Ua Kulivanga Kuli Vakua Kolintu
11 Nji temunuinenu, ngue omo yange njili naku temunuina Kilistu.
2 Njimi sangala, muomu mu viuma viose muli naku nji vuluka, kaha muli na kuniunga viuma vinja mi lekele ngue vene muze munja mi lekelelevio. 3 Vunoni nji tonda mu tantekeye ngecize, Kilistu ikeye mutue ua yala uose. Kaha yala, ikeye mutue ua mpuevo. Kaha Njambi, ikeye mutue ua Kilistu. 4 Yala uose avundila ni kuambulula vupolofeto oku na zala vimo ku mutue, asahula mutue uendi. 5 Vunoni mpuevo uose avundila ni kuambulula vupolofeto ca kuhona kufuika ku mutue, asahuisa mutue uendi, muomu napu vene ngue mpuevo na kongovola ku mutue uendi. 6 Muomu nga mpuevo ka fuika ku mutue uendi kaha atehuleni vinkambu. Vunoni nga cinapu ntsoni kuli mpuevo kutehula ni ku kongovola mutue uendi, kaha afuikeni ku mutue.
7 Yala ka pandele kuzala vimo ku mutue uendi, muomu napu cifua ca Njambi na vumpahu vuendi. Vunoni mpuevo napu vumpahu vua yala. 8 Muomu yala ka tundile kuli mpuevo vunoni mpuevo ikeye ua tundile kuli yala. 9 Cikuavo naua, yala ka vamu tangele omo lia mpuevo, vunoni mpuevo vamu tangele omo lia yala. 10 Ngeci mukemuo, mpuevo na pande kuzala cimo ku mutue mu kupua citantekeyeso* ca mpoko omo lia tungelo.
11 Cikuavo naua, muli Muangana, mpuevo ka hasa kukalako ca kuhona yala, kaha yala ka hasa kukalako ca kuhona mpuevo. 12 Muomu ngue omo mpuevo ua tunda kuli yala, mukemuo naua yala ueza kuhitila muli mpuevo. Vunoni viuma viose via tunda kuli Njambi. 13 Hilulenuho enu vavenya: Vuno mpuevo na fuila vene kuvundila kuli Njambi ca kuhona kufuika ku mutue uendi ni? 14 Kuliya na cifua civa tangelamo vantu, vuno kamu tantekeya nguenu, nga yala akala na vinkambu via laha capua kasahuntu ni? 15 Ni kamu tantekeya nguenu nga mpuevo ali na vinkambu via laha cinapu vumpahu kuli ikeye ni? Muomu va muhana vinkambu mu cihela ca ku muhana cuma ca kufuika ku mutue. 16 Vunoni nga kuli umo atonda kukandula vimpata omo lieci cisemua, katuesi na cikuavo, ambe mu vikungulukilo via Njambi cahimo.
17 Vunoni omo nji mihana evi vimamuna, kanjesi naku mi sangala. Muomu ku likungulula cenu ka ce kuneha viuma via cili, vunoni mue kuiza visoti. 18 Ha katete, nji nevu nguavo mu mue ku likungulula mu kupua cikungulukilo, hakati kenu he kukala matepeso. Nange nja tava nguange vusunga vene. 19 Kuhandeka vusunga, hakati kenu ha kakala tuvivunga tua ku limanena, linga vaze ve kuya Njambi ku mutima, va lisolole ha toma.
20 Muomu mu mue ku likungulula, vutumbe vuenu ka vue kupua kulia Mulalelo* ua Muangana. 21 Muomu mu ye kuheta ntsimbu ya kulia Mulalelo, mue kulivanga kulia vualumo viakulia via cinguezi. Ngeci mukemuo mue kulinga ou ali na ndzala, mukuavo na pende. 22 Vuno kamuesi na vindzivo vi muhasa kulila ni kunuina ni? Ni mu tonda ku sembulula cikungulukilo ca Njambi na kuvuisa ntsoni vaze kavesi na vimo ni? Mu tonda nji mileke vika? Vuno mu tonda nji mi sangale ni? Houe, ka njimi sangala ha viuma evi.
23 Muomu vize vi nja tambuile kuli Muangana, vikevio vene vi nja mi lekele nguange, Muangana Yesu ku vutsiki vu va muendele vungungu, uambatele mbolo, 24 kaha munima ya kusantsela ua ipazuile, na kuhandeka nguendi: “Eyi mbolo, yemanena muvila uange, uze u vaka hana omo lienu. Tualelenuho kulingamo mu kunji vulukilaho.” 25 Ua lingilemo naua naku ngandza, munima ya kulia ca cinguezi,* nguendi: “Eyi ngandza yemanena litavasiano lia liha lize li kalako omo lia maninga ange. Tualelenuho kulingamo ntsimbu yose imu nua eyi ngandza, mu kunji vulukilaho.” 26 Muomu ntsimbu yose imu ka lia eyi mbolo, na kunua eyi ngandza, mu ka tualelaho kuambulula kutsa ca Muangana noho akeza.
27 Ngeci mukemuo, uose alia ku mbolo na kunua ku ngandza ya Muangana vunoni ka pandele,* akakala na mulonga kutuala ha muvila na ha maninga a Muangana. 28 Ha katete, muntu ku muntu avange ku lihilula na kukala na vusunga nga na fuila, amba vuose alie ku mbolo na kunua ku ngandza. 29 Muomu uose alia na kunua, ca kuhona kuivuisisa vi ua lumbunuka ou muvila, alikazumuina cihiso. 30 Ngeci mukemuo, vavengi hakati kenu va na zeye, vali na kuvavala, kaha vamo vali mu tulo tua kutsa.* 31 Vunoni nga tu linongonuena etu vavenya veya mpundu tuapua, nga ka vatu sompesa. 32 Vutuhu ngoco, nga Yehova* atu sompesa, ali naku tu sungamesa linga kati va tu hisile kumolika na vakua mavu. 33 Ngeci mukemuo vamuanetu, omo mu likungulula ku Mulalelo, livandamenenu umo na mukuavo. 34 Nga kuli umo natsi njala, alie ku ndzivo, linga omo mu likungulula kati mu likazumuine kumi sompesa. Vunoni kutuala ha vimpande vikuavo, njaku vi sungamesa mua cili mu njiza oko.