Kuli Vakua Loma
1 Yange Paulu, ngamba ya Kilistu Yesu, uva sana kupua kapostolo naku mu hangula kuambulula muzimbu ua cili ua Njambi, 2 muzimbu uze ua kulahesele vualumo mu Visoneka via kulela kuhitila mu vapolofeto vendi. 3 Muzimbu uaco, uapua kutuala hali Muanendi uze ua tundile ku cikota* ca Ndaviti mua semukile mu kupua muntu. 4 Vunoni Njambi ua pangesele ndzili yendi sipilitu santu, mu kumu sangula ku vatsi kaha tua limuena mpundu nguetu ikeye Muana Njambi, (eyo, ikeye vene Yesu Kilistu Muangana uetu. 5 Kaha kuhitila muli ikeye tua tambuile ngozi ya kama na vupostolo, linga omo lia lutsilielo, vantu va ku vifuti viose vononoke naku singimika lizina liendi. 6 Nenu muli hakati ka vakua vifuti vaco, ava va sanene linga va kupue va Yesu Kilistu). 7 Njili naku sonekela enu vose va alema Njambi muli mu Loma, enu va vasana kupua va kulela:
Ngozi ya kama na ciyulo ca kutunda kuli Njambi Tatetu na Muangana Yesu Kilistu, vikale nenu.
8 Ha katete, kuhitila muli Yesu Kilistu nji santsela kuli Njambi yange omo lienu vose, muomu lutsilielo luenu vali naku luhandeka mu mavu ose. 9 Muomu Njambi uze unje kupangela cipanga ca kulela na mutima uange uose, mu kuambulula muzimbu ua cili ua Muanendi, napu mukaleho uange ngecize, kanje kulikela kumi kundika mu vivundilo viange. 10 Nje ku lambelela nguange, nga cikeco cizango ca Njambi, njize kuli yenu hano vene. 11 Muomu nji tonda mua kama kua kumi mona, linga nja kumi haneko vumo vuana vua sipilitu, linga mu kanyame; 12 ni nguetu, linga tua ku likanyamese umo na mukuavo kuhitila mu lutsilielo luetu, luenu na luange.
13 Vunoni vamuanetu, nji tonda mu tantekeye ngecize, vintsimbu viavingi nja tondele kuiza kuli yenu. Vunoni kuli vimo via nji honouesa na lelo lino. Nja tondele kuiza oko, linga nja ku uaneko vusuka ngue munji na limuenavuo kuli vakua vifuti viose. 14 Njili na makongo ku vaNgelengu, na vaze ka vapuile vaNgelengu,* na kuli vakua mangana na vaze ka vakele na mangana. 15 Ngeci mukemuo, nji tonda mua kama kuiza oko ku Loma, linga nenu nja ku miambuluileko muzimbu ua cili. 16 Ka njivuila ntsoni muzimbu ua cili, muomu mua vusunga, ukeuo ngolo ya Njambi mu kuneha vuovoke ku vakua kutsiliela vose, ha katete vaYundeya kaha na kuli vaNgelengu naua. 17 Muomu kuhitila mu muzimbu ua cili, Njambi ali na kusolola vuovoke vuendi kuli vakua kutsiliela, kaha lutsilielo luavo luli na kukanyama. Ngue muze mu vasoneka nguavo: “Vunoni mukua vuviuke ayoya omo lia lutsilielo luendi.”
18 Muomu vutenu vua Njambi vuli na kusoloka ku tundilila muilu, omo lia kasahuntu kose, na vuhenge vuose vua vantu vali naku tanganesa vusunga mu njila ya kuvihia. 19 Muomu vi vahasa ku tantekeya kutuala hali Njambi vi na soloka ha toma hakati kavo, muomu Njambi na va soluelavio ha toma. 20 Muomu tunde ha kutanga ca mavu, vifua viendi vize vintsa ka tuhasa kumona, ni nguetu, ngolo yendi yaya-ye na vuNjambi vuendi, tu vi muena mpundu ha viuma via kutanga. Ngeci mukemuo, ka vahasa kulihola malambi.* 21 Muomu vutuhu va tantekeya Njambi, vunoni ka vamu hanene vumpahu mu kupua Njambi ni kumu santsela. Vunoni visinganieka viavo viapuile via vungoco, kaha mitima yavo ya kuheva ya lavele. 22 Vutuhu va limuene kupua vakua mana, vunoni valulukile kupua viheve. 23 Kaha valuluile vumpahu vua Njambi uze ke kutsa naku vuhana ku tumponya ve kunonga va cifua ca vantu, na cifua ca tuzila, na ca tusitu va mikono iuana, tusitu ve kulikoka ha mavu.
24 Ngeci mukemuo, Njambi ua vecelele va tualeleho na vilinga viavo via mazilo, kuliya na vizango via mitima yavo, linga va sahuise mivila yavo vavenya. 25 Mu cihela ca kutava vusunga vua Njambi, va tavele makuli kaha va lemesele via kutanga, naku vipangela cipanga ca kulela, mu cihela ca kulemesa Sakatanga uze uapua uaku sangaziala ku miaka yose. Ame. 26 Ngeci Njambi ua vecelele ku masungu avo a ntsoni,* muomu vampuevo va hakati kavo, va na seza cifua ci vava tangelelemo na kulinga mueka muze ka vava tangele. 27 Na vamala navo va na seza cifua cavo ca kulimona ku mivila na vampuevo, na kuputuka kulivuila masungu umo na mukuavo. Vamala na vamala, valingile viuma via mazilo kaha va tambuile kasitiku kavo mu vutuntu kuliya na vupi vuavo.
28 Mu kulinga ka va tavele ku tantekeya Njambi, ngeci Njambi ua vecelele vakale na visinganieka vize ka tavesele, linga valinge viuma vize ka via pandele. 29 Va sulile na vilinga viose via vuhenge, na vupi, na kuliveyela viambala, vilinga via kuvihia, cipululu, kutsiha vantu, luozi, makuli, valema kuyandesa vakuavo na kupua vakua kufueya, 30 vakua kuhandeka vakuavo mua kuvihia, vakua kuzinda Njambi, vakua likamba, vakua ku lihalesa, vakua kulipamba, vakua ku sangumuka vupi, vakua lisino ku visemi vavo, 31 ka ve kuivuisisa, ka ve kupuisamo matavasiano, kavesi na cilemo, kaha kavesi na nkeke. 32 Vutuhu va tantekeya vuino lisiko lia Njambi lia kusungama, lize lia handeka ngualio, vakua kulinga evi viuma va na pande kutsa, kavesi na kutualelaho lika kuvi linga, vunoni naua ve kutavesa vaze veku vi linga.