, vamo vakele na kukatuka na kuhandeka vukaleho vua visaki kutuala hali ikeye nguavo: 58 “Tua mu vuile a handeka nguendi: ‘Njika puzula eyi tembele ya kutunga na mavoko, kaha mu matangua atatu, njika tunga ikuavo kati ya kutunga na mavoko a vantu.’” 59 Vutuhu va handekele viose evi, vunoni vukaleho vuavo ka vua litombuele.

60 Ngeci sasendote ua kama ua katukile hakati kavo na kuihula Yesu nguendi: “Na vimo vi ukumbululako viahi? Ka ua zivile vi vali naku kuvangeya ava vantu?” 61 Vunoni Yesu ua holokele kulu, ka kumbuluileko na vimo viahi. Sasendote ua kama ua muihuile naua nguendi: “Vuno yove Kilistu, Muana Njambi ua Kulela ni?” 62 Yesu uamu kumbuluile nguendi: “Yange vene. Kaha muka mona Muana muntu na tumama ku livoko lia cilio lia ngolo kaha ali na kuiza na maselua a muilu.” 63 Ngeci sasendote ua kama ua tavuile vuzalo vuendi na kuhandeka nguendi: “Vukaleho vueka vuka mu tonda? 64 Mua ziviko mua na sahula Njambi. Vika mu handekaho?” Vose vamu kumbuluile nguavo: “Na pande kutsa.” 65 Vamo va putukile kumu zekuila, kumu fuika ku meso, kumu veta vinkome oku vamu leka nguavo: “Handeka!”* Kaha mu nima ya kumu vandula vimbanda ku cihanga, misipayi vamu tualele.

66 Ntsimbu Petulu tele na tumama kuintsi mu citali, kuezile umo muanampuevo uapuile ngamba ya sasendote ua kama. 67 Mua muene Petulu ota tuhia, uamu talele sui na kuhandeka nguendi: “Nove una kala hamo nou Yesu Mukua Nazaleta.” 68 Vunoni ua vianene na kuhandeka nguendi: “Kanji mu tantekeya, cipue ovio viu handeka yanini.” Ngeci Petulu ua tuhukile na kuya ku vukovelelo vua citali. 69 Kuze, umo ngamba ua mpuevo uamu muene naua kaha ua putukile kuleka vaze vemanene kuze nguendi: “Ou nendi uapua umo uavo.” 70 Vunoni ua vianene naua, kaha mu nima ya kamo kantsimbu vaze vemanene kuze, va putukile naua kuleka Petulu nguavo: “Mua vusunga vene, nove u umo uavo, muomu u mukua Ngalileya.” 71 Vunoni ikeye ua putukile kulisinga naku likunkula nguendi: “Ka nji tantekeya ou yala imuli na kuhandeka.” 72 Haze vene, ndemba ua tambekele lua mu civali kaha Petulu ua vulukile via mu lekele Yesu nguendi: “Ntsimbu ndemba kanda atambeke luvali, unji viana lutatu.” Ngeci uavuile vusiua vua kama na kuputuka kulila cikuma.