Kuli Vakua Filipu
4 Ngeci mukemuo vamuanetu vanja lema, enu vanji na vuila vusona vua kama, yenu ndzolela yange na cilongo cange, imanenu ngo muli Muangana vakua cilemo cange.
2 Nji mamuna Yondiya na Sintike nguange, vakale na mutima umolika* muli Muangana. 3 Eyo, nove naua mukuetu mpundu mu tue kupangela hamo, nji kupinga nguange tualelaho kukuasa ava vampuevo va fuitanganene* hamolika nange mu kuambulula muzimbu ua cili, hamolika na Kelemende na vakuetu vose vakua kupanga, vaze mazina avo ali mu livulu lia muono.
4 Viukililenu muli Muangana ntsimbu yose. Nji hilukilaho naua nguange, Viukililenu! 5 Kuvotsika cenu ci soloke ku vantu vose. Muangana ali muhiehi. 6 Na vimo viahi vi mumina mitima, vunoni mu viuma viose tumbulenu vizango vienu kuli Njambi kuhitila mu kuvundila naku lambelela hamolika na kusantsela, 7 kaha ciyulo ca Njambi cize ca hiana kuivuisisa* cose, ci ka niunga mitima yenu na visinganieka vienu kuhitila muli Kilistu Yesu.
8 Mu ku manusula vamuanetu, tualelenuho ku singanieka* ha viuma viose via vusunga, viuma viose via seho cikuma, viuma viose via vuviuke, ha viuma viose via kulela, ha viuma viose vi neha cilemo, viuma viose vili na lutsimo lua cili,* viuma viose via cili, na viuma viose vi va sangala. 9 Lingenu viuma vize vi mua lilongesele kuli yange, vize vi mua tavele, vize vi muavuile kuli yange, na vize vi mua nji muene nji linga, kaha Njambi ua ciyulo aka kala nenu.
10 Nja viukilila cikuma muli Muangana muomu mua putuka naua kunji tuala mana. Nja tantekeya nguange mua lisosomuene nange, vunoni ka mua uanene lika vukovelelo vua kunji kuasa. 11 Kanjesi na kuhandeka ngoco omo lia kuzela,* houe, muomu njina lilongesa ku viukilila na viose-ovio vi njili navio. 12 Nji tantekeya mua kuyoyela na via vindende na mua kuyoyela na viavingi. Mu viuma viose ambe nga vifue vati, nja lilongesa lihungu lia mua kuyoyela na viakulia viavingi, na mua kuyoyela na njala, kaha na mua kuyoyela na viuma viavingi ni mu kuzela.* 13 Nji na kanyama mu viuma viose omo lia uze ueku nji hana ndzili.
14 Vutuhu ngoco, mua lingile vuino mu kunji kuasa mu lamba yange. 15 Nenu vakua Filipu mu tantekeya vuino nguenu, mu nima yaku halakana muzimbu ua cili lua katete, muze mu nja tundile ku Masendonia, ka kuakele cikungulukilo na cimo cahi ca nji kuasele kutuala ha kuhana na kutambula, kuvanga yenu lika. 16 Muomu mu njakele mu Tesalonika, mua nji tumineko vukuasi, kati lika lumo, houe, vunoni luvali luose. 17 Kati ngue njili na kutonda kutambula vuana, houe, vunoni nji tonda vusuka vuze vu vueza ku vupite vuenu. 18 Vutuhu ngoco, njili na viose vi nji tonda kaha viavingi. Njina sulu na viuma viavingi muomu nja tambula vuana vu mua tumisa na Epafolonditu, vuze vunapu ngue vueko vua cili, cikombelo ca atava Njambi cize ci muya ku mutima. 19 Kaha Njambi yange aka mihana viose vimua zela, kuliya na vupite vuendi vua vumpahu, kuhitila muli Kilistu Yesu. 20 Kaha kuli Njambi yetu, ikeye Tatetu, kukale vumpahu ku miaka yose ya yaye. Ame.
21 Menekenu vakua kulela vose va likata na Kilistu Yesu. Vamuanetu vali nange, va nami menekaho. 22 Vakua kulela vose va nami menekaho, cikuma-kuma vakua ndzivo ya Sezale.
23 Ngozi ya kama ya Muangana Yesu Kilistu ikale nenu omo lia mitima yenu ya cili.