Kuli Vakua Loma
14 Tambulenu uze na zeye mu lutsilielo, vunoni kati mu sompese muntu ali na visinganieka via kuliseza na vienu. 2 Muntu mukua lutsilielo ue kulia viuma viose, vunoni ua kuzeya mu lutsilielo, ue kulia lika visoka.* 3 Uze ue kulia viakulia viose, kati a sembulule uze ke kulia viose. Cikuavo naua, uze ke kulia viakulia viose, kati ahise uze ue kulia viose, muomu Njambi na mutava. 4 Yove iyandzo uhise ngamba yambala? Ambe nga emane ni aue, ovio kuli sukuluendi. Mua vusunga, aka hasa kuimana, muomu Yehova* ahasa kumu kuasa kuimana.
5 Umo muntu amona limo litangua nguendi, lia kala na seho ku tuvakana likuavo, vunoni mukuavo co, ahasa kumona nguendi matangua ose anafu mumolika. Ngeci mukemuo, muntu ku muntu na pande kukala na vusunga vua viuma via na tsiliela. 6 Uze aniunga litangua, aliniunga omo lia Yehova. Cikuavo naua, ou alia viose, alia omo lia Yehova, muomu a santsela kuli Njambi. Kaha uze kali viose, kali omo lia Yehova, vutuhu ngoco, kasi a santsela Njambi. 7 Naumo uahi ua yoya omo liendi vavenya, kaha naumo uahi atsa omo liendi vavenya. 8 Muomu nga tuyoya, tuyoya omo lia Yehova, kaha nga tutsa, tutsa omo lia Yehova. Ngeci mukemuo, ambe nga tuyoya, cipue kutsa, tuapua va Yehova. 9 Muomu evi vikevio via lingisile Kilistu kutsa na kuyoya naua, linga apue Muangana ua vatsi, na Muangana ua vaze vali na muono.
10 Vunoni, vika uli na kuhisila muanoko? Ni vika uli naku popoluela muanoko? Muomu tuvose tu kemana ku citumamo ca ku sompesela ca Njambi. 11 Muomu vasoneka nguavo: “Yehova nguendi, ‘nji lisinga ha kuyoya cange’ nguange, ‘mavuli ose akanji tsikamena, na malimi ose aka litavela ha toma nguavo yange Njambi.”’ 12 Ngeci mukemuo, tuvose muntu ku muntu aka litavela kuli Njambi.
13 Ngeci mukemuo, kati tu lihise naua umo na mukuavo, vunoni lingenu cose linga kati mu hakele muanoko cisuntsuiso ni cimo cuma cimu uisa. 14 Ange nja tantekeya kaha njili na vusunga vua kusula ngandza muli Muangana Yesu nguange, kakuesi cuma ca ku lizualesa civene, kuvanga nga muntu ivene acimona kupua ca kuzuala, kaha kuli ikeye cinapu ca kuzuala vene. 15 Muomu nga uluvalesa muanoko omo lia viakulia viove, kaha kauesi na kuenda naua mu cilemo. Kati unongese uze ya na tsila Kilistu omo lia viakulia viove. 16 Ngeci mukemuo, kati mu tavese viuma via cili vimuli na kulinga vavi tumbule nguavo via vipi. 17 Muomu Vuangana vua Njambi ka vua hitukilile ha viakulia ni viakunua, vunoni ha vuoloke, ciyulo na ndzolela mu sipilitu santu. 18 Muomu uose apangela Kilistu mu cifua eci, aya Njambi ku mutima kaha vantu va kamu singimika.
19 Ngeci mukemuo, tu kavangeyenu viuma vize vineha ciyulo, na viuma vize vi tu likolesa navio umo na mukuavo. 20 Kati* mu nongese vipanga via Njambi omo lia viakulia. Cili vene, viuma viose viapua via kulela, vunoni cipua ca kuvihia nga muntu alia viakulia vize vi suntsuisa mukuavo. 21 Cacili cikuma kati kulia ntsitu ni kunua vinyu, ambe kulinga cuma cose-oco ci suntsuisa muanoko. 22 Lutsilielo luuli naluo lukale hakati kove lika na Njambi. Ua vezika uze ka lihisa ikeye vavenya omo lia viuma via tsiliela. 23 Vunoni nga muntu atakanya ha vimo viakulia, vutuhu ngoco alia, muntu uaco na lihisa laza, muomu kesi na kulingamo omo lia lutsilielo. Mua vusunga, viose ovio ka via hitukilile ha lutsilielo viapua vupi.