Kuli Vakua Ngalata
3 Enu vakua Ngalata va kuhona mana! Iya nami hungumuna ngeci, enu vava lumbunuinine vuino via kutsa ca Yesu Kilistu iva sukikile ha citi? 2 Me njici mihuleko vimo:* Vuno mua tambuile sipilitu kuhitila mu vipanga via masiko, ni omo lia kutsiliela mu viuma vi mua vuile? 3 Nkuma na mana vene kamuesi nao ni? Mua putukile kuenda mu ku litombola na sipilitu,* nkuma mu manusula kuenda mu ku litombola na ntsitu* ni? 4 Vuno kayando kose ka mua muene kaile mu ngoco ni? Njili na vusunga nguange ka kaile mu ngoco. 5 Nkuma uze uami hanene sipilitu na kulinga vipanga via ngolo hali yenu, ua lingilemo omo lia vipanga vienu via masiko, ni omo lia kutsiliela mu viuma vi mua vuile? 6 Cinapu ngue mu via solokele kuli Avilahama. Ikeye “ua tsilielele muli Yehova,* evi via mu puisile mukua vuviuke.”*
7 Cili vene, mu tantekeya nguenu vaze vali na lutsilielo, vakevo vanapu vana va Avilahama. 8 Mu kulinga visoneka via muene vualumo nguavio, Njambi ue ku sanene vantu vakua vifuti kupua vakua vuviuke omo lia lutsilielo, viambuluile vualumo muzimbu ua cili kuli Avilahama nguavio: “Kuhitila muli yove, miyati yose ika vezika.” 9 Ngeci mukemuo, vaze vali na lutsilielo vali naku va vezikisila hamo na Avilahama, uze uakele na lutsilielo.
10 Vose vaze va na kulahela mu vipanga via masiko, vanapu va kusinga. Muomu vasoneka nguavo: “Uose ka tualelaho kulinga viuma viose viva na soneka mu lizengununo lia Masiko, apue ua kusinga.” 11 Cikuavo naua, kuli vukaleho vua muesa nguavuo, naumo uahi ive kupuisa mukua vuviuke ku meso a Njambi omo lia masiko. Muomu “mukua vuviuke ayoya omo lia lutsilielo luendi.” 12 Masiko ka emanene ha lutsilielo. Vunoni “uose alinga evi viuma, aka yoya.” 13 Kilistu ua tu landele, muku tu patula ku cisingo ca Masiko omo uapuile cisingo mu cihela cetu, muomu vasoneka nguavo: “Uose uze iva sukika ha citi napu ua kusinga.” 14 Evi via solokele linga civezikiso ca Avilahama ci hete na kuli vakua vifuti, kuhitila muli Kilistu Yesu, linga tu tambule sipilitu iva kulahesele, kuhitila mu lutsilielo luetu.
15 Vamuanetu, nji pangesa cimueso ci vevuisisa vantu: Nga litavasiano va na litumbika, cipue vene nga muntu ikeye na litumbika, uahi ahasa ku litundisako ni ku vuezelelako vimo. 16 Kaha vikulaheso vavi kulahesele Avilahama na mbuto yendi. Visoneka ka via handekele nguavio, “naku vimbuto viove,” ngue viavingi, houe. Vunoni nguavio, “naku mbuto yove,” ku lumbunuka muntu umolika, ikeye Kilistu. 17 Kaha nji handeka naua nguange: Aze Masiko ezile mu nima ya miaka 430, ka atundisileko litavasiano lia livangele kulinga Njambi, mu ku tundisako cikulaheso, houe. 18 Muomu nga vusuana vuimana ha masiko, kaha ka vuimana naua ha cikulaheso. Vunoni Njambi ku ngozi yendi, ua vu hanene kuli Avilahama kuhitila mu cikulaheso.
19 Amba Masiko a vika honi? Va atumbikile linga asolole vivulumuna, noho he ku hetelele mbuto uze iva kulahesele eci cikulaheso. Cikuavo naua, tungelo vakevo va hetesele aa Masiko kuhitila mu livoko lia lihako. 20 Nga muntu umolika alinga litavasiano, ka kue kukala lihako, vunoni Njambi uapua umolika. 21 Vuno Masiko ekuliluisa na vikulaheso via Njambi ni? Houe, na kumo kuahi! Muomu nga vahele masiko aze ahasa kuneha muono, nga va tu tumbula nguavo tu vakua vuviuke omo lia masiko. 22 Vunoni Visoneka via haka viuma viose ku ndzili ya vupi, linga cikulaheso cemana ha kutsiliela muli Yesu Kilistu, va ci hane kuli vaze va muesa lutsilielo.
23 Tele lutsilielo kanda luhete, va tu niungilile muintsi lia masiko, ku ndzili yao vene, oku tu lavelela lutsilielo luakele ha hiehi na kusoloka. 24 Ngeci mukemuo, Masiko apuile ndezi* yetu muku tu tuala kuli Kilistu, linga va hase ku tu tumbula nguavo vakua vuviuke omo lia lutsilielo. 25 Vunoni mu kulinga lutsilielo luna hete, katuesi naua muintsi lia ndezi.*
26 Cili vene, mu vose munapu vana va Njambi omo lia lutsilielo luenu muli Kilistu Yesu. 27 Muomu enu vose vava mbatizile muli Kilistu mu na zala Kilistu. 28 Muomu kakuesi kutepesa nguavo ou kaYundeya ou kaNgelengu, ni ou ndungo ou ua kupatuka, ni nguavo ou yala ou mpuevo, muomu mu vose mu vamolika mu kulikata na Kilistu Yesu. 29 Cikuavo naua, nga mua kundama kuli Kilistu, munapu mpundu mbuto* ya Avilahama, muapua vasuana kuliya na cikulaheso.