Kuhitila Muli Yoano

11 Umo yala lizina liendi Lazalu, uakele na kuvavala. Yala uaco uapuile mukua Mbetaniya, limbo lia Maliya na ndumbuendi Mata. 2 Ou Maliya, ikeye vene uze ua muanyenene Muangana mazi a vueko vua cili ku viliato viendi, naku vi hunda na vinkambu viendi. Ou Lazalu uakele na kuvavala, uapuile muanaye. 3 Ngeci vandumbu va Lazalu va tumine muzimbu kuli Yesu nguavo: “Muangana, muntu iua lema ali na kuvavala.” 4 Vunoni Yesu mua vuile ngoco, ua handekele nguendi: “Vumanusuilo vuovu vuvezi kati kutsa, vunoni kuhana vumpahu kuli Njambi, linga Muana Njambi vamu zumbangeyeleho.”

5 Yesu ua lemene Mata na ndumbuendi, na Lazalu. 6 Vunoni omo uavuile nguavo Lazalu ali na kuvavala, ua vandamene naua matangua avali kuze kuakele. 7 Mu nima yaco, ua lekele vandongesi nguendi: “Tuyenu naua ku Yundeya.” 8 Vandongesi vamu lekele nguavo: “Lambi, vuovuno vene vaYundeya va na tondele kukuasa mavue, kaha kukekuo naua ku utonda kuya?” 9 Yesu uava kumbuluile nguendi: “Ku mutana kati kuakala viola 12 ni? Nga muntu enda mu mutana, ka suntsuka ha cuma na cimo cahi, muomu ali na kumona ceke ca ano mavu. 10 Vunoni nga muntu enda vutsiki, asuntsuka muomu kesi na ceke.”

11 Mu nima ya kuhandeka evi, ua vuezeleko naua nguendi: “Kavusamba ketu Lazalu na kosa, vunoni njiyako linga njika mu hindule.” 12 Vandongesi vendi vamu lekele nguavo: “Muangana, nga na kosa ni akala mua cili.” 13 Yesu uakele na kuhandeka via kutsa ca Lazalu. Vunoni vakevo va singaniekele nguavo ua handekele via tulo mpundu. 14 Ngeci Yesu uava lekele ha toma nguendi: “Lazalu natsi, 15 kaha nja viukilila omo lienu muomu ka nja keleko, linga mu tsiliele. Vunoni tuyenuko.” 16 Ngeci Tomasi iva sanene naua nguavo Mpasa, ua lekele vakuavo vandongesi nguendi: “Netu vene tuyenu, linga tu katse nendi.”

17 Yesu mua ka hetele, ua uanene ngecize Lazalu ali laza mu mbumbo matangua auana. 18 Mbetaniya yakele ha hiehi na Yelusalema, ntunda ya kupua 3 kilometru.* 19 Kaha vaYundeya vavengi vezile mu kumeneka Mata na Maliya muomu vatsisile muanaye. 20 Mata muavuile nguendi Yesu ali na kuiza, uaile mu kumu sesa. Vunoni Maliya ua tumamene ku ndzivo. 21 Mata ua lekele Yesu nguendi: “Muangana, nga una kele kuno, muanetu nga katsile. 22 Vunoni nambe hano vene, nji tantekeya nguange viose vi uvundila kuli Njambi, Njambi aku hanavio.” 23 Yesu uamu lekele nguendi: “Muanoko asanguka.” 24 Mata uamu kumbuluile nguendi: “Nja tantekeya nguange aka sanguka, ku cisangukilo ca ha litangua lia kumanusuila.” 25 Yesu uamu lekele nguendi: “Yange cisangukilo na muono. Uose anji tsiliela, ambe nga atsa, aka yoya naua. 26 Kaha uose uze ali na kuyoya, anji tsiliela, ka katsi. Nove utsiliela aa mezi ni?” 27 Uamu kumbuluile nguendi: “Eyo Muangana, nja tsiliela nguange yove u Kilistu, Muana Njambi, uze ivambele nguavo akeza ha mavu.” 28 Mata mua manusuile kuhandeka evi, uaka sanene ndumbuendi Maliya, kaha uamu lekele kua likaliendi nguendi: “Mulongisi neza, ali naku kusana.” 29 Maliya muavuile ngoco, ua katukile vuasi-vuasi na kuya kuli ikeye.

30 Ha ntsimbu eyi, Yesu tele kanda aci kovele muimbo, vunoni uaci kele kuze kua ka mu uanene Mata. 31 VaYundeya vakele mu ndzivo mu ku lembezieka Maliya, omo vamu muene na katuka vuasi-vuasi na kutuhuka, vamu kavele, muomu va singaniekele nguavo halumo ali na kuya ku mbumbo linga aka lilileko. 32 Maliya ua hetele kuze kuakele Yesu, ngeci mua muene Yesu uamu tsikamenene ku mikono, naku muleka nguendi: “Muangana, nga una kele kuno, muanetu nga katsile.” 33 Yesu mua muene Maliya alila na vaYundeya vaze vezile nendi valila, ua pokokele mutima* kaha ua vuile vusiua. 34 Ua vehuile nguendi: “Kulihi mu namu haka?” Vamu kumbuluile nguavo: “Muangana, tuaya umone.” 35 Yesu ua lilile. 36 Ngeci vaYundeya va putukile kuhandeka nguavo: “Talenu mua mu lemene!” 37 Vunoni vamo va handekele nguavo: “Ou yala nemuisile meso a uze kapuputa, vika kohielele Lazalu ku kutsa?”

38 Yesu ua lisimuokele naua kaha uaile ku mbumbo. Mbumbo yaco, yapuile ya ku cokovola mu livue kaha va silikileko livue. 39 Yesu ua handekele nguendi: “Tundiseniko livue.” Vunoni Mata ndumbu ya mutsi uamu lekele nguendi: “Muangana, citava ali honi na kunika, muomu mu na hiti matangua auana.” 40 Yesu uamu kumbuluile nguendi: “Kanja ku lekele nguange nga utsiliela umona vumpahu vua Njambi ni?” 41 Ngeci va tundisileko livue. Kaha Yesu uanduile meso endi muilu na kuhandeka nguendi: “Tata, nji kusantsela muomu una njivu. 42 Mua vusunga, nja tantekeya nguange ueku njivua ntsimbu yose. Vunoni nja handekamo omo lia mbunga inemana kuno, linga va tsiliele nguavo yove uanji tumine.” 43 Mu nima ya kuhandeka evi, ua tambakanene nguendi: “Lazalu, tuhuka!” 44 Uze muntu uatsile, ua tuhukilemo oku va namu zenge vintanga ku mikono naku mavoko, naku meso endi va zengeleko ntanga. Ngeci Yesu uava lekele nguendi: “Mu zengununenu aye.”

45 Ngeci vaYundeya vavengi vaze vaile mu kumeneka Maliya mu va muene via lingile Yesu, vamu tsilielele. 46 Vunoni vamo vaile kuli vaFaliseu naku va leka viuma via lingile Yesu. 47 Kaha vakuluntu va vasasendote na vaFaliseu, va kunguluile Mpunga na kuhandeka nguavo: “Vati tu linga? Muomu ou yala ali na kulinga vitantekeyeso viavingi. 48 Nga tu muecelela vene ngeci, vantu vose vamu tsiliela, kaha vakua Loma va keza na kutambula cihela* cetu na muyati uetu.” 49 Vunoni umo uavo, Kayafase, uze uapuile sasendote ua kama mu muaka uze, uava lekele nguendi: “Enu kamu tantekeya na vimo viahi, 50 kaha ka mua nongonuene nguenu, ca cili kuli yenu muntu umo atsile vantu, ku tuvakana muyati uose unonge.” 51 Evi via handekele, ka viapuile via ku lisinganiekela, houe, vunoni mu kulinga uapuile sasendote ua kama mu muaka uze, ua polofetele ngecize, Yesu aka tsila uze muyati. 52 Kaha kati lika uze muyati, vunoni naku kungulula hamo vana va Njambi vaze va lisanduoka. 53 Ngeci tunde ha litangua lize, va lizivasanene nguavo vamu tsiha.

54 Ngeci Yesu kendele naua mutana muelu, hakati ka vaYundeya. Vunoni ua tundile kuze na kuya ku cimo cihela cakele ku hiehi na likango, mu mbonge iva sanene nguavo Efalimi, kaha uakele kuze na vandongesi vendi. 55 Paskua ya vaYundeya yakele mu hiehi, kaha ntsimbu Paskua kanda ihete, vantu vavengi mu membo va kandukile ku Yelusalema linga vaka lilelese kuliya na cisemua. 56 Vakele na kutonda-tonda Yesu, kaha vakele na kulihula umo na mukuavo oku va nemana mu tembele nguavo: “Mu kumona cenu, vuno kezako kuno ku cilika ni?” 57 Kaha vakuluntu va vasasendote na vaFaliseu va hanene lisiko nguavo, nga umo atantekeya kuali Yesu, ava leke linga vamu kuate.