Uamu Civali Kuli Vakua Kolintu
10 Yange Paulu, njili naku mi lambelela na kukonkama ca Kilistu, na ngozi yendi, ange imue kumona nguenu nji ua ku likehesa nga njili nenu citona meso, vunoni nguenu nji ua kukaluka nga kanjesi nenu. 2 Nja lavelela nguange mu njiza oko, vaze veku singanieka nguavo tue kuenda kuliya na vizango via ntsitu, va naluluka laza. Linga kati nja ku kaluke mu kuva sungamesa ngue mu ca pande. 3 Vutuhu tuli na kuyoya ngeci mua vantu vose, vunoni katuesi na kulua ndzita kuliya na vuntu vuetu vua ku ntsitu. 4 Muomu vitua via ndzita yetu kati via ku ntsitu, vunoni via ngolo ya Njambi vize vihasa ku lundumuna viuma via kukanyama cikuma. 5 Muomu tuli naku lundumuna visinganieka viose via kuhenga, na matumbe ose aku lihalesa, aze ekuliluisa na mangana aku tantekeya Njambi, kaha tuli na kuhaka mu vundzinda* visinganieka viose linga viononoke Kilistu. 6 Kaha tua livuahesela kuhana kasitiku ku uose amuesa lisino, mu nima ya kumuesa nguenu munononoka mu vutuntu.
7 Enu mue kuhisa viuma kuliya na muze mu vie ku solokela. Nga kuli umo ali na vusunga nguendi uapua Mukua Kilistu, na pande kuhilula naua ha vuno vusunga: Ngue muze vene muapua ikeye Mukua Kilistu, netu vene tu Vakua Kilistu. 8 Ambe nga nji lihalesa cikuma omo lia mpoko ya tuhana Muangana, ya kumi tunga* kati kumi puzula, kanjivu ntsoni. 9 Muomu kanji tondo ci soloke ngue njili na kutonda kumi zuzuisa na mikanda yange. 10 Muomu ve kuhandeka nguavo: “Mikanda yendi ilema kaha ili na ndzili, vunoni nga ali netu citona meso, uapua ua kuzeya, kaha na mezi endi a ngoco.” 11 Muntu uose ahandeka ngoco, atantekeye nguendi, vize vi tue kuhandeka mu mikanda nga katuesi nenu, vikevio vene vi tua kulinga mu tua kukala nenu citona meso. 12 Muomu ka tu tondo cipue kavundende kulipuisa hamo navo, cipue ku lisetekesa na vaze veku lisangala vakevo vavenya. Kaha veku liseteka vakevo vavenya kuliya na vize viva mona nguavo via cili, mu kulingamo ve kumuesa nguavo kave kuivuisisa na vimo viahi.
13 Ka tu lipamba na viuma vize ka via likuatele na cipanga ci tua tambuile, vunoni tu lipamba mu kulinga cipanga cize ca tu kundikile Njambi, eci cambatesela kumo naku miambuluila muzimbu ua cili. 14 Kaha ka tua lingile cuma na cimo cahi cize Njambi ka tu tumine kulinga. Vunoni yetu tua livangele ku miambuluila muzimbu ua cili kutuala hali Kilistu. 15 Houe, ka tu lipamba omo lia vipanga vize ka vatu tumine kulinga, ni omo lia ku fuitangana ca vakuetu, vunoni tua lavelela nguetu lutsilielo luenu lukole, linga cipanga ci tuna lingi ci tualeleho kukola hakati kenu. Kaha vipanga vietu navio vi tualelaho ku livuezelela 16 linga tuambulule muzimbu ua cili ku vifuti vili ku lahako, linga kati tu lipambele cipanga civa na puisamo laza vakuetu muimbo liavo. 17 “Vunoni uose alipamba, alipambele muli Yehova.”* 18 Muomu muntu iva tava, kati uze alisangala ikeye vavenya, vunoni uze iva sangala kuli Yehova.