Uamu Civali Kuli Vakua Kolintu
2 Muomu nja likuminya nguange, kati njize kuli yenu naua naku mivuisa vusiua. 2 Muomu nga nji mivuisa vusiua, iya aka njivuisa ndzolela? Hanga yenu vene vanji na luvalesa. 3 Njami sonekelele linga mu njikeza oko, kati njivue vusiua omo lia vaze va na pande ku njivuisa ndzolela. Muomu nja kulahela nguange viuma vi njivuisa ndzolela vikevio naua vi mivuisa ndzolela mu vose. 4 Muomu njami sonekelele na lamba ya kama, naku vavalesa mutima, na masozi a engi, kati mu ku mivuisa vusiua, vunoni linga mu tantekeye vukama vua cilemo ci njakala naco kutuala hali yenu.
5 Nga kuli umo nevuisa vakuavo vusiua, kati yange nevuisa vusiua vunoni mu vose, vutuhu ngoco kanji tondo kumi tenukila. 6 Eci kutenuka ci vali na kutenuka vantu vavengi, cinapu ku muntu uaco. 7 Kaha hano, mua pande kumu konekela na kumu lembezieka linga vusiua vua ku hianesamo kati vumu vule.* 8 Ngeci mukemuo, njimi mamuna nguange mu muesenu cilemo. 9 Muomu evi vikevio via nji lingisile kumi sonekela linga nji mone nga cili vene mue kuononoka mu viuma viose. 10 Nga kuli viose-ovio vimu na konekela muntu, nange njina mu konekela. Cili vene, viose-ovio vinji na konekela (nga kuli vimo vinji na konekela,) njina vilingi omo lienu ku meso a Kilistu. 11 Linga Satana kati atuvule,* muomu tu tantekeya miheto* yendi.
12 Munja hetele ku Toloase, linga njambulule muzimbu ua cili kutuala hali Kilistu, lipito lia vipanga lia nji sokolokelele muli Muangana. 13 Vunoni mutima* uange ka ua huimine muomu kanja uanene muanetu Titu. Ngeci nja salesele vamuanetu kuze na kuya ku Masendonia.
14 Vunoni tu santsela kuli Njambi uze ali naku tu tuamenena ntsimbu yose mu cendo ca vakua kuhiana hamolika na Kilistu, kaha kuhitila muli yetu, Njambi ali na kusanduola vueko vua cili vua mana endi kuvihela viose! 15 Muomu kuli Njambi, tunapu vueko vua cili vua Kilistu hakati ka vaze vali na kuovoka na vaze vali na kunonga. 16 Kuli ava vaya ku kunonga, tunapu lizimba lia kutsa lize lituala ku kutsa. Kuli vaze vali na kuovoka, tunapu vueko vua muono vuze vutuala ku muono. Kaha iya na puisamo kulinga evi viuma? 17 Yetu vene, muomu ka tuapuile vakua kulandesa lizi lia Njambi, ngue mu ve kulinga vavengi, vunoni tuli na kuhandeka na vusunga vuose mu kupua vantu vaze va na tumu Njambi, eyo, tuli na kulingamo ku meso a Njambi mu kulikata na Kilistu.