Kuli Vakua Ngalata
4 Hano nji mileka nguange, ntsimbu suana acili kanike, ka lisile na ndungo vutuhu ikeye sukulu ya viose, 2 vunoni ali muintsi lia tuniungi na vakuamanda* kuheta na ha litangua lia hangula vualumo ise. 3 Mukemuo naua, netu mu tuapuile vanike tuakele ku vundungo vua viuma via vuputukilo via ha mavu. 4 Vunoni mu yapuileho ntsimbu, Njambi ua tumine Muanendi uze ua semukile ku mpuevo kaha uakele muintsi lia masiko, 5 linga apatule vaze vali muintsi lia masiko muku va landa linga va tu puise vana.
6 Ngeci mukemuo, mu kulinga munapu honi vana, Njambi na tumu sipilitu ya Muanendi mu mitima yetu, kaha itambeka nguayo: “Aba,* Tata!” 7 Ngoco vene, kati naua u ndungo vunoni u muana; kaha nga u muana, Njambi na kupuisa naua suana.
8 Vutuhu ngoco, ntsimbu kanda mu tantekeye Njambi, muapuile vandungo va vaze ka vapuile mpundu vanjambi. 9 Vunoni hano honi mu tantekeya Njambi, ni nguetu, Njambi ami tantekeya, vati mu hilukila naua ku viuma via vuputukilo, via kuzeya, via ngoco, na kutonda kupua naua vandungo vavio? 10 Muli na kuniunga cikuma matangua, vingonde, vintsimbu na miaka. 11 Njili na liova nguange halumo nja lipakesele ngoco kumi kuasa.
12 Vamuanetu, njimi lambelela nguange, puenu ngeci muange, muomu nange njapuile ngeci muenu. Na vimo viahi mua nji vihisila. 13 Vunoni mua tantekeya nguenu kuvavala cange, cikeco canji hanene vukovelelo vua ku miambuluila muzimbu ua cili lua katete. 14 Kaha vutuhu kuvavala cange capuile ceseko kuli enu, ka mua nji yenguile cipue ku njivuila nyengo. Vunoni mua nji tambuile ngue kangelo ua Njambi, ngue Kilistu Yesu. 15 Ize ndzolela yenu ili kulihi? Muomu njili na vusunga nguange, nga ce ku tavele ku cokovola meso enu naku nji hanao, nga mua lingilemo. 16 Nkuma njinapu citozi cenu omo lia kumi leka vusunga ni? 17 Vali na kulinga cose linga vami kokele ku mutamba uavo, vunoni kavesi na vutumbe vua cili. Va tonda kumi tundisa kuli yange linga mu va kave. 18 Vunoni capua ca cili nga muntu alihakela kapandi ka kumi kokela ku mutamba uendi nga ali na vutumbe vua cili, kaha kati lika mu ntsimbu injili nenu. 19 Enu tuana tuange* tu njili na kuvuila kuvavala ngue musongo ua ku sulumuna noho Kilistu na kolo* muli yenu. 20 Cizango cange hano, tele nga ca kukala hamo nenu linga nja ku handeke nenu mu cifua ceka, muomu na mezi ananji huila.
21 Aci nji lekenuko, enu mu tonda kukala muintsi lia masiko: Vuno kamu tantekeya vi ahandeka Masiko ni? 22 Ca kumuenako, vasoneka nguavo Avilahama uakele na vana vavali va vamala, umo ku mpuevo ua ndungo, mukuavo ku mpuevo ua kuzituka. 23 Vunoni muana ua kuli ndungo ua semukile ngue mu ve kusemuka vantu vose,* kaha uze ua ku mpuevo ua kuzituka, ua semukile kuhitila mu cikulaheso. 24 Evi viuma vi hasa kupua lika cimueso. Muomu ava vampuevo vavali, vemanena matavasiano avali, limo lia ku Muncinda ua Sinayi, lize lisema vana va ku vundungo, litavasiano liaco liemanena Hangale. 25 Hangale uemanena Sinayi, Muncinda ua ku Alavia, kaha ua litombola na Yelusalema lelo lino, muomu uakala mu vundungo hamolika na vana vendi. 26 Vunoni Yelusalema ya muilu, yapua ya kupatuka kaha yapua nana yetu.
27 Muomu vasoneka nguavo: “Viukilila, ove ntsimpi kanda uci sulumuneho. Tambeka na ndzolela ove mpuevo kanda ucivueho musongo ua ku sulumuna. Muomu vana va mpuevo uva na seza, vanapu vavengi cikuma kuhiana va uze ali na yaliendi.” 28 Ngeci mukemuo vamuanetu, enu munapu vana va cikulaheso ngue muapuile Isake. 29 Vunoni ngue mu cafuile ku ntsimbu ize, omo uze ua semukile ngue mu ve kusemuka vantu vose,* ua putukile kuyandesa uze ua semukile kuhitila mu sipilitu, vikevio naua vili na kusoloka na lelo lino. 30 Vutuhu ngoco, vika via handeka visoneka? Nguavio “Sekula ou mpuevo ua ndungo hamolika na muanendi, muomu muana ndungo, kaka suana hamolika na muana ua mpuevo ua kuzituka.” 31 Ngeci mukemuo vamuanetu, etu kati tu vana va mpuevo ua ndungo, vunoni va mpuevo uze ua kuzituka.