Ua Kulivanga ua Petulu
4 Mu kulinga Kilistu ua yandele ku ntsitu, nenu naua livuaheselenu kukala na visinganieka ngue viakele navio ikeye. Muomu uze na yanda ku ntsitu, na likela vupi 2 linga ntsimbu ya muono uendi ina lisupuko ha mavu,* kati ayoye kuliya na masungu a vantu, vunoni mu kulinga cizango ca Njambi. 3 Muomu ntsimbu imuakele na kulinga cizango ca vakua vifuti inahu. Mu ntsimbu yaco, muakele na kuyoya mu vilinga via kasahuntu,* mu masungu, mu kupenda,* mu vilika via ku hianesamo, mu kunua ca kulivula-vula, na kulemesa tumponya ci avindika masiko. 4 Kaha va na likomokela, muomu mu na likela kulikata navo mu vilinga viavo via mazilo, ngeci vali naku mi handeka mua kuvihia. 5 Vunoni ava vantu vaka litavela kuli uze na livuahesela kusompesa vaze vali na muono, na vatsi. 6 Ngeci mukemuo, muzimbu ua cili va uambuluile naku vatsi, linga ambe nga vava sompesa ku ntsitu kuliya na cifua ci ve kumuenamo vantu, vayoye ku sipilitu, kuliya na cifua ce kumuenamo Njambi.
7 Vunoni ntsimbu ya kuhua ca viuma viose, ili muhiehi. Ngeci mukemuo, muesenu mana, kaha vingilenu kutuala ha vivundilo.* 8 Kaha mu kuhiana evi viose, lilemenu cikuma umo na mukuavo muomu cilemo cifuika vipi viavingi. 9 Litambulenu* umo na mukuavo ca kuhona kutatuoka. 10 Kuliya na muze mua na tambula muntu ku muntu vuana, vu pangesenu mu kukuasa vakuenu, mu kupua vangamba va cili va ngozi ya kama ya Njambi, ize ili na kusoloka mu vinjila via kuliseza-seza. 11 Nga umo ahandeka, ahandeke mezi a kutunda kuli Njambi. Nga umo apangela vakuavo, alingemo mu ku hitukila ha ndzili ya na muhana Njambi, linga mu viuma viose Njambi vamu zumbangeye kuhitila muli Yesu Kilistu. Vumpahu na ngolo, viapua viendi ku miaka yose ya yaye. Ame.
12 Vakua cilemo cange, kati mu likomokele na vieseko via kulifua na tuhia vi muli na kuhita, ngue kati via vundambo. 13 Vunoni tualelenuho ku vuahelela omo mu hita mu tuyando tua hitile Kilistu, linga mu viukilile na kulisamba na ndzolela mu vaka solola vumpahu vuendi. 14 Nga vali na kumi sahula* omo lia lizina lia Kilistu, mua vezika. Muomu sipilitu ya vumpahu, eyo, sipilitu ya Njambi, ili hali yenu.
15 Vunoni hakati kenu, kati ha kale umo ayanda omo lia kutsiha muntu, cipue kupunda, cipue kulinga via kuvihia, ni kulihaka mu vimpande viambala. 16 Vunoni nga kuli umo ayanda omo lia kupua Mukua Kilistu, kati evue ntsoni. Vunoni atualeleho ku zumbangeya Njambi omo lia kupua Mukua Kilistu. 17 Muomu ino ikeyo ntsimbu iva hangula, linga kusompesa ci putukile mu ndzivo ya Njambi. Kaha nga kusompesa ciputukila hali yetu, vati cikafua kuli vaze ka ve kuononoka muzimbu ua cili ua Njambi? 18 “Nga kuli mukua vuviuke kati cacasi kuovoka, amba co kuli mukua kusahula Njambi, na mukua vupi?” 19 Ngeci mukemuo, vaze vali na kuyanda omo lia kulinga cizango ca Njambi, va tualeleho ku likundika* mu mavoko a Sakatanga uze uapua mukua vusunga, oku va linga via cili.