Uamu Citatu ua Yoano
1 Yange civendzi,* njili naku sonekela mukua cilemo cange Ngayu, uze inja lema mpundu.
2 Mukua cilemo cange, nji vundila nguange viuma vi tualeleho kuenda vuino mu muono uove, kaha ukale na cihindu cacili ngue muuli mu ntsimbu ino. 3 Muomu nja viukililile mua kama, omo vamuanetu vezile naku njambuluila vukaleho nguavo, una kakatela ku vusunga kaha naua uli naku tualelaho kuenda mu vusunga. 4 Kakuesi viuma vieka vinji vuisa* ndzolela ya kama kuhiana evi, kuivua nguavo, vana vange vali naku tualelaho kuenda mu vusunga.
5 Mukua cilemo cange, ue kumuesa vucili vuove mu viuma viuli na kulingila vamuanetu, vutuhu ka uva tantekeya. 6 Va na njileka via cilemo ciuli na kumuesa ku cikungulukilo. Sukulukambu, mu va hiluka va kuase mu cifua ci vuisa Njambi ndzolela. 7 Muomu va katukile ovuo vungendzi omo lia lizina lia Njambi, ca kuhona kuambata cuma na cimo cahi ku vakua vifuti. 8 Ngeci netu tuapande kutambula mua cili vamuanetu ngeci muava, linga tu pangele hamo mu vusunga.
9 Nja sonekelele vimo ku cikungulukilo, vunoni Ndiotelefe uze ua zanga kupua ua kulivanga hakati kavo, ke kutava na kasingimiko viose-ovio vitunda kuli yetu. 10 Ngeci mukemuo, nga njiza oko, nja kutala viuma viali na kulinga na makuli ali na kusanduola kutuala hali yetu. Ka lengelele lika oho, vunoni ali na kuviana naua kutambula vamuanetu na kasingimiko, kaha ambe vene vaze vatonda ku va tambula, ueku va vindika naku va sekula mu cikungulukilo.
11 Mukua cilemo cange, kati utemunuine viuma via kuvihia, vunoni temunuina viacili. Uze ue kulinga via cili, uapua mukua Njambi. Uze ue kulinga via kuvihia, ka tantekeya Njambi. 12 Vose vali na kuhandeka via cili kutuala hali Ndemeteliu, kaha na vusunga vene vuavi muesa. Cili vene, netu tuambulula vukaleho kutuala hali ikeye kaha utantekeya nguove vukaleho vuaco, vua vusunga.
13 Nji nakala na viavingi vinji na tondele ku kusonekela, vunoni ka njitondo ku tualelaho kuvi soneka na cisonekeso* na vulombo.* 14 Vunoni nja lavelela kua ku kumona vuovuno kaha tua ku simutuila citona meso.
Ciyulo cikale nove.
Vavusamba va naku menekaho. Nji menekeleko naua vavusamba, umo ku umo.