Ua Kulivanga Kuli Vakua Kolintu
7 Kaha kutuala ha viuma vi mua sonekele, ci li kulutue yala kati akuate* mpuevo. 2 Vunoni omo lia kulana ca vupangala,* yala uose akale na mpueyendi kaha mpuevo uose akale na yaliendi. 3 Yala, ahane mpueyendi vize via mu pande, na mpuevo nendi ahane yaliendi vize via mu pande. 4 Mpuevo kesi na ndzili ha muvila uendi, vunoni yaliendi ikeye ali nayo. Mukemuo naua yala, kesi na mpoko* ha muvila uendi, vunoni mpueyendi ikeye ali nayo. 5 Kati mu liumine umo na mukuavo vize via mu pande, kuvanga nga mua litavasiana mu vuvali vuenu mu imo ntsimbu imu na hangula, linga mu tuale mana ku kuvundila, kaha munima yaco mu liuane naua, kutina Satana atualelaho ku mieseka omo lia kuhona kukuata mutima. 6 Vunoni evi nja vi handeka mu kumi tavesa lika, kati mu kumi tumbikila lisiko. 7 Njina tondele nga vantu vose vapue ngeci muange. Vunoni muntu ku muntu uakala na vuana vuendi vua muhana Njambi, ou va namu hanako vuana mu cifua eci, mukuavo ua tambula mu cifua ceka.
8 Kaha nji leka vazike* na vantuluue nguange, ci li kulutue va tualeleho vene ngeci muange. 9 Vunoni nga ka vahasa kukuata mutima,* kaha vambate ni kusomboka. Muomu ci li kulutue kuambata ni kusomboka, ku tuvakana kusukuma na masungu.
10 Kutuala kuli vaze va liambata, nji vahana masiko, kati yange vunoni Muangana, nguange, mpuevo kati alitepe na yaliendi. 11 Vunoni nga na litepe na yaliendi, akale ngoco vene kati asomboke. Nga kuahi, va lihiluise* na yaliendi. Kaha yala kati aseze mpueyendi.
12 Vunoni vakuavo nji valeka nguange, eyo, yange vene kati Muangana, nguange: Nga umo muanetu ali na mpuevo ka tsilielele, kaha mpuevo uaco na tava kukala nendi, ou muanetu kati aseze mpueyendi. 13 Kaha nga mpuevo ali na yala ka tsilielele, kaha yala uaco na tava kukala nendi, ou mpuevo kati aseze yaliendi. 14 Muomu yala uze ka tsilielele, va namu lelesa omo lia mpueyendi, kaha mpuevo uze ka tsiliele, va namu lelesa omo lia yaliendi. Kati ngoco vana venu nga vapua va kuzuala, vunoni hano vanapu va kulela. 15 Vunoni nga uze ka tsilielele alihanguila kuya,* aye ngano. Kaha muanetu ni ndumbuetu, ka kutiuile mu viuma viaco, vunoni Njambi nami hana ciyulo. 16 Muomu ove mpuevo, ka utantekeya nguove uhasa kuovola yaliove ni? Cipue ove yala, ka utantekeya nguove uhasa kuovola mpueyove ni?
17 Vunoni muntu ku muntu ayoye kuliya na mutamba uamu hana Yehova ngue omo Njambi uamu sanene. Eli lisiko njili na kulihana ku vikungulukilo viose. 18 Vuno kuli umo iva sanene tele ua lovoka laza ni? Kati alihiluise ku vulima. Vuno kuli umo iva sanene tele kanda alovoke ni? Kati vamu lovole. 19 Kulovoka* kacesi na seho, na kuhona kulovoka kacesi na seho. Ca seho capua kuononoka masiko a Njambi. 20 Mu cifua cose-oco cakele muntu mu vamu sanene, akale mu cifua oco vene. 21 Vuno mu vaku sanene tele u ndungo ni? Kati ulisosomue. Vunoni nga uhasa kupatuka, lingamo vene. 22 Muomu uose ya sanene Muangana tele napu ndungo, hano napu honi ua kupatuka muli Muangana. Mukemuo naua uose iva sanene tele napu ua kupatuka, hano napu honi ndungo ya Kilistu. 23 Enu vami landele na ndando, ngeci mukemuo, likelenu kupua vandungo va vantu. 24 Vamuanetu, mu cifua cose-oco cakele muntu mu vamu sanene, atualeleho kukala mu cifua oco vene ku meso a Njambi.
25 Vunoni kutuala hali vaze kanda vaci limoneho ku mivila na umo,* kanjesi na lisiko lia kutunda kuli Muangana, vunoni njimi lekako visinganieka viange, mu kupua muntu iva na muesa nkeke kuli Muangana, linga njipue mukua vucili. 26 Ngeci mukemuo mu kumona cange, ca cili muntu atualeleho muze vene, omo lia visoti viliko matangua ano. 27 Vuno uli na mpuevo ni? Kati utonde njila ya ku lizituilamo. Kauesi na mpuevo ni? Likele kutonda mpuevo. 28 Vunoni nga umbata,* ka ulingi vupi. Cikuavo naua, kutuala ha muntu kanda aci limoneho ku mivila, nga ambata ni kusomboka, ka lingi vupi. Vutuhu ngoco, vaze va lingamo, vaka mona lamba mu muono.* Ngeci mukemuo, njili na kutonda ku miohiela ku lamba yaco.
29 Cikuavo naua, vamuanetu nji mileka nguange, ntsimbu ina salako ina keha. Ngeci mukemuo kutunda hano, vaze vali na vampuevo, valinge ngue kavesi navo. 30 Vaze vali na kulila, valinge ngue kavesi na kulila. Vaze vali na ndzolela valinge ngue kavesi nayo. Vaze vali na kulanda, valinge ngue kavesi na viuma. 31 Vaze vali na kupangesa viuma via ha mavu, valinge ngue kavesi naku vi pangesa mu vutuntu. Muomu cifua ca viuma via ano mavu, ci li na kualuluka. 32 Kuhandeka vusunga, kanji tondo nguange mu yoye mu visoti. Yala uze uapua muzike, ueku lisosomua na viuma via Muangana, na vati aya Muangana ku mutima. 33 Vunoni yala uze uambata, ueku lisosomua na viuma via ha mavu na vati aya mpueyendi ku mutima, 34 kaha visinganieka viendi vi na litepe. Cikuavo naua, mpuevo uze ka sombokele na uze kanda aci limoneho na yala, ueku lisosomua na viuma via Muangana, linga apue ua kulela ku muvila naku sipilitu. Vunoni mpuevo uze ua somboka, ueku lisosomua na viuma via ha mavu, na vati aya yaliendi ku mutima. 35 Njili na kuhandeka evi viuma, kati mu kumi vingilika* vunoni mu kumi kuasa, linga mulinge via cili omo mu tualelaho kupangela Muangana ca kuhona kutanguka.
36 Vunoni nga kuli umo amona nguendi vuzike vuli naku mu kaluuila, kaha nga na tuvakana laza ha ntuitui ya vukuendze, na pande kulinga evi: Alinge via tonda; kalingi vupi. Ambate ni asomboke. 37 Vunoni nga kuli umo alikuminya mu mutima uendi kaha amona nguendi ka citondeka kulingamo, kaha ahasa ku lipokuesa,* cikuavo naua na lihanguila mu mutima uendi nguendi kambata ni kusomboka, alinga mua cili. 38 Mukemuo naua, uze ambata ni kusomboka, alinga mua cili. Vunoni uze kambata ni kusomboka, alinga mua cili cikuma.
39 Mpuevo ua kusomboka, na kutiua kuli yaliendi mu ntsimbu yose yaliendi acili na muono. Vunoni nga yaliendi natsi, na zituka mu kusomboka kuli uose-ouo ya na zange, vunoni muli Muangana lika. 40 Vunoni mu kumona cange, akala na ndzolela ya kama nga atualelaho kukala muze vene. Kaha njili na vusunga nguange njili na sipilitu ya Njambi.