Kuli Vakua Loma

13 Muntu uose, aliononuese kuli vakua kusika. Muomu kusika na cimo cahi cihasa kukalako nga Njambi ka ci tavesele. Vakua kusika vali ha vihela viavo, muomu Njambi ikeye na va tavesa va kaleko. 2 Uose aluisa vaze vali na mpoko ya kusika, ali na kuluisa viuma via tumbika Njambi. Kaha uze aluisa viuma via tumbika Njambi, vaka mu sompesa. 3 Muomu vakua kusika veku vavuila vuoma kuli vakua kulinga via vipi, kati kuli vakua kulinga via cili. Vuno utonda kuyoya ca kuhona kuvuila liova vaze vali na mpoko ya kusika ni? Tualelaho kulinga via cili kaha vaka kusangala. 4 Muomu vanapu vangamba va Njambi vali na kulinga vize vi kukuasa. Vunoni nga uli na kulinga via kuvihia, ivua liova, muomu kavesi na kuambata lika ngoco mukuale. Vanapu vangamba va Njambi vaze ve kulingula, na kumuesa vutenu vuavo ku muntu alinga via kuvihia.*

5 Ngeci mukemuo, mua pande ku liononuesa kuli vakevo kati omo lia vutenu lika, vunoni naua, omo lia mitima yenu.* 6 Vikevio naua vi mue kufuetela lisimu, muomu vapua vangamba va Njambi vaze ve kupangela vantu kaha ve kulingamo ntsimbu yose. 7 Hanenu vantu vose vize via va pande: uze atonda lisimu, mu hanenu lisimu; uze atonda mulambu, mu hanenu mulambu; uze atonda ku muvuila liova muvuilenu liova; uze atonda kasingimiko, mu singimikenu.

8 Kati mukale na likongo lia muntu na umo uahi, kuvanga lika kulilema umo na mukuavo. Muomu uze alema mukuavo, na puisamo masiko. 9 Muomu masiko ahandeka nguao: “Kati ulinge vukoyi, kati utsihe muntu, kati upunde, kati uliveyele viambala,” kaha na masiko akuavo ose akalako, ose va apandakana mu mezi aa ahandeka nguao: “Uapande kulema mukuenu ngue mu ua lilema ove vavenya.” 10 Muntu uakala na cilemo, ke kulinga via kuvihia ku mukuavo. Ngeci mukemuo, cilemo cipuisamo masiko.

11 Ngeci mukemuo, lingenumo muomu mu tantekeya vuino ino ntsimbu, ngecize inapuhu ola ya ku nyangumuka ku tulo, muomu vuovoke vuetu vuli mu hiehi cikuma kuhiana na muze mu tua putukile kutsiliela muli Yesu. 12 Vutsiki vuli na kuhua, kaha litangua lili mu hiehi. Ngeci mukemuo, tu mbilenu kuti vilinga via milima, kaha tu zalenu vitua via ceke. 13 Tu kalenu na vilinga via cili ngue vaze vali na kuenda mu ceke ca mutanya, kati mu vilika via ku hianesamo, mu kupenda,* mu vupangala, mu vilinga via kasahuntu,* mu luozi na cipululu. 14 Vunoni zalenu Muangana Yesu Kilistu,* kaha kati mu singaniekele vualumo mua ku puisilamo masungu aku ntsitu.