Ua Kulivanga Kuli Vakua Kolintu

2 Ngeci mukemuo vamuanetu, munja ku miambuluilile lihungu lia kulela lia Njambi, kanja pangesele mezi aku komouesa ni nji limuese ngue nji mukua mana. 2 Muomu kanja tondele ku tantekeya cuma na cimo cahi kutuala hali yenu, kuvanga lika via Yesu Kilistu, uze uva tsihilile ha citi. 3 Mu njezile kuli yenu, nja puile ua kuzeya, njakele na liova kaha njakele na kuzaza cikuma. 4 Vunoni handekesi yange na kuambulula cange, ka viapuile mezi aku kokueya na mana, vunoni viapuile vukaleho vua sipilitu na ngolo. 5 Linga lutsilielo luenu kati luhitukile ha mana a vantu, vunoni luhitukile mu ngolo ya Njambi.

6 Kaha tuli na kuhandeka via mana hakati ka vantu vaze va na kolo, vunoni kati mana a miaka ino,* cipue mana a vamiangana va miaka ino vaze va kanonga. 7 Vunoni tuli na kuhandeka via mana a Njambi aze ali mu lihungu lia kulela, eyo mana a kusuekesa alivangele kuhangula Njambi, ntsimbu miaka ino kanda ikaleko linga atu nehele vumpahu. 8 Aa akeo mana aze ka va tantekeyele vamiangana va miaka ino, muomu nga va a tantekeyele nga ka va tsihile Muangana ua vumpahu. 9 Vunoni ngue mu vasoneka nguavo: “Liso kalia muene, na lituitui kalia vuile, ambe vene mutima ua muntu kaua hasele kuivuisisa viuma via Njambi, vize via na viukisila vaze vamu lema.” 10 Vunoni Njambi na tu soluelavio kuhitila mu sipilitu yendi, muomu sipilitu ye ku tondesesa viuma viose, ambe vene viuma via kulova via Njambi.

11 Muomu iya ahasa ku tantekeya vili mu mutima ua mukuavo? Muntu atantekeya lika viuma vili mu mutima uendi. Na vuno vene, naumo uahi atantekeya visinganieka via Njambi, kuvanga lika kuhitila mu sipilitu ya Njambi. 12 Etu katua tambuile sipilitu ya mavu, vunoni tua tambula sipilitu ya kutunda kuli Njambi, linga tu tantekeye viuma via na tuhana Njambi ku ngozi yendi. 13 Evi viuma, netu tuli naku vihandeka kati na mezi a vilongesa via mana a vantu, vunoni tuli na kupangesa mezi a vilongesa via sipilitu, nga tu lumbununa viuma via ku sipilitu tu pangesa mezi aku sipilitu.

14 Vunoni muntu uaku ntsitu kahasa kutambula* viuma via ku sipilitu ya Njambi, muomu kuli ikeye vinapu vuheve, kaha kahasa ku vi tantekeya, muomu ve ku vihilula kuliya na sipilitu. 15 Vunoni muntu ue kutavesa sipilitu santu ya Njambi imu tuamenene, ahilula viuma viose, kaha naumo uahi amu hisa. 16 Muomu iya na tantekeya visinganieka via Yehova* linga amu longese? Vunoni etu tuli na visinganieka via Kilistu.