Uamu Civali ua Petulu
1 Yange Simone Petulu, ngamba na kapostolo ua Yesu Kilistu, njili naku sonekela vaze va na uana lutsilielo lua seho ya kama omo lia vuoloke vua Njambi yetu, na muovole uetu Yesu Kilistu, nguange:
2 Ngozi ya kama na ciyulo vi li vuezelele muli yenu kuhitila mu mangana a vusunga, kutuala hali Njambi na Muangana uetu Yesu. 3 Muomu ngolo ya Njambi ina tuhana viose vie ku tu kuasa kuyoya naku mu pangela kuhitila mu mangana a vusunga aku tantekeya Uze uatu sanene na vumpahu vuendi na vucili vuendi. 4 Kuhitila muli evi viuma, natu kulahesa viuma via seho kaha via kama cikuma linga omo lievi viuma, muka kale na mivila ya sipilitu ngue Njambi muomu mu na tina ku viuma via kuvihia via ha mavu, vize vie kuiza omo lia masungu a api.
5 Ngeci mukemuo, lingenu cose mu kuvueza vucili ku lutsilielo luenu, ku vucili vuezenuko mangana, 6 ku mangana vuezenuko kukuata mutima,* ku kukuata mutima vuezenuko kukolesa, ku kukolesa vuezenuko kupangela Njambi, 7 ku kupangela Njambi vuezenuko cilemo ca vana vaumo, ku cilemo ca vana vaumo kulema vantu vose. 8 Muomu nga evi viuma vikala muli yenu na kusumpuoka, vi kami lingisa kati mupue vilenda, vunoni mukeme vusuka omo mu pangesa mangana a vusunga aku tantekeya Muangana uetu Yesu Kilistu.
9 Muomu uose kesi nevi viuma, napu kapuputa na fuika meso endi ku ceke,* kaha na suvu nguendi va mu lelesele ku vupi vuendi vua laza. 10 Ngeci mukemuo vamuanetu, tualelenuho ku litakamesa, linga mu kakatele ku kumi sana ci vami hanguilile, muomu nga mu tualelaho kulinga evi viuma kamu ka suntsuka. 11 Mua vusunga, nga mu lingamo mu ka tambula civezikiso ca kama ca kuka kovela mu Vuangana vua yaye vua Muangana uetu na Muovole Yesu Kilistu.
12 Ngeci mukemuo, nji tonda kumi vuluisa evi viuma ntsimbu yose, vutuhu mu vitantekeya kaha mu na kanyama mu vusunga vuze vuli muli yenu. 13 Vunoni nja mono nguange, cacili nji mi vuluise evi viuma ntsimbu nji cili muno mu tavenakulu.* 14 Muomu nja tantekeya nguange, tavenakulu yange vuovuno va itundisa ngue mua nji lekele hatoma Muangana uetu Yesu Kilistu. 15 Nji tualelaho kupanga na ndzili yose, linga nga nji nayi, mu ka hase kuvuluka* evi viuma.
16 Ka tua kavele visimo via ngoco, ni mizimbu ya makuli, mu tua mi lekele via ngolo na kusoloka ca Muangana uetu Yesu Kilistu; vunoni tuapuile vakaleho kaha tua limuenenene mpundu vukama vuendi. 17 Muomu ua tambuile kasingimiko na vumpahu kuli Njambi Tata, vavenya vumpahu vua kama, omo uamu lekele nguendi: “Ou ikeye Muanange, inja lema, ueku njivuisa ndzolela.” 18 Eyo, tuavuile aa mezi atundile muilu, mu tuakele nendi ha muncinda ua kulela.
19 Ngeci mukemuo, tuli na vusunga nguetu vupolofeto vuose vu ka lipuisamo kaha muli na kulinga vuino mu kutuala mana ku vupolofeto vuaco, vuze vupua ngue ndeya ituila ceke mu milima, ku lumbunuka, mu mitima yenu (noho ha lika cela litangua na kutuhuka ca ntangantanga* ya cimene.) 20 Muomu mu tantekeya nguenu, kakuesi vupolofeto vua mu Visoneka vua tunda ku visinganieka via vantu. 21 Muomu vupolofeto na vumo vuahi vuezile ku cizango ca vantu, vunoni vantu va handekele via Njambi ngue omo sipilitu santu ya va tuamenene.