Kuhitila Muli Mako

6 Yesu mua tundile kuze kuakele, ua kovelele muimbo liendi kaha vandongesi vendi vamu kavele. 2 Mu lia hetele lia Sapalalo, ua putukile kulongesa mu sinangonga kaha cingi ca vaze vakele naku mu halakana va likomokelele mua kama na kuhandeka nguavo: “Ou yala kuiko na uana evi? Vika va namu hanena mana a kufua ngeci? Kaha vati ali na kuhasa kupuisamo evi vipanga via ku komouesa? 3 Kati ikeye ou mukua kusonga, muana Maliya kaha vantsongo vendi Tiango, Yosefe, Yunda na Simone ni vati? Kaha vandumbuendi kati vano vatuli navo?” Ngeci va putukile kusuntsuka omo liendi. 4 Vunoni Yesu uava lekele nguendi: “Kapolofeto ka veku mu singimika muimbo liendi ni vavusoko vendi ni ambe mu ndzivo yendi.” 5 Ngeci ka lingile naua vikomoueso mu mbonge yaco, vunoni ua salekele lika mavoko vamo vavezi naku va kanguisa. 6 Mua vusunga, Yesu ua likomokelele mua kama mua muene nguendi ka vakele na lutsilielo. Kaha uaile na kulizenga mu membo ose akele muyehi mu kulongesa vantu.

7 Kaha Yesu ua sanene vaze 12 na kuputuka ku va tuma vavali vavali, kaha uava hanene mpoko ya kutundisa va sipilitu va kuzuala. 8 Cikuavo naua, uava sikile nguendi kati vambate na vimo viahi mu vungendzi vuavo, vunoni vambate lika mulamu. Kati vambate mbolo cipue cipete ca viakulia, ni vimbongo ku miva yavo.* 9 Uava lekele naua va zale lika vinkaku kaha kati va zale vikovelo vivali. 10 Uava lekele naua nguendi: “Mu ndzivo yose-oyo imu kovela, kalenumo noho ha muka tundila ku cihela caco. 11 Kuose-oko ku va viana kumi tambula ni kumi halakana, omo mu tundako, totomonenu ku viliato vienu, linga vupue vukaleho kuli vakevo.” 12 Ngeci vaile na kuambuluila vantu nguavo va pande kualuluka, 13 kaha va tundisile vandemone vavengi na kukuita mazi ku vakua kuvavala vavengi naku va kanguisa.

14 Muangana Helonde uavuile evi viuma, muomu lizina lia Yesu lia tsimanene mua kama kaha vantu vakele naku handeka nguavo: “Ou Yoano Mukua Kumbatiza, va namu sangula ku vatsi ngeci ali na kuhasa kulinga vikomoueso via kama.” 15 Vunoni vamo vakele na kuhandeka nguavo: “Eliya.” Vakuavo co nguavo: “Kapolofeto ngeci mua umo ua vapolofeto va ku laza.” 16 Vunoni Helonde muavuile ngoco, ua handekele nguendi: “Yoano inja tapele mutue, ikeye iva na sangula.” 17 Helonde ua handekelemo muomu ikeye ua tumine vaka kuate Yoano naku mu soka mu kamenga, omo lia Helondiya mpuevo ya muanaye Filipu yambatele. 18 Muomu Yoano uakele na kuleka Helonde nguendi: “Kuliya na masiko, ka ua pandele kuambata mpuevo ya muanoko.” 19 Omo liaco, Helondiya uavuilile Yoano nkulundundu ngeci ua lihalelele kumu tsiha, vunoni ka hasele kulingamo. 20 Helonde uakele na liova lia Yoano, muomu ua tantekeyele nguendi uapuile yala ua vuoloke kaha ua kulela, ngeci uakele naku mu niunga vuino. Ntsimbu yose yakele naku mu halakana, Helonde ka tantekeyele via kulinga. Vutuhu ngoco, ua tualeleho kumu halakana na ndzolela.

21 Vunoni mu lia hetele litangua lia kuvuluka kusemuka ca Helonde, ikeye ua lingile cilika, na kulania vamiata vendi, vakuluntu va masualale, kaha na vamala vakua vukama vamu Ngalileya. 22 Kaha muana Helondiya ua mpuevo, ua kovelele na kukina, kaha uavuisile Helonde ndzolela hamolika na vaze vakele na kulia nendi. Kaha muangana ua lekele uze muanampuevo nguendi: “Pinga viose-ovio viu na zange, nji kuhanavio.” 23 Eyo, ua lisingile vene nguendi: “Viose-ovio vi upinga nji kuhanavio, ambe vene mutamba ua vuangana vuange.” 24 Ngeci uze muanampuevo ua tuhukile naku kehula naye nguendi: “Njika pinge vika?” Naye uamu kumbuluile nguendi: “Mutue ua Yoano Mukua Kumbatiza.” 25 Haze vene, ua tuntilile mukati muze muakele muangana, kaha uamu pingile nguendi: “Hano vene, nji tonda unji hane mutue ua Yoano Mukua Kumbatiza ha lilonga.” 26 Vutuhu muangana ua liveyele mua kama, vunoni ua hele uze muanampuevo via mu pingile, omo lia cisingo ca lingile kaha nomo lia vangendzi vendi. 27 Haze vene, muangana ua tumine umo ua masualale vakua kumu niunga, anehe mutue ua Yoano. Ngeci uaile mu kamenga naku kamu tapa mutue, 28 kaha ua unehele ha lilonga. Uahele mutue uaco kuli muanampuevo, kaha muanampuevo ua uhele kuli naye. 29 Omo vandongesi va Yoano va vivuile, vaile naku kambata muvila uendi, ngeci vaka utsindile.

30 Kaha vapostolo va likunguluile kuli Yesu, naku muleka viuma viose viva lingile na kulongesa. 31 Ngeci Yesu uava lekele nguendi: “Tuyenu kua likalietu, linga tu ka huimeko kavundende.” Muomu vantu vavengi vakele na kuiza na kuya kaha ka va uanene ambe vene ntsimbu ya kuhuima ni ya kulia. 32 Kaha va londele mu vuato na kuya ku cihela ca kuholoka, linga vaka kale kua likaliavo. 33 Vunoni vantu vava muene mu vakele na kuya, ngeci vavengi vavi tantekeyele. Kaha vantu vamu vimbonge viose va tuntilileko ha mikono, vaka livangele kuheta. 34 Mua ka sulukile mu vuato, ua muene mbunga ya kama ya vantu, ngeci ua vavuilile ngozi, muomu vapuile ngue vampanga kavesi na kaniungi. Kaha ua putukile ku va longesa viuma viavingi.

35 Tele kuya na kutoka, vandongesi vendi vezile kuli ikeye naku muleka nguavo: “Tuli ku lahako na membo kaha kuli na kutoka. 36 Vecele vaye muaya membo na mehia vaka lilandele viakulia.” 37 Kaha Yesu uava kumbuluile nguendi: “Va hanenu yenu viakulia.” Ngeci va muihuile nguavo: “Tu ka lande mbolo ya 200* linga tua ku va hane valie ni?” 38 Ua vehuile nguendi: “Vimbolo vingahi muli navio? Yenu muka vitale.” Mu nima ya kuvitala, vamu kumbuluile nguavo: “Vimbolo vitanu na vantsi vavali.” 39 Kaha ua lekele ize mbunga itumame ha muila mu tuvivunga. 40 Ngeci va tumamene mu tuvivunga tua vantu 100 na 50. 41 Ua nonene vize vimbolo vitanu na vantsi vavali, kaha ua talele muilu na kuvundila. Mu nima yaco, ua munguile vimbolo naku vihana ku vandongesi vendi, linga vakevo co va pangele mbunga. Kaha uava tepelele naua vaze vantsi vavali. 42 Ngeci vose valile, vekutile. 43 Kaha va kunguluile visupo viose na kusulisa vihele 12 ku tundisako vantsi. 44 Kaha vose valile mbolo, vapuile vamala 5.000.

45 Haze vene, ua lekele vandongesi vendi va kovele mu vuato linga va tuame mu sinia ku talekesa ku Mbetesainda ntsimbu ikeye aci lisalesa na mbunga. 46 Mu nima ya ku lisalesa na mbunga, uaile ha muncinda mu kuvundila. 47 Mu kua tokele, vuato vuakele hakati ka cisali, vunoni Yesu uakele likaliendi ha ntunda. 48 Ngeci mua muene vandongesi vendi vali na kupinda, omo lia luhundzi lua kele naku hungumuna vuato, uaile kuli vakevo ha cilo* ca mu ciuana oku enda helu lia mema. Vunoni ua lingile ngue ava tuvakana. 49 Vandongesi mu vamu muene ali na kuenda helu lia mema, va singaniekele nguavo: “Ciyovo eci!” Ngeci va putukile ku litetela. 50 Muomu vose vamu muene kaha vavuile liova. Vunoni haze vene Yesu uava lekele nguendi: “Simpenu! Yange vene, kati muivue liova.” 51 Kaha ua kovelele mu vuato mu vakele, ngeci ize mpundzi ya likelele. Kaha vandongesi va likomokelele mua kama, 52 muomu cikomoueso ca mbolo tele kanda ci va lumbunuke, cikuavo naua, tele kanda vaci kale na mitima ya kuivuisisa.

53 Mu va zavukile, vaka hetele ku Ngenezaleta kaha va kutiyile vuato vuavo kuhiehi na ntunda. 54 Vunoni mu va tundile ngeci mu vuato, vantu vamu nongonuene. 55 Kaha va tuntilile muaya membo ose, va putukile kuambatela vakua kuvavala ha vipoya naku va tuala kuze ku vavuile nguavo kukekuo kuali Yesu. 56 Mu membo ose muaile, mu vimbonge naku mehia, vakele naku mu nehela vakua kuvavala ha vitanda, kaha vamu lambelele linga va kuate lika ambe ku ntsongo ya vuzalo vuendi kaha vose va lingilemo, va kangukile.