Uamu Civali ua Petulu
3 Vakua cilemo cange, uno unapu mukanda uamu civali unjili naku mi sonekela, linga nji nyangumune vuhasi vuenu vua ku singanieka mua cili, kuhitila mu vivuluiso, ngue munja lingile mu mukanda uange ua kulivanga, 2 linga mu vuluke mezi ava handekele laza* vapolofeto va kulela, na masiko a Muangana na Muovole kuhitila mu vapostolo vendi. 3 Ha katete, tantekeyenu nguenu ku matangua aku manusuila, ku keza vakua sembulule vaze vaka linga sembulule muku kavangeya masungu avo, 4 nguavo: “Kusoloka cendi civa kulahesele cili kulihi? Muomu tunde ha vatsilile* vakukuluila vetu, viuma viose vili naku tualelaho ngue muze vene mu viafuile tunde ha kutanga ca mavu.”
5 Muomu vali naku sembuluila ku cizango ovu vusunga vua muesa nguavo tunde ku ntsenkulu, kuakele melu, kaha na mavu aze atuntukile mu mema na kukala hakati ka mema kuhitila mu lizi lia Njambi. 6 Kaha kuhitila mu viuma evi, mavu a ntsimbu ize anongele, mu asulile na mema. 7 Vunoni, kuhitila mu lizi eli vene naua, melu na mavu aliko lelo lino, va na atulikila tuhia kaha vali naku aniungilila na ha litangua lia kusompesa, na lia kunongesa vakua kusahula Njambi.
8 Vunoni enu vakua cilemo cange, kati mu suve eci: litangua limo kuli Yehova,* linapu ngue miaka 1.000, kaha miaka 1.000 ngue litangua limo. 9 Yehova kesi na kusimbula kutuala ha kupuisamo vikulaheso viendi, ngue mu veku singanieka vavengi nguavo ali na kusimbula. Vunoni ali naku mi muesa ntsintsa muomu ka yongola naumo uahi aka nonge, vunoni atonda nguendi vose valuluke. 10 Vunoni litangua lia Yehova, likeza ngue muizi. Ha litangua liaco, melu aka hita na musindo ua kama, omo lia kuyukuma cikuma viuma viliko vika sosonoka, kaha mavu na vipanga vilimo vika zomboloka.
11 Mu kulinga evi viuma viose vika sosonoka mu cifua eci, lihilulenu linga mu mone nga mua pande kupua vantu va cifua cika, kutuala ha vilinga via kulela, na via kupangela Njambi, 12 omo muli naku vandamena na kuvuluka kusoloka ca litangua lia Yehova, omo melu aka nonga na milengi, kaha viuma vilimo vika sosonoka omo lia kuyukuma ca kama! 13 Vunoni kuli melu a aha na mavu a aha atua lavelela kuliya na cikulaheso cendi, mukemuo muka kala vuviuke.
14 Ngeci mukemuo vakua cilemo cange, mu kulinga muli naku vandamena evi viuma, lingenu cose, linga kati va kumi uane na cimo citoma, cipue kapenga, vunoni mu ciyulo. 15 Cikuavo naua, monenu ntsintsa ya Muangana uetu kupua vuovoke, ngue mua mi sonekelele naua muanetu itua lema Paulu, kuliya na mana ava mu hanene, 16 ua handekele evi viuma, ngue mue kulinga mu mikanda yendi yose. Vutuhu ngoco, vimo viuma vilimo, via vikalu ku vivuisisa kaha vaze vali ku ndzimba na vakua vuzeye, vali naku vi hengesa ngue mu ve kulinga na visoneka viose, kaha va likokela kunonga cavo vavenya.
17 Ngeci mukemuo vakua cilemo cange, mu kulinga mua tantekeya vualumo evi viuma, zangamenu, linga vakua kupokola masiko kati va mi hungumune na visevuka viavo, naku mi tangula ku kukolesa cenu. 18 Vunoni tualelenuho kukola mu ngozi ya kama, namu mangana aku tantekeya Muangana uetu na Muovole uetu Yesu Kilistu. Kuli ikeye kukale vumpahu mu ntsimbu ino, naku miaka yose ya yaye. Ame.