Kuli Vakua Loma
16 Njitonda mu tantekeye ndumbuetu Fembe, mukua kupangela mu cikungulukilo ca Senkili, 2 linga mumu tambule muli Muangana, mu cifua cize ci vapande ku tambuilamo vakua kulela. Kaha mu hanenu viose vitondeka muomu nendi ue kukuasa vavengi, hamolika vene nange.
3 Hetesenu mitende yange kuli Piliska na Akuila, vakuetu vakua kupanga hamo nange muli Kilistu Yesu, 4 vaze va hakele miono yavo* mu vusonde omo liange.* Kati yange lika njili naku va santsela, vunoni na vikungulukilo viose via vakua vifuti. 5 Mitende naua, ku cikungulukilo ce ku likunguluila mu ndzivo yavo. Mitende kuli mukuetu inja lema, Epenetu, umo ua vusuka vua kulivanga vua Kilistu ku Asia. 6 Mitende kuli Maliya, uze ua fuitanganene cikuma omo lienu. 7 Mitende ku vavusoko vange, Andoloniku na Njunia, vakuetu vatua kelele hamo mu kamenga, vamala vava tantekeya vuino ku vapostolo kaha valikata na Kilistu mu ntsimbu ya kama ku tuvakana yange.
8 Mitende kuli Ampiliatu, mukuetu inja lema muli Muangana. 9 Mitende kuli Ulembanu, mukua kupangela hamo nange muli Kilistu, kaha naua mitende kuli mukuetu inja lema Sitaki. 10 Mitende kuli Apele, ou iva tava muli Kilistu. Mitende kuli vakua ndzivo ya Alistombulu. 11 Mitende kuli kavusoko kange Helondiyau. Mitende kuli vakua ndzivo ya Nalesizu vaze vali muli Muangana. 12 Mitende kuli Tilifena na Tilifosa, vampuevo vakua ku fuitangana cikuma muli Muangana. Mitende kuli mukua cilemo cetu Pelesinde, muomu ueku fuitangana cikuma muli Muangana. 13 Mitende kuli Lufu, uze iva hangula muli Muangana, kaha na naye inja puisa ngue nana. 14 Mitende kuli Asinikilitu, Felongote, Heleme, Patolombase, Helemase kaha na vamuanetu vaze vali hamo navo. 15 Mitende kuli Filolongu na Njulia, Neleu na ntsongo yendi, na Olimpase kaha na vakua kulela vose vali hamo navo. 16 Limenekenu umo na mukuavo na kulitsemba ca kulela. Vikungulukilo viose via Kilistu, vi nami tumu mitende.
17 Njimi lambelela vamuanetu, zangamenu na vaze vakoka matepeso na viuma vie kusuntsuisa vize via lihilika na vilongesa vi mua tambuile, ngeci mukemuo, va tinenu. 18 Muomu vantu vaco, ka vapuile vangamba va Muangana uetu Kilistu, vunoni vapua vangamba va masungu* avo vavenya. Kaha vali na kuhandeka na civembulu na tumezi tua ku lembezieka mu ku hungumuna mitima ya vaze vali ku ndzimba. 19 Kuononoka cenu ci na tsimana ku vantu vose, ngeci mukemuo, mue ku njivuisa ndzolela. Vunoni njitonda nguange, mukale na mangana ku via cili, vunoni ku via kuvihia kalenu ku ndzimba. 20 Kaha Njambi uze ue kuhana ciyulo, vuovuno atsena Satana muintsi lia viliato viendi. Nja vundila ngozi ya kama ya Muangana uetu Yesu ikale nenu.
21 Timoteu, mukuetu mu tue kupangela hamo, nami menekaho, hamolika na vavusoko vange, Lusiu, Yasone na Sosipatulu.
22 Nange Telesio, nja soneka uno mukanda, njami menekaho muli Muangana.
23 Ngayu, vavenya ndzivo kunjili kaha kukekuo kue ku kungulukila cikungulukilo cose, nami menekaho. Elastu, mukua kuniunga vimbongo via mbonge nami menekaho, hamolika na muanaye Kuatulu. 24 ——
25 Njambi ahasa kumi kanyamesa kuhitila mu muzimbu ua cili unjili na kuambulula, namu muzimbu ua handeka via Yesu Kilistu. Ou muzimbu va na usolola kuhitila mu lihungu lia kulela li va suekele mu miaka yayingi. 26 Vunoni hano va na lisolola naku liambulula kuli vakua vifuti vose, kuhitila mu Visoneka via vapolofeto kuliya na kunoneka ca Njambi ua yaye, linga vakua vifuti vononoke kuhitila mu lutsilielo. 27 Njambi uze uapua lika ikeye mukua mana, kuli ikeye kukale vumpahu ku miaka yose kuhitila muli Yesu Kilistu. Ame.