Kuhitila Muli Mako
15 Ku cimene, vakuluntu va vasasendote, vakuluntu na vakua kusoneka, eyo, Mpunga yose vene, ya likunguluile linga va mone vati va hasa kulinga. Ngeci va kutile Yesu, vamu tualele naku mu hana kuli Pilato. 2 Ngeci Pilato ua muihuile nguendi: “Yove Muangana ua vaYundeya ni?” Yesu uamu kumbuluile nguendi: “Yove vavenya una handekamo.” 3 Vunoni vakuluntu va vasasendote vakele naku mu vangeya viuma viavingi. 4 Ngeci Pilato uehuile naua Yesu nguendi: “Na vimo viu kumbululako viahi? Halakana kulana ca viuma vi vali naku kuvangeya.” 5 Vunoni Yesu ka kumbuluileko, ngeci Pilato ua likomokelele.
6 Paskua ku Paskua, Pilato uakele na kuecela cindzinda uose-ouo iva tondele vantu. 7 Ha ntsimbu ize, kuakele umo yala lizina liendi Mbalambasa. Ikeye na vakuavo vakele mu kamenga muomu va tengulukilile nguvulu kaha va tsihile vantu. 8 Mbunga yezile kaha ya putukile kupinga Pilato ava lingile viuma viakele naku va lingila-lingila. 9 Ngeci Pilato ua vehuile nguendi: “Mu tonda njecele Muangana ua vaYundeya ni?” 10 Muomu Pilato ua tantekeyele nguendi, vakuluntu va vasasendote vamu hanene Yesu omo lia cipululu. 11 Vunoni vakuluntu va vasasendote va songangeyele* mbunga linga va pinge Pilato ava patuile Mbalambasa. 12 Pilato ua vehuile naua nguendi: “Amba vati nji linga ou imu sana nguenu Muangana ua vaYundeya?” 13 Kaha va putukile ku tambakana naua nguavo: “Mu sukike ha citi!” 14 Vunoni Pilato ua vehuile nguendi: “Omo lia vika? Vupi vuka na lingi?” Vunoni va tualeleho ku tambakana nguavo: “Mu sukike ha citi!” 15 Ngeci Pilato mu kutonda kuya mbunga ku mutima, uecelele Mbalambasa, ua tumine va vete Yesu makote, mu nima yaco uava haneneye linga vaka mu sukike ha citi.
16 Masualale va tualele Yesu mu citali ca ndzivo ya nguvulu, kaha va kunguluile civunga cose ca masualale. 17 Vamu zikile ntanga ya ku venguluka, kaha va tungile cilongo ca vimbimbo naku mu zikaco. 18 Va putukile kumu tsopa nguavo: “Tua mi meneka, Muangana ua vaYundeya!” 19 Cikuavo naua, vakele naku mu veta lihongo mu mutue, naku mu zekuila mate oku va kotama naku mu tsikamena. 20 Mu nima ya kutsopa cose cize, vamu suluile ntanga ya ku venguluka, naku mu zika naua vizalo viendi via helu. Kaha vamu tualele linga vaka mu sukike ha citi. 21 Mu njila, va liuanene naumo yala ua ku Silene uakele na kutunda ku mehia, lizina liendi Simone, ikeye ise ya Alesandele na Lufu, ngeci vamu kakateyele kuambata citi ca kayando* ca Yesu.
22 Ngeci va tualele Yesu ku cihela ci va luka nguavo Ngolongota, ca lumbunuka, “Cihela ca Cikola.” 23 Kaha kuze, va setekele kumu hana vinyu via ku pandakana na mira, vimo vihemba via kupendesa,* vunoni ikeye ua vi vianene. 24 Kaha vamu sukikile ha citi, naku litahela vizalo viendi via helu, linga va tantekeye vika ue kuambatele muntu ku muntu. 25 Mu vamu sukikile ha citi, tele 9 ola.* 26 Kaha helu lia mutue uendi, va sonekeleho mulonga uva mu tuikile, nguavo: “Muangana ua vaYundeya.” 27 Vamu sukikile hamo na vamo mihuza vavali, umo ku cilio mukuavo ku cimosue. 28—— 29 Kaha vantu vakele na kuhita, vakele naku mu tsopa oku va pika ku mitue, naku handeka nguavo: “Ha! Ove uambele nguove upuzula tembele naku itunga mu matangua atatu, 30 suluka oho ha citi uliovole.” 31 Vakuluntu va vasasendote na vakua kusoneka, navo va putukile kumu tsopa nguavo: “Vakuavo ua hasele kuovola, vunoni na hono ku liovola! 32 Kati ikeye Kilistu, Muangana ua Isaleli? A suluke ha citi linga tu mu mone kaha tu mu tsiliela.” Ambe vene vaze vezi vava sukikile hamo nendi, va putukile kumu tsopa.
33 Kaha mu yapuile 12 ola,* mu cifuti cose mua uililile milima ya kama noho 15 ola.* 34 Kaha ku vi 15 ola, Yesu ua tambakanene na lizi lia kama nguendi: “Eli, Eli, lama sambakitani?” Kulumbunuka: “Njambi yange, Njambi yange, vika una nji sezela?” 35 Ngeci vamo vemanene mu hiehi mu vavuile ngoco, va putukile kuhandeka nguavo: “Halakanenu! Ali na kusana Eliya.” 36 Ngeci umo uavo ua tuntile naku ka mbuitika cisampo mu vinyu via ku kalumuka, kaha ua ci hakele ku lihongo naku mu hana linga anue, nguendi: “Muecelenu tu mone nga Eliya eza kua kumu tundisaho.” 37 Vunoni Yesu ua tambakanene na lizi lia kama, mu nima yaco, ua tsile.* 38 Kaha ntanga* ya mu tembele ya tavukile hakati, tunde kuilu na kuintsi. 39 Kapitau ua masualale uakele mu hiehi, mua muene kutsa ca Yesu na viose via solokele, ua handekele nguendi: “Cili vene, ou yala uapuile Muana Njambi.”
40 Kaha kuakele vampuevo vakele na kutalela ha lahako, hakati kavo ha kele Maliya Mandalena na Maliya naye ya Tiango ua mundende na Yosese kaha na Salome. 41 Ava vampuevo vakele na kukava Yesu naku mu pangela muakele ku Ngalileya. Cikuavo naua, kuakele vampuevo vakuavo vavengi vaze vezile nendi ku Yelusalema.
42 Mu kulinga tele kuya na kutoka kaha liapuile litangua lia kuviukisa viuma, muomu Sapalalo tele ili mu hiehi, 43 kuezile Yosefe ua ku Alimateya, mukua Mpunga kaha vantu vamu singimikile mua kama, nendi uakele naku lavelela Vuangana vua Njambi. Yala uaco ua simpile mu kuya kuli Pilato naku ka pinga muvila ua Yesu. 44 Vunoni Pilato ua tondele ku tantekeya nga Yesu natsi laza, ngeci ua sanene kapitau ua masualale amuihule nga Yesu natsi laza. 45 Mua uanene vukaleho kuli kapitau ua masualale, ua tavesele Yosefe ambate muvila ua Yesu. 46 Ngeci Yosefe ua landele ntanga ya linyu ya cili, mu nima ya kusuluisa uze muvila, ua uvungilile ha ntanga ya cili ya linyu naku uhaka mu cihilo ci va tsokuele mu livue. Mu nima yaco, ua kundikile livue ku mbelo ya cihilo. 47 Vunoni Maliya Mandalena na Maliya naye ya Yosese, va tualeleho kutala kuze ku va mu hakele.