Vilinga Via Vapostolo
18 Mu nima yevi, Paulu ua tundile ku Atena na kuya ku Kolintu. 2 Kaha ua uanene umo kaYundeya ua ku Pontu, lizina liendi Akuila. Ou kaYundeya uaco, tele aci tunda ku Italia hamo na mpueyendi Pilisila, muomu Kalaundiu ua tumine vaYundeya vose va tunde mu Loma, ngeci Paulu uaile mu ku va meneka. 3 Mu kulinga cipanga cavo capuile cimo, ngeci uakele ku ndzivo yavo kaha va pangelele hamo, muomu vapuile vakua kutunga vimbalaka.* 4 Sapalalo ku sapalalo, Paulu uakele na kulinga cimpande mu sinangonga kaha uakele na kukokueya vaYundeya na vaNgelengu.
5 Vunoni omo Silase na Timoteu vatundile ku Masendonia, Paulu ua lihanene mu vutuntu mu kuambulula lizi, kaha uakele na kuhana vukaleho ku vaYundeya na kumuesa ha toma nguendi, Yesu ikeye Kilistu. 6 Vunoni omo va tualeleho ku mu viana naku mu sahula, ua kukumuine vizalo viendi naku va leka nguendi: “Maninga enu akale ha mitue yenu vavenya, yange nji na sambue.* Kutunda hano, njiya ku vakua vifuti.” 7 Ngeci ua tundileko kaha uaka kovelele mu ndzivo ya umo yala, lizina liendi Tisiu Yustu, mukua ku lemesa Njambi; ndzivo yendi ya lihatele na sinangonga. 8 Kaha Kilispu uze uapuile ntuamena ua sinangonga, ua tsilielele muli Muangana hamolika na vakua ndzivo yendi vose. Kaha vakua Kolintu vavengi vaze va halakanene lizi, navo va tsilielele kaha vava mbatizile. 9 Cikuavo naua, ku vutsiki Muangana ua handekele na Paulu nguendi: “Kati uivue liova, vunoni tualelaho kuambulula, kati u holoke, 10 muomu njili nove kaha na umo uahi aka ku vulumuna. Njili na vantu vavengi mu mbonge ino.” 11 Ngeci ua tualeleho kukala kuze muaka umo na vingonde 6, mu ku longesa lizi lia Njambi hakati kavo.
12 Kaha capuile ngecize, omo Ngaliu uapuile nguvulu ku Akaya, vaYundeya va kungulukilile Paulu naku mu kuata kaha va mu tualele ku citumamo ca ku sompesela. 13 Kaha va handekele nguavo: “Ou yala ali naku songangeya vantu va lemese Njambi mu njila ize ya lihilika na masiko etu.” 14 Vunoni omo Paulu ua tondele ku handeka, Ngaliu ua lekele vaYundeya nguendi: “Nga ou yala na lingile viuma via kuvihia ni mulonga ua kama, nga nji na tualelaho ku mi halakana. 15 Vunoni mu kulinga cinapu kulihoya kutuala ha mezi, ha mazina na masiko enu, vitalenu enu vavenya, ka nji tondo kupua ngazi ua viuma viaco.” 16 Ngeci uava sekuile ku citumamo cendi ca ku sompesela. 17 Ngeci vantu vose va kuatele Sostene ntuamena ua sinangonga na kuputuka ku mu pupila ha lutue lua citumamo ca ku sompesela. Vunoni Ngaliu, ka tondele kulihaka mu vimpande viaco.
18 Mu nima ya kukala kuze matangua a engi, Paulo ua salesele vamuanetu kaha uaile ku Silia na mbapolo hamolika na Pilisila na Akuila. Muakele ku Senkili, ua tehuile vinkambu viendi omo lia imo nkuminyo ya lingile. 19 Mu va hetele ku Efesu, Paulo uasile Pilisila na Akuila kaha uaka kovelele mu sinangonga naku simutuila na vaYundeya. 20 Vutuhu va mu pingile nguavo aci kale navo mu ntsimbu ya kama vunoni ikeye ka tavele. 21 Uava salesele naku va leka nguendi: “Nga Yehova* na tava, njika hiluka naua.” Kaha ua tundile ku Efesu na mbapolo 22 naku sikuluka ku Sesaliya. Kaha uaile ku ka meneka cikungulukilo, kutundaho uaile* ku Antioka.
23 Mu nima ya kukalako imo ntsimbu, ua katukile na kuya. Kaha ua hitanganene muaya Ngalata na Silingia yose mu ku kanyamesa vandongesi vose.
24 Kaha umo kaYundeya, ua kusemukila ku Alesandeliya, lizina liendi Apolo, uezile ku Efesu. Uapuile mukua ku handeka na ndzandzu kaha ua tantekeyele muacili Visoneka. 25 Yala uaco, va mu longesele via njila ya Yehova. Mu kulinga uakele na ntuima ya sipilitu, uakele naku handeka naku longesa via Yesu mua kusungama, vunoni ua tantekeyele lika via mbatizimu ya Yoano. 26 Ua putukile kuambulula na kusimpa cose mu sinangonga, kaha omo Pilisila na Akuila va mu vuile, va mu sanene kua likaliavo na kuya nendi kaha va mu lumbunuinine vuino njila ya Njambi. 27 Cikuavo naua, mu kulinga Apolo ua tondele kuya ku Akaya, vamuanetu va sonekelele vandongesi mukanda nguavo va mu tambule vuino. Mua ka heteleko, ua kuasele mua kama vaze va tsilielele omo lia ngozi ya kama ya Njambi. 28 Na kapandi kose, ua soluele ha toma ku mbunga nguendi, vaYundeya va na sevuka, oku ava muesa mu Visoneka nguendi, Yesu ikeye vene Kilistu.