Kuhitila Muli Yoano
8 12 Kaha Yesu uava lekele naua nguendi: “Yange ceke ca mavu. Kaha uose anji kava ka kende naua mu milima, vunoni aka kala na ceke ca muono.” 13 Ngeci vaFaliseu vamu lekele nguavo: “Ove uli na kuambulula vukaleho kutuala hali yove vavenya. Vukaleho vuove kati vua vusunga.” 14 Yesu uava kumbuluile nguendi: “Ambe nga njili na kuambulula vukaleho kutuala hali yange vavenya, vukaleho vuange vua vusunga, muomu nji tantekeya kuiko nja tunda na kuiko njiya. Vunoni yenu kamu tantekeya kunja tunda na kuiko njiya. 15 Yenu mue kuhisa muntu kuliya na cifua* cendi, vunoni ange kanji hisa muntu naumo uahi. 16 Ambe vene nga nji hisa, kuhisa cange ca vusunga, muomu kanjesi likaliange, vunoni Tata uze uanji tumine ali nange. 17 Cikuavo naua, mu Masiko enu va sonekamo nguavo: ‘Vukaleho vua vantu vavali vuapua vua vusunga.’ 18 Yange njili na kuambulula vukaleho kutuala hali yange vavenya, kaha na Tata uze uanji tumine ali na kuambulula vukaleho kutuala hali yange.” 19 Kaha va muihuile nguavo: “Iso honi kuiko ali?” Yesu uava kumbuluile nguendi: “Kamu nji tantekeya kaha kamu tantekeya Tata. Nga mua nji tantekeyele na Tata nga mua mu tantekeya naua.” 20 Ua handekele aa mezi tele ali ku cihela kuakele vikasa via milambu mu ntsimbu yakele na kulongesa mu tembele. Vunoni naumo uahi uamu kuatele, muomu ola yendi tele kanda ihete.
21 Yesu uava lekele naua nguendi: “Njili na kuya, kaha tangua muka nji tonda, vunoni muka tsa na vupi vuenu. Oku ku njiya, enu ka muhasa kuyako.” 22 Ngeci vaYundeya va putukile kuhandeka nguavo: “Vuno atonda kulitsiha ni? Muomu ali na kuhandeka nguendi, ‘Oku ku njiya, enu ka mu hasa kuyako.’” 23 Ua tualeleho ku va leka nguendi: “Yenu mu va hano ha mavu, yange nji ua muilu. Yenu mu vakua mavu, yange kati nji mukua mavu. 24 Ngeci mukemuo njina mi lekele nguange: Muka tsa na vupi vuenu. Muomu nga ka mu tsiliela nguenu yange vene, muka tsa na vupi vuenu.” 25 Ngeci va putukile ku muihula nguavo: “Yove iya?” Yesu uava kumbuluile nguendi: “Na ikeye vika nji lipakesela kuhandeka nenu? 26 Njili na viavingi via kuhandeka kutuala hali yenu, na viavingi via kumi sompesela. Cili vene, Uze uanji tumine uapua ua vusunga mpundu, kaha viuma vi njavuile kuli ikeye, vikevio vinjili na kuhandeka kuli vakua mavu.” 27 Ka va nongonuene nguavo uakele naku va leka via Ise. 28 Yesu uava lekele nguendi: “Mu muka manusula kusukika Muana muntu, muka nongonona nguenu yange mpundu ikeye kaha kanje kulinga cuma na cimo cahi ca ku limangela yange vavenya. Vunoni njili na kuhandeka evi viose, ngue vene mua nji longesele Tata. 29 Kaha Uze uanji tumine ali nange. Kanji sile likaliange, muomu ntsimbu yose nje kulinga vize vie ku muya ku mutima.” 30 Kaha muakele na kuhandeka evi viuma, vantu vavengi vamu tsilielele.
31 Yesu ua lekele vaYundeya vaze vamu tsilielele nguendi: “Nga mu tualelaho kuniunga mezi ange, cili vene mu vandongesi vange, 32 kaha muka tantekeya vusunga na vusunga vuka mi patula.” 33 Vamu kumbuluile nguavo: “Yetu tu vana* va Avilahama kaha kanda tupueho vandungo va muntu. Amba vati uhandeka nguove, ‘Muka patuka’?” 34 Yesu uava kumbuluile nguendi: “Nji mileka vusunga nguange, uose alinga vupi napu ndungo ya vupi. 35 Cikuavo naua, ndungo ke kukala ku ndzivo ya sukuluendi ku miaka yose. Vunoni muana, ikeye ue kukalako miaka yose. 36 Ngeci mukemuo, nga Muana ami patula, muka patuka vene. 37 Nji tantekeya nguange mu vana va Avilahama. Vunoni muli na kutonda kunji tsiha, muomu ka muesi na kutava mezi ange. 38 Yange njili na kuhandeka viuma vi nja muene mu njakele na Tata, vunoni enu muli na kulinga viuma vimu nevu kuli isuenu.” 39 Vamu kumbuluile nguavo: “Yetu tatetu Avilahama.” Ngeci Yesu uava lekele nguendi: “Nga muapuile vana va Avilahama, nga muli na kulinga vipanga via Avilahama. 40 Vunoni hano mu tonda kunji tsiha, ange nja mileka vusunga vu njavuile kuli Njambi. Avilahama ka lingilemo. 41 Yenu muli na kulinga vipanga via isuenu.” Vamu kumbuluile nguavo: “Yetu ka tua semukilile mu vupangala.* Tuli na Tatetu umolika, Njambi.”
42 Yesu uava lekele nguendi: “Nga Njambi ikeye Isuenu, nga mua nji leme, muomu nja tundile kuli Njambi ngeci njili hano. Ka njezile ku cizango cange vavenya, vunoni ca uze uanji tumine. 43 Omo lia vika ka muesi na kuivuisisa vinjili na kuhandeka? Muomu ka muhasa ku halakana ku mezi ange. 44 Enu mu vana va isuenu Ndiavu, kaha mu tonda kulinga vizango via isuenu. Ikeye uapuile mukua kutsiha vantu tunde ha katete, ka tualeleleho mu vusunga, muomu vusunga muli ikeye vuahimo. Omo ahandeka makuli, ue kuhandeka mpundu kuliya na cifua cendi, muomu uapua mukua makuli na ise ya makuli. 45 Vunoni yange njili naku mileka vusunga, yenu ka muesi naku nji tsiliela. 46 Iya hakati kenu ahasa kunji uana na mulonga ua vupi? Nga njili na kuhandeka vusunga, omo lia vika honi ka muesi naku nji tsiliela? 47 Uose uapua mukua Njambi, ue kuivua mezi a Njambi. Ngeci mukemuo, yenu ka muesi naku halakana muomu kati mu vakua Njambi.”
48 VaYundeya vamu kumbuluile nguavo: “Ka tua handekele nguetu ‘U Mukua Samaliya kaha uli na ndemone’?” 49 Yesu uava kumbuluile nguendi: “Kanjesi na ndemone, yange njili naku singimika Tata, vunoni enu munji sahula. 50 Yange kanjesi naku litondela vumpahu, vunoni Njambi ikeye ali na kutonda njikale na vumpahu kaha ikeye ngazi. 51 Cili vene nji mileka vusunga nguange, uose ononoka mezi ange ka katsi.” 52 VaYundeya vamu kumbuluile nguavo: “Tua tantekeya honi nguetu nkuma uli na ndemone. Avilahama uatsile, vapolofeto navo, vunoni ove nguove, ‘Uose ononoka mezi ange ka katsi.’ 53 Vuno u ua kama kuhiana tatetu Avilahama uatsile? Vapolofeto navo vatsile. Amba yove co yove iya?” 54 Yesu uava va kumbuluile nguendi: “Nga nji lihana vumpahu yange vavenya, vumpahu vuange vua ngoco. Tata ikeye ali naku nji zumbangeya, uze imu tumbula nguenu Njambi yenu. 55 Vutuhu ngoco ka mumu tantekeya, yange nji mu tantekeya. Kaha nga nji handeka nguange kanji mu tantekeya, njipua ngeci muenu vakua makuli. Vunoni yange nji mu tantekeya kaha nje kuononoka lizi liendi. 56 Isuenu Avilahama, ua viukililile mua kama mu kulavelela kumona litangua liange, ngeci ua limuene kaha ua vuahelelele.” 57 Ngeci vaYundeya va muihuile nguavo: “Ove ua kulinga na miaka 50 yahi, Avilahama uamu muene kuli?” 58 Yesu uava kumbuluile nguendi: “Cili vene nji mileka nguange, ntsimbu Avilahama kanda akaleko, yange tele ku njili laza.” 59 Ngeci vanonele mavue linga va muase, vunoni Yesu ua vandele kaha ua tuhukile mu tembele.