Ua Kulivanga ua Yoano
1 Njili naku mi sonekela via uze ua keleko tunde ha katete, uze utua vuile, utua limuenene na meso etu, tua mu talesesele naku mu kuata na mavoko etu, uze uapua lizi lia muono. 2 (Eyo, ou muono va usoluele kaha tua limueneneuo, ngeci tuli na kuhana vukaleho naku miambuluila via muono ka ue kuhua uze uakele na Tata kaha va tu soluelauo). 3 Vize vi tuavuile na kumona, vikevio vituli naku miambuluila linga nenu naua mu likate netu. Eci kulikata cili hakati ketu nenu, cikeco cakala hali Tata na Muanendi Yesu Kilistu. 4 Kaha tuli na kusoneka evi viuma, linga ndzolela yetu ipue ya mutuntu.
5 Ou ukeuo muzimbu utuavuile kuli ikeye kaha ukeuo utuli naku miambuluila nguetu: Njambi ikeye ceke, kaha muli ikeye* ka muesi milima. 6 Nga tu handeka nguetu, “Tua likata nendi,” vunoni tu tualelaho kuendela mu milima, tuli na kukuisa kaha katuesi na kuyoya muaya vusunga. 7 Vunoni nga tuli na kuendela mu ceke, ngeci muendi uakala mu ceke, omo tu likata umo na mukuavo kaha maninga a Muanendi Yesu, atu lelesa ku vupi vuose.
8 Nga tu handeka nguetu, “Katuesi na vupi,” tuli naku likuisa yetu vavenya kaha vusunga vuahimo muli yetu. 9 Nga tu litavela vupi vuetu, atu konekela naku tu lelesa ku vilinga vietu viose via vuhenge, muomu ikeye mukua vusunga kaha mukua vuoloke. 10 Nga tu handeka nguetu, “Katue ku vulumuna,” kaha omo tuli naku mupuisa mukua visaki, na lizi liendi liahimo muli yetu.