Kuli Vakua Efesu
4 Ngeci mukemuo, ange cindzinda omo lia Muangana, njimi lambelela naua nguange endenu mua cili kuliya na kusana cize ci vami sanene, 2 naku likehesa cose, na kukonkama, na ntsintsa, liyandelenu umo na mukuavo mu cilemo, 3 oku mu linga cose mu kuyoya mu ciyulo umo na mukuavo, linga mu niunge kulikata cenu ce kuiza omo lia sipilitu santu. 4 Kuli muvila umolika, na sipilitu imolika, ngue mu vami sanene ku lulavelelo lumolika luze lu va nami sanena. 5 Kuli naua Muangana umolika, lutsilielo lumolika, na mbatizimu imolika, 6 Njambi umolika Ise ya vose, uze ali helu lia vose, ue kupanga kuhitila muli etu vose, na ngolo yendi ipanga mu vinjila viose.
7 Muntu ku muntu hakati ketu va namu muesa ngozi ya kama kuliya na seteko ya vuana vua mu hana Kilistu. 8 Muomu Visoneka nguavio: “Omo ua londele muilu uambatele vindzinda; ua hanene vantu kupua vuana.” 9 Kaha mezi “ua londele,” alumbunuka vika? Alumbunuka nguao ua livangele ku sikumuka kuintsi, ni nguetu, ha mavu. 10 Uze ua sikumukile, ikeye vene uze ua londele helu cikuma lia melu ose, linga kuhitila muli ikeye viuma viose vi sule.*
11 Kaha ua hanene vamo kupua vapostolo, vakuavo vapolofeto, vamo vakua kuambulula muzimbu ua cili, vamo tuniungi na valongisi, 12 linga va sungamese* vakua kulela, na kulinga cipanga ca kukuasa, mu kutunga muvila ua Kilistu, 13 noho tu vose tunapu vamo mu lutsilielo na mu mangana a vusunga aku tantekeya Muana Njambi, na kupua vantu va kukola,* na kuheta ha seteko ya citalamo ca kusula ca Kilistu. 14 Ngeci mukemuo, kati tupue ngue vanike va ku hungumuka, naku pekumuka oku noku na mpundzi yose ya vilongesa omo lia lizangamena lia vantu, na kuhitila mu makuli avo a kuenda ha vuongo. 15 Vunoni mu kuhandeka vusunga, tu kolenu mu cilemo na mu viuma viose muli Kilistu, uze uapua mutue. 16 Muomu kuli ikeye kukekuo kuva na nungila vilio viose via muvila, kaha vili na kupangela hamo kuhitila mu manunga ali na kuhana vize vi tondeka. Nga cilio ku cilio ci panga vuino, evi vi kuasa muvila kukola omo ulitunga uvenya mu cilemo.
17 Ngeci mukemuo, evi vikevio vinji handeka na kuhana vukaleho muli Muangana nguange, kati muende naua ngue mu ve kuenda vakua vifuti mu visinganieka viavo via ngoco. 18 Visinganieka viavo vili mu milima kaha va na hangunuka ku muono uze ua kundama kuli Njambi, omo lia ndzimba yavo na kukaluua ca mitima yavo. 19 Mu kulinga kavesi naua na ntsoni, va na lihana ku vilinga via kasahuntu,* mu kutonda kulinga na lizangamena* vilinga via mazilo ose.
20 Vunoni ka mua lilongesele nguenu mukemuo muafua Kilistu muze, 21 cili vene, muavuile viendi kaha vami longesele kuhitila muli ikeye, ngeci mua vusunga vuli muli Yesu. 22 Vami longesele nguavo, mua pande kuzula vuntu vuenu vua laza vuze vua litombola na vilinga vienu via ku nima, vuntu vuze vuli na kuvola omo lia vizango viavuo via makuli. 23 Kaha mua pande ku tualelaho kupua va vaha mu cifua cimue ku singaniekelamo,* 24 kaha zalenu vuntu vua vuha vuva na tanga kuliya na cizango ca Njambi mu vuviuke* vua vusunga, naku kakatela.
25 Ngeci mukemuo, mu kulinga mu na seza makuli, muntu ku muntu ahandeke vusunga ku umo na mukuavo, muomu tunapu vilio via muvila umolika. 26 Nyenguenu, vunoni kati mu linge vupi; litangua kati lilahuke oku muna ci luvala. 27 Ndiavu kati mumu sile cihela.* 28 Uze ue kupunda kati apunde naua. Vunoni afuitangane, apange via cili na mavoko endi, linga a uaneko vimo via kuhana kuli uze na zela. 29 Lizi lia lipi* kati litunde mu tunua tuenu, vunoni mu tunde lika via cili vize vi kanyamesa* kuliya na vize vi tondeka, linga vaze vali naku halakana va uaneho vukuasi. 30 Cikuavo naua, kati mu luvalese sipilitu santu ya Njambi, ize iva mi hanene mu kupua citantekeyeso ca ha litangua lia kupatuka cenu, kuhitila mu ndando ya kupatula.
31 Mbilenu kuti kusasa cose,* na vutenu, na matoto, ku yalumuka, na mezi ose a kuvihia, na viuma viose via vipi. 32 Vunoni livuilenu ngozi umo na mukuavo, puenu vakua cikeketima, likonekelenu umo na mukuavo na mutima uose, ngue omo Njambi uami konekelele na mutima uose kuhitila muli Kilistu.