Mukanda ua Tiango
5 Halakanenu enu vampite! Lilenu na kulinyenga omo lia tuyando tuli na kuiza hali yenu. 2 Vupite vuenu vuna volo, na vuzalo vuenu vuna liua ku tulongolo. 3 Olu yenu na palata via liua ku nkalavue kaha nkalavue yaco, ikapua vukaleho vua kumi paya, kaha ikalia ntsitu yenu. Viose vimu na tulika vikapua ngue tuhia ku matangua aku manusuila. 4 Talenu! Fueto ize ka mua hanene vakua kutia va mua pangesele mu mehia enu ili na kutambeka, kaha miteto ya vakua kutia ina hete mu matuitui a Yehova* ua vivunga via masualale. 5 Hano ha mavu mu na yoyo mu vupite na kupuisamo masungu enu. Mu na hindalesa mitima yenu ngue vimuna va na vandamena litangua lia kuva tsiha. 6 Mu na hisa; mu na tsihi mukua vuviuke. Vuno ka limika nenu ni?
7 Ngeci mukemuo vamuanetu, kalenu na ntsintsa na ha kusoloka ca Muangana. Talenu! Ndimi ueku tualelaho ku vandamena na ntsintsa yose vusuka vua cili vua ha mavu, noho vua tambula nyondzi ya kulivanga* na nyondzi ya ku manusuila.* 8 Nenu naua kalenu na ntsintsa, kanyamesenu mitima yenu muomu kusoloka ca Muangana cili muhiehi.
9 Vamuanetu, kati mu linyenyete* omo lia umo na mukuavo, linga kati vami hise. Talenu! Ngazi nemana ku vimbelo. 10 Vamuanetu, kutuala ha kukolesa mu tuyando na kumuesa ntsintsa, temunuinenu lungano lua vapolofeto vaze va handekele mu lizina lia Yehova. 11 Talenu! Tu tumbula vaze va na kolesa nguetu vapua va kuvezika.* Mua vuile via kukolesa ca Yombi na vize viezilemo via mu hanene Yehova, kaha mua limuena nguenu, Yehova uakala cikuma na cikeketima kaha uapua mukua nkeke.
12 Mu kuhiana viuma viose vamuanetu, likelenu kulisinga, nambe na lilu ni mavu, ni kulisinga cose-oco. Vunoni nga mu handeka nguenu, “Eyo” ipue vene eyo, nga nguenu “Houe” kaha houe vene, linga kati vami hise.
13 Vuno hakati kenu hali umo ali na kuyanda ni? Atualeleho kuvundila. Vuno hali umo na vuahelela ni? Embe miaso ya ku sangaziala.* 14 Vuno hakati kenu hali umo avavala ni? Asane vakuluntu mu cikungulukilo, va vundile nendi naku mu kuita mazi mu lizina lia Yehova. 15 Kaha civundilo ca kuvundila na lutsilielo, ci ka kanguisa muvezi kaha Yehova aka mu hindula. Cikuavo naua, ambe nga na lingi vupi, aka mu konekela.
16 Ngeci mukemuo, litavelenu vupi vuenu kuli umo na mukuavo, kaha likundikenu mu vivundilo linga mu kanguke. Muomu ku lambelela ca mukua vuviuke, cili na ndzili ya kama. 17 Eliya nendi uapuile muntu ua vifua ngeci muetu, vunoni mua vundilile naku lambelela mua kama linga nyondzi kati inoke, kaya nokele vene mu miaka itatu na vingonde 6. 18 Ngeci ua vundilile naua, kaha nyondzi ya nokele, na mavu emine vimbuto viavingi.
19 Vamuanetu, nga umo hakati kenu vamu hungumuna naku mu tundisa mu vusunga, kaha mukuavo amu hiluisa, 20 tantekeyenu nguenu, uze na hiluisa mukua vupi naku mu tundisa mu njila yendi ya kuvihia, amuovola ku kutsa, kaha afuika vipi viavingi.