Kuhitila Muli Yoano

19 Ngeci Pilato ua tualele Yesu na kutuma vamu vete makote. 2 Kaha masualale va tungile cilongo ca vimbimbo naku mu zikaco ku mutue. Kaha vamu zikile naua ntanga ya ku venguluka. 3 Va suenene kuli ikeye na kuhandeka nguavo: “Tua kumeneka, Muangana ua vaYundeya!” Kaha vakele naua naku mu hana vimbanda ku meso. 4 Pilato ua tuhukile naua kaha ua lekele mbunga nguendi: “Halakanenu! Nji mi tuhuilaye, linga mu tantekeye nguenu kanja mu uanene naumo mulonga uahi.” 5 Ngeci Yesu ua tuhukile, oku na zala cilongo ca vimbimbo na ntanga ya ku venguluka. Kaha Pilato uava lekele nguendi: “Talenu! Muntu ou!” 6 Vunoni vakuluntu va vasasendote na tupasu* mu va muene Yesu, va tambakanene nguavo: “Mu sukike ha citi! Mu sukike ha citi!” Vunoni Pilato uava lekele nguendi: “Mu tualenu yenu vavenya muka mu sukike, muomu kanja mu uanene na mulonga.” 7 VaYundeya vamu kumbuluile nguavo: “Tuakala na lisiko, kaha kuliya na lisiko napande vene kutsa, muomu na lipuisa ikeye vavenya Muana Njambi.”

8 Pilato mua vuile vi vakele na kuhandeka, uavuile liova lia kama, 9 kaha ua kovelele naua mu ndzivo ya nguvulu na kuihula Yesu nguendi: “Kuiko utunda?” Vunoni Yesu ka mu kumbuluile. 10 Ngeci Pilato ua muihuile nguendi: “Uove kuhandeka nange ni? Ka utantekeya nguove njili na mpoko ya ku kuecela kaha na mpoko ya ku kutsiha ni?”* 11 Yesu uamu kumbuluile nguendi: “Ka uhasa kukala na imo mpoko hali yange kuvanga va ku haneyo ku tundilila muilu. Ngeci mukemuo, ou muntu nanji hana mu mavoko ove, ali na vupi vua kama.”

12 Ngeci Pilato ua tondele njila ya kumu patuilamo, vunoni vaYundeya va tambakanene nguavo: “Nga upatula ou yala, kati u kavusamba ka Sezale. Uose alipuisa ikeye vavenya muangana, ali na kuluisa Sezale.” 13 Pilato mua vuile aa mezi, ua tuhuisile Yesu ha mbandza, kaha ua tumamene ha citumamo ca vusompelo ha cihela ci va sanene nguavo, Cihela ca Kuala Mavue, vunoni mu ciHevelu, Ngambata. 14 Vuno liapuile litangua lia ku Viukisa Paskua, tele ku vi 12 ola.* Pilato ua lekele vaYundeya nguendi: “Talenu! Muangana uenu!” 15 Vunoni va tambakanene nguavo: “Mu tsihenu! Mu tsihenu! Mu sukikenu ha citi!” Pilato ua vehuile nguendi: “Mu tonda nguenu nji tsihe muangana uenu?” Vakuluntu va vasasendote va kumbuluile nguavo: “Ka tuesi na muangana ueka, kuvanga Sezale lika.” 16 Omo liaco, Pilato uava heleye linga vaka mu sukike ha citi.

Ngeci vambatele Yesu na kuya nendi. 17 Ua liambatelele vavenya citi ca kayando,* kaha uaile ku cihela ci ve kusana nguavo Cihela ca Cikola, mu ciHevelu, Ngolongota. 18 Kukekuo ku vaka mu sukikilile ha citi, hamolika na vamala vavali, umo ku cilio, mukuavo ku cimosue, Yesu hakati. 19 Pilato ua sonekele naua mezi ava hakele ha citi* ci vamu sukikile. Ua sonekeleho nguendi: “Yesu Mukua Nazaleta, Muangana ua vaYundeya.” 20 VaYundeya vavengi va tandele mezi aco, muomu cihela ci va sukikile Yesu ca kele mu hiehi na mbonge, kaha va asonekele mu ciHevelu, mu ciLatini namu ciNgelengu. 21 Vunoni vakuluntu va vasasendote va vaYundeya, va lekele Pilato nguavo: “Kati usoneke nguove, ‘Muangana ua vaYundeya,’ vunoni sonekaho nguove ua litumbuluile nguendi, ‘Yange Muangana ua vaYundeya.’” 22 Pilato ua kumbuluile nguendi: “Evi vi njina soneka, nja soneka vene.”

23 Mu nima ya kusukika Yesu ha citi, masualale vambatele vuzalo vuendi vua helu naku vu teta ha uana, lisualale ku lisualale, uambatele umo mutamba kaha vambatele naua cikovelo cendi ca mukati. Vunoni cikovelo caco, ka cakele na mutongo tunde kuilu na kuintsi. 24 Ngeci va lihandekesele hakati kavo nguavo: “Kati tuci tavule, vunoni tu litahelenuco linga tu mone nga cipua ceya.” Evi via solokele linga vi lipuisemo visoneka via handeka nguavio: “Va litepelele vuzalo vuange hakati kavo, naku litahela cikovelo cange.” Mukemuo vene mu va lingile masualale.

25 Ku hiehi na citi ca kayando ca Yesu, kuemanene naye, na ndumbu ya naye. Na Maliya mpuevo ya Kelopa, kaha na Maliya Mandalena. 26 Yesu mua muene naye, na ndongesi ya lemene vali ha hiehi, ua lekele naye nguendi: “Mpuevo, Tala! Munove ou!” 27 Mu nima yaco ua lekele uze ndongesi nguendi: “Tala! Noko ou!” Kutunda haze vene, uze ndongesi ua tualele Maliya ku ndzivo yendi.

28 Mu nima yevi, Yesu mua tantekeyele nguendi viuma viose vinapumo, linga vi lipuisemo Visoneka, ua handekele nguendi: “Njili na mpuila.” 29 Kuze, va tumbikileko imo njava ya kusula na vinyu via ku kalumuka. Ngeci va mbuitikilemo cisampo, naku ci haka ku cisati ca hisopu* kaha va mu hakeleco ku kanua. 30 Yesu mua makelele vize vinyu via ku kalumuka, ua handekele nguendi: “Vinapumo!” ua uisile mutue uendi kaha ua tsile.*

31 Mu kulinga liapuile litangua lia ku liviukisila, linga mivila kati isale ha viti via kayando na lia Sapalalo (muomu ize Sapalalo yapuile ya kama), ngeci vaYundeya va pingile Pilato atume vaka pokole mikono ya vaze vamala, na kutundisa mivila yavo ha viti. 32 Ngeci masualale vezile na kupokola mikono ya uze yala ua kulivanga, na mikono ya uze mukuavo iva sukikile ha citi ha hiehi nendi. 33 Vunoni mu va hetele kuli Yesu, va uanene natsi laza, ngeci ka va mu pokuele mikono. 34 Vunoni umo lisualale uamu tuvile likunga ku luhati, kaha haze vene kua tundile maninga na mema. 35 Kaha uze ua muene evi viuma, ali na kuhana vukaleho, vukaleho vuendi vua vusunga. Muntu uaco atantekeya nguendi viali na kuhandeka via vusunga, linga nenu mu tsiliele. 36 Mua vusunga, evi via solokele linga vi lipuisemo Visoneka via handeka nguavio: “Ka vaka mu pokola citsiha na cimo cahi.” 37 Kaha Visoneka vikuavo, via handeka nguavio: “Vaka tala kuli uze iva tuvile.”

38 Mu nima yevi viuma, Yosefe uaku Alimateya, uze uapuile ndongesi ya Yesu vunoni mu vusueke, muomu uakele na liova lia vaYundeya, uaka pingile kuli Pilato linga amu tavese kuambata muvila ua Yesu, ngeci Pilato uamu tavesele. Kaha uezile na kuambata muvila uaco. 39 Nikondemo uze uezile kuli Yesu ha katete ku vutsiki, nendi uezile, ua nehele mira* ya ku pandakana na aloesi,* vulemu vuaco vua hetele ku 33 kilu. 40 Ngeci vambatele muvila ua Yesu naku uvungila ha vintanga via linyu hamolika na vihemba via vueko vua cili, kuliya na cifua ci vakele naku tsindilamo vaYundeya. 41 Ku cihela ci vamu sukikilile,* kuakele cimo citungu, kaha mu citungu caco muakele cimo cihilo ca ciha, tele kanda vatsindemo muntu. 42 Mu kulinga liapuile litangua lia ku Liviukisila lia vaYundeya, kaha cihilo ca kele ha hiehi, ngeci va tsindilemo Yesu.