Kuli Vakua Ngalata
6 Vamuanetu, ambe nga umo muntu ahangunuka mu njila ku ndzimba, enu mua kanyama ku sipilitu* setekenu ku sungamesa yala uaco na civuovuo.* Vunoni muntu ku muntu azangame, kuteua nendi naua auile mu ceseko. 2 Tualelenuho ku liambatesa viteli umo na mukuavo, nga mu linga ngoco mu ka puisamo lisiko lia Kilistu. 3 Muomu nga muntu a singanieka nguendi uapua ua seho vunoni kapuile na mumo muahi, ali na kulikuisa ikeye vavenya. 4 Vunoni muntu ku muntu ahilule vilinga viendi vavenya, kaha aka uana vimo vi kamu vuisa ndzolela ikeye vavenya, kati mu ku lisetekesa na mukuavo. 5 Muomu muntu ku muntu akambata citeli cendi vavenya.
6 Cikuavo naua, uose u vali na kulongesa* lizi, ahane viuma viose via cili na uze amu longesa.
7 Kati mu likuise ngoco: Njambi ka citava kumu tsopa. Viose via kuna muntu, vikevio naua via ka tia.* 8 Muomu uose akuna kuliya na vizango viendi via ntsitu, aka tia kunonga,* vunoni uze akuna kuliya na sipilitu, aka tia muono ka ue kuhua. 9 Ngeci mukemuo, kati tu hone* mu kulinga via cili, muomu nga ka tua honene, tu ka tia ku ntsimbu inapande. 10 Ngeci mukemuo, omo tu cili na vukovelelo,* tu lingenu via cili ku vantu vose, vunoni cikuma-kuma kuli vaze vapua vusoko vuetu vua mu lutsilielo.
11 Talenu vukama vua masona anji na mi sonekela na livoko liange.
12 Vose vaze vali na kutonda kuya ku mitima ya vantu kuliya na ntsitu,* vakevo vali naku mi sindiya kulovoka, kaha vali na kulingamo mu kutina ku va yandesa omo lia citi ca kayando* ca Kilistu Yesu. 13 Muomu cipue vaze vali na kulovoka, kavesi na kuononoka Masiko, vunoni va tonda nguavo enu mu lovoke linga va lipambe omo lia mivila yenu. 14 Vunoni kulipamba ca cifua eci, cikale ku lahako nange! Nji lipamba lika hali Muangana uetu Yesu Kilistu iva sukikile ha citi;* kuli yange, mavu anatsi kuhitila muli ikeye, kaha nange nji natsi ku vakua mavu. 15 Muomu kulovoka ni kuhona kulovoka, kati vikevio via seho; vunoni ca seho, kutanga ca ciha. 16 Ciyulo na nkeke vikale kuli vaze vose ve kuyoya* kuliya neli lisiko, eyo, Isaleli ya Njambi.
17 Kutunda hano, kati kukale naua muntu anji kokela visoti. Muomu ha muvila uange, hali vitamba* vi muesa nguavo, nji ngamba ya Yesu.
18 Vamuanetu, ngozi ya kama ya Muangana uetu Yesu Kilistu, ikale nenu omo lia mitima ya cili imue kumuesa. Ame.