Uamu Civali Kuli Vakua Kolintu
6 Kaha mu kupanga hamo nendi, tumi lambelela nguetu kati mu tambule ngoco ngozi ya kama ya Njambi, naku zimbalesa vutumbe vuayo. 2 Muomu na handeka nguendi: “Mu ntsimbu ya kumuesa ngozi nja ku halakanene, kaha ha litangua lia kuovola, nja ku kuasele.” Tala! Ino ikeyo ntsimbu ya ku kuivuila ngozi. Tala! Lino likelio litangua lia kuovola.
3 Ka tu tondo kulinga cuma na cimo cahi cisuntsuisa vantu, linga cipanga cetu kati cikale na hamo hahi ha ku cipayela. 4 Vunoni mu viuma viose, tue ku litumbula kupua vakua kupangela Njambi, mu kukolesa cikuma mulamba, mu vuhutu, mu tuyando, 5 mu vipupa, mu tumenga, luozi, ku fuitangana, mu kukosa cilavulavu, mu vintsimbu via kuhona kulia, 6 mu kulela, mu mangana, mu ntsintsa, mu ngozi, mu sipilitu santu, mu cilemo ca kuhona civembulu, 7 mu mezi a vusunga, mu ngolo ya Njambi, mu vitua via vuviuke vili kulivoko lia cilio* na lia cimosue,* 8 na kuhitila mu vumpahu na kusahuka, na kuhitila mu lutsimo lua kuvihia na lua cili. Ve ku tumona ngue tu vakua kukuisa vantu, vunoni tu vakua vusunga, 9 ve ku tumona ngue naumo uahi atu tantekeya, vunoni va tu tantekeya vuino, ve ku tumona ngue tuli na kutsa, vunoni talenu! yetu vano tuyoya, ve ku tumona ngue va na tuhana kasitiku,* vunoni ka vatu tsihile,* 10 ve ku tumona ngue tuli mu vusiua, vunoni ntsimbu yose tuli mu ndzolela, ve ku tumona ngue tua hutuua, vunoni tuli na kufukisa vavengi, ve ku tumona ngue katuesi na vimo viahi, vunoni tua fuku viuma viose.
11 Tu nasama kanua ketu linga tu handeke* nenu vakua Kolintu, kaha tu na sokolola cikuma mitima yetu. 12 Etu tua zituka mu kumi muesa cilemo, vunoni enu ka mua zitukile mu ku tumuesa cilemo cenu. 13 Ngeci mukemuo, njili na kuhandeka nenu ngue vana vange nguange, nenu naua sokololenu cikuma mitima yenu.*
14 Kati mu likutile* ku mukambo* umolika na vaze ka va tsilielele. Muomu kulikata cika cakala ha vilinga via vuviuke na kutsiha masiko? Ni vusamba vuka vuakala ha ceke na milima? 15 Cikuavo naua, kulikata cika cakala hakati ka Kilistu na Mbeliale?* Ni mukua kutsiliela* na uze ka tsilielele, va liuanena* haka? 16 Kaha litavasiano lika liakala hakati ka tembele ya Njambi na tumponya? Muomu etu tuapua tembele ya Njambi ua muono. Ngue mua handekele Njambi nguendi: “Njika kala hakati kavo, na kuendela hakati kavo, kaha njikapua Njambi yavo vakevo co vakapua vantu vange.” 17 “‘Ngeci mukemuo, tundenu hakati kavo naku lihangunuka navo,’ nguendi Yehova,* ‘likelenu kukuata ku viuma via kuzuala’”; “‘kaha njika mi tambula.’” 18 “‘Kaha ange njikapua isuenu, enu co mukapua vana vange va vamala na vava mpuevo,’ nguendi Yehova, Mukua Ngolo Yose.”