Kuli Vakua Loma
12 Ngeci mukemuo vamuanetu, mu kulinga Njambi na tu muesa cikeketima, njimi lambelela nguange, kundikenu mivila yenu kupua nkombelo ya muono, ya kulela ya tava Njambi, kulumbunuka cipanga ca kulela ca kulinga na vuhasi vuenu vua kusinganieka. 2 Kati mu tavese viuma via ano mavu* vimi munge, vunoni himpukenu mu kulingisa visinganieka vienu kupua via viha, linga mu limuene enu vavenya cizango ca Njambi cize capua cacili, ca muya ku mutima kaha ca ku tantuluka.
3 Muomu kuhitila mu ngozi ya kama iva nanji muesa, njileka muntu ku muntu hakati kenu nguange, kati a singanieke nguendi uapua ua seho cikuma ku tuvakana na muze mua napu, vunoni muntu ku muntu akale na visinganieka via mana kuliya na seteko ya lutsilielo yana muhana Njambi. 4 Muomu ngue omo tuli na vilio viavingi mu muvila umolika, vunoni vilio viose kaviesi na cipanga cimolika, 5 netu naua vutuhu tu vavengi, tuapua muvila umolika muli Kilistu, vunoni tu vose muntu ku muntu, tuapua vilio via ku linungakana ku umo na mukuavo. 6 Tu vose tuli na vuana vua kuliseza-seza kuliya na ngozi ya kama iva na tu muesa. Ngeci mukemuo, nga vuana vuaco vua kupolofeta kaha tuambululenu vupolofeto kuliya na lutsilielo luetu. 7 Ngaco vua kupangela, tu pangelenu. Uze ali na vuana vua kulongesa, alongese, 8 uze ali na vuana vua ku kanyamesa,* akanyamese,* uze uapua cihuanga, alingemo na mutima uendi uose; mukua ku tuamenena alingemo na ndzili yendi yose,* kaha uze mukua kumuesa nkeke alingemo na ndzolela.
9 Cilemo cenu kati cikale na civembulu.* Zindenu via vipi, kakatelenu ku viuma via cili. 10 Lilemenu cikuma umo na mukuavo ngue vana vaumo. Puenu va kulivanga mu ku lisingimika umo na mukuavo. 11 Puenu vakua ku fuitangana, kati vilenda. Ku sipilitu puenu vakua ntuima. Pangelenu Yehova.* 12 Viukililenu omo lia lulavelelo luenu. Kolesenu mu tuyando. Tualelenuho kuvundila. 13 Hanenuko vakua kulela viuma vi muli navio, kuliya na kuzela* cavo. Puenu vakua kutambula vuino vangendzi. 14 Tualelenuho ku vezikisa vaze vami yandesa; vezikisenu kati mu singe. 15 Viukililenu na vaze va na viukilila. Lilenu na vaze valila. 16 Monenu vakuenu ngue mu mue ku limuenamo enu vavenya. Kati mukale na visinganieka via kulihaka ku vukama, vunoni tavesenu visinganieka via kulikehesa vimi tuamenene. Kati mu limone kupua vakua mana enu vavenya.
17 Kati mu hiluise vupi na vupi. Lingenu viuma vive kumona vantu vose nguavo via cili. 18 Nga citava, lingenu cose mu yoye mu ciyulo na vantu vose. 19 Vakua cilemo cange, kati mu lingule, ecelenu Njambi asolole vutenu vuendi; muomu vasoneka nguavo: ‘“Kulingula capua cange, yange njika hiluisila,’ nguendi Yehova.” 20 Vunoni “nga citozi cove ali mu ndzala, muhane viakulia, nga ali na mpuila mu haneko vimo via kunua, muomu mu kulingamo, uka lundika manungu atuhia ha mbandamutue uendi.”* 21 Kati mu tavese vupi vumi vule, vunoni tualelenuho kuvula vupi mu kulinga via cili.