Kuli Vakua Loma

7 Enu vamuanetu, (njili na kuhandeka vaze va tantekeya masiko), vuno kamu tantekeya nguenu Masiko akala na ndzili ha muntu ntsimbu acili na muono ni? 2 Ca ku muenako, mpuevo ua kusomboka na kutiua mu lisiko kuli yaliendi, ntsimbu yaliendi aci yoya. Vunoni nga yaliendi atsa, kaha na patuka ku masiko a yaliendi. 3 Ngeci mukemuo, nga a somboka ku yala ueka ntsimbu yaliendi aci yoya, vamu tumbula nguavo mukua vukoyi. Vunoni nga yaliendi natsi, kaha na patuka ku masiko a yaliendi. Ngeci ka vamu tumbula naua nguavo, mukua vukoyi nga a somboka ku yala ueka.

4 Ngeci mukemuo vamuanetu, nenu vami tsihile ku Masiko linga mupue va ueka, uze iva sanguile ku vatsi, linga tuimine Njambi vusuka. 5 Muomu mu tuakele na kuyoya kuliya na ntsitu, masungu a vupi aze asangumukile omo lia Masiko, akele na kupanga mu mivila* yetu linga tuime vusuka vuze vu tuala ku kutsa. 6 Vunoni hano honi, va natu patula ku Masiko, muomu tunatsi ku vize via tu kutile, linga tupue vandungo mu cifua ca ciha kuhitila mu sipilitu, kati naua mu cifua ca laza, ni nguetu kuhitila mu masiko a kusoneka.

7 Tu handeke honi vati? Vuno Masiko anapu vupi ni? Houe, kati mukemuo! Mua vusunga, nga Masiko kuahi nga kanja tantekeyele vupi. Ca ku muenako, nga Masiko ka handekele nguao: “Kati uliveyele viuma viambala,” hano nga kanja tantekeyele nguange ku liveyela viambala capua vupi. 8 Vunoni vupi vua pangesele masiko mu kupua vukovelelo vua kukatula masungu eka na eka muli yange, muomu ca kuhona masiko vupi vu natsi. 9 Mua vusunga, tele Masiko ahiko njakele na kuyoya. Vunoni omo ezile masiko, vupi vua putukile kuyoya naua, vunoni yange nja tsile. 10 Kaha nja nongonuene nguange, masiko aze apandele kunji tuala ku muono akele na kunji tuala ku kutsa. 11 Vunoni vupi vua pangesele masiko mu kupua vukovelelo vua kunji kokueya, kaha kuhitila mu masiko aco vua nji tsihile. 12 Ngeci mukemuo, Masiko apua a kulela na vize vilimo viapua via kulela, via vuoloke kaha via cili.

13 Vuno viuma via cili vikevio vi nanji kokela kutsa ni? Houe, kati mukemuo! Vunoni vupi vukevuo vua nji kokela kutsa. Kuhitila mu viuma via cili, vupi vua nji kokelele kutsa, linga vusolole ha toma vika viapua vupi, kaha masiko asolola ha toma ngecize, vupi vuapua cuma ca kuvihia cikuma ku vantu. 14 Muomu tua tantekeya nguetu, Masiko apua aku sipilitu, vunoni ange njapua muntu ua muvila ua ntsitu ua kulandesa ku vundungo vua vupi. 15 Kanje kuivuisisa vinje kulinga.* Muomu vize vinja zange kati vikevio vinje kulinga, vunoni nje kulinga vize vinja zinda. 16 Vunoni nga nje kulinga vize kanja zangele, kaha njatava nguange Masiko apua acili. 17 Vunoni hano, kati yange naua njili naku vi linga, vunoni vupi vuli muli yange vukevuo vuli naku vi linga. 18 Muomu nja tantekeya nguange, muli yange ni nguetu mu ntsitu yange, na cimo cuma cacili vene cilimo cahi. Muomu njili na cizango ca kulinga viuma via cili, vunoni kanjesi na vuhasi vua ku vi linga. 19 Muomu kanjesi na kulinga viuma via cili vize vinji na zange, vunoni viuma via vipi vintsa kanja zangele vikevio vinjili na kulinga. 20 Kaha nga njili na kulinga viuma vintsa kanja zangele, omo ni kati yange naua njili naku vi linga, vunoni vupi vuze vuli muli yange.

21 Nja nongonona eli lisiko muli yange: omo njitonda kulinga via cili, kaha via vipi vili laza muli ange. 22 Mua vusunga, mu mutima* uange nja lema cikuma masiko a Njambi. 23 Vunoni njili na kumona lisiko lieka mu muvila uange, lize lili na kuliluisa na lisiko lia mu visinganieka viange, kaha lili na kunji tuala ku vundungo vua vupi vuli mu muvila* uange. 24 Yange muntu ua kuvindama vene! Iya anjovola ku muvila ou uli na kunji tuala ku kutsa? 25 Nji santsela kuli Njambi, kuhitila muli Yesu Kilistu Muangana uetu! Mukemuo vene, mu visinganieka viange nji ndungo ya Masiko a Njambi, vunoni ku ntsitu yange nji ndungo ya lisiko lia vupi.