Uamu Civali Kuli Vakua Kolintu
1 Yange Paulu, kapostolo ua Kilistu Yesu ku cizango ca Njambi, njili na muanetu Timoteu, njili naku sonekela cikungulukilo ca Njambi ca mu Kolintu, na vakua kulela vose vali mu Akaya yose nguange:
2 Ngozi ya kama na ciyulo via kutunda kuli Njambi Tatetu, na Muangana uetu Yesu Kilistu, vikale nenu.
3 Uaku sangaziala Njambi, Ise ya Muangana uetu Yesu Kilistu, ikeye Tatetu ua sula na nkeke, na Njambi uaku lembezieka cose, 4 uze ueku tu lembezieka* mu vieseko vietu viose, linga naku lembezieka ci tue kutambula kuli Njambi, netu tu lembezieke vakuetu mu vieseko* viose-ovio. 5 Muomu ngue tuyando tuetu muli Kilistu tua lana, mukemuo naua naku lembezieka ci tue kutambula kuhitila muli Kilistu naco ca kama. 6 Nga mu hita mu vieseko,* cinapu ku lembezieka na vuovoke vuenu. Kaha nga vali naku tu lembezieka, eci ca pande ku mi lembezieka, linga ci mi kuase kukolesa omo mu hita mu tuyando tu tuli na kuhita yetu. 7 Lulavelelo lu tuli naluo hali yenu lua kanyama, muomu tua tantekeya nguetu ngue muze vene mu mue kuhita mu tuyando tu tue kuhita, mukemuo naua muka tambula ku lembezieka ci tue kutambula.
8 Muomu vamuanetu, ka tu tondo mukale ku ndzimba kutuala ha tuyando tu tua hitile ku muhato ua Asia. Visoti via tu tsekele cikuma kuhiana ndzili yetu, ngeci tua lisosomuene nguetu ka tu mono muono. 9 Kuhandeka vusunga, tua livuile ngue va natu tomena kutsa. Evi via solokele linga kati tu likulahele yetu vavenya, vunoni tu kulahele Njambi uze ue kusangula vatsi. 10 Ua tuovuele ku vusonde vua kama vua kutsa, kaha aka tuovola. Ngeci tua lavelela muli ikeye nguetu aka tualelaho ku tuovola. 11 Nenu naua muhasa ku tu kuasa muku tu lambelelako kuli Njambi, muomu nga vavengi va tu kundika mu vivundilo, Njambi aka halakana naku tu kuasa, kaha omo liaco vavengi vaka santsela.
12 Tuli na mitima* ya kulela, kutuala ha kuyoya cetu ha mavu, cikuma-kuma hakati kenu muomu tu na yoyo mu kulela namu vusunga vu tunda kuli Njambi, kati omo lia mana a vantu, vunoni omo lia ngozi ya kama ya Njambi. Ngeci mukemuo, tu lipamba omo liaco. 13 Muomu katuesi naku mi sonekela viuma vieka, kuvanga lika vize vi muhasa kutanda* na kuivuisisa, kaha nja lavelela nguange mu tualelaho kuivuisisa mu vutuntu* evi viuma. 14 Ngue mumu nevuisisa naua nguenu etu tunapu kulipamba cenu, nenu naua mu kapua ku lipamba cetu ha litangua lia Muangana uetu Yesu.
15 Ngeci mukemuo, omo liolu lukulahelo njina tondele kulivanga kua kumi meneka, linga mua ku viukilile lua mu civali.* 16 Muomu nja tondele kua kumi meneka mu nje kuile ku Masendonia namu kuhiluka cange, kaha mue kunji sindikiyileko ku Yundeya. 17 Vuno mu njakele novu vutumbe, nja vu tualele mu sembulule ni? Vuno nje kutumba viuma mu cifua ca vuntu, linga munji handeka nguange “Eyo, eyo” munima yaco nguange “Houe, houe” ni? 18 Ngue omo Njambi uapua mukua vusunga, mukemuo naua na mezi etu apua a vusunga. Katue kuhandeka nguetu “eyo” munima yaco tu handeka naua nguetu “houe.” 19 Muomu Yesu Kilistu Muana Njambi, uze itua miambuluilile, yange, Siluano* na Timoteu, kapuile “eyo” kaha naua apue “houe,” vunoni uapuile lika “eyo.” 20 Muomu vikulaheso via Njambi ambe nga vi lane vati, vinapu “eyo” kuhitila muli ikeye. Cikuavo naua, kuhitila muli ikeye tu handeka “Ame” kuli Njambi, linga tuhane Njambi vumpahu. 21 Vunoni Njambi ikeye ua tuhana vusunga nguendi, nenu netu tuapua va Kilistu, kaha ikeye naua ua tu vuavesele. 22 Na tu haka naua citantekeyeso cendi, naku tuhana vusunga* vua viuma vi keza, kulumbunuka, sipilitu ize ili mu mitima yetu.
23 Kanja tondele kuiza ku Kolintu mu ntsimbu ino kutina ku mi vuisa vusiua vua kama. Na Njambi anji kelako vukaleho. 24 Kati ngue nguavo yetu tuli naku tuamenena lutsilielo luenu, vunoni tue kupangela hamo nenu linga mu vuahelele. Muomu mu nemana omo lia lutsilielo luenu.