Uamu Civali ua Petulu

2 Vutuhu ngoco, kuezile naua vapolofeto va makuli hakati ka vantu, ngue muze naua mu va keza valongisi va makuli hakati kenu. Vaka neha tuvivunga tua kuvihia,* tu kava lingisa kuviana vavenyavo uze uava landele, kaha vaka likokela kunonga ca vuasi. 2 Cikuavo naua, vavengi vaka temunuina vilinga viavo via kasahuntu,* kaha omo liavo, njila ya vusunga vaka ihandeka mua kuvihia. 3 Kaha naua omo lia lizangamena liavo, vaka mi zangamena na mezi a makuli. Vunoni cihiso cavo cize ci vava tumbuilile laza, cili muhiehi, kaha kunonga cavo kacesi ku lahako.*

4 Mua vusunga, Njambi ka tetelele vaze tungelo va vulumuine, mu kuhona ku vahana kasitiku, vunoni ua vombilile mu Tartaru,* muku va kuta na malienge a milima ya kama, kaha na va tulikila ku kava sompesa. 5 Kaha ka tetelele mavu a laza mu ku ahana kasitiku, vunoni ua niungile Noa, mukua kuambulula vuoloke, na vakuavo 7, mua nehele livazi ha mavu a vakua kusahula Njambi. 6 Kaha ua hisile vimbonge via Sondoma na Ngomola, muku vi nongesa naku vipuisa muto. Mu kulingamo, uahele cimueso ca viuma vi ka soloka kulutue, hali vaze ve kusahula Njambi. 7 Vunoni uovuele mukua vuviuke Lote, uze uakele na kuyanda, omo lia vilinga via kasahuntu* via vaze vakua kupokola masiko. 8 Muomu tangua na tangua, ou yala mukua vuviuke ua yandele* muakele hakati kavo, omo lia kumona na kuivua vilinga viavo viavipi. 9 Ngeci mukemuo, Yehova* atantekeya mua kuovuela vakua vuviuke ku vieseko, vunoni vakua vuhenge, na va niungila ku kava nongesa ha litangua lia kusompesa, 10 cikuma-kuma vaze va tonda kuzualesa mivila ya vakuavo, kaha vali na kusahula vaze vali na mpoko.

Kavesi na ntsoni, vakua mitima ya kukaluua, kaha kavesi na liova lia kuhandeka mua kuvihia vaze vali na vumpahu. 11 Vunoni tungelo, vutuhu vakala na ndzili ya kama na ngolo, ka ve kusompesa na kasahuntu valongisi va makuli, muomu tungelo va singimika Yehova. 12 Vunoni ava vantu, vapua ngue tusitu kavesi na mana vaze ve kulinga viuma ca kuhona ku singanieka, kaha va semukila ku va kuata naku va nongesa, ve kuhandeka mua kuvihia viuma vize ka va tantekeya. Ava vantu vaco vaka nonga omo lia vilinga viavo vize vi tuala ku kunonga, 13 fueto yavo ikapua kasitiku omo lia vilinga viavo via kuvihia.

Mueka va lema muono uavo ua senga ambe vene mutana muelu. Vanapu vitoma na vipenga, va viukilila mu vilongesa viavo via makuli mu ve kulia nenu ku viuano. 14 Meso avo ana sulu na vukoyi, kaha ka vahasa kulikela vupi; ve kukokueya vaze va na zeye; vali na mitima inezilila cipululu; vapua vana va kusinga. 15 Va na seza njila ya cili, kaha va na hungumuka. Va na kavangeya njila ya Mbalame muana Mbeole, uze ua lemene kutambula fueto ya vilinga via vuheve, 16 vunoni vamu handekelele omo lia kupokola lisiko. Cimulu uze ke kuhandeka, ua handekele ngue muntu mu kuvindika uze kapolofeto kulinga viuma via vuheve.

17 Vantu vaco, vanapu ngue vindundzi via kuhona mema, na mbundu ize ipekumuka na luhundzi lua kama, kaha va nava tulikila milima ya kama. 18 Vihandeka viavo vizivika ngue via seho, vunoni via ngoco. Kuhitila mu masungu avo a ntsitu na vilinga viavo via kasahuntu,* vali na kukokueya vaze va na patuka ku vantu vakua vilinga via kuvihia. 19 Vutuhu va kulahesa vakuavo kupatuka, vunoni vakevo vene vanapu vandungo va vupi. Muomu nga muntu vamu hiana ku mukuavo, kaha napu ndungo ya uze namu hiana. 20 Cili vene, nga mu nima ya kupatuka ku mazilo aha mavu kuhitila mu mangana a vusunga, a Muangana na Muovole Yesu Kilistu, va hilukila naua ku viuma viaco kaha viva vula, mua vusunga vumanusuilo vuavo, vu pihilila cikuma kuhiana vuputukilo vuavo. 21 Ca cili nga ku va tantekeyele vuino njila ya vuoloke, ku tuvakana ku itantekeya, kaha kutundaho va seza masiko a kulela ava tambuile. 22 Vi ca handeka cisimo ca vusunga, vili naku lipuisamo hali vakevo. Nguaco: “Katali na hilukila naua ku visandzo viendi, kaha ngulu iva na tanesele, ali na kulialanga naua mu vulova.”