Kuhitila Muli Yoano
12 Mu kua lisupile matangua 6 linga Paskua ihete, Yesu ua hetele mu Mbetaniya, muze muakele Lazalu uze ya sanguile ku vatsi. 2 Kaha vamu zumbuile viakulia via cinguezi, Mata ikeye uakele naku va pangela, kaha Lazalu co uapuile umo ua vaze vakele na kulia* hamo na Yesu. 3 Ngeci Maliya uambatele mutamba ua kilu* ya mazi a vueko vua cili, a ndando ya kama, nardu mpundu, naku a muanyena ku viliato via Yesu kaha ua a hundile na vinkambu viendi. Kaha ndzivo yose ya nikile vuino omo lia mazi aco. 4 Vunoni Yundasa Iskaliota, umo ua vandongesi vendi, uze tele alingila ku muenda vungungu, ua handekele nguendi: 5 “Vika aa mazi a vueko vua cili ka va alandesele videnariu 300 na kuhana vimbongo viaco ku vihutu?” 6 Ua handekele ngoco kati omo lia kuhaka seho ku vihutu, vunoni muomu uapuile muizi. Naua ikeye uakele na kutulika cikasa ca vimbongo kaha uakele na kuiva vimbongo vi vakele na kuhakamo. 7 Yesu ua handekele nguendi: “Muecelenu, linga avuahesele vualumo litangua lia kunji tsinda. 8 Muomu vihutu muli navo ntsimbu yose, vunoni yange ka mu kakala nange ntsimbu yose.”
9 Mu ntsimbu eyi, mbunga ya kama ya vaYundeya mu vavuile nguavo Yesu ali kuze, vaileko kati lika mu kuka mona Yesu, vunoni na Lazalu uze ya sanguile ku vatsi. 10 Vakuluntu va vasasendote va likuminyine kutsiha vene na Lazalu, 11 muomu omo liendi, vaYundeya vavengi vakele na kuyako na kutsiliela muli Yesu.
12 Lia mukuavo, mbunga ya kama ize yezile ku cilika, yavuile nguavo Yesu ali na kuiza mu Yelusalema. 13 Ngeci vambatele mintango ya tunkoma, vaile mu kumu sesa oku va tambeka nguavo: “Tua kuvundila, muovole!* Ua vezika uze eza mu lizina lia Yehova,* ua vezika Muangana ua Isaleli!” 14 Yesu ua uanene umo muana cimulu kaha ua londeleho, ngue mu va soneka nguavo: 15 “Kati uivue liova, ove muana ua mpuevo ua Siono. Tala! Muangana uove ali na kuiza, na tumama ha muana cimulu.” 16 Ha katete, vandongesi vendi ka vevuisisile evi viuma, vunoni omo Yesu vamu hanene vumpahu, vandongesi vendi va vulukile nguavo, viuma viaco vavi sonekele kutuala hali ikeye kaha vamu lingililevio ikeye.
17 Vantu vaze vakele na Yesu ha ntsimbu ya sanene Lazalu atunde mu mbumbo naku mu sangula ku vatsi, va tualeleho kuhana vukaleho. 18 Vikevio via lingisile ize mbunga kumu sesa, muomu vavuile nguavo na lingi eci citantekeyeso. 19 Ngeci vaFaliseu va lihandekesele hakati kavo nguavo: “Nevi vi tuli na kulinga vene viahi. Talenu! Mbunga yose* ili naku mu kava.”
20 Hakati ka vaze vaile ku cilika mu kulemesa, hakele vamo vaNgelengu. 21 Kaha va suenene kuli Filipu uze ua tundile ku Mbetesainda ya ku Ngalileya, na kuputuka kumu pinga nguavo: “Muata, tu tonda kumona Yesu.” 22 Filipu ua lekeleko Anduleu. Kaha Anduleu na Filipu vezile kuaku lekako Yesu.
23 Vunoni Yesu uava kumbuluile nguendi: “Inapuho ntsimbu ya kuhana Muana muntu vumpahu. 24 Mua vusunga nji mileka nguange, kuvanga nona ya tiliku iuile ha mavu na kutsa, kati ngoco, itualelaho kupua lika nona imo. Vunoni nga itsa, ilisemunuina na kupua vinona viavingi. 25 Uose alema muono uendi a uzimbalesa.* Vunoni uze azinda muono uendi, ali naku uniungiliya linga aka yoye miaka yose. 26 Nga umo atonda kunji pangela, anji kave, kaha kuze kunji kakala na ngamba yange kukekuo kua kakala. Nga umo atonda kunji pangela, Tata aka mu singimika. 27 Njina lisosomua cikuma, kaha vika nji handeka? Tata, njovole ku ola ino. Vutuhu ngoco, eyi ntsimbu ikeyo injezilile. 28 Tata, zumbangeya lizina liove.” Kaha muilu mua tundile lizi ngualio: “Njina lizumbangeya laza kaha nji lizumbangeya naua.”
29 Mbunga yemanene kuze, yavuile eli lizi. Kaha vaputukile kuhandeka nguavo kuzima ca muhiato. Vakuavo nguavo: “Kangelo na handeka nendi.” 30 Yesu uava kumbuluile nguendi: “Eli lizi lineza kati omo liange, vunoni omo lienu. 31 Hano honi, ano mavu vali naku asompesa, kaha mukua kusika ano mavu vaka mu ndandumuna. 32 Vunoni mu vaka nji sukika, njika kokela vantu va vifua viose kuli yange.” 33 Yesu ua handekele evi mu kulumbununa njila ye ku tsilililemo. 34 Vunoni mbunga ya mu kumbuluile nguayo: “Tuavuile mu Masiko nguavo Kilistu aka kalako miaka yose. Ambove vati uhandeka nguove Muana muntu vaka mu sukika? Ouo Muana muntu uaco iya?” 35 Ngeci Yesu uava kumbuluile nguendi: “Ceke ci kala nenu mu kantsimbu kakandende. Endenu, ntsimbu kucili ceke, linga milima kati imi hiane. Uose enda mu milima, ka tantekeya kuaya. 36 Ntsimbu mucili na ceke, tsilielenu ceke, linga mupue vana va ceke.”
Mua manusuile kuhandeka evi viuma, Yesu ua tundile kuze, uaile na kuvanda. 37 Vutuhu ua lingile vitantekeyeso viavingi ha meso avo, vunoni ka vamu tsilielele, 38 linga alipuisemo mezi a handekele kapolofeto Isaya, nguendi: “Yehova, iya na tsiliela mu viuma viva nevu kuli yetu? Iyandzo iva na zomboluela livoko lia Yehova?” 39 Isaya ua tumbuile naua viuma via va honouesele kutsiliela, nguendi: 40 “Na puputiyisa meso avo naku kaluuisa mitima yavo, linga kati va mone na meso avo na kuivuisisa na mitima yavo, kutina valuluke linga nji va kanguise.” 41 Isaya ua handekele evi viuma muomu ua muene vumpahu vuendi, kaha ua handekele viendi. 42 Vutuhu ngoco, vakua kusika vavengi va tsilielele muli ikeye, vunoni omo lia vaFaliseu, ka vakele naku vi handekela ha mbunga, kutina vava sekule mu sinangonga. 43 Muomu va lemene cikuma vumpahu vua kutunda ku vantu, kuhiana vumpahu* vua kutunda kuli Njambi.
44 Vunoni Yesu ua tambakanene nguendi: “Uose anji tsiliela, ka tsiliela lika muli yange, vunoni atsiliela na uze uanji tumine. 45 Kaha uose nanji mono, na mono na Uze uanji tumine. 46 Njineza hano ha mavu ngue ceke, linga uose anji tsiliela kati atualeleho mu milima. 47 Vunoni nga muntu evua mezi ange kaha ka ononoka, kanji muhisa. Muomu ka njezile mu kuhisa vakua mavu, vunoni mu kuvovola. 48 Uze anji sembulula na kuviana mezi ange, kuali mukua ku muhisa. Mezi anji na handeka, akeo vene aka muhisa ha litangua lia kumanusuila. 49 Muomu kanja handekele viuma via ku limangela yange vavenya, vunoni Tata uze uanji tumine ikeye uanji hele lisiko lia viuma vinja pandele kuhandeka na kulongesa. 50 Kaha nja tantekeya nguange lisiko liendi lia lumbunuka muono ka ue kuhua. Ngeci viose vinji handeka, nji vi handeka ngue muze vene mua nji lekelevio Tata.”